3
Att̃o Juanpaʼ quellcan carta añecop ñeñt̃ ameʼñetsa anetso Sardiso
1 Allempoña ñeñt̃ neserrpareʼtateneʼ ñapaʼ alla oterrnerr:
—T̃eʼpaʼ oʼch pequellquërrerr carta añecop ñeñt̃ cohuam̃peneʼ ñeñt̃ ameʼñetsa all anetso Sardis, oʼch p̃otanet atet̃: “Napaʼ oʼch nequellconas carta att̃och neñotatas ñeñt̃ atet̃ otenes Jesucristo ñeñt̃ eʼñe chorratena Yompor Puecamquëñ canc̈herr ñeñt̃ara canc̈herr ñeñt̃ sherb̃aʼyets. Ñetpaʼ poʼpoñeʼttsocma sherbenet. Ñam̃a ñeñt̃ara Cristo ñeñt̃ orreneʼ canc̈herr ranto. Ñapaʼ t̃eʼpaʼ atet̃ otenes: ‘Napaʼ neñotuennas ora allpon ñeñt̃ sep̃aʼyen. Ñam̃a neñotuennas att̃o sa acheñeneshaʼpaʼ atet̃ entensetañ ñerraʼmrrat̃eʼ eʼñe cohuen socrrena Yomporecop. T̃arraña ñeñt̃paʼ ama att̃eyeʼ sepeno c̈haña sottena ñerraʼmrrat̃eʼ c̈ho serromuen, amaña es sesherbenoña Yomporecop.
2 Amaʼt att̃o sameʼñenañ mameʼ t̃arraña ñeñt̃paʼ alloʼna sen huañuanmats. Napaʼ nentuenes ama setsotenoña ñeñt̃ eʼñe pocteʼ enten Nompor. T̃eʼpaʼ oʼch notas, eʼñechña señota, oʼch alla setanterra Yomporecop.
3 C̈hocmachña seyerpueña ñeñt̃ att̃o aserrpareʼtataret̃es ahuañmoʼchot̃eñ. Amach sepsatsche añ ñoñets ñeñt̃ sameʼñataya. Ñeñt̃oʼmarña t̃eʼpaʼ añ poctetsa oʼch alla soct̃apeʼcherr cohuen Yomporecop. Ñerraʼm ama att̃eyeʼ sepeno napaʼ machayot̃ach nohuerrnasa atet̃ ñerraʼmrrat̃eʼ eñet̃paʼ amach señoteñe esempopaʼ machayot̃ach huaponasa.
4 T̃arraña amaʼt att̃eñpaʼ all anetso Sardiso eʼñe puesheñaʼttsaña ñeñt̃ ama yec̈henaye sosyaʼtsañ ñeñt̃ ama pocteyeʼ enteno Yompor. Ñetpaʼ atet̃ atmaʼntataret̃tenet amaʼt paʼshtamuetpaʼ ama aʼsosyateñeto. Ñeñt̃oʼmar ñetpaʼ eʼñe pocteʼ nentenanet ñam̃a att̃ochña nemnaterranet oʼch yechopeʼcherr eʼñe parro t̃arroʼmar ñet ñeñt̃ neshtamtatenanetpaʼ ama aʼsosyateñeto, eʼñe cohuenarer orrtenet eʼñe huallamaʼt̃areret.
5 Ñeñt̃ metanaʼtueʼ allohuen paʼnamen topateñets ñeñt̃ ama nepuerram̃perrayo, ñetpaʼ neshtamtaterranet shetamuets ñeñt̃ atarr huallamaʼt̃. Ñetpaʼ amach neʼsherraneto paʼsoʼcheñ all aquellcaret̃tenet Yompor poʼlibro att̃ochña ñetpaʼ corretsetach. Ñetñapaʼ nechmeʼtaterranetchaʼ ñeñt̃ na Nompor ñam̃a allohuen poʼm̃llañot̃eñnaneshar.
6 Ñeñt̃ eʼm̃ñoteneʼ añ ñoñets c̈hapanetepaʼch pueyoc̈hreto ñeñt̃ atet̃ neñotatenanet na Necamquëñot̃ ora allohuen ñeñt̃ pameʼñeñot̃et c̈hocma apc̈haʼyenet allemeñ anetsoʼmar.’ ” Arrpaʼ allohua ñeñt̃ atet̃ ot sardisoʼmarneshacop.
