3
Ingkartel anwenhantherrenh itethilek Christ-angkwarr
Ingkartel arrenhantherrenh itethilek, Jesus Christ-angkwarr. Arrantherr-anem Ingkart-kenh-angkwarr anterr iterretyek, Ingkart-kenh apmerek iterretyek. Christ ra Akngey-itwel aneyel. Arrantherr-anem anterr iterretyek irrwerl-areny-kenh-angkwarr, ahern-areny-kenh-angkwarr-weny. Arrantherr ahern-areny-wety ywerrek-apeny, Christ-kenh-angkwarr anyentirremel. Arrantherr innganem Christ-angkwarr intem-antey iteth aney-alpeyenh. Ahern-arenyel arey-angenh, Ingkartelant areyel. Ingwer-inger Jesus Christ ra apey-alpeyenh rlterrk innga. Ikwer-penh ingwerel-rnem arrenhantherrenh areyenh rlterrk innganem.
Alakenh-anyem arrantherr ahern-arenyek inkwerelhey-angenh. Arrantherr apmwangkwarr alheyel-rnemek inkwerelhey-angenh. Arwa alhewer ingwer alwernirrey-angenh anternetyek, apmwangkwarr iterrey-angenh. Ampwal ingwer-kenhek iterrey-angenh inetyek. Alakenh-anyem Ingkart-kenh-angkwarr irrtywerreyelarl. Apmwangkwarr alheyel-rnemek Ingkart ahelirreyel. Awank-akerr arrantherr apmwangkwarrant apentenh. Aleyan arrantherr apmwangkwarr apentey-angenh. Ingwer-rnemek ahelirrey-angenh, iltey-angenh, irrentey-angenh anetyek. Arrantherr apmwekety ipmelhek. Arrantherr ingwerek irrtywerrey-angenh. 10 Arrantherr kel rlengkeny-anem, Jesus-kenh-angkwarr. Ingkartel arrenhantherrenh intem-antey akalty-antheyel, rapeny-anem irretyek, akalty innga irretyek. 11 Ingkart-kenh-angkwarran arrantherr ingkerr mwerrarl aneyel, apmer ingkerrenh-areny, Jew-rnem-then ingkerrenh, Jew-weny-rnem-then, apmwangkwarr alheyel-rnem-then, warrkenh-rnem-then atyetyart-rnem-then. Mwerrarl anem, anwantherr ikwer-warl anyentirrekarl. Christ ra anwekantherr-itwel aneyel.
12 Ingkart arrekantherr ilkelheyel ingkerrenhek. Alakenh ra iwerr mpwarek ingkerrenhek arrwekel-antey, ingkerrenhel renh arraty-angkwarr apentetyek, rernem ingwer-rnemek amperrngirretyek atwey-angenh, rernem tnakelhey-angenh ingkerrenh mwerrant-arey anetyek. 13 Arrantherr iparrp anamerl ahelirrey-angenh. Ingkart-areny ingwerel arrenhantherrenh iltenty, arrantherr renh ilteyney-angenh. Kel menty renh atwey-angenh, Christ-el arrenhantherrenh menty atwey-angenh-apeny. 14 Kel mwerrant-arey ingkerrenhek anetyek. Ikwer-penh arrantherr anyent-apeny anem.
15 Arrantherr ingkerrenh arlka anyent-apeny aneyel, Jesus Christ-kenh. Christ-el arrenhantherrenh ayerrpilek, mwerrant-arey ingkerr inkwerelhetyek. Mwerrant-arey atwerrey-angenh anayntetyek, Ingkart ikwer inkwerelhemel. 16 Christ-kenh angkek iterretyek, arraty akaltyel ingwer-rnem akalty-anthayntetyek, mwerr ilelhemel. Arrantherr aylelhey-angker, psalm-then aylelh-ayntetyek, Ingkartek inkwerelhetyek. 17 Arrantherr angkerretyek Ingkart-kenh-angkwarr, arrantherr intem-antey Ingkart Jesus-ek iterretyek, Ingkart Akngeyek inkwerelhemel, Jesus-kenh-angkwarr.
18 Arelh-rnem, artwek awelh-ayntetyek. Alakenh Ingkart-kenh-angkwarr arraty aneyel.
19 Artwernem, arrantherr anew-rnem mwerr arntarnt-arayntetyek. Arrantherr renh-rnem atwey-angenh.
20 Ampernem, arrantherr aleth amekengkw aynekengkw awelh-ayntetyek, Ingkartarl ilkelheyel-angkwarr. Ingkart-kenh-angkwarr alakenh aynteyel.
21 Aynikw-rnem, arrantherr ampernem irrentey-angenh, rernem antwerr alhekerr.
22 Warrkenh-rnem, arrantherr atyetyart-rnemek awelh-ayntetyek intem-antey, rernem arrenhantherrenh areyel-angkwarr, rernem arrenhantherrenh arey-angenh apal aneyel-angkwarr. Ingkartel areyel. Ingkartek mwerr warrkirr-ayntetyek. 23 Arrantherr iylpareth iytekerr-antey atnwentirrey-angenh warrkirretyek Ingkartek, ahern-arenyek warrkirrey-angenh. 24 Arrantherr kel akalty, Ingkart rarrp arrenhantherrenh ilek-ilek antheyenh apmer ikwerenh-itwek. Arrantherr Ingkart Christ ikwer warrkirrey-alpeyenh. 25 Ingkart anyentekant ilkelhey-angenh, ingkerrenhek ilkelherl-ayntetyek. Ingkartel ingkerrenh arraty tyatyemileyel.