11
Amnhĩ kaxyw Tĩrtũm kôt mẽ hamaxpẽr mex xwỳnhjê jarẽnh
Sikũn Pêtre 3.5-7
1 Nẽ na htem Kris ã mẽ panhĩpêx kati ho pa pu mẽ pahpunuj rãhã nẽ ri papa. Te Kris kot mẽ pahto mex kêt pyràk pu htem mẽmoj punuj pix kãm ri papa nẽ kormã Tĩrtũm kot mẽ pahto mex ã amnhĩ tã omunh kêt nẽ. Tã ã mẽ pahte anhỹr tã kwa kêr pu mẽ arĩ kapẽr kôt amnhĩ nhĩpêx rãhã ho papa. Mẽ pahte pano ho Tĩrtũm pumunh kêt tã kot mẽ pahkôt pa ho pa hã amnhĩ kaxyw kãm pajamaxpẽr tỳx rãhã ho papa. Jakamã na pu htem ãm kapẽr kôt pix mã amnhĩ nhĩpêx o papa.
2 Amnepê mã mẽ pakukamã mẽ panhĩgêtjaja na prem no ho Tĩrtũm pumunh kêt tã amnhĩ kaxyw kãm hamaxpẽr nẽ kapẽr kôt amnhĩ nhĩpêx o pa nhũm amnhĩ tã mẽ omu nhũm ja kãm mex nẽ.
3 Nẽ mẽ papajaja na pu htem pajaxwỳja mẽ pano ho omunh kêt tã amnhĩm harẽnh o:
—Nà amnepêm kormã mẽmoj piitã amrakati ri nhũm Tĩrtũm ãm kapẽr pix o mẽmoj piitã ho kato. Ixte inhno ho ja hã omunh kêt tã kot ã amnhĩ nhĩpêx anhỹr ã amnhĩ jarẽnhja jakamã kot paj hkôt ijamaxpẽr tỳx rãhã ho ri ixpa. Anẽ.
4 Na pre finat Atãw nhĩpêx nẽ kaxyw hprõ Ewa nhĩpêx. Hãmri nhũm wa hkra Apewja htõ Kaĩ rom amnhĩ kaxyw Tĩrtũm kôt hamaxpẽr tỳx o pa. Jakamã nhũm wa Tĩrtũm mã mẽmoj gõ. Nhũm Apew kot Kaĩ rom Tĩrtũm kãm hprãm xà hkôt kãm mẽmoj nhõr jakamã nhũm amnhĩ tã omu nẽ kot amnhĩ to mex xwỳnh ã harẽ nẽ kot kãm õr xwỳnhta nhũm mex ã harẽ. Tã Apew amnepêm htyk tã pu htem arĩ harẽnh mar rãhã ho papa nẽ kãm pajamaxpẽr o:
—Apew na pre hte amnhĩ kaxyw Tĩrtũm kôt hamaxpẽr tỳx rãhã ho pa.
Anhỹr ã kãm pajamaxpẽr.
5 Nẽ Atãw kanrẽhã htàmnhwỳ Enokja na pre haxwỳja amnhĩ kaxyw Tĩrtũm mã hamaxpẽr tỳx o pa. Jao hkamnàr rom kãm hprãm xà hkôt pix mã tanhmã kãm amnhĩ nhĩpêx to ho pa nhũm amnhĩ tã omu nẽ amnhĩm mex ã harẽ. Jakamã na pre htyk kêt nẽ. Na pre Tĩrtũm htĩr rãhã ma amnhĩ wỳr ho api nhũm hkwỳjaja tee ri hapêr o pa. Jakamã na pu htem arĩ axpẽn mã Enok kot amnhĩ kaxyw Tĩrtũm kôt hamaxpẽr mex o pa hã harẽnh o papa.
6 Mẽ kot amnhĩ kaxyw Tĩrtũm mã mẽ hamaxpẽr kêt xwỳnhjaja na hte Tĩrtũm mẽ mex ã mẽ harẽnh kêt nẽ. Tã mẽ papajaja kêr pu mẽ Enok pyrà nẽ amnhĩ kaxyw kãm pajamaxpẽr tỳx rãhã ho papa. Nẽ pajamaxpẽr o:
—Tĩrtũmja htĩr rãhã ho rãhã. Koja nhỹrmã mẽ ixte amnhĩ kaxyw hkôt ijamaxpẽr xwỳnhjê ho mex rax nẽ. Nà koja mẽ ixto anẽ.
