2 Joun
Olo Iyoswo Tɨfinjo loso Joun Afahwo Mtɨꞌmokumentisofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo sikɨsɨtiꞌnji (60) sikɨsɨti-sikɨsɨꞌnji (66) nto uyakoloꞌmentiso ajwo sopolɨkeno olo iyoswo tɨfinjo loso Joun afaohwo mtɨꞌmokumentisofoho. Olo iyoswo loso aꞌmu angaꞌnohino syineꞌno mtɨꞌmokumentisofoho. Oso hisi nehopi aꞌamu angaꞌnohinyinetɨkeno. Aꞌamu fiso hofɨkoe hunoso ole, Aꞌamu Jisasɨmo inɨngkunyo temtitofo hopa imoꞌnohumunyo somneꞌno mtɨꞌmokumentisofoho. Joun oso aꞌamu homo somo aꞌamu hwasyo hungkunoꞌnjo somneꞌno iꞌwaho itoꞌno fiyɨmno ulɨmonto mtɨꞌmokumentisofoho. Olo iyoswo loso ntɨpo humanto mtɨꞌmokumentisotɨkeno. Ango kako nohumanto olo iyoswo loso mtɨꞌmokumentiso soꞌno malinyofoho. Osoꞌno nakwo olo hungkuno homo lomo atofo lɨhwasi tɨfi unɨngkohwano.
1
1 Ngko Anɨtuye mehomi somo mokosyohumawoꞌnɨngkohe sohwoꞌni olo iyoswo loso mtɨꞌmokalokweno. Kɨko aꞌmu siki, Anɨtu kakoe syohomneꞌno kuhwosopoꞌmentiso sikinonji jɨje mehomi sohwantnneꞌno olo iyoswo loso semtɨꞌmokiyalokweno. Yahino nehopiꞌnohino somo ngko kakineꞌno sɨmeho kijopalokweno. Oso hiso ngkoꞌnohinɨꞌmaho. Oꞌo, aꞌamu hopiꞌnono Anɨtuye hungkuno neꞌnjo somo hunoꞌnjo soꞌnji hofɨko sekuneꞌno sɨmeho umoꞌnalofoho.
2 Jisas Kɨlaisɨye hungkuno neꞌnjoso nakwoe sɨmehomo wojo soꞌno nakwo sekuneꞌno sɨmeho namoꞌnɨwoꞌnɨngkohoho.
3 Mpohwo Anɨtuꞌnji kakoe Hwomu Jisas Kɨlaisɨꞌnji siko nakumneꞌno wopɨngo nalohofohosɨsi hitoho ulofɨhwosoꞌno humayo wopɨngo nejapohosɨsoꞌno nakwo hungkuno nehopiꞌnohini hnnɨngkuhwasi sɨmeho afa unantanoho.
Nakwo hitoho nalofo yahino somo unɨngkowano.
4 Jɨje mehomi fehohnjoso hofɨko Anɨtu kako yahino ne soꞌno nalɨmentiso hopaso hofɨko kakoe honɨngkano ne somo inɨngkowalokwofo. Oso hisoꞌno nupaꞌnonji ngko sɨmonyo yalokweno.
5 Oso hisoꞌno ngko, nje nampohwo siki, olo soꞌno wakilɨmonneꞌno yohono. Nakwo nomꞌne aꞌamu somneꞌno sɨmeho uyo yahino hiso songoꞌmaho. Oꞌo, nakwo Anɨtuye hungkunoso sɨmoꞌmo upoꞌnomaꞌmentɨhwone oso mtaꞌangofoho.
6 Hitoho ulofo yahinoso olenoho. Nakwo Anɨtuye honɨngkanomo tɨfi unɨngkowano. Hohonta olo honɨngkano loso upaꞌnɨmentɨhwoni, Sekwo nomꞌne aꞌamumneꞌno sɨmeho umoꞌnyo yahino somo finɨngkamno.
Nakwo Kɨlaisɨye hungkunomo aho yokumpohnꞌnyo wokemokosyohumano.
7 Aꞌamu piꞌnɨngo engoso hofɨko nakumo hwasyo hungkuno nelaneꞌentɨfi angoꞌmeemo lɨkuꞌmofalokwofo. Osoꞌno hofɨko nakumo ole nelalokwofo. Jisas Kɨlais Anɨtu sohwo kako nakwoe hwaho lopo aꞌamu imoꞌnɨmentisoꞌmaho. Hofɨko nakumo ose nelalokwofo. Oso aꞌamu hiso hofɨko hwasyo hungkuno lɨwoꞌnɨngkohofoso Kɨlaisɨye mango hwafoho.
8 Sekwo soku, oso aꞌamu ose sohwamneꞌno iꞌwaho ntoꞌno fiyɨmno. Hwapɨngoso sekwo Anɨtuye syoho yokumpohnꞌnyo iwoꞌnɨngkohofo soꞌno Anɨtu kako ngko sekumo yoꞌmayoso wosejapmmo selɨmentisoso sekwo hwasyo hungkuno homo somo inɨngkafijoꞌmanji sekwo momapitnnehofo. Oꞌo, sekwo Anɨtuye hungkunomo ntoꞌno inɨngkafijoso u sekwo yoꞌmayoso womantɨfeho.
9 Aꞌamu fihwo kako Kɨlaisɨye hungkunomo aho yokumpohnꞌnyo mokesyohumayoꞌnjo yoso sohwo kako hungkuno nomꞌne kengomo inɨngkawesoꞌmanji osohwo Anɨtu kakoꞌnji mohumuyoho. Hwe fihwo kako Kɨlaisɨye hungkunomo aho yokumpohnꞌnyo kemokosyohumaso osohumo Anɨtuꞌnji kakoe hwomu Kɨlaisɨꞌnji sikoꞌmontaꞌi siko kakoꞌnji humasiyo.
10 U hwe fihwo kako sekumo seꞌmaso sohwo kako sekumo Kɨlaisɨye hungkuno masejoꞌnjo ihwosi kako nomꞌne hungkuno kengo selɨhwosoꞌno osohumo sekwo kakimo sekwoe angoꞌmno ipemotakutoho. Sekwo nakwoe aꞌamuhwe eso nulɨkutoho.
11 Aꞌamu fihwo kako oso aꞌamu hwasyo hungkunoꞌnjo osohumo nje aꞌamuhwe uloso sohwo kako oso hwe hwasyo hungkunoꞌnjo sohwoe syoho somo ufoꞌmalofoho.
Hungkuno aeꞌuyofoho.
12 Ngko hungkuno sawemo waselɨmonji ko yoheso u olo hungkuno hiloso ngko iyoswomo mamtɨꞌmokumnehono. Oꞌo, ngko sekumo seꞌmahmꞌmo ngko sekwoꞌnji hungkuno hnnɨngkuhwasi nakwoe sɨmehoso wopɨngo wonamoꞌnɨmontonoho.
13 Anɨtu kakoe syoho somne uhwosopoꞌmentisoso jɨje nanohwo esɨꞌnji kakoe mehomi soꞌntnneꞌno nakwoe aꞌamufo selalokwofo. Nje hungkuno osohopeho. Ngko Jounꞌni mtɨꞌmokohono.