3
Basef amam mumafi siosi
1 Basef amama endilisimi. Iꞌi emi aman niꞌi nope dembinai numafi esis Kristen sios, anan okom naꞌi maol buꞌunai endilisi.
2 Eaꞌ emi aman nope numafi siosi nope andeandeꞌ endilisi ma epes ina siti anona waf aonai ma anan, owaꞌ. Anan nosoꞌ nemataꞌw atotoꞌw. Ina neaꞌ embel nohaga nogaol, owaꞌ. Anan okom nopaina numafi alop ananinai andeandeꞌ. Anan nila okom buꞌunai atona nondaꞌ waf buꞌunai hianai. Anan okom niꞌi hiesi alupusi etis ananisi hiꞌilas noseꞌas gwaꞌaimi. Anan nope notaga tisa buꞌunai ma basef buꞌwami atom.
3 Ina neaꞌ embel laifimi hiami, owaꞌ. Ina okom wandafuna mehip, owaꞌ. Nondaꞌ epes saꞌosaꞌombemas. Ina nohas etin, owaꞌ. Ina okom niꞌiniꞌi ma otamba.
4 Anan numafi awasi wauluꞌmana andeandeꞌ eaꞌ nondaꞌ awasi ananisi sila basef ananimi ma sondaꞌ agel ananinai nope andeandeꞌ.
5 Emi aman owaꞌ numafi awasi soloma wauluꞌmana andeandeꞌ, anan ina notaga nope agilinai numafi sios Godi, owaꞌ.
6 Aman anama nataga Kristen dambanai ina nope dembinai numafi sios, owaꞌ. Naꞌama nosambala basef Godi nogaloꞌmana siꞌi nagaloꞌma aman aonai Satan.
7 Aman agel buꞌunai ma amam nematawa sololama Godi, aman anama notaga nope numafi sios. Iꞌi anan owaꞌ agel buꞌunai, anan ambal aona eaꞌ nofeꞌ nuwis esag anama Satani nofaꞌana.
Basef amama ma amam migiambama agufumi siosi
8 Eaꞌ naꞌama etina amam amama magiambama agufumi siosi, amam ukup mope andeandeꞌma maol amamunai. Amam ina miꞌi malogof biam, owaꞌ. Ina meaꞌ embel laꞌifimi hiami endilisi mohaga mogaol, owaꞌ. Eaꞌ ina mombasoꞌmas molomas mofaꞌ otamba enis epesi, owaꞌ.
9 Basef amama endilisimi fowaꞌ mandambahiꞌi deiꞌ mataga mandawalap alihim, amam mombaleꞌef laꞌifim. Eaꞌ basef mape opalef nomoni maꞌiami maꞌipam basef mihiꞌambamam waf amamunai ina aona, owaꞌ. Boꞌona.
10 Piliꞌ ataꞌ piti maol amamunai. Ama piti mondaꞌana andeandeꞌ, mope mondaꞌ maol siosi.
11 Eaꞌ naꞌama etina wauhiamam amamuwai ukup mopaiwa andeandeꞌma maol awau wandaꞌanai. Awau ina ondaha basefa enis, owaꞌ. Ope andeandeꞌ, ina weaꞌ embel wainim laꞌifimi hiami, owaꞌ. Dendel ondaꞌ waf buꞌunai atona.
12 Amam mandaꞌ maol siosi, wauhiamam amamuwai atoꞌw etin. Amom mumafi awo oloma awasi amamisi andeandeꞌ.
13 Amom mope mondaꞌ maola siosi, iꞌi mondaꞌ maol buꞌunai, nambimb mofaꞌ agof buꞌwami. Ama laꞌifim mowalapa basef buꞌwami, mihiꞌambas alihim amam mombaleꞌefa Krais Jisas.
Basef ofagema ma waf Godi
14 Endilisi aeꞌ aꞌi efeꞌmago ineꞌ mehip, eaꞌ deiꞌ ataꞌ andaꞌ basef amama mafoꞌmago ineꞌ.
15 Iꞌi owaꞌ efoꞌo etaga ulal, ineꞌ nitiago basef amama negawa waf anama esis sape andeandeꞌ ma wambota anama Godi. Wambota anama esis sios amam nematawa Godi ambal namunai napainai. Sios Godi siꞌi olaf laꞌifinai nandaꞌ basef endilisimi laꞌifimi.
16 Endilisi, basef amama ofagema luꞌwami endilisi. Mandambahoꞌ mape mafeꞌ mafeꞌ deiꞌ God nihiꞌambafam alihim. Basef amama naꞌama.
Anan nataga epen endilisinai nofaꞌ alop epesi nataga nandawalap. Ambal Buꞌunai Godi nihiꞌambapa ma anan aman buꞌunai nape andeandeꞌ. Amam ensel Godi matolona. Basef ananimi saꞌipasam mafeꞌma kantri naninani hianai amam nematawa hiesi sololama Godi sembaleꞌefana. Eaꞌ God nofaꞌana nalata heven nape nafifili ananinai.