Anhỹr o mẽ pajamaxpẽr nhũm Tĩrtũm amnhĩ tã mẽ pajamaxpẽr ã mẽ pahpumu nẽ mẽ pahte amnhĩ to mex ã mẽ pajarẽ. No mẽ kot amnhĩ kaxyw kãm hamaxpẽr kêt xwỳnhjaja na hte ã mẽ harẽnh anhỹr kêt nẽ.
7 Nẽ Enok kanrẽhã htàmnhwỳ Noehtija na pre haxwỳja amnhĩ kaxyw Tĩrtũm mã hamaxpẽr tỳx o pa. Jao hkamnàr rom amnhĩm pàr raxja nhĩpêx. Na pre ra Tĩrtũm na rax kukamã tanhmã kãm ujarẽnh to. Kormã aa na wrỳk nhũm Noehti kot omunh kêt tã Tĩrtũm kapẽr ma nẽ mar xà hkôt amnhĩm pàr rax kumrẽxta nhĩpêx. Õrkwỹ kamã hkwỳjê mẽ mẽ amnhĩm hipêx. No mẽ kot Tĩrtũm kapẽr mar nẽ ãm mar xwỳnhjaja na pre Tĩrtũm gô tàm o mẽ hanhi nẽ mẽ himex pa. Nom Noehtija nhũm kot amnhĩ to mex xwỳnh ã harẽ. Kot amnhĩ kaxyw hkôt hamaxpẽr rãhã ho pa jakamã nhũm pre ã mex ã harẽnh anẽ.
8 Nẽ Noehti kanrẽhã htàmnhwỳ Apraãwja na pre haxwỳja amnhĩ kaxyw Tĩrtũm mã hamaxpẽr tỳx o pa. Na pre Tĩrtũm kot kãm pika nhõr ã kãm amnhĩ jarẽ nẽ ra kot ma hwỳr mẽnh kaxyw. Hãmri nhũm Apraãw kuma nẽ hkamnàr rom õ pika kaga nẽ ma pika hõja wỳr pa. Aa kot ma hwỳr mõr nẽ omunh kêt tã Tĩrtũm kapẽr mar xà hkôt õ pika kaga nẽ ma hwỳr pa ho pa.
9 Hãmri nẽ hwỳr pôj nẽ omu nhũm Tĩrtũm kãm:
—E pika ja kot paj nhỹrmã akanrẽhã akra nẽ atàmnhwỳjê mã kugõ. Anẽ.
Hãmri nhũm kuma nẽ pikaja kamã pa ho pa. Ra kamã axtem mẽ uro hkwỳjaja ri pa nhũm Tĩrtũm kormã mẽ kator kêt ri nhũm mẽ õ pika hwỳr pôj nẽ mẽ kamã pa ho pa. Nom amnhĩm õrkwỹ mex nhĩpêx kêt nẽ. Kormã kêp õ pika kumrẽx kêt ã hkamnhĩx jakamã ãm mry kà o ixkre nhĩpêx nẽ kamã pa ho pa. Nẽ nhỹhỹm pa kaxyw nẽ kugrà nẽ ma amnhĩ kôt o pa. Amnhĩ kaxyw Tĩrtũm mã hamaxpẽr rãhã jakamã ã amnhĩ nhĩpêx anhỹr o pa.
Nẽ Apraãw kra Ijak nẽ htàmnhwỳ Jakoja wa Apraãw pyrà nẽ mry kà ho õrkwỹ nẽ ma amnhĩ kôt o pa. Nhũm Tĩrtũm kot Apraãw mã kapẽr pyrà nẽ wa kãm wa hkanrẽhã wa hkra nẽ wa htàmnhwỳjê mã pika nhõr ã amnhĩ kukamã wa kãm amnhĩ jarẽ.
10 Jakamã nhũm Apraãw kormã Tĩrtũm nhõ krĩ hwỳr àpir xa hã amnhĩ tã hamãr pê kot ho õ pika mã xwỳnhjê kamã pa ho pa. Kaxkwa hwỳr àpir mã xwỳnhta mex kumrẽx. Tĩrtũm kot hipêx jakamã koja mry kà ho ixkre nhĩpêxta rom aa hapêx kêt nẽ. Jakamã nhũm Apraãw mẽ pahpyrà nẽ ma kot hwỳr àpir xa hã amnhĩ tã Tĩrtũm jamãr rãhã ho pa.
