3
Jon Douk Nenek Baptaisumesh Iri Nakripesh Iruhin Ananin Baraen
(Matyu 3:1-12; Mak 1:2-8; Jon 1:19-28)
Abudok nyutob Taiberias Sisar nape debeini gavman um Rom um 15-poreish kwarahos obi, Pontius Pailat nape debeini gavman um shokugi nahobig Judia. Aria Herot nape debeini um shokugi nahobig Galili, aria ananin wanin Filip nape debeini um shokugi nahobig Ituria iri Trakonitis. Aria Lisanias nape debeini um shokugi nahobig Abilene iri. Aria Anas nani Kaiafas hape debeimi pris. Aria douk abudok nyutob, Sekaraia ananin nuganin Jon nanak nape wehigunum arpesh uwok um aria Iruhin nakripan ananin baraen. Namudok Jon narahaen neyatarub warub bape hurukatin um abudok worub Jordan iri. Aria anan nape nakripesh um shukeshuguk agabus yoweishi inahos shutanam shukon aparuh Iruhin aria shunek baptais. Aria Iruhin ta nukweshih esheshis yoweishi inahos. Enyudok douk nyatogur nyagipesh enen baraen seiwok profet Aisaia nenyemaguk Iruhin ananik Buk iri nyakrium. Baraen nyakri, “Enen arpen nyape nyahwar gani wehigunum arpesh uwok um nyakri, ‘Gabeiman yah Debeini. Pugabeyoh hupe um anan nigimah nunaki um. Pushuragun ihigunum nabuhum atap iri. Aria yoduduruh hani mihigas shopunek ta pukorihogas subuh atap sukuh beriyaigas. Aria pugapesh hakukotomi yeh hupe duratin hupe aria pugapesh ihihmorim yeh ba greg atin hetem. Aria ihishmorim arpesh ta shutik enyudok mour douk Iruhin nuneken um narap matanamori mupe wosik abom um.’ ”
Aria sabaisi awirosish arpesh shanakumori Jon um nunek baptaisumesh. Eshesh shanaki aria anan nakripesh nakri, “Ipak pape kabi wanohwiguhwi yuguhw um. Omi nyakripep um ta puruwok um um namudok um ta Iruhin ananish urkum apahw ta juwehosish um ipak? Um maresh? Anan ko nenek eshudok yoweishi inahos shutogurum ipak adur atin. Ipak ko penek yopihi aih um puyabig arpesh shutrip aria shukri adur ipak pekeshukuk agabus yoweishi inahos. Aria mare pupe um puneyagwreh pukri Abraham anan douk ipakin yamenen aria Iruhin ta nutrip nukri wosik aka, uwok. Eik yakripep, Iruhin ta nenek abrudok utabor bakus atap iri butogur kabi Abraham ananish batowish um. Arman nabro rowos iri douk nasuhw enen bode nape nawanamen nabro rowos gani atap nukwaruhigos um. Aria ihigos rowos douk yopipi shuruwep madae piragosi uwe ta nubrogos nuwashagos nyih.”
10 Aria ihishmorim arpesh sharigan shakri, “Aria apak ta munekesh mumam?”
11 Aria anan wata nawanamesh baraen nakri, “Anudok arman douk nanabuk biyog siotog iri ta nukon anat anudok douk siot uwok iri. Aria eshudok arpesh shobuk worigun iri ta shusiyaesh shibiram eshudok worigun wokeshi.” 12 Aria amam harao takis iri shopunek hanamori anan um nunek baptaisumam. Aria hanaki harig Jon hakri, “Debeini tisa, apak ta munek maresh?”
13 Aria anan nakripam nakri, “Purao takis um, ipak ta putrish utabor kabi da gavman shakri um. Ipak mare putrish anabor utabor meyoh uwe, uwok.”
14 Aria amam soldia shopunek hanaki aria harigan hakri, “Apak shopunek ta munek maresh?”
Aria anan nakripam nakri, “Mare pusuhw dodog enesh arpesh aria putrish utabor aka penekumesh enen wehinyi baraen enesh arpesh um putrish anabor utabor meyoh uwe, uwok. Punasuhw abrudok douk shukep um mouribor um atin aria mare ta pukri anabor shopunek uwe, uwok.” 15 Aria arpesh esheshish mishish shape shor shanak aria shape shere urkum um Jon. Eshesh shakri anan douk Krais douk Iruhin nagraehan ba neshopokan nanaki um nurao arpesh iri. 16 Douk namudok aria Jon nakrip sabaishi arpesh nakri, “Eik uwok. Eik douk yenek baptaisumep abar meyoh. Aria anan dodogowin atun neshagrakuk eik iri ta nigigi. Aria eik douk madae yopuwe iri um ta ikweshihuman madururuh um ananin su uwe, uwok. Aria anan ta nenek baptaisumep nekep Iruhin ananin Mishin aria ta nyuwish aria nyupeyep. Aria ta nyugabeyep kabi nyih hanuguk eshudok um. 17 Anan ta ko nunaki kabi da anan arman nasuhwi ananip neitip ananis wis um nunaki niyagom nyubuhas shape ananit wit iri ba nushubuk sik. Aria yoputi shuruwepit wit anan ko ta nutubuk sik gani ananit urupat nobuk wit ati. Aria ihish witish nyubuhas anan ko nushaisheh nukwu ehudok yoweihi nyih madae ta hugok iri uwe, uwok.”
