21
Namuburi Wabur Heven Aria Namubi Amnab
1 Douk enyudok nyanakuk aria eik yatigu namuburi wabur heven bani namubi amnab shape. Barik iri wabur heven bani barik iri amnab shani youg shanak shawishuk abom aria madae enesh shupe uwe.
2 Aria eik yatigu abrudok yopuburi wabur Jerusalem. Ababur douk bape iri agundok Iruhin napeum aria bakutukuk iruhw heven bape babuhi. Abrudok wabur douk shaginohwobur kabi douk onok armatok douk kwanaginohw kwenek yopihi atih rupeh aria kwape um kwuni okwokwin raminen shunaraum iri.
3 Aria eik yemnek anah mah agundok enyudok debeinyi wagitur nyakus um. Aria enyudok arpen nyeyagwrehi iri nyakri debeg, “Ipak pumnek! Douk Iruhin nani arpesh shape atugun! Aria anan ta nini eshesh shupe aria eshesh ta shupe ananish atish arpesh. Aria anan ta nupe esheshin debeini Iruhin.
4 Aria anan ta nubatikumesh abih esheshis nabes aria eshesh ta mare wata shugok atin, uwok. Aria esheshiruh aparuh ta mare wata yoweruh aria shumnek anar eriger aria shureh, uwok. Ihinyumorim enenyenen douk seiwok nyape nyatogur um arpesh iri douk nyanak nyawishuk abom.”
5 Aria anudok nape enyudok debeinyi wagitur iri nakri, “Ipak pumnek! Douk eik yenek ihishmorim eneshenesh eshudok shape iruhw atap iri shatogur namushi!” Aria anan wata shopunek nakripe nakri, “Nyak nyuwem um enyudok baraen douk iganigadae nyemneken iri anap shup. Um maresh? Enyudok baraen douk adurin abom aria wosik um arpesh shumneken aria shusuhwen dodog shugipeshen.”
6 Aria anan nakripe shopunek nakri, “Eshudok eneshenesh douk shatogur shatuh! Seiwok baugos um ihishmorim eneshenesh eshudok watak enesh shutogur shupe uwe aria eik yape. Aria kweipon shopunek ta ipe arigaha hugiguk iri nyumnah hutogur. Aria meinyi arpen abar baen iri, eik ta iken anabar abar nyubroh meyoh. Enyen mare nyutorabar, uwok. Abrudok abar douk bakih atap meyoh iri. Ababar douk ta arpesh shubroh aria shupe wosik abom ihih nyumneh iri.
7 Aria meinyi arpen douk nyiyotu dodogowin atin nyunek wanohw nyubo yoweishi inahos shubuhuk iri, enyen ta nyugrem ihishmorim eikish yopishi eshudok eneshenesh. Aria eik ta ipe enyen nyenek lotume iri Iruhin, aria enyen ta nyupe eikin batowin.
8 Aria eshudok douk shanogugur aria wata shatanam shenek yoweishi inahos iri, shuni eshudok douk madae shusuhw eikin baraen dodog shugipeshen iri uwe, shuni eshudok douk shenek eneshenesh yoweishi inahos iri, shuni eshudok douk shabo kupaishi arpesh shagok iri, shuni eshudok douk shenek wehrur um iri, shuni eshudok douk shenek ouruh iri, shuni eshudok douk shenek enenyenen um yoweiruhi subagwiruhi iri, shuni eshudok douk shenek lotu um eshudok douk madae adurimi god omi iri uwe, shuni eshudok douk shenek rohwumesh iri, eshesh ihishmorim ta shunak shupe agudok nuwag douk juwehosihi nyih hape hanu agari. Agudok nuwag agag douk ta arpesh shubuh aria mare shugok anah shopunek um.”
Namuburi Wabur Jerusalem
9 Aria enen ensel um eshudok 7-poreish enselahos douk shasuhw shagiguk abom iri 7-poreish yoweishi abom eshudok eneshenesh iri nyanaki aria nyakripe nyakri, “Nyak yowi aria iyabigen nugaen Sipsip enyenyik irohukwik.”
10 Aria Iruhin ananin Mishin nyatogrume dodogowin atin aria agundok eik kabi douk yabo yomnis um. Aria enyudok ensel nyare wanak wato onohw debeihwi rouhwi yoduhw. Aria enyen nyeyabige abrudok Iruhin ananibur yopuburi wabur Jerusalem. Ababur douk baperi agundok Iruhin napeum aria bakutukuk iruhw heven bape babuhi.
11 Aria agundok douk Iruhin dodogowin abom aria natrugun abom um natrugun numun abrudok wabur. Aria ababur babuhi anabik sik kabi douk anam yopumi utom douk shatorum debeibori utabor iri mabuhi um. Aria shopunek, ababur babuhi kabi douk anam utom jaspa mani wenyir shabuhi um.
12 Aria arbudok narub douk sharukarubi narub um abrudok debeiburi wabur iri douk debeirubi abom aria rourourubi bato gani iruhw. Aria 12-poreish duahas shape arbudok narub. Aria shopunek, 12-poreish enselahos sheyotu sheyoh um eshudok 12-poreish duahas. Aria asudok 12-poreis awirosish arpesh douk shakitaki Israel iri esheshish nyeiguhw shetem eshudok 12-poreish duahas.
13 Aria bishatin duahas shape gani wobrehah-irub um narub douk bape batik aun nakihumori um. Aria bishatin shape shatik saut, bishatin shape shatik not, aria bishatin shape shatik aun nabuh um.
