Baugenyum Enen Baraen Nyape Arpeshin Nupela Testament Iri
Aposel Amam aposel amam douk amudok 12-poreim douk Jisas nograiham aria nakam dadag aria neshopokam hanak henek ananin mour iri. Enydok nyeigur aposel douk shopunek shohwar Pol. Um maresh? Anan shopunek douk narao Iruhin ananin dadag aria nenek Iruhin ananin mour kabi amam 12-poreim aposel um. Enyudok nyeigur aposel douk seiwok eshesh shopunek showhar kupaimi Kristen shopunek douk henek Iruhin ananin mour iri.
Baptais Enyudok baraen nyakri eshesh Kristen shenekeh iri aih um sheshurokuh abar um. Baugenyum baraen um ehudok aih douk nyape 1 Pita 3:21. Arpeshin baraen apak makri shenek baptaisumesh um.
Bielsebul Bielsebul anan douk debeinari um sagabehos iri. Aria ananin kupainyi nyeigur douk Satan. Tik Matyu 12:24, 26, 27; Mak 3:22, 23.
Disaipel bilong Jisas Enyudok baraen disaipel nyakri eshesh Jisas ananish arpesh douk nanabreshesh um ananin baraen nyani aih um shupe um shusuhwen dadag shugipeshen namudok atin iri.
Ensel Eshesh enselahos douk madae arpesh meyoh uwe, uwok. Eshesh kabi douk yopishi mishish um. Eshesh douk Iruhin nenekesh um shunek ananin mour. Aria sabaihi nyumneh anan apa neshopokesh sharauri ananin baraen shanaki. Aria eshesh apa shataurum Iruhin ananish arpesh wosik abom. Tik Hibru 1:14.
Farisi Amam Farisi amam douk eshesh Juda esheshim debeimi. Amam douk hakri wosik um hunek lotu aria hagipesh enyudok lo seiwok Iruhin nakaguk Moses enyi hasuhwen dadag hagipeshen. Seiwok amamim yamehem douk henek skulumesh um amamin lo atin. Aria amam Farisi douk hagipesh enyudok baraen abom aria hakri enyudok lo douk kabi Iruhin ananin baraen um. Amam hagipesh amam profet hatogur hagiguk um Moses ananib nyutab iri amamin baraen. Amudok profet douk howem Iruhin ananin baraen douk anan nakripamen iri nyetem buk.
Glori Enyudok baraen glori nyakli Iruhin ananin dadag nyani agundok anan natrugun abom um.
Haus lotu bilong ol Juda Enyudok baraen haus lotu bilong ol Juda, baugenyum douk nyakri eshesh Juda shape sheyagwreh baraen ogwi urusag.
Hel Enyudok baraen hel nyakri yowiburi wabur nyih hapenyabur iri.
Israel Jekob, douk Aisak ananin nuganin narao namunyi nyeigur Israel (tik [Genesis] Stat 32:24-30; 35:9-15) arigaha kweipon ananim 12-poreim nugamim hakwarum eshudok ihishmorim arpesh Israel hatogur ihishmorim arpesh Israel esheshim yamehem popehem. Seiwok abudok nyutob eshesh Israel shanak shape abudok amnab Kenan abi nyutab, eshesh shohwar esheshig nahobig douk Israel. Aria arigaha abudok nyutob King Solomon natogur aria nagok abi nyutab eshesh Israel shanodiyagor shatogur biagos nahobigos. Abudok nyutob, abudok amnab hape not um shahwarab Israel aria kupaigi nahobig gape saut iri shohwarag Juda. Aria arigaha eshesh Asiria shanaki shanunu agudok nahobig aria shorao eshesh Israel shanak kupaigosi shokugosi nahobigos aria eshesh Israel esheshig nahobig yoweg abom Jurug. Aria eshesh eshudok arpesh shape shokugi nahobig Juda iri eshesh shopunek enesh Israel. Namudok aria abudok nyutab eshesh Asiria shanunu eshesh Israel abi, enesh arpesh shape Juda iri shahwar esheshig shokugi nahobig enyudok nyeigur Israel.
Jordan Worub Jordan bape agudok nahobig Israel eshesh Juda shape um. Abudok worub douk Jon nenek baptais um Jisas um.