18 Aria Jon nakripesh Iruhin ananin yopinyi baraen obi nyutob, nakripesh sabainyi enyudokmori baraen shopunek um nuhur esheshiruh aparuh.
Herot Nuweshik Jon Nape Um
19 Aria Jon nahao Herot douk debeini gavman um shokugi nahobig um Galili iri. Jon nahan um agundok natrun ananin wanin ananik irohukwik Herodias um. Aria shopunek um agundok nenek sabaishi yoweishi inahos um. 20 Aria Herot ta shopunek nenek enesh yoweishi inahos um ta nuweshik Jon um.
Jon Nenek Baptais Um Jisas
(Matyu 3:13-17; Mak 1:9-11)
21 Douk sabaishi arpesh shenek baptais shatuh aria Jisas shopunek nenek baptais. Anan nenek baptais jurug aria neyotu nape nenek beten aria iruhw utag ganupok. 22 Aria Iruhin ananin Mishin nyabuhi kabi da arudok armir manyun um nabuhi netem Jisas. Aria shemnek anah mah gani iruhw heven aria enyudok arpen nyeyagwreh iri nyakri, “Nyak douk adur atin Eikin Nuganin. Eik douk urkum manawasham aria yanadudareh abom um nyak.”
Jisas Ananim Yamehem Popehem Amamish Nyeiguhw
(Matyu 1:1-17)
23 Abudok nyutob Jisas nohur ananin mour nape neneken obi, ananish kwarahos douk shatogur 30-poreish. Aria arpesh shakri Jisas anan douk Josep nanabuki iri nuganin aka, uwok.
Josep ananin yain douk Heli.
24 Aria Heli ananin yain Matat.
Matat ananin yain Livai.
Livai ananin yain Melki.
Melki ananin yain Janai.
Janai ananin yain Josep.
25 Aria Josep ananin yain Matatias.
Matatias ananin yain Amos.
Amos ananin yain Nahum.
Nahum ananin yain Esli.
Esli ananin yain Nagai.
26 Aria Nagai ananin yain Mat.
Mat ananin yain Matatias.
Matatias ananin yain Semen.
Semen ananin yain Josek.
Josek ananin yain Joda.
27 Aria Joda ananin yain Joanan.
Joanan ananin yain Resa.
Resa ananin yain Serubabel.
Serubabel ananin yain Sealtiel.
Sealtiel ananin yain Neri.
28 Aria Neri ananin yain Melki.
Melki ananin yain Adi.
Adi ananin yain Kosam.
Kosam ananin yain Elmadam.
Elmadam ananin yain Er.
29 Aria Er ananin yain Josua.
Josua ananin yain Elieser.
Elieser ananin yain Jorim.
Jorim ananin yain Matat.
Matat ananin yain Livai.
30 Aria Livai ananin yain Simeon.
Simeon ananin yain Juda.
Juda ananin yain Josep.
Josep ananin yain Jonam.
Jonam ananin yain Eliakim.
31 Aria Eliakim ananin yain Melea.
Melea ananin yain Mena.
Mena ananin yain Matata.
Matata ananin yain Natan.
Natan ananin yain Devit.
32 Aria Devit ananin yain Jesi.
Jesi ananin yain Obet.
Obet ananin yain Boas.
Boas ananin yain Salmon.
Salmon ananin yain Nason.
33 Aria Nason ananin yain Aminadap.
Aminadap ananin yain Atmin.
Atmin ananin yain Arni.
Arni ananin yain Hesron.
Hesron ananin yain Peres.
Peres ananin yain Juda.
34 Aria Juda ananin yain Jekop.
Jekop ananin yain Aisak.
Aisak ananin yain Abraham.
Abraham ananin yain Tera.
Tera ananin yain Nahor.
35 Aria Nahor ananin yain Seruk.
Seruk ananin yain Reu.
Reu ananin yain Pelek.
Pelek ananin yain Eber.
Eber ananin yain Sela.
36 Aria Sela ananin yain Kainan.
Kainan ananin yain Arpaksat.
Arpaksat ananin yain Siem.
Siem ananin yain Noa.
Noa ananin yain Lamek.
37 Aria Lamek ananin yain Metusela.
Metusela ananin yain Enok.
Enok ananin yain Jaret.
Jaret ananin yain Mahalalel.
Mahalalel ananin yain Kenan.
38 Aria Kenan ananin yain Enos.
Enos ananin yain Set.
Set ananin yain Adam.
Aria Adam douk Iruhin nenekan.