4
Fwina suialag gawig bite sospen la go
1 Afa kagel mas enag gafugag yiskosig mo asa God kam aflafenigim afa enag gafugag kagelim faig.
2 Afa afwanfeg nihe afa nihe meagam sa go ena ka enam masig fatig. Afa kagel mas elim mwakwaligoni afa Godna mom waike algana sihifi. Afa kagel Godna nof la afohiegim asa ka ambala nufunam mo sihig afa enag ogfug kagel haig el maia. Asa mungwali el anwenafig kagel eba nufunam el.
3 Afa kagel Godna suialag mo sihiafug. Afa mingnag el enaig esogog enag mo mas ambala feg mo. Afa el asa suwi lagig mina la patalfuia afa ehengelim mungu enag mo mas ambala fenig mo.
4 Afa el mas Godim olug oniginag mo asa Satan, hwa bite nai god, ehena onigigim sikulufenag asa ehe mas Godna suialag mona ombusug nangui. Afa enag ombusug suialag mo nai blog eba Kraisna ombusug afa eheba God i mungwalofug ahfeg.
5 Afa mo ka sihig mango kagelni mo mo eba Sisas Kraisna mo asa ehe Ainiyag feg. Afa kagel Sisasim kwefugum asa kagel nengelni gafugag el fig.
6 Afa God enaig esog, “Sa ma ombusug ahkauminefei afa sikulufegim filafetig.” Afa ehe bigelni olugim ombusug fenigbi asa bigel Kraisna nofbusugna ombusugum nangugim afa Godna ombusug nemugim anwenafi.
7 Afa Sungwabugni gawig fwina suialag nemug bigel nai yi go afa bigel ofenaiba bite sospen. Afa enag ogfug Godna kigmog kwania eba mango kagelni mo.
8 Afa haig haig kinig bigelim pugunim afa enag kinig mas bigelim filaiti. Afa maia big enaig esogog, “Haig big esefi?” Asa bigel mas enam yiskosi fwahi.
9 Afa el bigelim amtakwalig esegonigbi asa God bigelim mas nangwagi fwatig mo. Afa bigelim kwagaitifigbi asa mas bigel pigig mo.
10 Afa el bigelim wahkig ona kwagiklaiti asa Sisasim esini. Asa Sisas bigelim wasneinig sa ma el ehena nofkikenagim bigel nai yi nangug.
11 Afa bigel Sisasna el figbi afa maia bigel nofkikena afohieba angoluwag el ona bigelim kwagaitifi asa mas bigelim kagfugonig mo. Asa bigelni auwiaug elig Sisasna wasneig nofkikenagim ambala ogfug.
12 Afa eba enaig eseg maia kagel Godna gafugag la afohieba asa lahag kagelim muhla fenig asa nofkikenagag eba nengelim faig.
13 Afa Godna buk la el enaig ginofena “Ka Godim olug oniginag asa ka sihig.” Afa kagel mungwalofug gwenaig olug onigifig asa kagel sihi.
14 Afa big anwenafig God Ainiyag Sisasim pese ilafo fatigba asa big Sisasna el fig asa God bigim gafa ilafonam afa nengel mi kagel mi asa bigim mungwali wankanam asa big ehena nof la laskuhlafe.
15 Afa enag haig haig kinig kagel nai yi pugunig eba enag nengelim kwaganigim. Afa Godna esmunagim kwaganig kaksag el nai yi puguiakagba asa fwina kaksag el Godim suialag onig asa enag Godna unehlagim fingi fig.
16 Asa kagel Godna gafugagim mas yiskosig fwahi. Afa bigelni elig watiau ofe asa mungwali osuna bigelni sungwabug glaunai wasneig flafe.
17 Afa enag kinig kagel kahlig eba wetiti afa mas fwina gofi. Afa enag kinig kagelim numwehenugegim afa God i wahkig suialag hawag ahfegim. Afa enag suialag gag mungwali bitenai kinigim gofsenig.
18 Afa bigel mangwal asa nofna nangug mo asa big enam fwina onigig. Afa bigel mangwal asa nofna mas nangug mo asa big enam fwina onigig. Asa mangwalim big nofna nangug eba mwakwalig gohnam awaiefe. Afa mangwalim big nofna mas nangug mo eba wahkig wahkig gofife.