2
Jona oturutopõpyry Ritonõpo a
1 Moroto kanaimo wakuru ao tõturuse Jona Ritonõpo a. Ynara tykase ynororo:
2 “Ritonõpo Jesemy, jetuarimaryhtao kykohmase, kuezukuase roropa.
Zue ao jahtao, aorihtyã esary poe, kui tykase ywy:
‘Kypynanohko!’ ase oya.
Mame jomiry totase oya.
3 Kuemase zue konõto kuaka, tuna konõto kurohtaka.
Moroto tuna a toworise ywy emero porehme.
Pohkane jamihme exiketõ, okyryry emero toytose jupuhpyry epozakuroko.
4 Jũme tomase tõsekarose ywy owinoino, myame roropa,
Atapyĩ kurã onenepyra ropa jehtohme.
5 Tuna zueme exiryke tumyhkase ywy,
tynerymase ywy tuna konõto a,
otyro nakuaõkõ jupuhpyry amẽnõko nexiase.
6 Tyhtose ywy ypy tõ zopikoxi,
imepỹ nono pona, moroto omõtoh tapuruse mana jũme.
Yrome omoro, Ritonõpo Jesemy,
kypynanopyase orihpyra jehtohme,
7 Orihsasaka jahtao, wenikehpyra opoko exiase,
Ritonõpo, oturuase oya,
mame kuetase Atapyĩ kurã tao awahtao.
8 Mokaro tyneponãmarykõ xihpyry eahmananomo a
turumekase omoro Tosẽkõme.
9 Yrome ywy oeahmaryme eremiãko ase.
Oya ynekarory ekarõko roropa ase.
Jomihpyry ae ro, kure orĩko ase
Ypynanohneme oexiryke, Ritonõpo, Jesemy.”
10 Morarame Ritonõpo omi poe kanaimo tonarutase ropa, Jona tomase eya isawã pona tuna konõto ehpikoxi.