Att̃o Juanpaʼ quellcan carta añecop ñeñt̃ ameʼñetsa anetso Filadelfio
7 Ñeñt̃ neserrpareʼtateneʼ ñapaʼ alla oterrnerr:
—T̃eʼpaʼ oʼch pequellquërrerr carta añecop ñeñt̃ cohuam̃peneʼ ñeñt̃ ameʼñetsa all anetso Filadelfia, oʼch p̃otanet atet̃: “Napaʼ oʼch nequellconas carta att̃och neñotatas ñeñt̃ atet̃ otenes Jesucristo ñeñt̃ eʼñe Parets ñeñt̃ eʼñe poʼñoc̈h allohuen es oten. Ñeñt̃ara Cristo ñeñt̃ allsensaret̃ ñach am̃chaʼtaret̃terrtsa eʼñe atet̃ am̃chaʼtaret̃teʼt̃ David. Ñatoʼ oʼch netmaʼntacha oʼch not ñapaʼ echenan David poʼllave. Amaʼt erraʼtsenchaʼ oʼch toram̃penanet att̃och c̈hapanet Yompor poʼcohuenña amaʼt eseshapaʼ amach errot̃enot̃ alla epatareʼterraneto. Ñam̃a ñerraʼm ñach yottam̃perreʼ amaʼt eseshapaʼ amach errot̃enot̃ toram̃pereto.
8 Cristopaʼ t̃eʼpaʼ atet̃ otenes sa: ‘Napaʼ eʼñe neñotuennas ñeñt̃ atet̃ cohuen es sep̃aʼyen. Amaʼt ama tama ahuamencat̃eso Yomporecop, t̃arraña amaʼt coñeʼt̃a sehuamenc sepen c̈hocma sameʼñennana neñoñ ñam̃a c̈hocma saʼmet̃en att̃o sameʼñenna ama saʼnasotenno. Ñeñt̃oʼmar napaʼ oʼch netoram̃p̃sonas allchaʼ saʼpot̃ennan neñoñ, ñam̃a amaʼt eseshapaʼ amach errot̃enot̃ alla yottam̃perrnaso.
9 Ñam̃a añña ñeñt̃ otetseñ ñetpaʼ judioneshetoʼ — ñehua, ñetpaʼ ama Yomporeyeʼ pueyochreshaʼ penahueto t̃arroʼmar ñetpaʼ aña pueyochreshaʼ penahuet oneñet̃, ñetpaʼ att̃a shecareʼtenset. T̃arraña ñetña t̃eʼpaʼ oʼch nameʼñatanet allochñapaʼ oʼch c̈hapanet pueyoc̈hreto sapaʼ ñeñt̃es atarr nemorrentena. Ñeñt̃oʼmarña ñetpaʼ oʼch huapuet sesho oʼch concorposet alloʼtsenes.
10 Sapaʼ eʼñe cohuen acop̃a setsoton allpon neñoñ, ama saʼypoʼñenno na, ñeñt̃oʼmarña napaʼc̈hoʼña amach naʼypoʼñaso. Oʼch necuam̃perres t̃arrempohua allempoch mueroc̈hteñtsopoterra ñeñt̃chaʼ topaterreʼ ora allohuen acheñeneshaʼ ñeñt̃ yec̈haʼyetsa añe patsro.
11 Oʼch eʼñe mamerrerrpaʼ oʼch nohuerrnasa. Ñeñt̃ att̃o allpon sameʼñena oʼch eʼñe señotuanem amach sequec̈hpatsche. Allochñapaʼ amaʼt eseshapaʼ amach errot̃enot̃ puerratam̃p̃saso ñeñt̃ noʼpatatensa ñeñt̃chaʼ atarr socshaterreʼ.