11-12 Tã ra hpigêt tỳx nẽ hkurẽ hkêt nẽ pa. Te ra ri htyk kaxyw pa pyràk. Nhũm hprõ Sara haxwỳja hpigêx tỳx nẽ. Kamrô hkêt ã amgrà xohtô rax kumrẽx. Nhũm wa aa hkra hkêt nẽ pa htã nhũm Tĩrtũm nhỹrmã wa hkra hã wa kãm awjarẽ nhũm wa kuma nẽ amnhĩ kaxyw hkôt hamaxpẽr kurê kumrẽx. Nom amnhĩ tã kuma nẽ tee ri amnhĩ kukamã hamaxpẽr hkêt nẽ. Na pre wa kuma nẽ axpẽn mã:
—Nà kot puj xep hãmri tã pahkra. Tĩrtũm kot hã ã pajarẽnh anhỹr kênã. Anẽ.
Tã ã wa kot hkra kaxyw Tĩrtũm mã hamaxpẽr anhỹr jakamã na pre Apraãwja hprõ htu. Ra wa hamẽ hpigêt tỳx kumrẽx tã nhũm htu. Nhũm wa hkra Ijakja gaa nẽ wa kãm kato. Jakamã nhũm wa gaa nẽ rĩ wa hkanrẽhã wa htàmnhwỳ xohtô rax o ohtô rax. Ohtô ho kaxkwa kamã kanhêti xohtô jakre. Nẽ ohtô ho gô xujanãr mỳri pikahti grà hkryre jakre. Jakamã nhũm mẽ tee ri mẽ ho kõta hpar mã. Nhũm Apraãw kêp mẽ hpàr krax.
13 Tã nhũm Apraãw nẽ Ijak nẽ Jakoja mẽ ri pa tãmtã nẽ htyk pa nẽ hapêx. Tĩrtũm kormã kot mẽ kãm pika jarẽnhta nhõr xwỳj ri ra htyk pa. Nom kormã mẽ htĩr ri tanhmã kãm hamaxpẽr to nẽ hamaxpẽr o:
—Nà kormã Tĩrtũm kot mẽ inhmã pika jarẽnhja nhõr kêt tã koja nhỹrmã inhmỳr pê ixkanrẽhã ixkra nẽ ixtàmnhwỳjê mã kugõ. Nà koja mẽ kãm kugõ. Ra kot hã inhmã amnhĩ jarẽnh kênã kot kêt mẽ kãm õr kêt.
Anhỹr o kaxyw kãm hamaxpẽr rãhã ho pa. Jao hkĩnh nẽ hamaxpẽr o:
—Nà inhõ krĩja axtem na. Na pa hte jar pika ja kamã ri mẽ hkôt ri ixpa. Te ixpê mẽ uro pyrà nẽ ri mẽ hkôt ixpa nom jar inhõ krĩ hkêt. Inhõ krĩ na kêt axte mã. Anẽ.
14-15 Na prem ã õ krĩ hõ hkukamã hamaxpẽr anhỹr o pa. No õ krĩ htũmta mẽ kot hkaga nẽ pika hõ hwỳr mõr xwỳnhta na prem ã harẽnh anhỹr kêt nẽ. Kop apu mẽ kot amnhĩm tãm mãn jarẽnh ronhỹx prem awjanã nẽ ma akupỹm hwỳr pa. Na prem axtem krĩ hõ jarẽ nẽ kormã hwỳr mõr kêt ã amnhĩ jarẽnh o pa.
16 Tã nhỹ krĩ na prem ã harẽnh anẽ? Nà kaxkwa kamã Tĩrtũm nhõ krĩja. Tãm na mex kumrẽx jakamã nhũm prem kormã hwỳr ma àpir xa hã mẽ pahpyrà nẽ amnhĩ tã Tĩrtũm jamãr rãhã ho pa nhũm amnhĩ tã mẽ omu nẽ hkĩnh nẽ. Nẽ mẽ kot tãm amnhĩ nhĩpêx ã mẽ omu nẽ mẽ kêp hkra hã mẽ harẽnh ã hpijaàm kêt nẽ. Hãmri nẽ mẽ kutêp tanhmã õ krĩ ho mex to ho pa.
17-18 Na pre ra tanhmã Apraãw mã hkra Ijakja jarẽnh to nẽ kãm:
—Akra Ijak kanrẽhã hkra nẽ htàmnhwỳjaja koja mẽ kêp ixkra. Anẽ.
