3
Mẽ kot Tĩrtũm mã tanhmã amnhĩ nhĩpêx to xwỳnhjê jarẽnh
Wam Korĩt 14.20; Karatas 5.16-21; Epes 4.14; Eprêw 5.11
E Kris kôt ixtõ nẽ ixtõxjaja. Pa mẽ amã mẽmoj jarẽ ka mẽ inhma nẽ kãm ajamaxpẽr. Nà amnepê mã kormã mẽ ate Kris kôt amnhĩ nhĩpêx tohtuj anhỹrta ã tanhmã na ka prem amnhĩ nhĩpêx to ho ri apa wehe? Na ka prem arĩ ajamaxpẽr tũm kôt pix mã amnhĩ nhĩpêx. Kormã mẽ ate Tĩrtũm Karõ hkôt amnhĩ nhĩpêx mex kêt jakamã na ka pre htem mẽhprĩre kot amnhĩ nhĩpêx pyràk o amnhĩ nhĩpêx. Nẽ mẽ uràk nẽ kormã mẽmoj piitã omunh kêt nẽ. Jakamã na pa pre mẽ amã ixujarẽnh kaxyw nẽ te mẽ ate kormã Tĩrtũm kapẽr mar kêt xwỳnhjê pyràk o mẽ anhĩpêx nẽ mẽ amã tanhmã ixujarẽnh to. Mẽ hkaràre na htem mẽ hkà kagô pix kaô nẽ kormã mẽ apkur xà mex kur kêt nẽ. Ja pyrà nẽ na pa pre te ixte mẽ ato hpijaôr pyrà nẽ mẽ amã Tĩrtũm kapẽr piitã harẽnh par kurê kumrẽx kêt nẽ. Ãm mẽ amã hkwỳ pix jarẽ ka prem ama nẽ Jejus kôt amnhĩ xunhwỳ. Tã na pa hte arĩ mẽ amã hkwỳ pix jarẽnh o ri ixpa nẽ kormã piitã ho mẽ ajahkre jatur xàm mẽnh kêt nẽ. Na ka htem arĩ te mẽ apê Kris kwỳ hkêt pyràk o amnhĩ nhĩpêx o apa. Nẽ mẽmoj kôt axpẽn kãm agryk axpẽn mã axàkjêr o apa. Ã amnhĩ nhĩpêx anhỹr jao arĩ mẽ ate amnhĩ nhĩpêx tũm kôt amnhĩ nhĩpêx rãhã nẽ.
Na hte mẽ akwỳjaja amnhĩ jarẽnh o: “Ixpê Pawre hkwỳ na pa.” Anẽ. Nẽ mẽ akwỳjaja amnhĩ jarẽnh o: “Pa na ixpê Apor kwỳ na pa.” Anẽ. Kwa na ka htem ã amnhĩ jarẽnh anhỹr o te mẽ apê Kris kwỳ hkêt pyràk. Apor mẽ pa ãm wa ixte Tĩrtũm kapẽr o mẽ ajahkre xwỳnh pix na pa wa. Wa ixpê mẽ anhõ pahihti hkêt kênã kot ka kêt mẽ axtem nẽ mẽ apê ahpỹnhã wa ixkwỳ hã amnhĩ jarẽ. Na pa pre wa mẽ amã Tĩrtũm kapẽr jarẽnh o ri mẽ akôt ixpa ka prem wa inhma nẽ amnhĩ kaxyw hkôt ajamaxpẽr tỳx nẽ. Nẽ hkôt amnhĩ xunhwỳ nom wa pa wa ixkôt amnhĩ xunhwỳr kêt nẽ. Na pa wa ãm Tĩrtũm kapẽr o mẽ ajahkre nom amnhĩ kôt mẽ axunhwỳr kêt nẽ.
