35
Kure rokẽ Jako ritopõpyry Peteu po
1 Morarame ynara tykase Ritonõpo Jako a:
— Atakimako oytotohkõme Peteu pona. Moroto Peteu po apoto apõ tyriko jeahmatohme. Ywy ase Ritonõpo, osenepoase oya orui, Ezau poe oeparyhtao.
2 Naeroro ynara tykase Jako tytapyĩ taõkomo a, tymarõkõ maro emero:
— Neponãmary ipahtoko, imeimehnõ neponãmarykõ, amaro xine ahtao. Oorypyrykõ ikorokapotoko te, epytoko te, upo amurutoko, ikurikasenano.
3 Atakimatoko, Peteu pona ytõko sytatose. Moroto apoto apõ rĩko ase Ritonõpo eahmatohme kyya xine. Typynanohse ywy eya etuarimaryhtao. Morararo ymaro exikehpyra toehse ynororo emero pona toytose jahtao.
4 Mame tyneponãmarykõ tokarose eya xine, panasere tõkehko tokarose roropa eya xine. Mame Jako a morohne tonẽse wewe karawario zopikoxi, pata Xikẽ pũto.
5 Morotoino toytose toto ahtao Jako tõ zuno toehse toto, moe pyra roropa imehnõ patary kynexine, Ritonõpo poe toto zuno toehse toto. Morara exiryke Jako tõ onekahmara toh kynexine emỹpotohme.
6 Morarame toeporehkase Jako tomo, imarõkõ maro emero Ruze pona. Moro pata esety akorõ Peteume kynexine, Kanaã nonory po.
7 Moroto apoto apõ tyrise Jako a Ritonõpo eahmatohme. Moroto tosehpase eya “Ritonõpo, Peteu Esemy” me. Moroto tõsenepose Ritonõpo exiryke eya toepase ynororo ahtao turui kurũke.
8 Moroto kynexine Repeka akorehmahpõ Tepora orihtopõpyry. Ekepyry tonẽse kynexine wewe kurã zopikoxi ikurenaka Peteu wino. Moroto tosehpase “Wewe Karawario Xitatohme”.
9 Moromeĩpo toehse ropa Jako ahtao Mesopotamia poe, tõsenepose ropa Ritonõpo eya. Kure tyripose roropa ynororo eya.
10 Ynara tykase ynororo eya:
— Oesety Jakome mana,
yrome oesety myakamãko ase;
taroino Jakome pyra mase,
Izyraeume oesehpãko ase.
Naeroro tosehpase ynororo Ritonõpo a Izyraeume.
11 Ynara tykase roropa Ritonõpo eya:
— Ywy ase Ritonõpo Jamihmehxo Exikety.
Emũkuako tuhke, typakõke tuhke oehtohme.
Ahno imoihme, apakõ emãnõko mã toto,
tuhke exiketõme exĩko mã toto,
toitoine tuisa tõme exĩko mã toto.
12 Sero nono ynekarohpyry Aparão a,
Izake a roropa ekarõko ase oya roropa, apakomotyamo a roropa.
13 Mame tõturukehse Ritonõpo ahtao Jako maro tõnuhse ynororo, moro poe toesyryhmase ropa.
14 Mame topu tapoise Jako a xikihme tyritohme, moroto tymaro Ritonõpo oturutopõpyry po. Moro topu po oriu tukuãse Jako a eukuru jehnahpyry maro tynekaroryme Ritonõpo a.
15 Moro tosehpase eya Peteume.
Rakeu orihtopõpyry
16 Morarame Peteu poe toytose Jako tytapyĩ taõkõ maro, mame moe pyra toehse toto ahtao Epyrata pona, Rakeu enurutoh toehse, toxietũtose ynororo. Yrome tupime kynexine eya, okyna enurupopyra toehse.
17 Morarame sam tykase itamurume ahtao, imaro exikety, nohpo ynara tykase:
— Enaromyra exiko; emũkuãko mase orutuame.
18 Yrome orihnõko Rakeu kynexine. Orihsasaka ahtao ynara tykase:
— Mose esehpãko ase Penonime, tykase. Yrome jumy a tosehpase ynororo Pẽjamĩme.
19 Moro sã toorihse Rakeu, ekepyry tonẽse Epyrata esemary ehpio. Imeĩpo Perẽme toehse moro pata.
20 Zonẽtoh pona topu tyrise Jako a xikihme, wenikehpyra ehtohme, Rakeu ekepyry zonẽtopõpyry poko. Moroto ro mana seroae ro.
21 Morotoino toytose Jako osesarise tapyi kaetokõ Etea esary mõpozakoxi.
Jako poenomo
(1 Koronika 2.1-2)
22 Morarame moroto Jako tõ toehse ahtao, imũkuru Rupẽ Pira poko toehse tumy pyty poetory, yrome ipytyme ro. Moro waro toehse Jako ahtao tyekĩtapãse ynororo.
Jako toemũkuase 12me
23 Typyty Reia maro toemũkuase 6me: Rupẽ osemazupu te, Ximeão te, Rewi te, Juta te, Isakaa te, Zepurõ, enara.
24 Rakeu maro toemũkuase asakoro: Joze te, Pẽjamĩ, enara.
25 Pira maro Rakeu poetory toemũkuase asakoro: Tã te, Napatari, enara.
26 Ziupa maro Reia poetory toemũkuase asakoro: Kate te, Asea, enara. Mokaro Jako mũkuru tõ tonuruse Mesopotamia po.
Izake orihtopõpyry
27 Jako toytose tumy Izake maro ehse Mãre pona, esety akorõ Arapame kynexine, Eperõ pũto. Moroto Aparão esahpyry kynexine Izake maro.
28 Mame 180 jeimamyry taropose Izake ahtao,
29 tamuhpõme toehse ynororo ahtao toorihse ynororo. Mame ekepyry tonẽse imũkuru tomo a, Ezau, Jako, enara.