Tã ra kot amnhĩ tã Apraãw kamã hamak kaxyw hkukamã hamaxpẽr nẽ hamaxpẽr o:
—Xà we Apraãw kãm ixkĩnh tỳx kumrẽx nẽ kãm ixkôt amnhĩ nhĩpêx rãhã ho pa hprãm nà? Xà we kãm ixkĩnh tỳx o hkrata jakrenh? E pa kop we ja hã amnhĩ tã kamã ama nẽ omu mãn. Anẽ.
Hãmri nẽ kot hkra hpĩr nẽ kãm õr ã kãm karõ. Hãmri nhũm kuma nẽ ra kot kãm hpĩr kaxyw. Kot Tĩrtũm kot amnhĩ nhĩpêx ã omunh mex jakamã hkamnàr rom kot kãm hpĩr kaxyw.
19 Nẽ hamaxpẽr o:
—Nà Tĩrtũm akupỹm kot mẽ ho htĩr xwỳnh kênã.
Anhỹr jakamã kãm hkra hpĩr pyma hkêt nẽ ra kot kãm hpĩr mã tã nhũm Tĩrtũm amnhĩ tã omu nẽ nê kãm kapẽr nhũm kuma nẽ hpĩr kêt nẽ wa ma akupỹm õrkwỹ hwỳr mõ. Tã ã kot hkra nhĩpêx anhỹr jakamã Apraãw mã te Ijak htyk nẽ akupỹm htĩr pyràk.
20 Nẽ Ijakja na pre haxwỳja amnhĩ kaxyw Tĩrtũm mã hamaxpẽr tỳx o pa. Jao hkamnàr rom amnhĩ kra wa kãm Tĩrtũm kot wa ho mex kukamã wa kãm harẽ. Kra Jako mẽ Ejauta wa kãm harẽ nẽ wa kãm:
—E koja nhỹrmã Tĩrtũm inhmỳr pê war ato mex rãhã ho pa. Anẽ.
21 Nẽ Jakoja na pre haxwỳja amnhĩ kaxyw Tĩrtũm mã hamaxpẽr tỳx o pa. Jao hkamnàr rom hkra Juje mã Tĩrtũm kot mẽ ho mex kukamã harẽ. Na pre Jakoja hkra nẽ htàmnhwỳ mẽ hpimrààtã hprãm xàj ma Ejit wỳr pa nẽ kamã pa ho pa. Tã nhũm Jako hpigêt tỳx nẽ ra htyk kaxyw. Hãmri nẽ hkra Juje mẽ hkra wa mẽ kãm kapẽr nẽ mẽ kãm:
—E na pa tee amnhĩ kamã ama. Na pa ra ixtyk kaxyw. Nom koja Tĩrtũm nhỹrmã inhmỳr pê mẽ ato mex rax nẽ. Anẽ.
Hãmri nẽ amnhĩ kaxpar xà hã pĩ hã amnhĩ kaxpa nẽ kànhmã xa nẽ Tĩrtũm mã mex o mex ã harẽ. Hãmri nẽ akupỹm nõr xà kamã nõn ty.
22 Nẽ Jujeja na pre haxwỳja amnhĩ kaxyw Tĩrtũm mã hamaxpẽr tỳx o pa. Jao htyk kaxyw nẽ hkamnàr rom hkwỳjê mã tanhmã amnhĩ jarẽnh to. Ra hpigêt nẽ htyk kaxyw nẽ hkwỳjê mã tanhmã amnhĩ tã karõ hto nẽ mẽ kãm:
—E na pa ra ixtyk kaxyw. Tã koja Tĩrtũm inhmỳr pê nhỹrmã Ejit rũm mẽ akator nẽ ma akupỹm mẽ panhõ pika hwỳr mẽ ato pa. Ra kot mẽ panhĩgêt Apraãw mã amnhĩ jarẽnh xà hkôt. Jakamã kwa mẽ inhma. Kêr ka mẽ akupỹm anojarêt nẽ ma amnhĩ kôt ixtã kasãwja mỳ nẽ amnhĩ kôt ixto mõ. Hãmri nẽ mũtar mẽ panhõ pika kamã mẽ anhõ krĩ htã ijaxà pa jawỳ mẽ akuri ixtã pyka. Anẽ.