6-9 E pa ixprĩ hã mẽ amã war amnhĩ jarẽ ka mẽ inhma. Te wa ixpê Tĩrtũm pur kãm wa ixàpênh xwỳnh pyràk no mẽ kajaja te mẽ apê hpur pyràk. Na htem hpur karê nhũm hirã nhũm mẽ kamã ahkre ho pa. Ja pyrà nẽ na pa pre ixkumrẽx mẽ awỳr ixpa nẽ mẽ amã Tĩrtũm kapẽr jarẽnh o ri mẽ akôt ixpa. Te mẽ kot pur kãm ahkre ho ri pata pyràk. Tã nhũm Apor ixpãnhã ma mẽ awỳr pa nẽ te mẽ kot pur karêrta pyràk o mẽ anhĩpêx nẽ mẽ amã Tĩrtũm kapẽr o mẽ ajahkre mex o ri pa. Xà na hte pur karêr xwỳnhja rỳ kamã ahkre xwỳnhja tãm tanhmã mẽmo hy hto nhũm ra higrõt nẽ hprêk nẽ ô? Nà na htem ãm ahkre hpa nhũm arĩ hikwỹ. Nhũm Tĩrtũm tãm tanhmã hyta to nhũm higrõt nẽ hprêk nẽ ô. Ja pyrà nẽ na hte Tĩrtũm mẽ ho hkra nẽ tanhmã mẽ ho nhũm mẽ amnhĩ kaxyw hkôt hamaxpẽr tỳx nẽ hkôt amnhĩ nhĩpêx mex o pa. Nom mẽ kãm harẽnh o pa xwỳnhta kôt amnhĩ xunhwỳr kêt nẽ.
Nẽ na hte pur karêr xwỳnh rỳ kamã ahkre xwỳnhja tãm tanhmã hyta to nẽ ho htĩr kêt nẽ. Tĩrtũm pix na hte tanhmã ho nhũm higrõt. Ja pyrà nẽ na pa hte Tĩrtũm kapẽr o mẽ ajahkre o ri mẽ akôt ixpa nom pa tanhmã mẽ ato ka mẽ apê Tĩrtũm kra nẽ ri apa hkêt nẽ. Tanhmã kot pa mẽ ato ka mẽ apê hkra? Tapxipix na kot mẽ pahto hkra kaxyw àhpumunh. Nẽ tapxipix na hte tanhmã mẽ pahkrã hto pu mẽ kãm hprãm xà hkôt amnhĩ nhĩpêx mex o ri papa.
Nẽ pur karêr xwỳnh mẽ pur kãm ahkre xwỳnhja wa. Hamẽ wa àpênh mex jakamã koja hamẽ wa kot pur kãm àpênh pãnhã amnhĩm ujamỳnh rax nẽ. Ja pyrà nẽ kot paj mẽ ixte Tĩrtũm kapẽr o mẽ ajahkre ho ri mẽ akôt ixpa xwỳnhjaja nhũm Tĩrtũm nhỹrmã mẽ ixàpênh pãnhã mẽ inhmã amnhĩrer mex nẽ.
Nẽ te mẽ ate Tĩrtũm nhõ ixkre pyràk. 10 Nẽ pa te ixpê Tĩrtũm mã ixkre hã ixàpênh xwỳnh pyràk jakamã na pre Tĩrtũm mẽ akaxyw tanhmã ixto pa mẽ amã tanhmã kot amnhĩ nhĩpêx to hã harẽnh o ri mẽ akôt ixpa. Te ixte õ ixkre kaxyw ãm xà maati xãm pyràk o mẽ anhĩpêx. Jao mẽ amã kapẽr jarẽnh o ri mẽ akôt ixpa. Mẽ ate amnhĩ kaxyw hkôt ajamaxpẽr nẽ hkôt amnhĩ xunhwỳr kaxyw. Tã na ka prem hkôt amnhĩ xunhwỳ nhũm ixpãnhã Tĩrtũm kapẽr o mẽ ahkre ho mẽ pa xwỳnh kwỳjaja mẽ awỳr mra nẽ mẽ amã kapẽr jarẽnh jatur xàm kurẽ. Nẽ hprĩ hã ho mẽ ajahkre ho ri mẽ akôt pa. Te ho mẽ kot ixkre krax nhĩpêx pyràk o mẽ anhĩpêx.
Nẽ kwa mẽ ate mẽ ahkre o mẽ apa xwỳnhjaja kêr ka mẽ akatàt kôt mẽ ahkre mex rãhã ho ri mẽ hkôt apa.
