18
Tigarungu Babilon
Le nga so tina ngan pombe a imot, motong la akamata bangabangana ke Maro san mulu in ipa ye malala ke Maro a isi. Ngan bangabangana tani in gurana ki mai san, inbe lulngana ilolo a ilangaraia tana i le imot. Inbe koonoo le gurana nen,
“Malala mai Babilon in tigarungu oo.
Le moolmool, ye in tigarungu le dook tiap yege.
Le dookoot ngan malala koonoo le di so sidi leu la tinepe ye nga.
Nen le di so sidi ke geingi sennene,
inbe di man yo tinidi giri leu nga,
inbe di man yo ke bet takan di tiap nga,
ngan di leu la tinepe ye nga.
Ngan tigarungu nen,
yesoo di tooltool ke ni mai i le imot nga,
ngan tiye tiyei gogo dada dook tiap ke bauk mata,
le dawa ben tool iyin ran medana yo ene wain in le kuton moo ye a iyei kapa nga.
Inbe di tooltool kuto maimai yo matadi kala tana maimai nga,
ngan tiye tiyei bauk lapau.
Inbe ye in taukan moomoonoo le tina kanakana ngan iyimi so yo pat ki mai san nga ye di tooltool ke yawaringi so.
Ngan nen le di tooltool tina ngan ballingadi ye so kidi tina yo iyimi nga.”
Motong la alongo tool san mulu kalngana ye malala ke Maro in iwete nen,
“Ai, di tooltool kiau nga, kagege malala ke garup lekelekene tani in a kapas a kasi diki,
ngan la bet kayei dada dook tiap yo dawa ben ye iyei ngan tiap nga.
Ole nen ngan kayei ene ye kene yo bet tikap urata moonoo masngana panga ye sennene ki tina ngan kootoonoo ye i.
Ngan garup tani in sennene ki alunu san le ben tagaun pat a budanga ki ilo ete le bet lo itoko lang nga.
Nen le Maro lon tut ye dada dook tiap ki tina yo iyei nga le imot.
Inbe lomu tut ye dada dook tiap ki yo iyei pang nga,
a bet nen ngan karau dada dook tiap ki tina ye dada gaongo leu le paru.
Mugu ngan ikap ran malingene pang bet kayin,
bong bet karaukol ran ki nga, ngan ole kakap ran malingene gaongo leu panga a iyin le paru.
Ngan garup tani in iyimi so yo pat ki mai san ngan panga ye taunu bet lon ponana ye.
Ngan nanga, karautoo ene le idu lopo yege,
inbe kakaua urata moonoo masngana dook tiap panga ye dada dook tiap ki yo iyei, ngan kootoonoo.
Ye in ye lono ngan ye taun ipayiti nen,
‘Au i garup kuto mai le awur ye kakawa kiau ke burungu a nen ngan matak kala di tooltool ke tana mai kiau i.
Inbe au i ben garup tap tiap lapau, le so sa yo bet iyei au a lok madoko ye a atang, ngan tiap.’
Ngan tina yo iyei nen nga,
le ole so dook tiap matana matana alunu la bet pombe pang ye nga, ngan ye ke ataleu.
Nen le pitolo mai ole pombe,
inbe di tooltool alunu la bet timmata nga le tangini mai ole pombe lapau.
Inbe ei ole ikani le imot,
yesoo Tool Mai Maro yo gurana ki mai san i,
in ye la ikarata betanga ki i.
“Nen le ye kene yo ei ikana malala tani le kutana ikut a ilo pang ete ye in nga, ngan di tooltool kuto maimai yo matadi kala tana maimai kapala nga, ngan ole tikamata le lodi madoko ye. Di tooltool tina ngan tiye tiyei dada dook tiap ke bauk, inbe tiye tiyimi so yo pat ki mai san ngan pang di tapdi lapau. Ngan nen le di tooltool tina ole lodi madoko a titang ye. 10 Bong di tooltool kuto maimai tina ngan ole tila potai ye tiap, yesoo titattadai, inbe lodi imassingi ye so yo pombe pang ye nga. Nen le ole tikodo manga mooloo ye, inbe tiwete nen,
‘Atoo! Atoo, Babilon ong in malala mai,
inbe gurana kiong mai san lapau.
Bong ye manga modono kasin leu nga,*
ngan la le urata dook tiap ke sennene kiong ngan kootoonoo pombe pang yong koot nga.’
11 “Ngan di tooltool ke tana yo tiyawar so a bet tikap pat ye nga, ngan ole lodi madoko ye Babilon inbe titang ye, yesoo tool sa mulu bet iyimi so kidi yo ke bet tiyawar a tikap pat ye, ngan tiap. 12 Ngan so kidi tina yo tiyawar nga, ngan pat yo gol le silba nga, inbe pat matana matana yo isallin dook mata nga, inbe pat ke gomo yo sallinene ngan lapau. Inbe tiyawar mala yo puspusngana nga, inbe mala san yo yoongoonoo be kooroonoo yo pat ki mai san nga, inbe mala yo tinini ilappus nga. Inbe tiyawar kai medana yo ene sitron nga, inbe so yo tikarata ye asara yo ene elepen in dongana nga, inbe so kapala yo tikarata ye baras le so san medana yo ene ain i, inbe pat san yo tinini rorngana i. 13 Inbe so kidi kapala yo tiyawar nga, ngan kai kulini yo kini ki dook mata nga, inbe so ben laki ke kaningi, inbe so yo tidauni ngan kutana ikini dook mata nga, inbe kai yo ene mir in surunu nga, inbe so dawa ben matuk gorengana yo kini ki dook mata nga. Inbe tiyawar ran medana yo ene wain nga, inbe kai olip surunu, inbe dingding patunu yo maroana nga, inbe dingding patunu yo ene wit nga. Inbe tiyawar asara yo edi bulumakau le sipsip nga, inbe oos tipa ye koror kidi, inbe di poranga le di tooltool kapala yo tinepe maguredi nga, ngan lapau. Bong tool sa mulu bet iyimi so kidi yo bet tiyawar a tikap pat ye, ngan tiap.
