12
Armatok Kwani Debeiri Yur
1 Aria shatik um enen dodogowinyi abom kak um shutrin aria shudukemesh shukri enen dodogowinyi arpen hurukatin um nyutogur. Enyudok kak nyanakwarum nyatogur nyape iruhw heven. Aria nyatograri iri kak douk enyudok. Onok armatok kwape aria okwok kwashok nyumnahin aun kabi douk rupah um. Aria wabin nape shakameruh um okwokwiruh yeriweruh. Aria kowem anat yoputi hat douk 12-poreiyu unib wapenyat iri kabi douk debeiwori otu wogwem iri um okwokwig barag.
2 Aria okwok douk kwonarahaen aria kwape kwabirak um kwakri kwubanuh aria kwareh kwahwar debeg.
3 Aria wata shopunek, kupainyi dodogowinyi kak nyanakwarum nyatogur nyape iruhw heven. Aria nyatograri douk enyudok. Enen dedebeinyi owishiborinyi mahin kabi douk anar takweiri yur um nyanakwarum nyatogur nyape. Enyen 7-poreigos baragos seiren aria 10-poreiruh shuworuh hakihen barag. Aria 7-poreig yopugwi hatog douk debeimi atum hogwem iri gwatem atug atug um enyenyigos baragos.
4 Aria enyen nyakwu enyenyip honup nyogat unib douk wape atugun um onok outuk iri gani iruhw utag aria nyawasho wagrukuki atap. Aria bio outumeb um unib wapeik iruhw utag. Aria enyen nyanak nyeyotu apahwik um okwudok armatok douk hurukatin um kubuki batowin iri um nyakri kadak okwok kwunyubuki atin aria enyen arigas nyunyuhur nyunyoh.
5 Aria okwok kwabanuh kwabuki armanin batowin. Anudok arman kweipon ta nupe dodogowin atun aria ta nusuhw ainim butum aria nupe debeini um ihishmorim arpesh douk shape ihigos-morim nahobigos iri. Douk okwok kwanabuki aria eshesh shatrukwan sharan shanak um Iruhin um ananin debeinyi yopunyi wagitur douk anan napenyen iri.
6 Aria okwok kwaruwok kwanak um anabik wehigunum arpesh uwok um. Okwok kwanak um agundok douk Iruhin nenekagun-umok um kwunak kwupeum. Aria agundok eshesh ta shupe shutaurumok kwupe 1,260-poreih nyumneh. Ehudok 1,260-poreih nyumneh douk shopunek atin um bishatin shuknish aria enen tukwanin kwarahos.
7 Aria debeihwi wanohw hwatogur iruhw heven. Enyudok debeini Iruhin ananin ensel douk nyanahwar um Maikel iri nyani enyenyish enselahos shabo arudok debeiri yur. Aria arudok yur shopunek rani ararish yoweishi enselahos wata shatanam shawanam wanohw.
8 Douk eshesh sharpak aria yur rani ararish enselahos madae dodogowish uwe. Aria eshesh madae anabik uwe um shupe iruhw heven um.
9 Aria Iruhin ananish enselahos shasuhwesh shawashesh shabuhi atap. Arudok yur douk seiwok rape aria douk shopunek rape iri. Arar douk shahwaror um yoweini sagaben o Satan. Anan douk nape nenek rohw um ihishmorim arpesh douk shape agundok atap iri. Anan nani ananish yoweishi enselahos, eshesh douk showashesh shagruki agundok atap.
10 Aria eik yemnek anah debeihi mah. Aria enyudok arpen nyeyagwrehi debeihi mah gani iruhw heven iri nyakri,
“Douk agundok um Iruhin narap
matanamori mape wosik um douk nanaki.
Aria Iruhin neyabigap um anan douk dodogowini abom
aria ta nupe king um apak ihih nyumneh!
Aria douk Krais, Iruhin nagraehan
aria neshopokan nanakumori nurao arpesh iri douk
neyabigap um anan douk dodogowini
aria ananin big nyatogur deben.
Um maresh? Arudok yur douk reyotu rape renekumesh rohwin baraen eshesh Kristen,
rakrip apakin Iruhin nyumnah wab
rakri eshesh shenek yoweihi aih iri arar douk
Iruhin ananish enselahos shawashor
rakutukuk iruhw heven ragruki agundok atap.
11 Aria apakish ashukenyish owashish douk shagipesh Krais iri
shenek uhwinyumor.
Um maresh? Eshesh shape dodogowish um
enyudok Nugaen Sipsip douk
seiwok shaen nyagok iri enyenyibor owishibor
bani enyenyin adurin baraen douk eshesh shakripeshen iri.
Esheship urkwip douk por abom um shakri
shukripesh enyudok adurin baraen
aria eshesh madae urkwip purum shukri
shupe wosik agundok atap um uwe.
Aria shopunek, eshesh madae shunogugur um kupaishi arpesh douk
shakon agabus Iruhin iri shesh shugok um uwe.
12 Douk namudok aria ipak pape iruhw heven iri puni iruhw utag, ipak ta punadudareh.
Aria ipak pape atap pani youg iri eik yakri giha-umep,
ipak ta pumnek debeiri eriger.
Um maresh? Satan douk nagrukugu um ipak.
Aria anan douk juwehosin abom. Um maresh?
Anan nadukemesh um anan nupe nurahaen obi nyutob douk banab abom meyoh.”
13 Aria douk arudok debeiri yur ratik um eshesh shawashor ragruki agundok atap um, aria arar rape rahiyah okwudok armatok douk kwabanuh kwabuki nuganin iri.
14 Aria eshesh shokok biyesh debeishi kumunish kapraigiyohos um kwehuru. Aria okwok kwanadudareh kwanak gani wehigunum arpesh uwok um. Okwok kwanak agundok um eshesh shupe shutaurumok eshudok bishatin shuknish aria enen tukwanin kwarahos um arudok yur mare rok.
15 Aria sabaibari abar batograri ararit nokwat aria batogur banak. Ababar bagipeshok banak kabi douk worub batogur banak um. Um arar rakri kadak abrudok abar bunak aria buraok bunak bok kwugok.
16 Aria amnab bataurumok. Aria amnab puwarob banak tukwotukwan aria abrudok abar bagrukuk atap.
17-18 Aria arar juwehosir abom um okwudok armatok aria ranak um rakri runi ihishmorim okwokwish batowish aria barheshish shurpak. Eshesh douk eshudok ihishmorim arpesh douk shagipesh Iruhin ananin lo aria shakripesh Jisas ananin adurin atinyi baraen aria shagipeshen iri.