11 Nẽ Jejus Kris tapxipix na pu htem hkôt amnhĩ xunhwỳ nhũm mẽ panê mẽ pahte amnhĩ tomnuj o hapêx. Jakamã te kêp kỳxpê ixkre nhĩmõk ã nõr xà maatita pyràk.
12 Nẽ na htem tõhã ixkre nhĩpêx kaxyw nẽ pĩ htỳx jakà nẽ ho hipêx nhũm kritpêm mẽ kãm mex ry nẽ kuhê. No na htem tõhã nojarêt kãm ixkre hã apê nẽ pĩ rerek o hipêx nhũm mẽ kãm mex ry hkêt nẽ. Koja rôr nhyre hwỳr mra nẽ mẽ kêp hapôk nẽ homnu. Ja pyrà nẽ na hte Tĩrtũm kapẽr o mẽ ahkre ho ri mẽ pa xwỳnh kwỳjaja te mẽ kot katàt kôt pĩ htỳx o ixkre nhĩpêxta pyrà nẽ katàt kôt mẽ ahkre ho ri mẽ hkôt pa. No nhũm mẽ hkwỳjaja axtem nẽ te mẽ kot pĩ rerek o ixkre nhĩpêxta pyràk o amnhĩ nhĩpêx nẽ htỳx ri Tĩrtũm kapẽr kwỳm ri tanhmã mẽ ahkre hto ho pa. Jao hkwỳm ri amnhĩ nhĩpêx rãhã ho ri pa.
13 Nẽ koja mẽhõ pĩ htỳx pix o amnhĩm õrkwỹ nhĩpêx hãmri nhũm mẽmo arĩgro hã tanhmã amnhĩ to nẽ kêp pôr. No ãm hã pôja pix xêt pa nhũm kãm hikwỹ xà nẽ õkwa êja arĩ piitã mex nhũm ixkre hpãm axte hã pô janhôr o nyw. No koja pĩ rerek o hipêx nhũm mẽmo arĩgro hã kêp pôr hãmri nẽ piitã kêp kaxàr pa. Ja pyrà nẽ koja nhỹrmã Krisja akupỹn mẽ pahwỳr wrỳ hãmri nẽ mẽ pahte kãm tanhmã amnhĩ nhĩpêx to ho papaja piitã hã mẽ pahpumunh kôt tanhmã mẽ pajarẽnh to. Koja mẽ pahkwỳjaja mẽ pahte mẽ kot pĩ htỳx o ixkre nhĩpêxta pyrà nẽ Tĩrtũm mã mẽ pahte amnhĩ nhĩpêx mex o mẽ papa xwỳnhjê xàpênh pumu nẽ mẽ pahte amnhĩ to mex xwỳnh ã mẽ pajarẽ. Hãmri nẽ hpãnhã mẽ kot pĩ rerek o ixkre nhĩpêxta pyrà nẽ mẽ kot kãm amnhĩ nhĩpêx mex kêt xwỳnhjê pumu nẽ mẽ kot amnhĩ to mex kêt xwỳnh hã mẽ harẽ.
14 Nẽ pĩ htỳxja na hte tanhmã amnhĩ to nẽ hpôr no ãm arĩ mex nẽ kuhê nhũm mẽ piitã arĩ mex ã omu. Ja pyrà nẽ koja Krisja mẽ kot kãm tanhmã amnhĩ nhĩpêx mex to ho mẽ pa xwỳnhjê pumu nẽ mẽ kot tanhmã kãm amnhĩ nhĩpêx to hpãnhã mẽ kãm amnhĩre nhũm mẽ piitã mẽ kot amnhĩ to mex ã mẽ omu. 15 No pĩ rerekja na hte pôr nẽ kaxàr pa. Ja pyrà nẽ mẽ kot Kris mã amnhĩ nhĩpêx mex hkêt xwỳnhjaja koja Tĩrtũm mẽ kãm amnhĩrer kêt nẽ. Nom arĩ mẽ kêp hkra jakamã koja mẽ arĩ kuri htĩr tũm nẽ pa. No ãm mẽ kot Tĩrtũm mã amnhĩ nhĩpêx mex kêt jakamã koja mẽ hkwỳjê hkĩnh ã amnhĩm mẽmoj mex kwỳ jamỳnh kêt nẽ. Te mẽhõ nhõrkwỹ kêp hpôr nhũm mẽ hkukrêx kwỳ jamỳnh kêt nẽ ỹ kamã kurũm hapôx pyràk.