23 Nẽ Mojes katorxà mẽ hipêêxàja na pre wa haxwỳja jajê pyrà nẽ amnhĩ kaxyw Tĩrtũm mã hamaxpẽr tỳx o pa. Juje hkanrẽhã htàmnhwỳ na pre wa. Jakamã nhũm Ejit nhõ pahija tee ri Ijaew xohtô rax kumrẽx ã mẽ omu nhũm ja kêp omnuj nẽ. Hãmri nhũm mẽ hkra myjaja mẽ hapôx kôt mẽ hamỳnh xwỳnhjaja kot mẽ hpar ã mẽ kãm karõ. Tã nhũm Mojes kato nhũm hipêêxà mẽ katorxàja wa omu nhũm muxre nhũm wa tee ri hkukamã hamaxpẽr. Hãmri nẽ pahi Paraohti mã mẽ hkra jamỳnh xwỳnh kot wa kêp hpĩr pymaj ho pimxur o hã mytwrỳ axkrunẽpxi. Tĩrtũm kamnàr rom wa amnhĩ tã kãm uma hkêt nẽ ã kêp hkra ho hpimxur anẽ.
24 Nẽ Mojes na pre haxwỳja amnhĩ kaxyw Tĩrtũm mã hamaxpẽr tỳx o pa. Kormã karàre ri na pre Paraohti hkra nija omu nẽ amnhĩm kumỳ nẽ ho hkra nẽ amnhĩ kôt o pa. Rãhã nhũm àptàr nhũm Ejit nhõ xwỳnhjaja kêp pahi Paraohti htàmnhwỳ hã axpẽn mã harẽ. Hãmri nhũm tee ri amnhĩ tã mẽ kuma nẽ amnhĩ tã mẽ kãm aprã nẽ mẽ kãm:
—Kwa mẽ ã ijarẽnh anhỹr kêt nẽ. Ixpê mẽ akwỳ hkêt. Anẽ.
25 ãm kãm Tĩrtũm kwỳjê kôt pix mã ri pa ho pa hprãm. Nẽ kãm Ejit nhõ pahi hkôt amnhĩ tomnuj prãm kêt nẽ. Ãm mẽ kot amnhĩ tomnuj pix o paja na mẽ kãm hprãm nhũm ja hã mẽ omu nẽ tee ri mẽ hkukamã hamaxpẽr nẽ hamaxpẽr o:
—Nà kot paj mẽ hkôt ri ixpa hkêt kumrẽx. Mẽ hkĩnh nẽ pa htã koja mẽ gaa nẽ ty nhũm mẽ hkĩnhja mẽ kêp hapêx. Nà kot paj Tĩrtũm kwỳjê hkôt mãn ri ixpa ho ixpa. Mẽ kot Tĩrtũm ã mẽ inhĩpêx kati htã pa arĩ mẽ hkôt ixpa ho ixpa.
26 Inhmã Ejit nhõ xwỳnhjê hkôt ixkukrêx rax nẽ ri ixpa hprãm kêt. Kwãr mẽ mãmrĩ Tĩrtũm ã tanhmã inhĩpêx to. Koja mẽ ã inhĩpêx anẽ pa ixpunuj nẽ ri ixpa htã koja Tĩrtũm nhỹrmã ixto mex rax nẽ. Nà kot paj Ejit nhõ pahihti hkôt ri ixpa hkêt nẽ.
Anhỹr jao ra mẽ pahpyrà nẽ Kris gryk ã mẽ hkaga.
27 Tã akupỹm mẽõ pika hwỳr Ijaewjê ho mõr kaxyw nhũm Ejit nhõ pahihtija tee ri ja hã omu nẽ kamã gryk tỳx nẽ. No nhũm Mojesja amnhĩ kaxyw Tĩrtũm kôt hamaxpẽr tỳx o hkamnàr rom kãm mẽ uma hkêt nẽ. Nẽ mẽ kêp hkwỳjê kator pa nẽ ma akupỹm mẽõ pika hwỳr amnhĩ kôt mẽ o pa. Tĩrtũm kamnàr rom ã mẽ kêp mẽ ho kator anẽ. Aa kot no ho omunh kêt tã amnhĩ kaxyw kãm hamaxpẽr tỳx nẽ hkamnàr rom mẽ kator nẽ hamakêtkati nẽ mẽ o pa.
