10
Angka yep-yep-akert
1 Jesus angkek, “Artwa irrtyert-awarr-rnem rernem akwerterrparl atnarnpenh keyt-ketyan. Rernem arrkernelhenh yep-yep-rnemek artwa apmwernemey.
2-3 Artwa keytelarl rtnenh. Iwerran ra altywerilenhey-apeny yep-yep-rnemekan. Artwa ingwerek-anem. Artwa nhayman yep-yepek-artwey, renh-rnem akngenhan. Rap arlkenh yep-yep-rnem ikwer-rnemek. Ahenty renhant iterl-arenh. Yep-yepel-rnem ahentyan renhant iterl-arenh. Alhengk-awenhan arreynan renh, ‘Wethip arlkeyel wenh! Anwekantherrenh wenh!’ Itnan ingwerek-ingwer iterl-arenh yep-yep-rnem, rap arlkenharl ikwer-rnemek. Renh awerl-alhenharl rerneman.
4 Rap renh-rnem tyerrenh aketh-warl-anem. Arrwekelarl ran alhenh yep-yeparl arntarnt-arenh ran, rerneman ingkern-they apentenh. Yep-yepel-rnem renh awerl-alhenh. Alhengk-awenh renhantarl.
5 Ingwer-rnem rernem apentey-angenharl, iterl-arey-angenharl. Arreyn ingwer-lkwer, ingwerel-ayeth ingwer-lkwer rernem angkenharl. Renhant rerneman iterl-arenh, yep-yep renh-rnem arntarnt-arenhantarl. Ahentyan. Anterrenharl ingwer-rnem-ketyan arreyn ingwer-lkwer rernem awenharl yep-yepel-rnem, rernemap anterrenharl. Yep-yep-rnemey.”
6 Jesus-elap angkan ikwer-rnemek ilenh, rernemap iterl-arey-angenh, “Ilekek nhan Jesus-arl angkeyel wenh?”
Jesus ilelheyel, “Ayengarlap ran yep-yep arntarnt-arey-angker”
7 Iwerr aynteyneyel alakenhan, yep-yep-rnemek. Jesus-an angkek, “Ayengarlart iwerran, iteth-kenh apmer-warl! Ingkerrenhel ayenh iterl-areyel.
8 Ingwer-rneman angkeyel irrtyert-awarr-rnem. Atyenh-rnem atyeng awelheyel, yep-yep-rnem awelheyel-apeny.
9 Ayengarlart iwerran. Athap itethilemarl ingkerr innga atyeng-angkwarr apetyeman rerneman iwerr-angkwarr. Apmer atyenh-warl apey-alpeman. Inkwerelheyek. Atyeng-angkwarrant inkwerelheyek mwerr-angkwarr.
10 Artwa anyelk-awarr apetyem, ra yep-yep-rnem anyelkel inetyek atwetyek-then. Alakenh-anyemant ra apetyem. Ayengan apetyek, atyenh-angkwarrarl apenteyel-rnem ingkerrenh itethiletyek, intem-antey rernem iteth anetyek.”
Jesus ilelheyel, “Ayeng yep-yep arntarnt-arey-angker mwerr”
11 “Ayengarl yep-yep-rnem arntarnt-arey-angker aneyel-apeny. Anyelk-awarr apetyenty, yep-yep-rnem irrtyert inetyek, ra yep-yep arntarnt-arey-angker-tangkwel renh ipmek atwem. Yep-yep arntarnt-arey-angker ra katy ilwem yep-yep ikwerenh-rnemek, renh-rnem arntarnt-aretyek apmwekety itethiletyek.
12 Warrkenh ingwer-rnem rernem manekant warrkirreyel, rernem atyeng-apeny-wenyarl. Yep-yep-rneman ikwer-rnem-kenh-wenyarl. Artwa ra man-awarr arengk artnwer arnarenty, ra aterel ikwerety anterrem, yep-yep-rnem iwerl-alhemel. Arengk artnwerel yep-yep-rnem tnhwem. Yep-yep-rnem arlperrtyirremel anterrem arengk artnwer ikwerety.
13 Man-awarr rernem yep-yep-rnem innga arntarnt-arey-angenharl. Alakenh-kety rernem aterel anterrem arengk artnwerel tnhwekerr.”
14 “Ayengarl artwa yep-yep-rnem arntarnt-arey-angker aneyel-apeny. Atha yep-yep atyenh-rnem alhengk-aremarl, rernem atyeng akalty arrpemarl.
15 Irrkaty-angkwarr Akngeyelan ayenh alhengk-areyel arrpemarl. Ayeng ikwer akalty arrpemarl. Kel ayeng katy ilwetyek yep-yep atyenh-rnemek, renh-rnem arntarnt-aretyek apmwekety.
16 Yep-yep ingwer-rnem atyenh-rnem arrpemarl. Rernemap ingwer-areny-rnemarl. Atha renh-rnem akngetyem atyeng-angkwarr, rernem angka atyenh alhengk-awem-anem, ayeng ikwer-rnem arlkenty. Ikwer-penh atha ingkerrenh-antey renh-rnem anyentelhilem.
17 Alakenh-anyem Akngey atyeng artewentyel ilkelheyel, ayengarl arlka menty anthelhem, atyenh-rnemek katy ilwem. Ayeng ipmepenh itethirreyenh.
18 Kel menty ayeng arlka anthelhem, ayeng katy ilwetyek ingkerrenhek alhewer. Akngeyel ayenh rlterrkilek, ayeng kel arlka menty anthelhetyek. Ra ayenh rlterrkilem, ayeng angkep itethirretyek arrpemarl. Alakenh-anyem Akngeyel atyeng arrernek arrwekel.”
19 Jew-rnemel angka awek-penh, ingwer-rnem ikwer inkwerelhek, ingwer-rnemarl arrangkwarl, irrpeltherrenh.
20 Rernem angkerrenh Jesus ikwer, “Ra arrenty-kenh itnweng-akertarl. Ran nhenh arwengkarl angkeyel! Arrantherr ikwer awelhey-angenharl!”
21 Jew ingwer-rneman angkerrek, “Jesus apek arrenty-kenh rlterrk-akert, nthakenh ra mwerr apmwel-areth angkey-angenh! Nthakenharlap artwa aparrng-penh ra mwerrilek, arrenty-kenh rlterrk-akertarlan?”
Jew-rnem-kenh atyetyart-rnemel Jesus renh apwertel wetyek arrkernelheyel
22 Alyangkwel rernem akarrirrenh Jerusalem-warl, tyenkerr Hanukkah arlkwetyek. Jesus anenh arrpemarl apmer ikwer-itwek.
23 Ingwer-inger Jesus ra aketh-ampenyel lywenty-itwek itnan Solomon-kenh lywenty, ikwer-itwek ra alhenh tyaty ilkwitwek.
24 Jew ingwer-rnem Jesus ikwer-warl akarrirrek, renh ayern-ayntetyek, “Nga arraty anwekantherr ilelhey-angenh-antey. Akngeyel apek ngenh Christ nhenh-warl thwenek, rarl awank-akerr ilek, ahern nhenh-warl thwenetyek. Nga arraty innga ilelha, anwantherr ngenh iterl-arayntetyek.”
25 Jesus-el tyernek renh-rnem, “Ayengan arrekantherr arrwekel-antey ilelhek, ayengan Christ-arl, Akngeyel arrwekeleny-rnem ilek, ayenh ahern nhenh-warl thweneyenh. Arrantherr atyeng awelhey-angenharl. Akngeyel ayenh thwenek, rlterrk ikwerenh-akertel ayeng warrkirr-ayntetyek. Arrantherr ayenh anngetherr areyel. Alakenh-anyem-they arrantherr ayenh iterl-arey-areny, ayeng Christ-arl, rarl ayenh thwenek.
26 Arrantherr ingkerrenh atyeng irrpeltherreyelarl. Arrantherr atyeng-angkwarr apentey-angenharl. Arrantherran yep-yep atyenh-wenyarl.
