14
Vavu hesirire vaꞌarue öroho Iesu jiaje jö Iesuhu jövadohoje.
1 Iae Iesuro hesi ijorajo ömoꞌömoho uëvadeje: Nadi nurunurumoromo uehore gö gö baeꞌi aꞌi God-are öroro mae uehorovoromo nasi örohuꞌo ëhuꞌo mae uehorovorëjo.
2 Ëhesi bëhoho nasi Vavu hesi osare röhoho ahoꞌobëhe jioꞌamajëjo. Ëhuni na ë vaꞌoromo jemëhu raromoꞌirarije röhoho avohëhoꞌejöjo. Naehu jövaje jöho bogo maehu jioꞌibejajo bogo uëꞌibejöjo.
3 Vaꞌoromo jemesi röhoho avohëhonugoromo vuonoröꞌö rueromo söjëvoromo nasirëro vaꞌejöjo ëhuro naehu hijajire jemëꞌo ë raromoꞌirarijego.
4 Naehu vaꞌoromo hiꞌirode öroho jemë iae gavaruje höjo.
5 Gavaruje höjamu Thomas-ro uavadeje: Bada jero ëhi uövuanuëjo röhu jaehu dinöꞌe vaꞌo hiꞌiranoho no bogo gavaruëjo. Ëhi jiëꞌoho ja diehiꞌoromo uövuanuëjo: Öroho iae gavaruje höjo.
6 Gavaruje höjamu Iesuro uavadeje: Mare vaꞌirarije öroho na jevajëjo. Jö ma gaꞌirarije öroho na jevajëjo. Darugo baeꞌirarije öroho na jevajëjo. Vavuohuꞌo gemu mae jëvojöro nëgëꞌiroho öroho na gemu jevajëjo.
7 Jemë na gevëꞌe jëvëꞌëro nasi Vavuohuꞌo gaꞌaꞌarujëjo. Jaruvoho aevoromo jemë ë A hesi bëhoho uehore baeromo gabe vaꞌaꞌarujëjo.
8 Gabe vaꞌaꞌarujëjamu Philip-ro uavadeje: Vavuoho röjahuijego no gavarëjo. Gavëꞌoho ëhuro no mae javuoꞌajëjo.
9 Mae javuoꞌajëjamu uavadeje: Philip na majae ëgobövie jemëꞌo hijëꞌe jevajëjo. Ëhuꞌoho ja diehiꞌoromo bogo avoho gevanuëjo. Ae rahu na gevëꞌoho nasi Vavuohuꞌo garuomaje höjo. Ëhuꞌoho ja diehiꞌoromo uevanuëjo: Vavuoho röjahuijego no gavarëjo.
10 Ja diehiꞌoromo bogo uehorovoromo uvanuëjo: Nöröro Vavu hesi dë vövöbajoꞌere jioꞌi Vavuohuro nöruare dë vövöbajoꞌere jiajëjo. Naehu jemë uëvaje jöho bogo nasi ëma uehorovoromo uëꞌi aꞌi Vavue nasi dë vövöbajoꞌere hijajohuro huro hesi muoho nasi dë vövöbajoꞌere vaejego na vaejaje höjo.
11 Na uëvode höjo: Naro Vavu hesi dë vövöbajoꞌere jioꞌi Vavuohuro nasi dë vövöbajoꞌere jiajëjo. Ëjöho heromo uvorëjo: Iae mae-ëjo. O jemë uvëꞌoho: Nöruare jöho bogo eni hö uvëꞌoho naehu vaejaje mu masijoho uehorovoromo uvorëjo: Nöruare jöho mae höjo.
12 Ave jöho na jö mae uëꞌiëꞌajëjo. Ae rahu na mae uehorovevëꞌoho naehu vaejajëhi jiëꞌe darugoꞌe muoho vaeꞌaꞌarujëjo. Röhu naehu vaejaje darugoꞌe muoho ma-jianovajoho uꞌemu jemëro darugoꞌe mu masijo maho vaeꞌaꞌarujëjo rabëni naro Vavu hesi örire vaꞌiramu.
13 O jemë rabe rabe Vavuoho nasi ihore ua gavëꞌoho naro ëhi vaejëhoꞌejöjo ëhuro Harihu nasi muoho garomo uvoꞌirarijego: Vavuoho böröme höjo.
14 No nöruare aribövie javuajë uvoromo rabe rabe ue gevëꞌoho iae na vaejëhoꞌejöjo.
God-hu hesi Aruꞌaho mëmiꞌiröhe jö Iesuhu jövodohoje.
