Filemoun
Olo Iyoswo loso Poul Kako Hwe Filemounneꞌno Mtɨꞌmokumentisofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo tɨwenti-nainꞌnji (29) teti-wanꞌnji (31) nto uyakoloꞌmentisopolɨkeno olo iyoswo loso Poul kako hwe Filemounneꞌno mtɨꞌmokumentisofoho. Filemoun sohwo Poulɨye aꞌamu hweho. Oso hwe huhwo sohwo ango Koulousi humunyo hweho. Filemoun huhwo sohwo kakoe syoho ulohofiyoso hiꞌnjo hweho. Oso syoho ulohofiyo sohune yofeso olenoho. Ounesimosɨyoho. Oso hwe Ounesimos huhwo sohwo hiyaso lɨꞌmofonto ango Loum sopo Poulɨmo uꞌmaꞌmentisofoho. Nuꞌmahonɨngki Poul kako Anɨtuye hungkuno ulɨmentisofoho. Nulahonɨngki Ounesimos kako sɨmeho iwoloꞌmokumentisofoho. Sɨmeho iwoloꞌmokahonɨngki Poul Filemounɨyepono asomo uhwajɨmonto olo iyoswo loso mtɨꞌmokuyahotɨmentisofoho. Olo iyoswo hiloso Poul kako ango Loum sopo impojoho yonto mtɨꞌmokumentisofoho. Osoꞌno nakwo olo iyoswo homo lomo atofo lɨhwasi tɨfi unɨngkohwano.
1
1 U nje nɨngkwahwo Filemoun, nje hungkuno tɨfo upaꞌnyo. Ngko Poulɨꞌni nekwoe nɨngkwahwo Timoutiꞌnji nohumentayo kikineꞌno olo iyoswo loso mtɨꞌmokalokuhwoyo. Ngko aꞌamumo Jisas Kɨlaisɨye hungkuno ulɨmale soꞌno hofɨko ngkimo impoꞌangomo intofanɨhumalofofoho. U Filemoun kɨko nekwoꞌnji Anɨtumneꞌno syoho afa hwosoho. Nekwo sɨmeho kijopalokuhwoyo.
2 Nekwoe hungkuno loso olo aꞌamu lomo uhwojalokuhwoyo. Nekwoe nampohwo Apiyaꞌnji Akiposɨꞌnjoho. Akipos ngko paꞌnyo Anɨtumneꞌno yokumpohnꞌnyo lohofonto Anɨtuye hungkuno lutɨhwalofoho. Nomꞌne aꞌamu Jisas Kɨlaisɨmo inɨngkawentɨfi jɨje angomo uhuꞌmokuwoꞌnɨngkohofo somo hungkuno loso mtɨꞌmokalokuhwayo.
3 Nanɨngkwohwo Anɨtu sohwoꞌnji nakwoe Hwe Engo Jisas Kɨlaisɨꞌnji sikoꞌmontaꞌi siko yoꞌmayo wopɨngo selohofosɨsi sɨmeho pompengo wosejopanjiyoho.
Filemoun kako Hwe Engo Jisas sohumo sɨmeho uyɨmojo hweho.
4 Nje nɨngkwahwo Filemoun, ngko Anɨtumo jomo ulontnne sohonta ngko kikineꞌno isamoyoka mɨkunɨmposo ulɨwoꞌnɨngkohefoho.
5 Hwapɨngoso ole, Olo hungkuno loso upaꞌnɨmalefoho. Kɨko nakwoe Hwe Engo Jisas osohumo sɨmeho hiꞌntnnono engo uyonji aꞌamu Jisas sohumo inɨngkuwoꞌnɨngkohofo osoꞌntnneꞌno sɨmeho uyalokuno. Osoꞌno Mpohumo isamoyoka ulalokweno.
6 Olo soꞌno nɨmoꞌnɨngkohoho. Nakwo Jisas Kɨlaisɨmo inɨngkawoꞌnɨngkuhwone hnꞌnwi nakwo yokumpohnꞌnyo sosofitoꞌnɨngkuhwasi foꞌmaꞌnososo yoꞌmayo wonyoangkafo Jisas Kɨlais nejapɨwoꞌnɨngkiso soꞌno nakwo huno itoꞌno naisoso itoꞌnohini wokemokosyohumantanoho. Osoꞌno Mpohumo jomo ulalokweno.