27 Yep-yep atyenh-rneman rernem angka atyenh alhengk-awemarl. Atha renh-rnem iterl-areyel arrpemarl. Rernem atyenh-angkwarr apenteyelarl.
28 Alakenh-anyem-they rernem iteth intem Akngey-itwek aneyenh. Nthakenh rernem ilwey-angenh. Ingwerel nthakenh renh-rnem akngakey-angenh atyeng-they.
29 Akngey atyenhel ayenh yep-yep-rnem-apeny anthek. Akngey ran ilkwa inngarl, rlterrk-awaty aneyel ingwer-rnem-angkwarr. Ingwer-rnemel nthakenh renh-rnem Akngey-they akngakey-angenh.
30 Akngey-then ayeng-then anyent-antey aneyel. Akngeyel renh-rnem ayerrpilem, atha renh-rnem ayerrpilem arrpemarl.”
31 Jew-rnem-kenh atyetyart-rnemel Jesus renh awek-penh, rernem apwert-rnem inenh, apwertel-anem Jesus renh wetyek-anek.
32 Jesus ra angkek ikwer-rnemek, “Atha mwerr-angkwarr mpwarek ingkerrenhek ahern nhenh-itwek. Alakenh-anyem Akngeyel ayenh rlterrkilek. Arrantherr ingkerrenhel ayenh arek, ayeng mwerr-angkwarr ingkart-angkwarr warrkirrenh. Ilekek arrantherr ayenh apwertel wetyek?”
33 Rernem Jesus ikwer irrpelthirrek, “Arrangkw. Nthakenh anwantherr ngenh atwey-angenh warrk ngkwenh-angkwarr. Ngan Ingkart-wenyarl. Ngan Akngey ilkwarrpantey irrtywerremel ilelheyel, anyent-angkwarr-arrpantey! Alakenh-they anwantherr ngenh apwertel wetyek!”
34-35 Jesus angkek ikwer-rnemek, “Akngey-kenh angka arrwekeleny aynteyel: ‘Arrantherr akngey-rnem atyeng-apeny anetyek.’ Akngey-kenh pip arrwekelenyel aynteyel, angka nhenh arraty innga aynteyel intem-antey. Pip-itwek Ingkart angkek ikwer-rnem-warl, ra renh-rnem akngey itnewek ikwer-apeny.
36 Akngeyel ayenh thwenek ahern nhenh-warl, ayenh arrernek impen ikwerenh. Ayeng antwelheyel Akngey-kenh Alerikw. Ilekek arrantherr ayenh apmwa antweyel?
37 Arrantherr ayenh tnaketyek atharl Akngey atyenh-kenh warrk mpwareyel.
38 Arrantherr apek atyeng irrpeltherreyel, ayenh tnakey-angenh, atharl ileyel-angkwarr. Kel athan warrk mwerr mpwareyel Akngeyel mpwareyel-apeny. Alakenh-anyem-they arrantherr ayenh tnakey-areny. Ikwer-penhan arrantherr iterl-arey-areny, Akngey-then ayeng-then anyent-anteyarl.”
39 Jew-rnem atyetyart-rnemel awek-penh, rernem renh antwerrketyek arrkernelhek, tyayl-warl akwernetyek-arrpantey. Ra ikwer-rnem-kety anterrek.
40 Ra anpenhek irrkaty-angkwarr-antey Jordan lher-angkwarr, John-elarl akngerr arrwekel kwatyel baptise-emilenh-angkwarr. Jesus ra apmer ikwer-itwek anenh.
41 Jesus ra ikwer-itwek anenharl-antey, akngerr ingwer-rnem ikwer-warl akarrirrek. Rernem angkerrenh, “John-el anenhantherrenh Akngey-kenh rlterrkel mwerriley-angenharl. John-el angka arraty ilenh Jesus ikwer.”
42 Apmer ikwerel akngerran antelhek-anem Jesus-angkwarr.