15
Amern grapes-akert
1 Jesus ilelhek, “Ayeng arwerl grapes rarl. Akngey atyenh ran amern grapes arntarnt-arey-angker-apeny.
2 Waly amern-akert-rnem mentyarl arem. Waly-rnem amern-weny-rneman ra akalthemel iwem, waly ingwer-rnem amern-akert-rnem irretyek.
3 Mwerr arrantherr arraty aneyel, angka atyenh-angkwarr ayntarrp-iley-angenh.”
Anayntileyel: Anwantherr arratyirrem angka ikwerenh-angkwarr, alyelk-anem, waly mwerr-rnem aneyel-apeny.
4 “Atyeng-itwel ana, ayeng arrekantherr-itwel anem arrpemarl. Waly akenty ra arlenyirrem, arrangkwarl. Alperr amentirrenty, amern aney-angenh-anemarl. Arrantherr amentirrenty atyengety arrantherr arrangkwarl, atyeng-angkwarr apentey-angenhan.
5 Ayeng arwerl grapes-apeny, arrantherr waly-rnem-apeny. Atyeng-itwel arrantherr anenty, ayeng arrekantherr-itwel anem arrpemarl, arrantherr arraty-angkwarr aneman. Atyeng-angkwarr aney-angenh ayeng arrekantherr-itwel aney-angenh arrpemarl.
6 Ingwerenty atyengety amentirrenty, ra apmwirreyenh, alperrarl apmwa arlenyirrem-apeny arrangkw. Warrkenh-rnemel alperr arleny-rnem rwewarl iwem-apeny.
7 Arrantherr atyeng-angkwarr apententy, angka atyenh iterl-aremel awelhenty, ayeng arrekantherr awelh-ayntem arrpemarl, arrantherr atyeng ayernenty, athap arrenhantherr arntarnt-arayntem.
8 Arrantherr arraty-angkwarr apententy, ingkerrenhel Akngey renh iterl-arem tnakemel, ran rlterrk inngarl aneyel.
9 Ayeng arrekantherr ilkelheyel, Akngey atyeng ilkelheyel-apeny. Ayeng arrekantherr ilkelheyel, Akngey atyeng ilkelheyel-apeny. Atyengety intwemelirrey-angenh, intem-antey apenterl-ayntetyek.
10 Ra atyeng ilkelheyel, ayeng ikwer awelheyelarl. Ra nthakenh atyengety intwemelirrey-angenh. Ayeng innga arrekantherr ilkelheyel irrkaty-angkwarr-antey. Arrantherr atyeng awelhenty, ayeng arrekantherr-itwel anem, arrekantherrety intwemelirrey-angenh.
11 Atha arrenhantherr ilek, arrantherr irrngerney anayntetyek ayeng aneyel-apeny. Ayeng ilkelheyel, arrantherr irrngerney innga anayntetyek.
12 Nhenhan angka atha arrekantherr intem-antey arrernek: Ayengarl arrekantherr-itwel mwerr-angkwarr aneyel-apeny, arrantherr ingwer-rnem-then mwerrant-arey anayntetyek.
13 Alakenh-anyem artwa ra ikwerenh-rnemek artewentyel ilkelheyelarl, rap arlka menty anthelhem, ikwer-rnem katy ilwetyek, renh-rnem itethiletyek.”
Anayntileyel: Jesus irrker-angkwarr arwa ilelhek.
14 “Arrantherr angka atyenh-angkwarr apententy aleth-antey, arrantherrap atyenh-rnemarl anem.
15 Lyertan atha arrenhantherr itnewem atyenh-rnem-anemarl. Aleyan arrantherrarl iterl-areyel angka atyenh-angkwarr, ayengan iterreyel-angkwarr. Arrantherran warrkenh-weny-anemarl. Atha arrekantherr angka ingkerrenh ilek, Akngey atyenhel ayenh ilek-apeny. Warrkenh-rnemel atyetyart-kenh angka ingkerrenh iterl-arey-angenharl, rarl iterreyel-angkwarr.
