4
Anwantherr Akngey-kenh alerikwant-anem aneyel
Apmerek-artwey rernem apmer atnyeneyel. Ampa akely-rnem alerl-antey ilkwerrentyant-anem rernem apmer atnyeneyenh, apmerek-artwey. Rernem alerl-antey mpwelheyenh. Artwa ampwel-rnem renh-rnem-tangkwel akalty-anthem, amangkem-anem. Akely-penh ilkwerrentyelant-anem rernem apmerek-artwey irreman. Ampapenyarl anwantherr awankarl anenh akwerrp, ingkart-arrpantey ingwer-rnemant apentenh. Arlta ikwerenhel, Akngeyel alerikw ikwerenh ahern nhenh-warl thwenek, rarl arrwekel awank-akerr alhelek, renh thwenetyek. Akngey-kenh alerikw irrkngarl-anem ayntek, ra Jew-kenh-angkwarr arraty apentenh. Anwantherrarl Jew-rnem-kenh-angkwarrant apentenh, ra alerikw ikwerenh thwenek, anwenhantherr itethiletyek, Akngey-angkwarrant arraty apenterl-ayntetyek. Akngey-kenh alerikw-rnem arrpemarl anwantherr aneyenh. Anwantherr kel Akngey-kenh alerikw aneyel. Ra Itnweng anwekantherr-warl thwenek, anwekantherr-itwek kwen anayntetyek. Anwantherr renh Akngey akem, rarl Itnwengel anwenhantherr akalty-antheyel-angkwarr. Arrantherr kel alerikw ikwerenh-rnem aneyel, Jew-kenh-angkwarr arrangkwarl. Arrantherr Akngey-kenh alerikw-rnem, arrantherr apmer ikwerenhel aney-alpeyenh.
Paul Galatia-areny-rnemek amperrngirreyel
Arrwekel arrantherr apatemel anenh, ingkart-arrpantey-rnemant apentenh. Arrantherr ingkerrenhel Akngey iterl-areyel, rarl arrenhantherr atnyeneyel. Nthakenh arrantherr angkepirretyek iterreyel, ingkart-arrpantey irrtywerreyelarl ilenh-rnem-warl? 10 Arrantherr ilkelheyel Moses-kenh-warl anyentirretyek, arlta arrpanenhel, alkent arrpanenhel, aherrety arrpanenhel. 11 Atha arrenhantherr ywarn-antey akalty-anthek, arrantherr atyeng awelhetyek-arrpantey. 12 Atyenh-rnem, Jew-kenh-angkwarr apentey-angenh. Arrantherr ayenh apmwewarliley-angenh, arrantherr atyeng iylpareth awelhenh. 13 Arrantherr kel akalty. Awank-akerrarl ayeng arntety anenharl, atharl arrekantherr angka mwerr-angker renh akalty-anthek. 14-15 Arrantherr atyeng iterrenh, Akngey-kenh warrkenh-weny-arrpantey, ayengarl aleth arntetyirrenhek. Arrantherr ayenh arek-penh, arrantherr atyeng irrpelthirrey-angenh. Arrwekelan arrantherr atyeng inkwerelhek-tangkwel! Arrantherr atyeng inkwerelhek angel-ek inkwerelheyel-apeny, Jesus Christ-ek inkwerelheyel-apeny. Aleyan arrantherr atyengety arlkarirreyel-anem. 16 Angka atha arrekantherr ileyel arraty. Arrantherr atyeng awelhey-angenh. Arrantherr atyengety arlkarirreyel. 17 Atyengety Jew-kenh-angkwarr apenteyel-rnem rernem arrenhantherr ilpertiletyek arrkernelheyel, ikwer-rnem-angkwarr apentetyek. 18 Arrantherr Jesus-kenh angkek inkwerelhek arrwekel, arrantherr-anem ingwer-angkwarr apenteyel, ament-anem. 19 Ayeng arrekantherr artewentyel iterreyel, Jesus Christ arrantherr arraty tnaketyek, ikwer inkwerelhetyek. 20 Ayeng ilkelheyel ayeng arrekantherr-warl alhetyek, ayeng arrekantherr-itwek angketyek. Ayeng arrekantherr artewentyel iterreyel, amperrngirremel.
Hagar Sarah atherr
21 Ingwer-rnem ilkelheyel, Moses-kenh angka apenterl-ayntetyek. 22 Akngey-kenh angka alakenh aynteyel. Abraham-kenh alerikw awey atherr anenh. Arelh warrkenh-kenh awey anyent anenh. Awey ingweran apmerek-artwey-kenharl anenh. 23 Awey anyentan warrkenh-kenh, apmwamwamarl Hagar-kenharl. Ingweran Sarah-kenh, Akngeyelan anthek, ra arrwekel alhelekarl. 24-25 Arelh ingwerant-atherrarl anayntileyel. Arelh warrkenh anyent, Sinai-areny Hagar arlarl anenh, apmerek arrangkw. Jew-kenh-angkwarr apenteyel-rnem rernem ahern-areny-angkwarr apenteyel, Jew-kenh-angkwarrant. 26 Arelh ingweran, Sarah mwerr-angkwarr apentenh, Ingkart arraty-angkwarr apenteyel-rnem-apenyarl, alker irrwerl-areny-rnemelarl apenteyel-apenyarl. 27 Alakenh angka anayntileyel. “Arelh anyent ampek arrangkw. Ra inkwerelheyel, Akngeyelarl renh alhelek ikwer-they ampa akngerram-akngerrirreyenh, arelh ingwer-rnem-angkwarr.” 28 Isaac anenh, Akngeyelarl Abraham renh-tangkwel arrwekel alhelek-angkwarr. Atyenh-rnem, alakenh-apeny arrantherr Akngey-kenh alerikw arrpemarl aneyel, Akngeyelarl arrwekel alhelek arrantherr ikwerenh-rnem anetyek arrpemarl. 29 Abraham-kenh alerikw ingweran Ishmael, awey arlarl ilenhel irrwernek Isaac, awey alhelenty renh, Akngey-kenh Itnwengelarl renh anthek, Akngey-angkwarr ra anetyek. Aley-anyem Akngey-angkwarr aneyel-rneman alwernemel irrwerneyel arrpemarl. 30 Akngey-kenh angka arrwekeleny arrwekel aynteyel, amenheng-atherr Hagar atherr arlarl, ratherr apmerek-artwey-weny arrangkw. Renh-atherr irrenta! Amenheng ingwer-atherran Sarah-then Isaac atherr ratherrantarl apmer atnyenetyek. 31 Anwantherr arelh anyent Sarah mwerr-angkwarr apentetyek, arelh warrkenh Hagar apentey-angenh, mentyarl. Alakenh anayntileyel. Akngeyelarl arrwekel alhelek, anwantherr ikwerenh-rnem anayntetyek. Anwantherr mwerr ilenh-angkwarr apentetyek.