Katim skin Ehudok aih um amam Juda hatah yegeshiweruh um douk hape kabi enen kak um enyudok adurin atinyi baraen kontrak Iruhin nakrip eshesh Israel en. Amam hatah amamim nugamim amamiruh yegeshiweruh abudok nyutab amakeniyu womubuki aria 8-poreih nyumneh hadiyomuk um.
Kingdom bilong God Enyudok baraen nyakri Iruhin atun nape debeini um ananish arpesh nataurumesh um. Tok Pisin nyakri kingdom bilong God o kingdom bilong heven. Aria baugenyum baraen nyakri Iruhin nape debeini um ananish arpesh nataurumesh um. Aria douk enen baraen um kingdom bilong God baugenyum nyakri iruh heven um, apak Arpesh meyagwreh Arpeshin baraen iri ta mukri agundok Iruhin ananish arpesh shape um.
Kontrak God i wokim Enyudok baraen nyakri adurin atinyi baraen kontrak Iruhin nakrip eshesh Israel en. Enyudok baraen nyakri dodogowinyi baraen Iruhin nakrip eshesh Israel um shumneken ari shugipeshen. Aria Iruhin ta mare nukri uwok um enen kupainyi baraen. Enyudok atin baraen ta nyupe abom ihih nyumneh.
Krais Enyudok baraen Krais baugenyum douk bien baraen. Enen nyakri nyeigur kabi douk anan arman ananin nyeigur o enen kupainyi nyeigur shopunek um. Aria enesh shohwar Jisas shakri Jisas Krais. Aria enen nyakri Mesaia, anudok arman seiwok Iruhin nograihan neshopokon nanamori nurao arpesh iri. Anudok arman douk nanaki apakib amnab um nurap mutanam mupe wosik abom iri.
Pikinini sipsip Enyudok baraen nyakri nugan sipsip kabi sabaishi sipsip eshesh Juda esheshim pris haesh henek ofamesh haka Iruhin um nukweshih esheshish yoweishi inahos. Aria baugenyum enyudok baraen pikinini sipsip douk nyakri Jisas Krais atun douk nenek ofa nakan anan kanak Iruhin atuh nyumnah meyoh um nator apakish yoweishi inahos menekesh iri.
Ol man Livai Baugenyum enyudok baraen um amam Livai douk nyakri namudok. Apudok awirop Livai douk anudok atun yamenon Livai nokwarumom iri. Aria Livai anan kanak douk Jekop ananin nuganin. Seiwok amam Livai henek Iruhin ananin mour heyoh atudok selit urupat eshesh Juda apa shawish shape shenek lotuatari. Aria eshesh Juda shanak sharao esheshig nahobig Israel um, amam Livai henek mour hataurum amam pris numun Iruhin ananit debeiti urupat gani Jerusalem. Aria anam hataurum amam pris ihigun um eshesh Israel shape um shopunek.
Maunten Oliv Enyudok baraen nyakri anag mihig sabaisi rowos sonohwarum oliv iri setu um. Agudok mihig douk gape harakatin um Jerusalem.
Mirakel Enyudok baraen nyakri Iruhin atun neneken iri mour. Arpesh madae dodogowish um shunek anyudokumori mour uwe, uwok. Iruhin atun apa neneken.
Pasova Seiwok eshesh Juda shape shakamum eshesh Isip shenekumesh mour meyoh. Eshesh Juda shape shenek debeinyi mour roubi nyutab. Arigaha aria Iruhin naturish nenek gihaumesh aria nakripesh dodogowinyi baraen eshesh Isip um shukwashihesh shukutishuk shunak meyoh. Aria eshesh Isip shakkri uwok um shumnek Iruhin, aria Iruhin nakrip ananish arpessh eshesh Juda um eshesh shokusi awiros sisig atin shubo atin atin nugain sipsip aria shuwayok owishibor wobur wobur witog um esheshig urusag. Iruhin nakri shunekesh namudok um abudak nyutab ensel nyanaki nyobo eshesh Isip esheshim nugamim hugok aria nyunaki nyutik abrudok owishibor aria nyishagrakuk eshesh Juda esheshim nugamim nyunak aria amam hupeik wosik. Aria enyudok ensel nyanaki nyeshagrakuk Juda esheshim nugamim aria nyanak nyabo eshesh Isip esheshim sharik shamubuk iri nugamim hani esheshish mahish sharik sheshubuk iri shagok. Aria Iruhin nataurum eshesh Juda shapeik wosik. Aria douk eshesh shape urkwip porum agundok seiwok Irukhin nataurumesh um aria ihishmorim atin atin kwarahos eshesh apa shenek anagun debeiguni worigun. Aria ahudok nyhumnah shenek worigun ahi douk shohwaroh Pasova.
