3 JOHN
1
O asëꞌe nasi isio Gaius God-are ekaresia jabesi a duvahoho naro jasi örire jejamije. Na bogo ma-döëremuoho uehorovavoꞌi nasi dë vövöbajoꞌe ahoꞌo uehorovavajeje.
Isio na nege jasi sino hahoꞌohuꞌo muohuꞌo ma-mabëhe javojöro. Iae na gave jasi dë vövöbajoꞌoho avevejöꞌoho mae javoꞌego. Ëhesi bëhoho Christian ö muenoꞌëro rueromo uevareje: Gaius hu God-are jö mahemu ejahaje hö uevamu heromo nimoroho avohodeje. Ëho iae maeje. Majae ëhi ja God-are jö maho ejahëꞌe raromanueje. Mu göëni göënioho na ma-bisemu nimorohoꞌi aehu uevëꞌoho: John jasi Christian aboji harihuꞌohuro God-are jö maho ejahëꞌe raromaruë uevamu hejëꞌoho na nimoroho avohajeje.
Gaius-hu mu mae vaejamu John-hu rajahijade jöhoje.
Isio jero mabëhe biririvoromo Christian ö muenoꞌoho ajëmijanueje. Öre gö jioromo rovare Christian ariböviohuꞌo huë mae bojëmijanueje. Ëariböviohuro rueromo ekaresiae ahoꞌo uövuareje: Gaius-ro nosi örire huë mabëhe bojamuijade höjo. Röhu God-hu nimajëhi jaehu bövi biseꞌo jabumë ajëmiromo rëmöꞌöjamu örire vaꞌëꞌoho ëho iae mae jioꞌëꞌe. Ëhesi bëhoho God bogo ma uehorovarue aribövi jabesiriroho suvuoroho bogo ujuohëꞌe ëma riꞌöromo vaꞌëꞌejö Keriso-are jöho baeromo jijihoꞌiro. Ëhuni Christian aribövioho noro jabumë ajëmiꞌejo ëhuro no jabuꞌo bimuvoromo jö ma majëhijarue hesi muoho vaeröhëni.
Diotrephesꞌo Demetriusꞌo ë ae niöꞌi jabesi jöhoje.
Naro jasi ekaresia jabesi örire jö harihe jajivodeje. Jajivodoho Diotrephes hu böröme vaeꞌi nimëꞌëro nosi jöho bogo ejahuajeje. 10 Ëhuꞌëro jiëꞌëro na öꞌëꞌoho huhu vaejaje mu sisëho huruoho majëhiꞌejo ekaresiae ahoꞌo heromo uehorovoruomoröhego. Huro nosi jöho huotovoromo uëvajeje: John-mëro ëhi jiëꞌe mu sisëho vaejarue höjo. Hu bogo ëhemuoho ëꞌi Christian ö muenoꞌehu öꞌëꞌoho bogo rajëhiromo baejëvajeje. O ae göehu ajëmiꞌi nimëꞌoho huro ahëvoromo uëvajeje: Jemë ë aribövioho ajëmiꞌiëꞌe jëvaje roriꞌo vaꞌohëjo. Vaꞌoromo nadi ijoho Keriso rajahijarue osaroho ruerëjo.
11 Isio aehu mu sisë vaejaruëhioho nadi ëhioho vaeꞌi aꞌi mu ma vaejaruëhi ëhi vaene. Ae rahu mu mae vaejëꞌoho ëho God-are aribövie jioruome. O ae rahu mu sisë vaejëꞌoho jabu God bogo gavëꞌejö.
12 Röhu ae ahoꞌobëhe uvoruomajeje: Demetrius hu a mae höjo. Iae hu mu mae vaejaje aeje. Ae ahoꞌo hu garomo ëhi uvarueje. Iae noꞌo uvarueje: Hu a mae höjo. Röhu jaꞌo gavanueje no jö maemu majëhijego. Ëhuꞌëro Demetrius-are jö majëhijaruoho ëhuꞌo iae maeje.
Ijo tugohoꞌi jöhoje.
13 Na jöe ahoꞌobëhe jajivoꞌirodoho röhu bogo jajivoꞌejo. 14 Na nege ma-burëro öꞌoromo ja garomo jaꞌo naꞌo jöho majahirovoröhëni.
15 Huë mae hine. Ja huë baejavarue aganoho jaburo jasi örire jejamijö. O nasi aganoho ahoꞌo gemu gemu jejëmijode höne. Ahia minoꞌe.