5
Paul-el Timothy ilew, renh-rnem arraty-angkwarr akalty-anthaynteyew
1 Tyaty-areny anyentarl apmwangkwarr alhem apek, mwerranty nga angkeyew ikwer, ntwap arratyeleyew renh mwerr-angkwarr. Mwerr angka artwampew, aynengkw ngkwenhew-apeny. Renh iltey-angenh. Artwa akelyew mwerr angka, ayteyengkw ngkwenhew-apeny.
2 Mwerr angka arelhampwew, amengkw ngkwenhew-apeny. Mwerr angka aleyakew, ayteyengkw ngkwenhew-apeny.
3 Arelh inpert-rnem aneyel arrangkw apek, ikwer-rnem-wenh arrangkwarl. Ngan amperrngerreyew ikwer-rnemew. Tyaty-areny-rnemel arntarnt-aremer renh-rnem mwanty.
4 Inpert ingwer-rneman mwerrarl apek aneyel ikwerenh-rnem-akert. Nthakenh ikwerenh-rnemel renh-rnem iwey-angenh, renh-rnemarl alkenhelew-penh. Angkeparlap inpert-rnem arntarnt-areman, rernem renh-rnem arntarnt-arenh irrkaty-angkwarr. Alakenh-anyemarl inpert-rnem aneyel, Akngeyanap ikwer-rnem inkwerelheyel.
5 Inpert ingweranap arrangkwarl aneyel apek, ingwerentyel arntarnt-arey-angenharl. Angkepelarreng ra aleth ayerneyel Akngey, renh arntarnt-araynteyew. Renhap tyaty-areny-rnemel arntarnt-araynteyew.
6 Arelh inpert ingweran ilelhem Christian, ranap ilkelheyel apek, arrkent alhaynteyew. Ra arraty-angkwarr aney-angenh, arrkent alhaynteyew apmwangkwarr, Akngey apentey-angenh-anem. Inwengan ikwerenh apmwarl.
7 Ntwa Christian-rnem ingkerrenh ila angka inpert-rnemew, rernem arraty aneyew, ingwerentyel renh-rnem ayntarrp-ilewerr.
8 Christian-rnemel aleth ikwer-rnem-wenh arntarnt-arem, ampwety-ampwernem-then akely-rnem-then. Akngey-wenh-angkwarr alakenh-anyemarl. Rerneman anerl-anenty, ikwerenh-angkwarr apentey-angenharl, rernemap arwantey Christian-arrpanteyarl. Akngey rernem inngarl iterl-arey-angenh.
9-10 Aleyanap akngerrarl inpert-rnem arrangkw aneyel apwert-weny-then, ingwerentyel arntarnt-arey-angenh. Ntwanap itnernem ingkwerneyew inpert yanh-rnem ingkerrenh pip-warl. Yanh-rnem-tangkwel arternpel ara. Ampwa innganem rernem aneyel, 60 apek. Arelh inpert ingwer-rnem ingkwerney-angenh-antey, alerl-antey rernem aneyel. Arelh inpert ampwa anyent ra artwa anyentant-akert anenh, mpweny ingwerew alhey-angenh arrangkw. Ran ingwer-rnem arntarnt-arenh mwerrantyel, alethang-rnem-then ra arntarnt-arenh apmer ikwerenh-itwew mwerrantyel. Ran ampa ikwerenh-rnemarl alkenhelew arraty-angkwarr mwerrantyel, rap rlterrk anenh tyaty-angkwarr. Ingkety ingwer-rnem-wenh ra lhewenh Christian-rnem, Jesus-elarl kwertengerl ikwerenh-rnem ingkety lhewenh-apeny. Rlterrkarl ayntenh-angkwarrarl, ranap athamerrenh ingwer-rnemew. Inpert nhelkwerant Akngey-wenh-angkwarr arratyarl anenh, pip-warl ntwa ingkwerneyew.
11-12 Inpert akely-rnem-alew? Ingkwerney-angenh-antey, mentyarl. Rernemarl apek inperterrew, rernem angkew alakenharl: “Ayengan amentewarl anerl-aneyenh, anewarterrey-angenh. Ayeng anaynteman amperrel-antey, tyaty-itwew warrkerr-aynteyew.” Alakenh-anyemanap mwerrarl. Ingwer-ingweranap rernem iterrem apek, “Artwa yanhew ayeng ilkelheyel innga. Ayeng anewarterreyew-anem.” Alakenh rernemap iylpelerrew-anem, rernemarl angkew-penh, nyerrerrew-anem. Akngeyan ikwer-rnem awakelhem apek, rernemarl irrtyerremel ilew-wety renh.
13 Inpert akely ingwer-rnem apek anewarterrey-angenh-antey, rernemap alakenh apek iterrem: “Tyaty-areny-rnemelan ayenh aley arntarnt-areyel-anem, mwerr-anem ayeng anayntem, warrkerrey-angenh-anem.” Alakenh rernem arnmerreyel-anem, apmer ingwer-rnem-wenh-warl-anem alherl-apeyel, ilek-ilekew aparelh-aynteyew. Rernemap ingwer-rnemew tyel-angkemel alherleweyel.
