14
Izyraeu tõ toahmase eramatohme ropa Ritonõpo a
1 Izyraeu tomo, osehtoko ropa Ritonõpo Oesẽkomo a! Mepukatose oorypyrykõ poko toehse oexirykõke.
2 Osehtoko ropa Ritonõpo a, ynara kahtoko eya: “Yna rypyry ikorokako, yna otururu oya etako! Oeahmary yna a ekarõko ynanase oya ynanekaroryme.
3 Axirio tõ yna onypynanohsaromepyra mã toto, kawaru tõ yna onewomasaromepyra mã toto. Jũme ynanyrityamo a, ynaneponãmary tomo a ‘Yna Esẽme mase,’ kara ropa exĩko ynanase. Omoro, Ritonõpo, yna pyno mase, tymõkomoke pyra exiketõ etuarimaketõ roropa pynanohnõko mase.”
Isene ehtoh ekarõko ropa Ritonõpo mana
4 Ynara ãko Ritonõpo mana:
“Ypoetory tõ kurãkãko ase,
toto amonohtopõpyrykõ korokãko ase.
Toto pyno exĩko ase yronymyryme ukurohtao, tohne toehkehse jexiryke ipoko xine.
5 Konopo sã exĩko ase Izyraeu tomo a,
ekuru tõ ekutãko mã kehko, ririo tomo.
Imity tõ ahtãko roropa mã kehko mya rahkene, wewe mity sã Ripano po.
6 Amoriry tõ mosahxo exĩko mã kehko, kure potu oriwera amoriry tõ samo.
Typoxine exĩko roropa mã kehko apupari samo Ripano po.
7 Isene exĩko ropa Izyraeu mana, towomase ya;
tiriiku ahtary sã emãnõko mã toto,
topere sã exĩko mã toto uwa zoko samo.
Mokaro imehxo ehtoh waro exĩko imehnõ mana, uwa eukuru jehnahpyry samo Ripano po.
8 ‘Ynaneponãmary tõ toiparo rokẽ mã kehko, typahsẽme rokene,’ ãko Izyraeu tõ mana.
Ywy ase Ritonõpo Oesẽkomo, ypoetory tõ otururu etãko ase;
ywy ase toto pynanohneme.
Pinieiro wewe isene exikety sã ase toto ewomãko.
Ypoe kure ehtoh apoĩko mã toto emero porehme.”
Etyhpyryme
9 Senohne, ynymerohpyry enetuputyry se ase tuaro exiketomo a, osenetupuhtohme moro poko. Ritonõpo esemary tõ zae mã kehko. Zae ehtoh poko exiketõ ytoytõko mã toto moro ae, yrome iirypyryme exiketõ osetapãko, epukãko mã toto.