4
Noehu uehore gemu baeromo nimorohoromo mu maemu uehorovoꞌiröhe jöhoje.
Ëhuni nasi ö muenoꞌe Badare öroro ëhi uehorovoromo biririvoromo riravore. Na jemesi örire dë vövöbajoꞌe ahoꞌo uehorovëvego jemesi jöëni vavaenegajeje. Na jemesi jöho uehorovoromo huë mabëhe jevëꞌëro nimoroho avohajeje. Ëhuni na jemesi örire uëve: Nasi ö muenoꞌe biririvoromo riravorëjo.
Naro Euodia jasi örire uave. Syntyche jasi örire uave. Badare magonahe gemuoho jëvaje ëhuni uehore gemu baere. Röhu ja naꞌo mue gemuoho mae vaejanue ae javëꞌego naro ave jöho jasi örire uave. Ëmagonaho niöꞌioho ajëmijego gemuoro avoho ariꞌiro. Ëhesi bëhoho ë magonahoho jaburo naꞌo gemu mae bimuvoromo God-are jö ma hesi muoho biririvoromo vaejareje. Jaburo Clementꞌo naꞌo mu vaejarue aribövi ioroꞌiorohuꞌo ëhi ëꞌareje. Jabesi ihoho mae raromemu raromoꞌiröhe öꞌidöre jiaje surire ë jajivoꞌamëꞌeje. Ëhuni ë magonaho niöꞌioho ajëmine.
Röhu jemë ae ahoꞌo Badare ae gemuoho jëvaje majae ëhi nimorohonövore. Röhu maho uëve: Nimorohorëjo.
Ma-sanuovoromo ae ahoꞌobëhe jabesi öroro huë mae baejëvore. Badahu rueröhe majaho dunove. Bövi biseꞌo rovëꞌiroho nadi nurunurumoꞌirögoro aꞌi God-hu ajëmijajoho huë mae uavëꞌi ëninamiromo jemesi huë vavaenoho hesi öroro majahinövore. Jemëhu ëhi ëꞌëꞌoho God-are sanuꞌe mahuro noehu uehorovarue sanu iosiramijajohuro ëhuro jemesi uehoroho dë vövöbajoꞌoho duohëhoꞌiramu sanuovëhoꞌëꞌe Iesu Kerisoꞌo gemuoro jëvëꞌëro.
Nasi ö muenoꞌe ijo tugohoꞌi jöho uëꞌiëꞌe. Aviëhi jiëꞌe muohemu uehorovore. Jö mae ataruohuremu a duvahonöꞌe vaejarue muemu ahorirëro vaejarue muemu ajiro raromarue muemu dë vuëvoꞌe muemu aji maꞌe muemu huë baejëꞌe muemu mu rabe rabe ma-maemu jiajoho rabe rabe noehu mae uehorovaruoho ë muohuremu uehorovonövore. Naehu rabe rabe röjëhijamu o vaejamu jemëhu garomo heromo baejarijoho ëhi jiëꞌe muohuremu vaenövore. Ëhi ëꞌëꞌoho God jö sanuꞌe bojamuijaje ahuro jemëꞌo hiꞌëꞌe.
Philippi ekaresiaehu huë baeromo Paul-are örire suvuoro bamahamu Paul-hu mabëhe uëvade jöhoje.
10 Badaꞌo gemuoro jevëꞌego na nimorohevo avohe ë hesi bëhoho jemë majae bisemu ëgoꞌo bogo ajemijarijoho avevejöꞌe röhu maho uehorovevoromo huë baejevarijohuni. Iae jemë na uehorovevobe rovarijeje röhu huë baejevoꞌirarije öroho bogo biroharijeje. 11 Na bogo uve: Jemë nasi huë vavaenoho bogo gevanovarije höromo bogo ëhunioho jajive. Aꞌi huë mae o huë sisë rovëꞌoho na uvajeje: Na rabe rabe jevajoho iae eni höjo. Ëhi jiëꞌe uehoroho iae na avoho baejëꞌe jeve. 12 Bövi biseꞌo bogo eni jevajoho o marohëꞌe mae jevajoho iae na gavëꞌe jeve. Eni daꞌuegëꞌoho o hömevëꞌoho bövi biseꞌo marohëꞌe mae jevëꞌoho o inömo rumoꞌe jevëꞌoho o diehi jevëꞌoho naro uehorovoromo uvajeje: Na iae eni jevajëjo. Ëhi jiëꞌe uehoro hesi bëhoho birohëꞌe jeve. 13 Keriso biriri bojemaje ahuro ajemijëꞌëro ëhuro mae o sisë rovëꞌoho na biririvoromo namiꞌirodoho eni jeve.
14 Röhu nasi huë vavaeni ajemijarijoho ëho iae mae ëꞌarijeje. 15 Röhu Philippi amo rajohumë jemëꞌo iae gavarijeje. Na urimëꞌi aevoromo Keriso-are jö ma majëhibe juvodevare evare naro jemesi saꞌaho Macedonia vuonugoꞌi vaꞌamu ekaresia ioroꞌioroho bogo ajemiꞌi jemëremu ijo bajo suvuoroho bojemiromo huë maho mana baejarijeje. 16 Röhu jemesi saꞌaho bogo vuonugoꞌi aꞌi Thessalonica amore vaꞌo hijamu evare na bogo eni jevoꞌego jemëro suvuore nasi örire nugöꞌöꞌi arinövarijeje. 17 Na bogo suvuoroho nahoromo ëhunioho uëꞌi aꞌi na nege jemëro suvuore bojemego ëhuro ijonö God-hu suvuoro mana jemesi örire bojëmiꞌiröhoho bövi mae jiëhoröhego. 18 Epaphroditus-ro jemesi suvuoroho nasi örire barovadeje. Ëhuni uëve: Jemesi suvuoroho iae na baejëꞌe jevajëjo. Iae eni höjo. Marohëꞌe mae höjo. Jew rajehu mi God-are örire suvuoro bojamiꞌi anoromo vënire buejahoꞌego God-hu ridi heromo vuëvonövadëhi jemesi suvuoroho ëhi jie. God-ro garomo suvuoroho nimoromo huë mae jiajeje. 19 Röhu jemë rabe rabe bogo eni jëvamu gëvëꞌoho jemë Iesu Keriso-are ae gemuoho jëvëꞌego nasi Vavuohuro iae ajëmiꞌëꞌe hu daruge aje bövie biseꞌe bogo biseꞌo vaduꞌoho jiëꞌëro. 20 Röhu na nege God nosi Vavu hesi ihoho ioroꞌiore gemu dö maro jiobe vaꞌoröhego. Iae mae.
Paul-mëhu ijo tugohoꞌi jejëmijare jöhoje.
21 Röhu God-are aribövie Iesu Keriso-are aganoho ahoꞌobëhe jejëmijajë uëre. Christian ö muenoꞌe naꞌo gemu mae arijaruohuro jemesi örire jejëmijö. 22 God-are aribövie ahoꞌobëhe jemë jejëmijö. Röhu Rome a börömo hesi osare raromarue God-are aganoho jaburo bövi maho jejëmijö.
23 Bada Iesu Kerisoro jemesi aruꞌahohuꞌo jioromo huë baeromo ajëminövoꞌëꞌe. Ahia minoꞌe.