28 Nẽ hkamnàr rom mẽ hkĩnh ã arĩgro mẽ kot kãm “Pas” anhỹr xwỳnhta ho hkrax. Kormã Ejit rũm kator kêt ri. Nẽ kaxyw amnhĩ kwỳjê mã hã karõ nẽ mẽ kãm:
—E pa mẽ amã Tĩrtũm kapẽr jarẽ ka mẽ inhma. Nà kot puj xep mẽ jarãhã ôwêhti hkwỳ pa nẽ hkamrô ru. Nẽ hkamrô ho panhõrkwỹ jakwakre hã pĩ kukõ. Hãmri nẽ ĩ kuxôt nẽ kuku. Koja kamàt nhũm mẽ kot amnhĩ tomnuj xwỳnhjê pê mẽ hkra my kot wa piitã mẽ hpar mã xwỳnhja mõ. Hãmri nẽ mẽ pamỳ ri mõ nẽ ã mẽ pahte mẽ panhõrkwỹ nhĩpêx anhỹrja ã omu nẽ tanhmã mẽ pahkrajê ho hkêt nẽ. Tĩrtũmja ã mẽ pahte amnhĩ nhĩpêx anhỹr kaxyw ã inhmã karõ anẽ. Jakamã e pu mẽ hkamnàr rom ã amnhĩ nhĩpêx anẽ kê mẽ pahkrajaja mẽ pahpê htyk kêt nẽ. Anẽ.
Hãmri nẽ ã mẽ kot Ejit rũm kator xà hã arĩgrota ã mẽ hkĩnh o kator krax anẽ. Mẽ hkĩnhja na htem kãm “Pas” anẽ.
29 Nẽ Ijaewjaja na prem haxwỳja Ejit rũm kormã Mojes kôt mẽ pa ri uràk nẽ amnhĩ kaxyw Tĩrtũm mã hamaxpẽr. Jakamã na prem ra gô xujanãr pê “Gô Kamrêk” anhỹr xwỳnhja mỳ ri kuhê nhũm Tĩrtũm mẽ kãm ho axkjê. Nẽ mẽ kãm hkôt ã ho amgrà nhũm mẽ hã hkamnàr rom mex nẽ rêr pa. No nhũm mẽ hkôt mẽ kot mẽ himex kaxyw mẽ mrar xwỳnhjaja. Ejit nhõ pôristijaja nhũm gôja akupỹm mẽ hã axkamur nẽ mẽ himex pa.
30-31 Nẽ Ijaew kot Mojes mỳr pê Jojue hkôt pa ri mẽ uràk nẽ amnhĩ kaxyw Tĩrtũm kôt hamaxpẽr o pa. Na prem ra Tĩrtũm kot mẽ kãm pika nhõr xwỳnhta wỳr pôj nhũm Tĩrtũm krĩ pê Jeriko hwỳr mẽ kurẽ. Mẽ kot kamã mẽ pa xwỳnh pê utàr kaxyw mẽ hwỳr mẽ kurẽ. Mẽõ krĩ pu hã kahêja kẽn tỳx pix o na pre. Nẽ hprêk rax kumrẽx. Nẽ krĩ nhõ xwỳnhjaja kãm Tĩrtũm kapẽr mar prãm kêt. Hãmri nhũm Tĩrtũm mẽ hã Ijaewjê mã amỹnê nẽ mẽ kãm:
—E mẽõ krĩja kot paj mẽ amã kugõ nom kêr ka mẽ inhmar kumrẽx. Kêr ka mẽ apkati mẽ mẽ õ krĩ hwỳr mra nẽ kupu hpỹnh o atã apkati kêp 7 nẽ rĩ ma akupỹm mra. Anẽ.
Hãmri nhũm mẽ kuma nẽ mar xà hkôt ma Jeriko hwỳr mra. Hãmri nẽ hwỳr pôj nẽ Tĩrtũm kamnàr rom krĩ puhã kahêja kupu hpỹnh o hã apkati kêp 7. Hãmri nhũm apkati pê 7ta ã nhũm kẽn tỳx o kahêja mẽ kêp amnhĩ krakrak nẽ rôrôk pa. Nhũm mẽ mra nẽ hkôt krĩ hwỳr agjê nẽ krĩ nhõ xwỳnhjê nhĩmex pa. Nom krĩ kamã kuprỳ pê Raapja Ijaew pyrà nẽ amnhĩ kaxyw Tĩrtũm mã hamaxpẽr o pa jakamã nhũm mẽ kormã mẽ himex kaxyw mẽ hwỳr mõr kêt ri amnhĩ kukamã mẽ hkwỳjaja kot mẽ hã ukapi ho pa kaxyw mẽ hwỳr mẽ kurẽ. Hãmri nhũm Raapja mẽ kêp amnhĩ pyrà nẽ Tĩrtũm kôt hamaxpẽr ã mẽ omu nẽ hkwỳ kot mẽ himex pymaj amnhĩ nhõrkwỹ kamã mẽ kêp mẽ ho amũxu nhũm mẽ hkà hkĩnh pê ma akupỹm hkwỳjê wỳr mõ. Jakamã nhũm mẽ kot mẽ himex kaxyw mẽ hwỳr mra hãmri nẽ amnhĩ pyrà nẽ tanhmã Raap mẽ õ fãmii ho hkêt nhũm mẽ arĩ htĩr nẽ pa. Mẽ uràk nẽ amnhĩ kaxyw Tĩrtũm kôt hamaxpẽr o pa hã omunh xà hkôt tanhmã mẽ ho hkêt nẽ.
