8
Jisas Douk Apakin Debeini Pris Abom
1 Aria baugenyum um enyudok yakripepen iri baraen douk namudok. Apak douk anan yopuni debeini pris abom nape. Anan douk nape agundok yopunyi rogur ehahum anudok dodogowin atun abom iri king ananin wagitur nyeyotu um gani iruhw heven.
2 Douk nape aria nenek enyudok mour pris numun um atudok Iruhin ananit atut abom urupat gani iruhw heven. Madae enesh arpesh shurukat uwe, uwok. Iruhin anan meyoh narukot.
3 Ihim-morim debeimi abom pris douk mour nyapenyam um hurao yopishi eshudok eneshenesh huko Iruhinesh. Eshudok douk arpesh sharaeshuman iri aria shopunek huweh mahish hunekuman ofa. Namudok aria anudok yakripep-umani iri apakin debeini abom pris, anan douk shopunek ta nurao enesh eshudok nunek ofamesh nuko Iruhin.
4 Douk ta anan nupe agundok atap akure, anan ta mare nutogur anan pris, uwok. Um maresh? Amudok anam pris douk hape aria hape henek ofa um eshudok eneshenesh hako Iruhin kabi lo seiwok Iruhin nakoguk Moses enyi nyakrium.
5 Amam douk henek enyudok mour pris numun atudok lotuit urupat tatao agundok atap iri. Atudok urupat douk aborir meyoh um atudok adurit urupat tatao gani iruhw heven iri. Douk namudok aria abudok nyutob Iruhin nakrip Moses um nurok atudok selit urupat obi nyutob, anan douk nakripan dodogowinyi baraen nakri, “Abudok nyutob nyukri nyurok atudok urupat obi nyutob, nyak ta gamo nyudukemesh nyunek ihishmori eshudok wosik atin nyugipesh arudok aborir kabi yeyabigen gani iruhw yoduhw um.”
6 Aria douk enyudok mour pris Jisas neneken iri, enyen douk dedeben abom nyeshagrakuk agundok atapimi pris heneken iri mour. Shopunek enyudok Iruhin neneken iri namunyi abom adurin atinyi baraen kontrak douk nyeshagrakuk abom nyarik iri. Enyudok namunyi kontrak douk Jisas nape orokohun um apak mani Iruhin aria nape nataurumap. Enyudok namunyi kontrak douk nyeshagrakuk abom nyarik iri. Um maresh? Baugenyum enyen douk nyakri adurin atinyi baraen um apak ta mupe wosik abom.
Enyudok Namunyi Adurin Atinyi Abom Baraen Kontrak Douk Nyeshagrakuk Abom Nyarik Iri Kontrak
7 Douk ta nyarik iri kontrak yopin abom akure, aria Iruhin ta mare watak nukop namunyi uwe, uwok.
8 Aria Iruhin natik ananish arpesh aria nakri yoweishi inahos douk shapenyesh. Aria nakri namudok, nakri,
“Eik Debeiwe iri douk yakri,
‘Nyutob ta butogur um eik ini eshesh Israel
aria Juda ta mupe atugun
aria mubo baraen um eikin namunyi adurin atinyi baraen kontrak.’
9 Enyudok namunyi kontrak
ta mare nyudukem enyudok seiwok yani esheshish popehesh yamehesh meneken iri, uwok.
Eshudok douk abudok nyutob yaraeshi agudok nahobig Isip aria yarik-umeshi manaki iri.
Yaraeshi aria madae shugipeshen wosik uwe
enyudok nyarik iri kontrak.
Namudok aria yatanam yekeshuk agab.
Eik Debeiwe iri yakri namudok.
10 Eik Debeiwe iri yakri kweipon anab butograri iri nyutob,
eik ta ini eshesh Israel
ta miyagwreh mubo enen eikin adurin atinyi baraen kontrak. Baraen enyudok,
‘Eik ta eiyur ihinyumorim eikin lo nyupe esheship urkwip
aria shopunek ta inyem nyupe numun esheshiruh aparuh.
Inekesh namudok
aria eik ta ipe esheshin Iruhin
aria eshesh ta shupe eikish arpesh.
11 Aria abudok nyutob, eshesh ta mare watak shukitak
shunek skulum um enesheshesh aturub warub um
o atup awirop um shudukemesh um eik Debeiwe iri, ta uwok.
Um maresh? Ihishmorim nyeiguhw wokeshi arpesh shuni
nyeiguhw shato iruhw iri ta shudukeme iri atish.
12 Um maresh? Eik ta inek gihaumesh ikweshihuk
esheshish shenekesh iri yoweishi inahos
aria mare watak urkum murumesh, uwok.’ ”
13 Enyudok baraen, Iruhin douk nakripap um enen namunyi adurin atinyi baraen kontrak. Aria namudok douk neyabigap um nakri nyarik iri kontrak douk apak magipeshen iri, enyen douk mour woken. Ipak douk padukemesh. Ihishmori eneshenesh seiwokishi jugwaishi eshudok, eshesh douk mour wokesh aria hurukatin abom um ta shunak shuwishuk.