14 Abrudok debeiburi waburirub narub agundok atapirub um douk betem um 12-poreibor utabor um busuwobur batao dodog iri. Aria enyudok Nugaen Sipsip enyenyim 12-poreim aposel douk riguk enyen nyograeham um hunak hukripesh Iruhin ananin baraen iri amamish nyeiguhw shatem abrudok 12-poreibor utabor.
15 Aria enyudok ensel douk nyani eik weyagwreh iri nyasuhw anam butum douk shenekam gol iri um shape shasuhw wigah um eshudok eneshenesh-am iri. Enyen nyakri nyusuhw wigah um abrudok debeiburi wabur buni arbudok debeirubi narub buni eshudok duahas douk shape narub iri.
16 Abrudok debeiburi wabur roubur um bani agundok debebur um douk arag atin abom. Aria enyudok ensel nyakwu enyenyim butum aria nyasuhw wigah um abrudok wabur. Aria douk enyen nyasuhw wigah aria ihiburmorim agundok roubur um bani debebur um bani agundok atap bato iruhw um douk aragum atin abom. Aria shasuhw wigah um, ababur douk rourouburi abom hurukatin um 2,200 kilomita.
17 Aria enyen nyasuhw wigah um narub shopunek. Aria agundok atap bato iruhw um douk hurukatin um 144 mita. Amudok butum enyen nyasuhw wigah um arbudok narub iri douk amudokmori um douk arpesh apa shasuhw wigah um eshudok eneshenesh iri um.
18 Aria arbudok narub douk shenekarub abrudok utabor atubor douk shahwarabor um jaspa iri. Aria wabur ababur kanak shenekabur shakwu yopuri gol douk rabuhi aria ratrugun kabi wenyirumori.
19 Atapirub um arbudok narub douk shenekarub um shunek narub um abrudok wabur iri douk shenekarub dodog. Aria shaginohwarub sabaibori sisigibor yopubori utabor douk shatorabor debeibori utabor iri.
Marik iri utom douk
makus atap um masuhw arbudok narub iri douk jaspa.
Aria magiguk iri douk bluporeimi douk shahwaram um sapaia iri.
Aria biobor atum iri douk shigorihwimi douk shahwaram um aget iri,
aria nubatibor iri douk grinporeim douk shahwaram um emeral iri.
20 Aria anas wisi-ibor iri douk anabigim um owishiborim
aria anabigim um shagarihwim.
Amam douk shahwaram um sadonikis iri.
Aria anas wisi-ibor iri douk owishiborimi douk
shahwaram um konilian iri.
Aria namba 7-im douk akitohimi douk
shahwaram um krisolait iri,
aria namba 8-im douk sikim grinporeim douk
shahwaram um beril iri.
Aria namba 9-im douk anam sikim akitohimi douk
shahwaram um topas iri,
aria namba 10-im douk anabigim um grinporeim
aria anabigim um akitohimi iri.
Aria amam douk shahwaram um krisopres iri.
Aria namba 11-im douk anam sikim bluporeimi douk
shahwaram um haiyasin iri,
aria namba 12-im douk anam sikim owishiborimi utom
shahwaram um ametis iri.
21 Aria eshudok 12-poreish duahas douk shenekesh shakwu 12-poreib shigorihwibi debeibi weiyoub douk shatarub debeibori utabor iri. Aria eshudok duahas atin atin shenekesh shakwu atut atut um debeigwi weiyoubig natog douk shahwarog um pel iri. Aria ahudok debeihi yah douk hape abrudok debeiburi wabur iri douk shenekah yopiri gol aria ahah hape kabi wenyir um.
22 Aria eik madae itik Iruhin ananit debeiti urupat tutao abrudok wabur uwe, uwok. Um maresh? Debeini Iruhin anan douk Dodogowin abom nabo ihishmorim eshudok shabuhuk iri nani Nugaen Sipsip amam kanak hape kabi Iruhin ananit urupat um.
23 Aria abrudok wabur mour ta mare enen um wah hutao hobur um o wabin aun wanyukehin aria nutrugun um, uwok. Um maresh? Agundok douk Iruhin dodogowin aria natrugum abom um, agagun kanak ta nunek ihigunmorim um abrudok wabur butrugun aria bogaragun. Aria shopunek, enyudok Nugaen Sipsip enyen kanak nyabuhi kabi douk lam um aria nyenekagun bogaragun abrudok wabur.
24 Aria ihishmorim arpesh shape sabaigosi nahobigos iri ta abrudok wabur butrugun-umesh aria eshesh ta shunatrugun aria shurahaen. Aria amam king douk hape agundok atap iri ta hurao amamibor utabor buni ihishmorim eneshenesh amamish yopishi eshudok hunak huwish abrudok wabur um hakri hutuk Iruhin ananin nyeigur nyuto iruhw.
25 Aria nyumneh, abrudok waburish duahas ta shunejik shupe namudok atin. Um maresh? Agundok weibus ta mare anabus, uwok.
26 Aria ihishmorim arpesh shape ihigos-morim nahobigos iri ta shurao esheshibor utabor buni yopihi jah shuwish abrudok wabur um shutuk Iruhin ananin nyeigur nyuto iruhw.
27 Aria ihishmorim eneshenesh shabosusih iri yoweishi eshudok shuni eshudok arpesh douk shenek eneshenesh yoweishi inahos iri, shuni eshudok douk shenek abraenyih aih iri, shuni eshudok douk shenek rohw um kupaishi iri ta mare shuwish abrudok wabur, uwok. Aria eshudok arpesh douk esheshish nyeiguhw shetem Nugaen Sipsip enyenyik buk iri eshesh atish ta shuwish abrudok wabur. Okwudok buk okwok douk eshudok arpesh douk ta shupe wosik abom ihih nyumneh iri esheshish nyeiguhw shetemokwi.