7
Aꞌamu Isɨlael ