5
Tymõkomokãkara rohmanohpory poko
1 Moromeĩpo juteu tõ tykerekeremapitose tuhkãkomo a, orutua komo a, nohpo tomo a, enara.
2 Ynara tykase toitoine exiketomo:
— Yna tapyĩ taõkõ tuhke nase. Tonahsã se ynanase, tiriiku tõkehko, isene ro yna ehtohme, tykase toto.
3 Imehnõ ynara tykase:
— Yna emitapãpyra ehtohme yna tupi tõ tokamose yna a, yna narykahpyry uwa zoko tõkehko, yna tapyĩ tõ roropa tonahsẽ epekahtohme, tykase toto.
4 Imehnõ roropa ynara tykase:
— Tineru tokaropose yna a axĩtao rokẽ tuisa konõto epehmatohme kowenu tinerume tupito tõ poko yna narykahpyry uwa tõ poko roropa.
5 Oxisã ynanase imehnõ juteu tõ maro repe. Yna poenõ kure roropa mã toto, mokaro poenõ sã repe. Yrome yna poenõ irohmanohpõko ynanase topehke pyra. Toitoine yna ẽxiry tõ tokamose yna a tineru poko, imehnõ namotome. Otupĩko ynanase yna tupi tõ tupuxihkase exiryke yna wino yna narykahpyry uwa tõ roropa.
6 Morara kary etaryke ya tyekĩtapãse ywy.
7 Orẽpyra sã toto tuisary tõ tupokase ya, ynara tykase ywy eya xine:
— Oekyry tõ htomãko matose. Epehpyry motye epehmaporyhtao oekyry tomo a tonahsẽ poko, eukuru poko roropa aosanumãko matose. Morara popyra mana.
Mame taoximõnohpose toto ya morara zae pyra ehtoh kurãkatohme.
8 Ynara tykase ywy:
— Tineru nae kuahtao xine kuekyrykõ topekahse kyya xine imehnõ ahno wino, toto namotome toehse toto ahtao. Yrome seromaroro oekyry tõ tyripõko matose osekarotohme anamotome toto ehtohme, tykase ywy.
Yrome jezuhpyra tamuximãkomo, mynyhme rokẽ toh nexiase.
9 Mame ynara tykase ywy:
— Onyrihpyrykõ zae pyra nase ipunaka! Ritonõpo omipona ehtoko zae oehtohkõme. Morara awahtao xine kuepetõkara, juteutõkara kykerekeremasaromepyra exĩko mã toto.
10 Ahno a tineru ekaroase, tiriiku roropa axĩtao rokẽ repe. Morara tyrise ymaro exiketomo a te, ypoetory tõ a roropa, morohne tokarose ahno a axĩtao rokene. Seromaroro morohne onepehmapopyra ropa sehtone eya xine.
11 Amarokõ roropa onepehmapopyra ropa ehtoko eya xine, tineru te, uwa eukuru te, azeite, enara. Itupi tõ roropa ekarotoko ropa eya xine seromaroro, uwa ke inarykatyamo te, oriwera tõ inarykatyamo te, itapyĩkõ roropa.
12 Ynara tykase tamuximãkomo:
— Kure. Morara tyrĩko ynanase onyripohpyry ae ro. Esarykõ ekarõko ropa ynanase eya xine. Ynanekarohpyry roropa onepehmapopyra ropa ynanase, tykase toto.
Morara exiryke oturuketõ tonehpose ya tuisa tõ omiry etatohme eya xine, ekurehpyra toto ehtohme, tõmihpyrykõ omipona toto ehtohme.
13 Mame jupõ zamareary touse ya, moro tytohtohmase ya. Ynara tykase ywy:
— Ynara amarokõ tytohtohmasẽme exĩko Ritonõpo a õmihpyrykõ omipona pyra exiketyme awahtao xine zae ehtoh ritohme. Mokyro tapyĩ puxihkãko Ritonõpo mana. Tymõkomoke pyra inomõko mana.
Mame morotõkomo a tozuhse:
— Kure. Morara zae mã yna a!
Mame Ritonõpo toahmase eya xine. Tõmihpyrykõ omipona toehse roropa toh nexiase.
Zae Neemia ehtopõpyry
14 12me jeimamyry ae kowenatume jahtao Juta nonory po, jeimamyry 20mã poe Arataxerexe tuisa konõtome ahtao jeimamyry 32mã pona, kowenatu tonahsẽ anapoipyra exiase wekyry tõ maro, moro apoipory se kowenu ahtao ro yna a.
15 Osemazuhme, kowenatume pyra ro jahtao, imehnõ kowenatu tomo a ahno tyrohmanohpose tupimã ke. 40me parata tonehpose tyya xine ahno a kokoro rokẽ tynapyrykõ epekahtohme tõkurukõ maro. Ipoetory tomo a roropa ahno tyrohmanohpose. Yrome tyoro exiase Ritonõpo omipona jexiryke.
16 Erokuase yronymyryme pata apuru riry ropa poko. Jesaryme imehnõ esary anapoipyra exiase. Ypoetory tõ emero toerohse toto akorehmatohme pata apuru riry poko.
17 Morararo kokoro rokẽ tõtuhse juteu tõ ytapyĩ tao 150me tuisa tõ maro imehnõ oehketõ maro jenese imeimehnõ nonory poe.
18 Kokoro rokẽ toiro pui totapapose ya te, 6me kaneru kurano te, kuratiri tuhke roropa. 10me ẽmepyry taropose ahtao eukuru kurã tyripose ya. Yrome tupime ahno erohtoh waro jexiryke osepehmapopyra exiase eya xine kowenatu epehpyryme.
19 Oya, Ritonõpo, ynara ãko ase: “Wenikehpyra exiko ynyrihpyry kurã poko moxiã akorehmatohme.”