3
Artwethen arelh-then apmwelheleyel
1 Rtnwem anyent anenh Akngey INGKARTelarl arnwarnek, irrtywerremel apmwangkwarr iley-angker. Apmwarlap ran atnwenth ingkerrenh-angkwarr. Arlta anyentel ra alhek arelh-warl. Ra ayernek, “Mpwelenhanth apek ilek Akngeyel, arwerl anyent-penh mpwelanth amern arlkwey-angenharl wenh, mentyarl aretyek?”
2 Arelh ra angkek, “Akngeyel ilek, ‘Arwerl ingwer-rnem-penhant arlkwetyek.
3 Arwerl anyent-penh nthakenh mpwelanth amern akey-angenh amern-angketyarr ampep-itwek. Mpwelanth arwerl ikwer-penh arlkwenty, mpwelanth ilwemarl.’ ”
4 Rtnwem ra irrtywerremel ilek, “Mpwelanth nthakenh ilwey-angenh arwerl ikwer-penh amern arlkwenty.
5 Akngey akalty, arlta ikwerel mpwelanth amern arlkwenty, Akngey rapeny mpwelanth anem, akalty-anem, apmwangkwarr-then mwerr-angkwarr-then.”
6 Arelh ra amern renh arek. Amern ra mwerr-angker innga. Ra ilkelhenh, amern arlkwenty-penh Akngey rapeny akalty-anem anetyek. Amern renh akek, arlkwemel-anem. Arelh ra artwanem anthek, ratherr atherrel-antey arlkwek amern renh.
7 Ratherr iterl-arek ratherrarl Akngeyek awelhey-angenh. Angath-antey ratherr apmwelhelekan. Ratherr iterl-arelhek-anem, ratherr arnkweweny-anem anenh. Arwerl tywerrk aylpepenh ratherr arnkwa atanthenh pweytilemel, aylpemel-anem. Artelhenh-anem ratherr.
8 Ikwer-penhan alherrp ratherr awek, amern-angketyarr ikwer-itwek Akngeyarl alhenh. Ratherr aterirremel arwerlel arlengkewelhek Akngey ikwerety.
9 Akngey INGKART artwa ikwer arlkek, “Nthenh-angkwarr nga?”
10 Artwel renh ilek, “Ayeng arnkweweny arlengkewelhek ngkwengety, nyerr-anem irrek.”
11 Akngey INGKART angkek, “Nthakenh mpwelanth iterl-arelhek, mpwelanth arnkweweny anenhan? Ntwa amern-angketyarr ampep-itwek arwerl anyent-penh arlkwek apek?”
12 Artwa ra angkek, “Arelhel amern akek, rap ayenh-anem anthek, athanem arlkwetyek, arelh yanhel ntwarl ayenh anthekarl.”
13 Akngey INGKARTel arelh renh ayernek, “Arwerl ilek-penh ntwa arlkwek?” Arelh ra angkek, “Rtnwemel ayenh irrtywerl-ampernek wenh! Ikwer-penh atharl arlkwek.”
14 Akngey INGKARTel rtnwem renh ilek, Ntwa arelh renh irrtywerl-ampernek-penh, nga atnertel artnerrerl-apem ahern-penh arlkwerl-aperl-anem. Atha ngenh anyent apmwewarlilem intem-antey.
15 “Arelh nhayman ngkwengety arlkarirrem. Arelh-kenh-rnem-then ngkwenh-rnem-then ilkelhey-angenh intem anayntem. Arelh-kenhel-rnem ngenh akapwert atwayntem, ngkwenh-rnemel ingkan tnhwayntem.”
16 Akngey INGKARTel arelh renh ilek, “Nga ampakert rlterrk anayntem. Nga artwa ngkwenhek aleth ilkelh-ayntem. Artwa Atyetyart-anem ngkwenh anayntem.”
17 Akngey INGKARTel artwa renh ilek, Nga arelh ilenhek awelhek, ntwa amern-anem arlkwek. Atha weth ngenh artwerilek arwerl ilenh-penh amern ntwa arlkwekerr. Nga atyeng awelhey-angenh. Ahern yanh apmwanem, amern rnkernayntetyekan. Nga warrkirretyek artewentyel amern intwelheletyek, nga ilwetyek-atwety.
18 Atherrk apmwethen intwayntem. Ntwa amern-angketyarr ikwer-penh amern arlkwey-angenh.
19 “Ntwa artewentyel warrkirretyek amern ngkwenhek. Nga ahernirreyenh ilwenty-penh. Ahern-penh atha ngenh arnwarnek. Nga angkep ahern arrpemarl irreyenh. Ngan ahern arwarl.”
20 Adam-el arelh ikwerenh itnewek Eve.
21 Akngey INGKARTel arnkwanem ikwer-atherr mpwarek, atnwenth yenp-penh.
22 Akngey INGKARTel ilek, “Ratherr iterl-areyel apmwangkwarr-then mwerr-angkwarr-then, atharl iterl-areyel-apeny. Amern-angketyarr yanh-they ratherr alpetyekant-anem. Ratherr arwerl yanh itethiley-angker-penh ratherr arlkwey-angenh anetyek. Ratherr arlkwenty-penh, ratherr intem-antey iteth anekerr.”
23 Akngey INGKARTel renh-atherr aketh-warl-anem irrentek, apmer ingwer-warl-anem ratherr alpek.
24 Aympelh-akert-rnem akngerrakw-ampenyek arrnkngert rnkernek arwerl ikwerety. Nayp arlpenty Akngeyel rnkernek, ikwer-atherr-itwek. Nayp arlpentyel ampep-they arrtyernenh. Aympelh-akert rernem akwerrelant arrkngert rtnek, ratherr angkep alpekerr, arwerl ikwer-itwek arlkwekerr, amern-angketyarr ampep-itwek, ratherr intem iteth anekerr.