7 Filemoun kɨko aꞌamu Jisas Kɨlaisɨmo inɨngkawoꞌnɨngkohofo somo sɨmeho engo uyalokuno soꞌno ngkimo yokumpohnꞌnyo nɨsosofitofonji nje sɨmeho wopɨngo kɨko nɨmokuwoꞌnɨngkino hwosoho. Anɨtuye aꞌamu hopiꞌnonohinoso kikineꞌno syakufɨsyontɨfi sɨmeho wopɨngo umoꞌnɨngkohoho.
Poul Filemounɨmo ulɨmento, Kɨko Ounesimosɨmo maho. Jɨje nɨngkwahwo hopa umoꞌnono.
8-9 Hungkuno angaꞌnohino Ounesimosɨmneꞌno wakilohonɨmonneꞌno yohono. Nakwoe Hwe Engo Jisas Kɨlais aꞌamumo sɨmeho uyo yahino loso nejapmmentiso soꞌno ngko hungkuno yokumpohnꞌnyo kɨko inɨngkayoꞌneso nokilɨꞌmnesohilo. I osoꞌno ngko sɨmeho kijapmmentohe soꞌno olo soꞌno jomo wakilohonɨmonneꞌno yohono. Kɨko ngkineꞌno huno kiyohoho. Ngko aꞌmane imoꞌnonji Jisas Kɨlaisɨye syohomneꞌno impoꞌangomo humaleno.
10 Osoꞌno Ounesimosɨmneꞌno wakilohonɨmonneꞌno yohono. Kako nje hwomu paꞌnyo imoꞌnɨngkiso hweho. Impoꞌangomo nohumanji Anɨtuye hungkunoso Ounesimosɨmo ulahonɨngko hungkuno hiloso kako sɨmeho hiꞌntnnono uyonto Anɨtuye aꞌamu imoꞌnɨmasofoho. Osoꞌno ngko kanɨngkwohwo paꞌnyo humaleno.
11 Oso hwe huhwo sohwo Ounesimosɨyo kakoe yofe hwapɨngoso olenoho. Foꞌmayoꞌnefoho. I hohonta Ounesimos kako jɨje syoho kilohofimentiso sohonta kako wonyo kilohoꞌmentisofoho. I olohonta kako kɨkoꞌnji ngkoꞌnji syoho wonyoangkafo elohofiyo hweho. Kako wefoꞌmaꞌmontonoho.
12-14 Anɨtuye syohomneꞌno impoꞌangomo nohumentanɨꞌmo kɨko ango kengopo nohumahoji ngkimo manɨfoꞌmatnnehino. Kɨko ngkoꞌnji humentontasi ngkimo wopɨngo nonɨmokosyohumantnnesohilo. I osoꞌno jɨje syoho kilohofiyo ngkoꞌnji humayo soꞌno ngkimo wopɨngo nɨmokosyohumahwosoꞌno nje sɨmeho wopɨngo wanɨmoꞌnɨmonteꞌno yohoho. Jɨje uyohope hweho. Ounesimos ngkoꞌnji wohumano lonji ko yoheso kɨko olo hilo soꞌno manjosoꞌno ngko jɨje honɨngkano jɨje syoho kilohofiyo osohumo asomo utɨmayoꞌne mopɨjwakumoꞌmnehono. Oꞌo, kɨko ngkimo nɨfoꞌmayo soꞌno asomo uhwajisoso oso wonyoangkafofoho. I osoꞌno jɨje hunofoho. Osoꞌno kikiyepono Ounesimos sohumo uhwojalokweno. Hwe huhwo sohumo sɨmeho engo uyonji uhwojalokweno.