14 “Ngan nen le di tooltool tina yo tiyawar so a tikap pat ye ngan ole tiwete nen, ‘So le imot yo mugu ngan lom panga le kop nga, ngan dookoot nga ilene yong oo. Inbe balingi le moro kiong yo dook mata nga, ngan ilene a imot le ke bet kupusye mulu tiap.’
15 “Di tooltool yo tiyawar so tina ye malala tani ngan le tikap belebele pat ye nga, ngan ole titattadaia masngana yo pombe pang ye malala mai tani le tikodo manga mooloo ye. Inbe ole lodi madoko a titang le mai, 16 inbe tiwete nen,
‘Atoo! Atoo, lomam pang malala mai ni koot sa,
yesoo mugu ngan isousou ye sousoungu dook mata yo puspusngana nga,
inbe isousou ye sousoungu yo kooroonoo inbe yoongoonoo le dook mata san nga.
Inbe isorosoro ye gol inbe ye pat matana matana yo isallin dook mata nga,
inbe matauu ki ngan tikarata ye pat ke gomo yo sallinene nga.
17 Bong ye manga modono kasin leu nga,
ngan balingi le so ki tina yo dook mata nga, ngan ilene a imot oo.’
“Ngan di koddenge ke ookoo nga le imot, inbe di manungu le imot yo tikooi ye ookoo a bet tila pang ye malala kapala nga, inbe di loningi ke koddenge ke ookoo, inbe di tooltool ke yoosoongoo nga, ngan ole tikodo manga mooloo ye malala mai tani in. 18 Inbe ye kene yo tikamata ei tani yo ikani, in kutana nga, ngan ole titang le mai, inbe tiwete nen, ‘Atoo, ni malala sa yo dawa ben malala mai tani ni lapau?’ 19 Inbe ole tikap gauru ke tana a tikatte lo kutodi, inbe lodi madoko a titang le mai inbe tiwete nen,
‘Atoo! Atoo, lomam pang malala mai tani ni koot sa.
Ngan di tooltool le imot yo ookoo kidi tikooi tiek pono a tipayiri so matana matana ke malala mai tani a tikap pat le ballingadi ye nga,
ngan ye manga modono kasin leu nga, ngan so dook tiap pombe a igarungu malala mai tani le dook tiap oo.
20 Nen le ang di tooltool le imot yo kanepe ye malala ke Maro nga,
ngan lomu ponana ye masngana dook tiap yo pombe pang ye malala mai tani ni.
Inbe ang di tooltool ke Maro le di aposol inbe di Maro koonoo nga,
ngan ole lomu ponana lapau ye yo Maro ikarata betanga ki a bet nen ngan iyemenaii ye dada dook tiap ki yo iyei pang, ngan kootoonoo nga.’ ”
21 Ngan alongo betanga tina ngan a imot, motong la bangabangana ke Maro yo gurana ki mai san i, in ikaua pat somai atu yo dawa ben pat ke raunganingi dingding patunu i, inbe ikatte a idu tiek lono a idaudat le ilene. Inbe iwete nen,
“Urata dook tiap maiyoko yo pombe ye pat ni,
in la bet pombe pang ye malala mai tani yo Babilon i.
Le ole tigarungu le ilene le ke bet di tooltool tikamata mulu tiap.
22 Le, Babilon, kulongo!
Di tooltool ke sianga yo tipodo so dawa ben pari,
too timai kure le tauru koongoo lono kiong nga,
ngan o ke bet amlongo kalngadi yong mulu tiap.
Inbe di tooltool ke urata yo lodi galanga ye urata matana matana nga,
ngan o ke bet ampusye di yong mulu tiap.
Inbe pat somai ke raunganingi dingding patunu i,
in o ke bet amlongo tangini ki yong mulu tiap lapau.
23 Inbe sul lulngana yo ilangaraia ni kiong nga,
ngan o ke bet ilolo yong mulu tiap.
Inbe di garup le di tamoto yo bet tikere nga,
ngan o ke bet amlongo betanga kidi yong mulu tiap.
Di tooltool yo man tiyawar so koongoo lono kiong a tikap pat ye nga,
ngan di tooltool edi maimai le tillos di diedi kapala yo ke tana i nga.
Inbe ong in kuyei gogo bar matana matana a bet kullung di tooltool ke tana maimai nga le imot.
24 Inbe ye tana kiong tani in ampusye rara ke di Maro koonoo le ipa ye rara ke di tooltool ke Maro,
inbe di tooltool ke tana i le imot yo kuraumata di nga, ngan lapau.”
* 18:10 Ngan manga modono kasin in dawa ben aua atu leu.