14-15 Inpert akely yanh-rnem kel intwemelerrew Akngey-wety, arrenty-angkwarr-anem apenteyel. Alakenh ayeng angkeyel inpert akely-rnemew, “Mwerr-awaty anewarterreyew, ampernem atnyeneyew ilkwatherr, renh-rnem alkenheleyew, arraty innga anaynteyew. Nga amperrel aney-angenh, nga apmwelhel-anewerr.” Ingwer-rnemelanap inpert akely yanh areyel, rernem arewerr, rernemarl apmwangkwarr alheyel. Rernemap ilem Christian anenhantherrenh ingkerrenh apmwarl.
16 Arelh Christian-wenh angkwerikw inpert apekarl aneyel. Rap arntarnt-aremer angkwerikw inpert ikwerenh. Nthakenh arelh Christian ra alakenh iterrey-angenh, “Mwerr tyaty-areny-rnemel angkweraty renh arntarnt-arem. Ayeng arlarl.” Alakenh-wenyaw, menty. Rantey renh arntarnt-aremer. Nthakenh tyaty-areny-rnemel arntarnt-arey-angenh inpert-rnem ingkerrenh. Rernemap arntarnt-aremer inpert amentarl aneyel-rnemant, arrangkwarl aneyel-rnem.
Tyaty-areny ilkwernem-akert
17 Timothy, atha ngenh ilenh arrwekel-antey artwa arrwekeleny-rnemew tyatyew-artey-rnemew. Artwa ilkwernem irrngerney warrkerreyel iylpareth tyaty-itwew. Rernemap arrenhantherrenh akalty-antheyel, Jesus apent-aynteyew. Rernemap angka mwerr-angker ikwer-akert ileyel ingwer-rnemew. Alakenh-anyem ikwerenh-rnem awelh-aynteyew nakemel.
18 Akngey-wenh pwekel alakenh-anyem ileyel, “Artwa warrkenh payemelem warrk-penh!” Pwek ra alakenh ileyel arrpemarl, “Pwelek apek warrkerreyel artwa ikwer. Pwelek rap amern weyt lthweyel, ntang akatweyew ilpeyew-alenty. Nthakenh pwelek-wenh arrakert arertney-angenh. Mentyarl pwelekelan ntang arlkwayntem.” Alakenh-anyem aynteyel artwa tyatyew-artey yanh-rnemew, mwerr-angkwarrarl rernem warrkerreyel tyaty-itwew. Apwert anthaynteyew ikwer-rnem.
19 Tyatyew-artey anyent apek apmwelhelem. Anyent ingwerentyarl ayntarrp-ilem renh apek. Nthakenh awelhey-angenh ikwer anyentew. Artwa atherrel apek, irrpetyel apek, angka tyatyew-artey ikwer-akert ilem, rarl apmwelhelew. Ngap awelheyewarl.
20 Tyatyew-artey ra apek akwetyemel apmwelhelenh. Ntwa tyaty-itwew renh nyerrel-anthemel, angka ikwer-akert ilemel, tyaty-areny-rnemel aweyew-awaty. Alakenh-anyem rernem iterl-aremarl, arraty-angkwarr-anem anaynteyew.
21 Atha ngenh alakenh ileyel: Akngey, Jesus antyerl-rnemel-thenarl areyel-wety. Antyerl yanh-rneman Akngeyel rlwanew ikwer. Alakenh-anyem ntwa mpwareyew, atharl pip nhenh-angkwarr ngenh ileyel. Nga mwerr aneyew ingkerrenh-angkwarr irrkaty-angkwarr. Ngkwenh-rnemew mwerr anaynteyew alethang-rnemew-then. Mwerr aneyel-rnemew mwerr anaynteyew. Apmwangkwarrarl aneyel-rnemew-then mwerr anaynteyew arrpemarl.
22 Ingwer-ingwer nga iterrem, ntwa ingwerenty arrerneyew, warrkerreyew tyaty-itwew. Alerl-antey iterreyew mwerranty-antey. Nthakenh itep arrerney-angenh akapwert-warl anamerl-antey. Renh arntarnt-arey, ra arraty anerl-anentyew. Ra tyatyew-artey apmwa anewerr, rap ngenh-then apmwangkwarr akalty-anthewerr. Ngantey mwerr-angkwarr anaynteyew arraty.
23 Ingwer-ingwer ngan atnert kwarnelhem, kwatyantarl ntwa antyweyel. Ntwap pweytelem kwaty-then ngkwarl wayn akely-then ilpertelelhemel. Yanh-penh nga mwerr-anem awelhem.
24 Anyent apmwangkwarr alhem apek, ingwer-rnemelan areyelarl. Ingkerrel areyel. Anyent ingweran apmwangkwarr alhem, ingwer-rnemel arey-angenh apekarl. Ingwer-rnemel iterl-arey-angenh, rarl apmwangkwarr alheyel.
25 Anyentan mwerr-angkwarr alhem, ingwer-rnemel areyelarl. Anyent ingweran mwerr-angkwarrarl alhem, ingwer-rnemel apek arey-angenharl. Ingwer-ingwer ingkerrel iterl-arem, rarl mwerr-angkwarr anenh intem.