32 ã na pre mẽ kot amnhĩ kaxyw Tĩrtũm kôt mẽ hamaxpẽr xwỳnhjaja Tĩrtũm kamnàr rom amnhĩ nhĩpêx anhỹr o pa. Nom jajê pixjaja na prem ã amnhĩ nhĩpêx anhỹr hkêt nẽ. Mããnẽn Giteãw nẽ Parak nẽ Sãsõ nẽ Jepte nẽ Tawi nẽ Sãmuew nẽ Tĩrtũm nhỹ hã mẽ kapẽr o pa xwỳnhjaja. Jajê piitã na prem wamtajê pyrà nẽ amnhĩ kaxyw Tĩrtũm kôt hamaxpẽr tỳx rãhã ho pa. Nom kot paj ixprĩ hã tanhmã mẽ kot hkamnàr rom amnhĩ nhĩpêx to hã mẽ harẽnh kêt nẽ. Kot pa anẽ nẽ tokyx harẽnh par kêt nẽ. Mẽ ohtô rax kumrẽx jakamã na pa ãm hkwỳ pix jarẽ nẽ hã kagà.
33 Na prem hkwỳjaja Tĩrtũm kamnàr rom ma mẽ kot amnhĩ tomnuj xwỳnhjê nhõ krĩ hwỳr mra nẽ mẽ kêp mẽ õ pika pytà. Nẽ mẽ hkwỳjaja Tĩrtũm kamnàr rom mẽ ho amnhĩptàr mex o pa. Nhũm prem kãm Tĩrtũm kurê xwỳnhjaja mẽ hkwỳjê pynê nẽ ahkrehti kamã mry xoprê hkwỳ nhĩpy mẽ kurẽ. Nhũm prem amnhĩ tã mẽ omu nẽ amnhĩ kaxyw Tĩrtũm mã hamaxpẽr kurê kumrẽx nhũm amnhĩ tã mẽ omu mẽ nê te mry jakwa ho pikamỳr tỳx pyràk o mẽ hipêx nhũm ãm mẽ omunh o kuhê nẽ tanhmã mẽ ho hkêt nẽ. Ã na prem Tĩrtũm kamnàr rom amnhĩ nhĩpêx anhỹr o pa.
34 Nhũm mẽ kot kuwy rax kãm mẽ hkwỳjê rẽnh tã nhũm mẽ kot amnhĩ kaxyw Tĩrtũm mã hamaxpẽr tỳx nhũm amnhĩ tã mẽ omu nẽ mẽ nê tanhmã kuwy ho nhũm mẽ hxêt kêt nẽ. Nhũm pre mẽ hkwỳjaja wapo ho mẽ hkamnhwỳr o mẽ hkwỳjê hpar kaxyw nhũm mẽ amnhĩ kaxyw Tĩrtũm mã hamaxpẽr nhũm amnhĩ tã mẽ omu nẽ mẽ nê tanhmã mẽ ho nhũm mẽ amnhĩ rê nẽ mẽ umaj hprõt nẽ ma mra. Mẽ hihtỳx kêt tã Tĩrtũm kamnàr rom ỹ hã hihtỳx nẽ mẽ kãm mẽ hkurê xwỳnhjê ho krihkrit pa nhũm mẽ ma akupỹm hapêx.
35 Nẽ mẽni hkwỳjaja na prem haxwỳja amnhĩ kaxyw Tĩrtũm mã hamaxpẽr tỳx o pa. Jao mẽ hkrajaja mẽ kêp htyk tã nhũm prem Tĩrtũm kamnàr rom mẽ ho kuwỳ nhũm mẽ kuma nẽ akupỹm mẽ kãm mẽ ho htĩr.