16-17 E pa mẽ amã mẽmoj jarẽ. Ra mẽ ate mar tã mãn ka mẽ ra tanhmã amnhĩ to nẽ hã ano hkêt rỳ ko. Nà te mẽ pahpê Tĩrtũm nhõrkwỹ pyràk. Tĩrtũm nhõrkwỹja õ na. Tã mẽ pahpê hkra nhũm Karõ kot mẽ pakaxwỳnh mã gjêx jakamã te mẽ pahpê õrkwỹ pyràk. Jakamã mẽ kot kapẽr kwỳm ri mẽ ajahkre o ri mẽ pa xwỳnhjaja te mẽ kot Tĩrtũm nhõrkwỹ grành xwỳnh pyràk. Koja mẽ nhỹrmã amnhĩ xà htỳx kamã hamak o pa.
Mẽ pahte amnhĩ to jarkrar kêt ã mẽ pamã karõ
Wam Korĩt 1.10-25
18 Nẽ kot kaj mẽ atõ axàhpumunh tỳx o amnhĩ to jarkrar o ri apa japêr. Kwa mẽ jam anhũre nẽ axte ri ã amnhĩ nhĩpêx anhỹr kêt nẽ. Nẽ te mẽ ate amnhĩ nê axàhpumunh tỳx xàja nhãm rẽnh par pyràk o amnhĩ nhĩpêx. Mẽ paxàhpumunh xàja pika kamã mẽ àhpumunh pix jakamã kêr ka mẽ te amnhĩ nê nhãm rẽnh pyrà nẽ hpãnhã Tĩrtũm xàhpumunh xà hkôt pix mã amnhĩ nhĩpêx o ri apa. 19 No pika kamã mẽ àhpumunh xwỳnhjaja Tĩrtũm noo mã te mẽ hkrã pipãnh nẽ htỳx ri pata pyràk. Tĩrtũm kapẽr ã kagà htũm kot mẽ harẽnh kot:
Pika ja kamã mẽ àhpumunh tỳx ã mẽ kot amnhĩ to jarkrar xwỳnhjaja Tĩrtũm noo mã te mẽ kot amnhĩ to hêx o pa pyràk. Anẽ.
20 Nẽ mããnẽn mẽ harẽnh kot:
Mẽ kot amnhĩ xàhpumunh tỳx ã amnhĩ to jarkrar o ri mẽ pa xwỳnhjaja na hte Tĩrtũm mẽ omu nẽ mẽ kot ã amnhĩ jarẽnh anhỹr kaprỳ hã mẽ harẽ. Anẽ.
21-22 Jakamã kwa kêr ka mẽ axte mẽ apê ixkwỳ rỳ mẽ apê Apor kwỳ hã amnhĩ jarẽnh o ri apa hkêt nẽ. Mẽ apê wa ixkwỳ hkêt kênã. Nẽ mẽ apê nhãm mẽhõ hkwỳ hkêt. Mẽ pahpiitã mẽ pahpê Kris kwỳ na pu mẽ.
Nẽ kot puj mẽ nhỹrmã pahtyk tã akupỹm pahtĩr nẽ Tĩrtũm mẽ Jejus wa kuri pamex nẽ pahtĩr tũm nẽ ri papa. Jakamã kwa mẽ tee ri amnhĩ kukamã ajamaxpẽr kêt nẽ.
Nẽ jarãhã mẽmoj piitã mẽ panhõõ. Nẽ kormã mẽmoj kot amnhĩrĩt kêt xwỳnhjaja haxwỳja mẽ panhõ na. Ãm mẽmoj piitã mẽ panhõ jakamã te mẽ pahpê mẽmoj piitã mẽõ pahi pyràk. 23 No mẽ papajaja axtem Kris kêp mẽ panhõ Pahihti. Nẽ Tĩrtũm kêp Kris nhõ Pahihti.