12 Ñeñt̃ metanaʼtueʼ allohuen paʼnamen topateñtsoc̈hno ñeñt̃ ama nepuerram̃perrayo ñetpaʼ amat̃eʼ errot̃enot̃ ahuaporeʼtaret̃terreto allot̃, ñetpaʼ eʼñe att̃et ñerraʼmrrat̃eʼ all orratenet pocoll ñeñt̃ paʼpaquëll pen Nompor ñeñt̃ eʼñe huomenc echarr ap̃aret̃. Amaʼt eseshapaʼ amat̃eʼ errot̃enot̃ huaporeʼche. Ñam̃a eʼñe ñesheto napaʼ oʼch nequellcoñ Nompor paʼsoʼcheñ, allot̃paʼ oʼch nequellcoñ ñam̃a Nompor paʼnetser eʼñe allara ñesheto, ñeñt̃ara paʼnetser ñeñt̃ sochetsa Jerusaléñ, ñeñt̃chaʼ sohuerrtsa entot̃ eʼñe etserrareʼ. Allot̃paʼ oʼch nequellcaʼ ñam̃a nesoʼcheñ all eʼñe ñesheto ñeñt̃ eʼñe etserrareʼ nesoʼcheñ.
13 Ñeñt̃ eʼm̃ñoteneʼ añ ñoñets c̈hapanetepaʼch pueyoc̈hreto ñeñt̃ atet̃ neñotatenanet na Necamquëñot̃ ora allohuen ñeñt̃ pameʼñeñot̃et apc̈haʼyenet allemeñ anetsoʼmar.’ ” Arrpaʼ allohua ñeñt̃ atet̃ ot filadelfioʼmarneshacop.
Att̃o Juanpaʼ quellcan carta añecop ñeñt̃ ameʼñetsa anetso Laodiceo
14 Ñeñt̃ neserrpareʼtateneʼ ñapaʼ alla oterrnerr:
—T̃eʼpaʼ oʼch pequellquërrerr carta añecop ñeñt̃ cohuam̃peneʼ ñeñt̃ ameʼñetsa all anetso Laodicea, oʼch p̃otanet atet̃: “Napaʼ oʼch nequellconas carta att̃och neñotatas ñeñt̃ atet̃ otenes Jesucristo ñeñt̃ ama puenesho poʼñoñ. Ñeñt̃ atet̃ oteney Pomporecop ñeñt̃paʼ atet̃chaʼ perrnay, ñam̃a ñeñt̃ allpon oten, ñeñt̃paʼ eʼñe poʼñoc̈h atet̃, ñam̃a ñeñt̃ara Cristo ñeñt̃ ñanom eñall, allot̃ña Pomporpaʼ yec̈hcatyesan allohuen ñeñt̃ allpon eñall.
15-16 Cristoña t̃eʼpaʼ atet̃ otenes: ‘Napaʼ eʼñe neñotuennas ñeñt̃ ora allpon atet̃ sep̃aʼyen. T̃arraña sapaʼ sec̃llañot̃etsetsa sameʼñenna, ama eʼñe huomencayeʼ sameʼñenno. Ñerraʼm ama semno oʼch sameʼñaʼna huomencpaʼ amachña sameʼñatsetno amaʼt mamesha. T̃arraña sapaʼ sec̃llañot̃etsetsa sameʼñenna. Ñatoʼ oʼch netmaʼntacha atet̃. Sapaʼ ama att̃eyayso ñerraʼmrrat̃eʼ oñ ñeñt̃ atarr soseʼ, ñam̃a ama att̃eyayso ñerraʼmrrat̃eʼ oñ ñeñt̃ atarr atserrsasen. Sapaʼ att̃a sepena ñerraʼmrrat̃eʼ oñ ñeñt̃ mamesha shorrsastetsa ñeñt̃ nanac netsenaʼten. Ñeñt̃oʼmarña napaʼ eʼñe atet̃ nentenes atet̃ ñerraʼmrrat̃eʼ oñ ñeñt̃ c̈ha ayaʼpesatañtena. Ñerraʼm yorrpaʼ c̈hach yaʼpesatey oʼch yaʼtatstera. Ñeñt̃oʼmarña sapaʼ eʼñe atet̃ nentenes c̈hach nemneñ oʼch nehuaporeʼtam̃perres.
