13
Apeꞌ ukup mimila enis amam nematawa endilisi
1 Iꞌi aeꞌ egawa ma iꞌi diga naninani epesi soloma enseli wapotiꞌ ma aeꞌ owaꞌ okom mimilas eseꞌasa okom igiambamas, basef aeꞌami falafumi atom siꞌi saha olef wata malef etini.
2 Iꞌi Ambal Buꞌunai Godi noseꞌe presen amamaga buꞌwami nefele ma ewalipasa basef Godi ma egawa okom hiami Godi mape mandamabahiꞌi hiꞌilam, ama egawa gawa hianai wapotiꞌ, ma embaleꞌefa God laꞌifiwi endilisi ma laꞌifiwi ma iꞌipama halafutagw mindikiꞌah mefeꞌ gani toꞌwan, eaꞌ aeꞌ owaꞌ okom ninila esis amam nematawa endilisi, aeꞌ falafuwei atowe.
3 Iꞌi aeꞌ eseꞌasa amamaga hiami aeꞌami hiꞌilama esis isima kwahusima hiahaom ma endaꞌ maol Godi iꞌi ahoꞌma enis epes sandaiwaꞌma Godi siꞌi sehe sofe nif egaꞌ. Eaꞌ aeꞌ owaꞌ okom ninilas eseꞌas opaf, eaꞌ hapaimi. Anona nemaf amamaga amama hiami ina migiambame, owaꞌetin.
4 Emi egafis ukup maila enis epes endilisi, esis sandaꞌ waf buꞌunai naꞌama. Esis ina mehip sagwamasa waf aonai esis sandaꞌmasanai, owaꞌetin. Esis sape satilis. Esis sati epes hiesi uwahipis sagiambamas. Esis ina kowalasa epes amamaga hiamisi, owaꞌetin. Eaꞌ ina safela agof asasimi atom, esis ina ukup maꞌi esis etis, owaꞌetin.
5 Esis ukup maimailas sape andeandeꞌ. Esis ina ukup mapoma amamaga asasimi endilisi, owaꞌetin. Esis ina ukup wandafum mehip, owaꞌ. Eaꞌ ina ukup mapoma waf aonai enis epes sandaꞌmasanai, owaꞌetin.
6 Esis ina sandanifel ma waf aonai ikiakanai, owaꞌetin. Esis sandanifel ma waf endilisinai buꞌunai atona.
7 Nimeguf hiami dondol esis sandaꞌ waf anama naꞌama. Esis ukup mape awanema maina nemaf sefaꞌ nimanimi luꞌwami. Esis sagiambama epes alifisi saloma epes isima ena laꞌifisa sagiambama esis etisi. Esis sombaleꞌefa God endilisi sape sehafana ma nigiambama esis soloma enis wapotiꞌ. Esis saitu laꞌifisa nimanimi matagamas.
8 Waf anama ukup maimaila enis epes endilisi, anama anona nemaf ina higililana, owaꞌetin. Eaꞌ waf anama Ambal Godi nafelapa ma mowalapa basef ananimi, anama anona nemaf higililana hiꞌilana. Presen anama buꞌunai ma epes sogawa saꞌi diga naninani, diga anama anona nemaf hiꞌilana. Presen anama epes sogawa ma waf Godi, gawa anama anona nemaf hiꞌilana wapotiꞌ.
9 Deiꞌ main, deiꞌ ataꞌ mogawa gawa tuꞌwanina atona. Presen anama Ambal Buꞌunai Godi nafelasa sowalapa basef ananimi siꞌi profet, basef amama wapotiꞌ ataꞌ tuꞌwanim atom.
10 Eaꞌ anona nemaf amamaga God okom naꞌi meataga migiꞌ endilisi motaga, nemaf anama amamaga amama deiꞌ motaga tuꞌwatuꞌwanim atuwasi hiꞌilam.
11 Fowaꞌ aeꞌ ataꞌ ape siꞌi awani aꞌi basef siꞌi awani. Aeꞌ amemeꞌma amamaga siꞌi awani. Eaꞌ nemaf anama ataga dambewe, akwaha waf anama fowaꞌ ape soꞌuwe andaꞌanai.
12 Deiꞌ mati amamaga mataga, eaꞌ ina mandawalap alihim endilisi, ataꞌ owaꞌ. Mataga siꞌi mapela embel mati ambal atona. Eaꞌ anona nemaf owagama nemaf dahandahama motaga, muti naep alihim. Deiꞌ ataꞌ egawa tuꞌwatuꞌwan atom. Eaꞌ nemaf anama egawa amama endilisi siꞌi God nogawa aeꞌ.
13 Deiꞌ waf wenifina nape, anama naꞌama. Waf mombaleꞌefa Kraisi naloma waf mope mohafa God, waf ukup maimailasanai. Waf anama wenifina. Eaꞌ naliꞌ endilisi, waf ukup maimailasanai.