28
1 Isaac Jacob-ek arlkek, renh rlterrkel iletyek. Ra mwerr angkek ikwer, renh rlterrkiletyek. Ra Jacob renh ilek, “Arelh Canaan-areny-rnem itengirrey-angenh. Kel menty-anem renh-rnem ipma!
2 Artartey ngkwenh-kenh apmer-warl alha, Bethuel-warl, apmer Syria-ampeny, apmer Paddam Aran. Apmarlengkw ngkwenh-itwek anew ntwa ikngwetyek, apmarlengkw ngkwenh-kenh alerikw.
3 Ayeng Akngey-warl angkey, ra ngenh rlterrkiletyek, ampa ngkwenh-rnem akngerrirretyek.
4 Nga apmer ikwer-itwek anayntetyek, Akngeyel Abraham renh anthek-itwek, anwantherr aneyelan alethang-rnemarl. Akngeyel Abraham renh alhelek, apmer renh anthetyek, Ngan arwa alethangarl aney-alhek.” ...
Jacob ra altyerr areyel
10 ... Jacob anperl-alhek apmer Beersheba-they apmer Haran-warl.
11 Atwerrp-anem, ingkeny aylperl-alhekan. Apwert rtemal arrernek. Rap ankwanem ayntek.
12 Rap altyerr arek. Angel-rnem ladder ikwerel angkepelarreng alhenh.
13 Alkerel irrwerl Akngey ra rtnenh. Ra angkek, “Ayeng INGKART ra, Akngey arrengengkw ngkwenh-kenh, Abraham-kenh, INGKART Akngey ngkwenh-kenh, Isaac-kenh. Apmer nhenhan ngan aynteyelan, atha ngkwenh-rnemek antheyenh.
14 Rernem arlperrtyirreyenh, amentew-ament irremel.
15 Atha ngenh apmer nhewarl akngey-alpem. Ayeng ngkweng ilkwatherr alhem. Atha ngenh arntarnt-aretyek intem-antey, nthakenh ngenh ipmey-angenh. Atha ngenh anthem, atharl ngenh alhelek-angkwarr.”
16 Jacob akemirrenhey-alpek, “INGKART wenh apmer nhel aneyel! Atha iterl-arey-angenharl! Iwerr altywer alker-warl-athek!”
17 Ra aterirrek, “Apmer nhenh aknganenty! Nhenh apekan Akngey-kenh apmerelarl ayeng aynteyel!”
18 Ra apwert rtemal renh arrernek Akngeyek, anterel apernemel.
19 Ra apmer renh itnewek Bethel, Luz-tangkwel arrwekel-antey itna ra ayntenh. Ra angkek, “Akngey nhel-antey aneyel!”
20 Ra Akngey ilek, “Ntwa ayenh arntarnt-arem, amern-then arnkwethen anthem,
21 ntwa ayenh iteth-antey akngey-alpenty, ayeng ngkweng awelhem. Nga INGKART atyenh aneyenh.
22 Apmer nhan apmer ngkwenhan. Atha ngenh tyenkerr anthem.”