17 Sapaʼ amaʼt soteneñ añoʼ es sepallteno eʼñoʼ sechuen ora ñeñt̃ allpon poctetsa socop eʼñe sa setaruasot̃. T̃arraña ñeñt̃ sherbets secamquëñecoppaʼ ama secheñe amaʼt coñeʼt̃a. Napaʼ att̃a nentenes atet̃ ñerraʼmrrat̃eʼ ñeñt̃ nanac atsenaʼtaret̃, atarrchaʼ amueroc̈htataret̃tena ñeñt̃ eʼñe huocchañ ñam̃a aporoʼyet̃ att̃ach muelleʼmquën.
18 Ñeñt̃oʼmarña na t̃eʼpaʼ oʼch noct̃apeʼchaterres sa oʼch notas sapaʼ ñeñt̃ sepalltena. Oʼch senamuen nesho ñeñt̃ poʼñoc̈h nanac sherbets secamquëñecop. Allochñapaʼ att̃och sechuerr shonteʼ esocmañen ñeñt̃ eʼñe poʼñoc̈h sherbets. Ñeñt̃ ama sherbetsopaʼ oʼch saʼypoʼñer. Ñatoʼ oʼch netmaʼntacha att̃o allempo atserrtatenet oropaʼ oʼch nohuanña aʼyo ñeñt̃ ama sherbetso allempoñapaʼ oʼch eʼñe orochayam̃a ñeñt̃ nanac sherbets. Ñeñt̃ atarr sherbets atet̃ ñerraʼm oro ñeñt̃chaʼña seʼnenña nesho. Elloña napaʼ oʼch netmaʼntatasa atet̃chaʼ sep̃a, oʼch serañt̃a nesho shetamuets ñeñt̃ atarr huallamaʼt̃. Allochñapaʼ ñeñt̃chaʼ sechorrerra att̃och oʼhuañchaʼ sepenca ñeñt̃ att̃o semuelleʼmquën. Att̃och serañt̃ena ñam̃a quëlloʼyeñtsopar alloch separterr seclleʼ allochñapaʼ att̃och secuerr oʼch senterra eʼñe cohuen.
19 Ñehua, allohuen ñeñt̃ poʼñoc̈h atarr nemorrentenapaʼ c̈hocmach eʼñe cohuen noct̃apeʼchaterranet ñerraʼm esempo at̃pareʼtennet. Ñam̃a errot̃eno allohuen ñeñt̃ nemorrentena oʼch necoñchach mameʼ, t̃arraña ñeñt̃paʼ eʼñe ñocpueta allochñapaʼ att̃och oʼch alla cot̃apeʼcherret cohuen nocop, oʼch alla ameʼñerrnet huomenc.
20 Señochepaʼch ñeñt̃chaʼ atet̃ netmaʼntaterrsa. Napaʼ atet̃chaʼ nepena ñerraʼmrrat̃eʼ eseshaʼ ñeñt̃ c̈hocma c̈horeʼtets yetarrot̃. Ñerraʼm eseshas seʼmapuerrnan neñoñ ñam̃a ñerraʼm setoram̃penen, nañapaʼ oʼch nebeʼt̃os all, allñapaʼ oʼch yerrallmeʼchen parro.
21 Ñeñt̃ metanaʼtueʼ allohuen paʼnamen topateñtsoc̈hno ñeñt̃ ama nepuerram̃perraye, ñetñapaʼ nemnatanetchaʼ oʼch am̃chaʼtaret̃tapreterrnet eʼñe all neconaño. Eʼñech att̃et ñerraʼmrrat̃eʼ na, napaʼ eʼñe nem̃tanaʼtua allohuen paʼnamen topateñtsoc̈hno. Ñeñt̃oʼmarña napaʼ naʼm̃chaʼtaret̃tapreteña Nompor eʼñe all poʼconaño.
22 Ñeñt̃ eʼm̃ñoteneʼ añ ñoñets c̈hapanetepaʼch pueyoc̈hreto ñeñt̃ atet̃ neñotatenanet na Necamquëñot̃ ora allohuen ñeñt̃ pameʼñeñot̃et apc̈haʼyenet allemeñ anetsoʼmar.’ ” Arrpaʼ allohua ñeñt̃ atet̃ ot laodiceoʼmarneshacop.