43
Rernem alheyel apmer Egypt-warl, amern inetyek
1-2 Aherrety atherrk lyapey-angenh, aherrety innganem ayntek, kwaty rntwey-angenh arrangkw-anem. Ntang-rnem arrangkw-anem irreynenh, Jacob-kenh apmer-itwekan. Ntang-rnem ywerrek-anem. Amern-weny arrangkw-anem anenh. Jacob-el renh-rnem angkep-antey ilanthek ntang akngerr-rnem inerl-alpetyek. Arringkerr alhenherr-arey ntang akngerr-anem inerl-alpetyek.
3-5 Judah angkek, “Atyetyartel ilek aytey anwekingkerrenh anwingkerr akngeynentyelant, anwenhingkerr amern ntang akngerr anthem. Benjamin anwingkerr akngentyelant mwerr. Anwingkerr ikwer-weny alhentyan arrangkw wenh!”
6 Jacob-el renh-rnem ilek, “Arringkerrarl Atyetyart renh ilek, arringkerr irrwernek-anem aytey arrekingkerr. Arringkerr ikwer-warl iley-angenh menty aynteyek-anek.”
7 Rernem renh ilek, “Angka akngerr inngel anwenhingkerr ra ayernekan wenh! Nga iteth-antey anentyek, alerengkw ngkwenh ingwer apek anentyek. Anwingkerr ikwer arraty-antey ilelhek. Anwingkerr iterl-arey-angenh-antey rarl anwenhingkerr ilanthetyek aytey anwekingkerrenh akngey-alhetyek ikwer-warl.”
8 Judah aynikw ikwerenhek angkek, “Menty anwenhingkerr tyarlewa! Amern-weny-kety angayakw irrekerr. Atha renh arntarnt-aremel akngey-alpem apmer-warl. Menty renh tyarlewa anwingkerr alhetyek.
9 Ingwerel-rnem renh atwentyan, ayenh anyentant-anem ntwa ileman, athan renh atnwenhek-penh. Ra ilwentyel, ntwa ayenhant-anem iley-ayntem.
10 Arlta rlwethirreyneyel-kety, anwenhingkerr tyarlewa. Anwingkerr anngangelheyel-kety. Alakenh-apenyel apmer ikwerel-anem aney-areny.”
11 Jacob-el renh-rnem ilek, “Atyetyart ikwer ampwal ilek-ilek akngenherr-arey apmer, nhenh-areny, ngkwarl arwengalker amern-rnem-then ampwal ilek-ilek-rnem-then.
12 Man-then akngenherr-arey, apalelarl ingwerentyel yakweth-warl arrernek, antheynenherr-arey, ra anwenhingkerr ayntarrp-ilekerr anyelkel-inenty-arrpantey.
13 Benjamin ikngwerl-alhenherr-arey, arringkerr alhemelant-anem.
14 Arringkerr Akngey rlterrk ilkwakert ayernetyek, ra arrenhingkerr arntarnt-aretyek, atyetyartel aytey arrekingkerrenh tyarlewetyek.”
15 Awayenheng-rnem Egypt-warl anperl-alhek, ampwal ilek-ilek-akert, renh-rnem-akert ayteyikw-anem ikwerenh-rnem-kenh-then.
16 Joseph-el renh-rnem arnarek Benjamin-akert. Warrkenh ikwerenh ilanthek, “Artwa yanh-rnem apmer atyenh-warl atnwenha, aker-anem ikwer-rnem atwemel, anwantherr ingkerrenh aker arlkwetyek.”
17 Warrkenhel artwernem Joseph-kenh warl-warl atnwenhek.
18 Rernem iterrek, “Man yakweth-itwel ayntenhel-antey anwingkerr irrwernek Atyetyart ra apek anwenhingkerr anterrkwemel tyayl-warl akwernem apek, tangkey-anem rakem apek.”
19 Rernem Joseph-kenh apmer-warl alhek artwa warrkenh-warl ilelhey-alhek.
20-21 “Anwingkerr ingwer-inger-antey apmer nhewarl apetyek, man irrkaty renh-antey anwingkerr yakweth-itwek arek, nhenh-anem anwingkerr akngey-alpek Atyetyart renh anthetyek.
22 Man akngerr-akert anwingkerr apetyek ntang payemeletyek. Anwingkerr man ingwer yanhan iterl-arey-angenh-antey, yakweth-itwek aynterl-apenh.”
23 Warrkenh angkek, “Kel mwerr, Akngey arrekantherrenh ra apek arrernek man atyenh nhenh-anteyarl.” Warrkenhel Simeon ikwer-rnem-warl atnwenhey-alhek.
24 Warrkenhel renh-rnem Joseph-kenh warl-warl atnwenhek, kwaty renh-rnem anthemel kwatyel-anem ingkernem lhewelhetyek. Warrkenhel tangkey atherrkel wantek, kwatyel-anem anthwengilek.
25 Ampwal rernem Joseph ikwer tywenek, renh anthetyek.
26 Rernem apmer ikwerenh-warl alhek. Ampwal-rnem-anem rernem Joseph renh anthek, kwenirremel.
27 Joseph-el renh-rnem ayernek, “Mwerrang arringkerr? Artwa ampwalew arrekingkerrenh? Iteth-antey ra aneyel?”
28 “Kel, ra mwerr-antey aneyel.” Rernem Joseph ikwer tyernek kwenirremel.
29 Joseph-el ayteyikw ikwerenh akely arek, rap renh-rnem ayernek, “Nhenhang aytey arrekingkerrenh ran? Artwa nhenhang aytey arrekingkerr ran, arringkerr renh atyeng-warl ilenhan.”
30 Ra kwen-warl aylpenhek Benjamin-ek amperrngirremel-anem artney-alpek.
31 Inngerr lhewelhek-penh, ra ikwer-rnem-warl angkep alpek. Ra warrkenh ikwerenh-rnem ilanthek, “Amern-rnem akngetyenherr-arey artwa yanh-rnem-warl.”
32 Joseph taypel anyentel anenh, ament-areny. Awayikw-rnem taypel ingwerelarl anek. Egypt-areny-rnem taypel ingwer-itwek arrpemarl anenh. Rernem arlkarirrenh Hebrew-rnem-itwek amern arlkwekerr.
33 Joseph-kenh warrkenh-rnemel awayikw-rneman ilek, rernem akert-arraty arrernelhetyek ingkerneny-they arrwekelenyek-atwety. Awayenheng rernem ywarn iterrek ilekek ra rnkerneynek arraty-angkwarr, ra iterl-arentyel apek.
34 Warrkenh-rnemel amern akngerr renh-rnem anthek. Benjamin renh amern akngerr innga anthek ingwer-rnem-angkwarr, ngkwarl-anem rernem antywemel tyenkerr-anem amern akngerr arlkwemel.