à na prem amnhĩ kaxyw Tĩrtũm mã hamaxpẽr pê mex nẽ pa anẽ. No na pre mẽ hkwỳjaja mẽ uràk nẽ amnhĩ kaxyw kãm hamaxpẽr tỳx tã nhũm Tĩrtũm tokyx mẽ ho mex kêt nẽ. Na pre mẽ kãm mẽ hkurê xwỳnhjaja Tĩrtũm ã mẽ par kaxyw. Nẽ mẽ hkwỳjaja Tĩrtũm ã mẽ hipêx kati ho pa nhũm mẽ amnhĩ xà htỳx kãm hamak kãm ty. Nhũm mẽ himex kaxyw nẽ mẽ kãm:
—Kwa mẽ Tĩrtũm kaga. Kot kaj mẽ hkaga pa mẽ amã inhũre nẽ mẽ anhĩmex kêt nẽ. Anẽ.
No nhũm mẽ kuma nẽ ãm mẽ kuma nẽ amnhĩ kaxyw kãm hamaxpẽr tỳx pê mẽ kãm:
—Nà mẽ kam nẽ mãmrĩ ixpĩ. Inhmã ixtyk pyma hkêt. Kot paj ty nhũm Tĩrtũm akupỹm ixto ixtĩr pa kuri inhmex kumrẽx nẽ ri ixtĩr tũm nẽ ixpa ho ixpa.
Anhỹr o mẽ kãm amnhĩ jarẽnh jakamã hãmri Tĩrtũm kaga hkêt rãhã nhũm mẽ himex.
36 Nẽ mẽ kãm mẽ hkurê xwỳnhjaja na prem Kris ã mẽ hkwỳjê mã hpẽr o pikẽnh pê mẽ htak xà ho mẽ htak rũnh o pa. Nẽ kàx o mẽ hkwỳjê hpa hpre nẽ mẽ hte hpre nhũm mẽ kêp prês nẽ hkrĩ ho hkrĩ.
37-38 Nhũm prem kẽn rũnh o mẽ hkwỳjê htak o mẽ kupa. Nẽ mẽ hayr o mẽ hkwỳjê pa. Nẽ mẽ hkamnhwỳr o mẽ hkwỳjê pa. Ã na prem Kris kôt mẽ hamaxpẽr ã mẽ omunh xà hkôt mẽ hipêx anhỹr o pa. Jakamã na pre mẽ hkwỳjaja mẽ umaj mẽõ krĩ rũm hapôj nẽ ma hprõt nẽ mra. Nẽ te mẽ õ krĩ hkêt pyrà nẽ kapôt ã kêp amrakati nẽ ri pa. Mẽ ê hkêt nẽ ôwêhti hkà ho ê nẽ ri hã pa. Nẽ motre kà ho amnhĩ pre nẽ ri hã pa. Nẽ kẽn prêk ã api nẽ kre kamã hpimxur o pa. Nẽ pika hkre kamã hpimxur o pa. Nhũm mẽ kãm mẽ hkurê xwỳnhjaja te mẽ kêp ahpunu nẽ mẽ kêp ahkro pyràk o mẽ hipêx nẽ axpẽn mã mẽ harẽnh o:
—Nà mẽ mexti hã. Kwa pu mẽ piitã mẽ himex paa ri.
Anhỹr o mẽ harẽnh tã nhũm Tĩrtũm mẽ uràk nẽ ã mẽ harẽnh anhỹr kêt nẽ. Na pre mẽ mex kumrẽx ã mẽ harẽ. Nẽ nhỹrmã kuri mẽ mex nẽ pa ho pa hkukamã mẽ harẽ.
39 ã na prem Tĩrtũm kamnàr rom mẽ kãm mẽ hkurê xwỳnhjê kutã amnhĩ to htỳx kãm htyk o pa anẽ. Nhũm Tĩrtũm ja hã mẽ omu nẽ hkĩnh nẽ kãm mẽ hapê htỳx nẽ. No nhũm mẽ kormã htĩr ri amnhĩm Tĩrtũm kot mẽ ho mex xà jamỳnh kêt rãhã ty.
40 Tã mo na pre Tĩrtũm kormã mẽ htĩr ri hkwỳjê pyrà nẽ mẽ ho mex kêt nẽ? Nà na pre kormã mẽ hkukamã hamaxpẽr o:
—Nà kot paj kormã mẽ ho mex kêt nẽ. Kot pa mẽ mỳr pê mẽ kot ixkôt amnhĩ xunhwỳr mã xwỳnhjê jamãr grire mãn. Kêr pa inhõ krĩ kamã mẽ ho ixpimrààtã mẽ ho mex rax kumrẽx. Nà kot paj ã mẽ ho mex anẽ. Ja na kêt inhmã mex o kormã mẽ htĩr ri ixte mẽ ho mexta jakrenh. Anẽ.
Jao ra ã mẽ papajaja mẽ pakukamã hamaxpẽr anẽ.