15 Jemë na rajehijëꞌohuro nasi jögoroho ejehoꞌarujëjo.
16 Ejehoꞌiramu naro Vavuoho uaꞌiramu Ajëminövoꞌiröhe A göho bojëmiꞌajëjo huro rueromo jemëꞌo ma-ioroꞌioremu hiꞌiröhego.
17 Ajëminövoꞌiröhe Aho iae jö maemu barovaje Aruꞌahoho höjo. Saꞌarohemu uehorovarue ariböviohuro ë Aruꞌahoho bogo uehorovoromo simanoho bogo avoho gavaruëro jiëꞌëro ëhuni baeꞌiröhoho bogo eni jëvajëjo. Aꞌi jemëro hu avoho gavaruje höjo. Avevejöꞌe hu jemëꞌo hijajoho uꞌemu jemesi dëre abo hibe vaꞌaꞌajëjo. Iae ëhuni jemë gavaruje höjo.
18 Naro jemë rëmo vaꞌiramu jemë bogo sivuoho öbioho raromanovoꞌarujëjo. Aꞌiro na vuonoröꞌöromo jemesirire rueꞌejöjo.
19 Majae ma-bunemu barëꞌiramu saꞌarohemu uehorovarue ariböviohuro bogo geruomoꞌajëjo. Röhu jemëro iae geꞌaꞌarujëjo. Na hiemu hijajohuro ëhuro jemëꞌo daruge baeromo raromoꞌarujëjo.
20 Ëho majaho rueꞌiramu jemë garomo uvoꞌaꞌarujëjo: Nörö hesi Vavu hesi dë vövöbajoꞌere jioꞌi no nöruare dë vövöbajoꞌere javuoꞌi nörö nosi dë vövöbajoꞌere jiajëjo.
21 Ae rahu nasi jögoru baeromo ejehëꞌoho ëhi jiëꞌe ariböviohuro rajehiruomaje höjo. Rajehijëꞌoho nasi Vavuohuro jabumë rajëhiꞌajëjo. Rajëhiꞌiramu naꞌo ë aribövioho rajëhiromo vaꞌorahoro röjahirovoꞌejöjo geruomoröhego.
22 Ëhi uëvamu Judas-ro bogo Judas Iscariot aꞌi Judas göhuro Iesu uavadeje: Bada ja diehiꞌoromo nosi örire gemu jasi arijoꞌarije röjahirovoꞌi saꞌarohemu uehorovarue aribövi jabesi öriroho bogo röjahirovoꞌiëꞌanuëjo.
23 Bogo röjahirovoꞌiëꞌanuëjamu uavadeje: Ae rahu na rajehijëꞌoho ë ariböviohuro nasi jöho ejehoruomoꞌajëjo. Ejehoꞌiramu nasi Vavuohuro jabumë rajëhiromo huꞌo naꞌo öꞌoromo jabuꞌo gemu mae ariꞌejarëjo.
24 O ae rahu bogo rajehijëꞌoho nasi jöho bogo ejehoruomaje höjo. Jemë hejaruje jöho bogo nasirehu jioꞌi aꞌi Vavuehu remöꞌöjamu rovode a hesi jöho höjo.
25 Na jemëꞌo hijëꞌi ë jöho majëhijëꞌe jevajëjo.
26 O Vavuohuro jemë Ajëminövoꞌiröhe Aho ë hesi bëhoho Vavu hesi Aruꞌahoho nasi ihore nugöꞌöꞌiramu huro jemë bövioho biseꞌoho röjëhiromo simanoho huotovëhoꞌiramu naehu majëhijode jöho uehorovo barëꞌarujëjo.
27 Nasi huë maho jemesi örire bojëmijajëjo rëmo vaꞌiëꞌëro. Saꞌarohemu uehorovarue ariböviehu huë ma bojëmijaruëhioho na bogo ëhioho bojëmiꞌi uhohuꞌo bojëmijajëjo. Nadi nurunurumoromo juhuonivorëjo.
28 Mamiꞌe jemë hejarije höjo naro uëvamu: Na vaꞌejöjo. Röhu na vuonoröꞌöromo jemesirire rueꞌejöjo. Jemë na avoho rajehiꞌibejarijëjo nasi Vavu hesirire vaꞌirode jöho heromo nimorohoꞌibejarijëjo Vavuehu na iosiremiromo börömo jiajohuni.
29 Avevejöꞌoho ë muoho bogo vaejëꞌe röhu urimo na ma-majëhijëꞌe jevajëjo ëhiꞌego garomo evare mae uehorovoꞌirarijego.
30 Röhu na bogo majae ëgoꞌoho jemë jöho majëhiꞌejöjo ave saꞌare Sisë A Börömoho rueꞌego ëhunivo. Röhu hu bogo nasi bövioho jiëꞌëro hu jöho bogohöjo.
31 Röhu na nege saꞌae ahoꞌo jaburo garomo uvoruomoröhego: Nöröro Vavuoho iae rajahiromo Vavuehu jö bojamijadëhi nöröro ëhi ëꞌaje höjo. Ahia minoꞌëjo. Riꞌöhego no vaꞌarëjo.