Pentikos Ahudok nyumnah Pentikos, baugenyum baraen nyape namudok. Eshesh Juda shenek anagun debeiguni worigun ahudok nyumnah shohwaroh um Pasova iri. Tik baraen nyape iruh douk nyakri enen baraen um Pasova. Eshesh shenek agundok worigun arigaha 49-poreih nyumneh hanakuk, aria hakri um 50-poreih ahi, ahudok nyumnah Pentikos hatogur. Ahudok nyumnah eshesh Juda shanadudareh shenek anagun debeiguni worigun um shanadudareh um Iruhin nataurumesh wosik aria sabaiguni worigun natogur. Tik baraen nyape Kisim Bek 23:16, 34:22, Wok Pris 23:15-21; Lo 16:9-12. Ahudok atuh nyumnah Pentekos eshesh Kristen sharik sharao Iruhin ananin Mishin kabi baraen nyape Aposel 2:1-4 nyakri um.
Pikinini bilong man Enydok baraen pikinini bilong man nyakri anudok arman douk natogur adurinyi arpen iri. Aria anam seiwokimi profet douk harao enyudok nyeigur, aria baugenyum enydok nyeigur douk nyakri Jisas Krais atun. Enyudok nyeigur nyakri anan natogur adurinyi arpen kabi apak arpesh um. Aria nyakri anan douk Mesaia, seiwok Iruhin nograehan neshopokan nanamori nurao arpesh iri. Tok ples Inglisin baraen o Grikin baraen douk eshesh shobeshukuk baugenyum baraen um enyudok nyeigur. Aria Arpeshin baraen douk nyatogur yopugunum. Enyen nyakri, “Jisas nakri Eik yatogur adurinyi arpen iri.”
Profet Amam profet henek Iruhin ananin mour hape hakripesh ananin nyonobeshuk iri baraen ihishmorim arpesh. Iruhin ananin Mishin nyawisham nyeyabigam aria hadukem enyudok brain nytem Iruhin ananik kwarik iri Buk.
Sadyusi Amam Sadyusi, amam douk anam Juda. Amam hakri wosik um hunek lotu um Iruhin aria hasuhw Iruhin ananin lo seiwok anan nakaguk Moses iri dadag hagipeshen. Aria enen kupainyi baraen nyetem Iruhin ananik Buk iri amam madae husuhwen hugipeshen uwe, uwok. Amam hakri uwok-umen. Amam hakri shagok iri arpesh ta mare shikitak shupe, uwok. Amam Sadyusi madae sabaimi uwe, kwaroim meyoh.
Saveman bilong lo Saveman bilong lo nyakri amam henek skulumesh um Iruhin ananin lo iri. Amam saveman bilong lo, amam douk eshesh Juda esheshim debeimi. Hani amam Farisi aria amam Sadyusi. Amam hadukemen wosik abom enyudok lo seiwok Iruhin nakguk Moses iri nyani enyudok ihinyumorim baraen nyetem Iruhin ananik kwarik iri Buk Olpela Testamen, aria henek skulumesh ihih nyumneh.
Tempel Enyudok baraen tempel nyakri Iruhin ananit debeiti urupat tatau Jerusalem iri. Sabaishi Juda apa shanak shenek lotu um anan atudok urupat. Aria shopunek, eshesh apa shenek ofa um eneshenesh eshudok shoko Iruhim.
Tok piksa Enyudok baraen tok piksa nyakri enyudok wobu woburen douk baugenyum baraen madae nyutogur wosik uwe. Seiwok Jisas nenek skulum sabaishi arpesh nakripesh wobu woburen atin baraen. Aria anan nani ananim 12-poreim atum hape um, anan apa nakripam baugenyum enyudok wobu woburen baraen. Um maresh? Amam shopunek madae hudukemen wosik uwe.