16 Arrantherr ayenh arrerney-angenh, atyetyart arrekantherr anetyek. Atharl arrenhantherr ayerrpilek, atyenh-rnem anetyek. Atha arrenhantherr ayerrpilek, arrantherr Akngey-angkwarr warrkirr-ayntetyek intem-antey. Arrantherr Akngey ayernenty atyeng-angkwarr, Akngeyel arrekantherr awelhemarl.
17 Atha arrekantherr ileyel arrpemarl, angka nhenh aynteyel-angkwarr: Arrantherr mwerr-angkwarr anayntetyek, artewentyel ilkelh-ayntetyek ingwer-rnemek.”
Jesus ilelhek, ahern nhareny-rnem ikwer ilkelhey-angenh
18 Jesus kwertengerl-rnemek angkek arrpemarl, “Ingwer-rnem ahern nhareny-rnem arrekantherr ilkelhey-angenharl. Iterl-arayntenherr-arey, arrwekel-antey rernem atyengety arlkarirrenh-apeny.
19 Arrantherr ahern-areny-kenh-angkwarr apententy, ahern-areny rernem arrekantherr inkwerelhemarl. Arrangkw. Atha arrenhantherr ingkerrenh ayerrpilek atyenh-rnem-anem. Alakenh-they rernem arrekantherrety arlkarirreyel. Arrantherrap ikwer-rnem-kenh-wenyarl.
20 Iterl-arenherr-arey, atharl arrenhantherr arrwekel ilek. Artwa warrkenh anem, ranap atyetyart ikwerenh-angkwarr ilkwewenyarl arrangkw. Ahern-arenyel ayenh atwetyek arrkernelhem. Irrkaty-angkwarr rernem arrenhantherr atyenh-rnem atwetyek arrkernelhem arrpemarl. Ingwer-rnem angka atyenhek awelhek, atharl ikwer-rnem ilek. Irrkaty-angkwarr rernem arrekantherr awelhem, arrantherran angka ikwer-rnem ilenty.
21 Ahern-areny-rnem rernem apal anenh, Akngey renh iterl-arey-angenh, rarl ayenh thwenek ahern nhenh-warl. Arrantherran atyenh-rnemarl. Rernem arrekantherr irrpelthirrem arrpemarl, atyeng irrpelthirrenh-apeny, ikwer-rnemant awelhetyek.
22 Apalarl rernem anenh arrwekel. Ingkartel renh-rnem nthakenh ayntarrp-iley-angenh, arrangkw. Angka atyenh awek-penh rernem apmwangkwarr-antey aneyel. Ingkartel renh-rnem tyatyemilem.
23 Ingwerenty atyengety arlkarirrenty, rap Akngey-kety arlkarirreyel arrpemarl.
24 Atha ilek-ilek mpwarek, ingkerrenhel aretyek, Akngey rlterrk ilkwa. Rernem anngetherr arek. Ingkerrenhel ayenh arek, ayengarl ikwer-rnem-itwek warrkirrenh. Rernem atyeng ilkelhey-angenh-antey, Akngey atyenhek-then, rernem atyengety intwemelirrek. Rernem apmwelhilek Akngey-kenh-angkwarr.
25 Akngey-kenh angka alakenh arrwekel aynteyel: ‘Ingwer-rnem arwa atyengety arlkarirreyelarl apmwangkwarrarl.’ ” Angka innganem irrek.
26 Jesus-el kwertengerl ikwerenh-rnem ilek, “Atha arrekantherr-warl-anem Itnweng arrernem. Ra Itnweng Akngey-they apetyem, atyenh-angkwarr arrenhantherr akalty-anthetyek arraty-angkwarr.
27 Arrantherr ayenh aytarenhey-alpenh awank-they. Alakenh arrantherr ingwer-rnemek iley-areny angka atyenh.”