15-16 Hohonta kako kuhwotɨꞌmofonto weꞌenehwo hiyaso umentisofoho. Osohonta kako hamniyoho momasoꞌnjo siki syoho kilohofiyo hweho. I olohonta syoho kilohofiyoꞌnohino hwoꞌmaho. Oꞌo, kako hnnɨngkwaꞌwehweho. Hwapɨngoso kako Hwe Engo Jisasɨmo sɨmeho uyɨwoꞌnɨngkiso hweho. Sɨmoꞌmo Ounesimos weꞌenehwo kuhwotɨꞌmoꞌmentisoso olelɨkeno, kɨkoꞌnji neꞌno nohumuhnne soꞌno kakuhwotɨꞌmoꞌmentono. Nenɨngkwohwo Ounesimosɨmo sɨmeho uyɨmentohe hwoꞌnyoho. I olohonta kɨko kakimo sɨmeho engo uyɨmonnoho. Kako jɨje syoho kilohofiyoꞌnji hnnɨngkwaꞌwehwoꞌnjoho.
17 Kɨko ngkimo Anɨtuye syohomneꞌno nje tatohwo hwosoho syonɨfɨsyɨwoꞌnɨngkinoꞌmanji kɨko ngkimo ntohofɨwoꞌnɨngkino hopaso kɨko Ounesimosɨmo ulohofo.
18 Hohonta kako kikimo wonyo pipi kilohoꞌmentisoꞌmanji kɨko ngkineꞌno oso hisoꞌno hungkuno filɨhwajo. Ngko jɨje yoꞌmayo soꞌno kikimo aku wokijapmmo.
19 Ngko Poulɨꞌni yoꞌmayoso aku wokijapmneꞌno nehopi kilalokweno. U kɨko uhwonyo. Olo hungkuno loso nje ahoꞌnji ifalifaliyo mtɨꞌmokalokweno. Ngko jɨje hunomo huno makufohotoꞌmnehono. Hohonta ngko Anɨtuye hungkuno lokitɨhwahonɨngko kɨko olo hungkuno hilo somo sɨmeho hiꞌntnnono umentohino soꞌno kɨko songo neꞌno humayoꞌneso maꞌmentohinofoho. I oso hungkuno kilɨmentohe soꞌno kɨko ngkimo aku peho ntapmmentohinoto. Awonoho. Oso hisoꞌno ngko huno makufohotoꞌmnehono.
20 U nje nɨngkwahwo, kɨko ngkoꞌnji nakwoe Hwe Engo Jisas Kɨlaisɨye syoho ntnneꞌno syafɨsyohoji kɨko Ounesimosɨmo itoꞌno mokosyohumaho. Kɨko ose isoso nje sɨmeho wopɨngo wanɨmoꞌnɨmontonoho.
21 Olo hungkuno ngko kikimneꞌno mtɨꞌmokuyohojalokwe loso kɨko uhwonɨngkohoji haloho pesoꞌno ngko huno niyohoho. Ounesimosɨmneꞌno yahino wopɨngo kɨko ulohofo soꞌno kilohe somo tɨfi inɨngkahuji oso mtaꞌni kɨko yoꞌmayo yahino wopɨngo neꞌno mjɨmɨsoso jɨje yahino wopɨngoso nje hungkuno kilohe loso jɨje hunoso nje hunomo wonɨyakoloꞌmonnoho.
22 Nomꞌne hungkuno tɨfo upaꞌnyo. Ounesimos kikimo kuꞌmaso sohonta kɨko ngkineꞌno ango angaꞌno itoꞌno fesyohumaho. Hwapɨngoso sekwo ngkineꞌno Mpohumo jomo ulɨwoꞌnɨngkohofo soꞌno hontohumaleno. Anɨtu sekuyepono ngkimo asomo wonɨhwajono ntnneꞌno yalokweno.
Nomꞌne aꞌamuso Filemoun neꞌno nakwoe aꞌamu hweho lɨmentohofofoho.
23 Epeefɨlos kakoꞌnji ngko ntnneꞌno Kɨlais Jisasɨye syohomneꞌno impoꞌangomo humalohwoyo. Kako kikimneꞌno nje aꞌamu hweho lonto huno syokufɨsyalofoho.
24 Aꞌamu nomꞌne sohwa ngkoꞌnji Anɨtuye syoho yalokuhwone sohwa kikimneꞌno nakwoe aꞌamu hweho kilalokwofo. Aꞌamu huhwo sohwa ole, Mak, Alisɨtakos, Ntemas, Luk. Osohwa kikimneꞌno syokufɨsyalokwofo.
25 Nakwoe Hwe Engo Jisas Kɨlais kako yoꞌmayo wopɨngo waselohofono. Nje hungkuno tɨfo osohopeho.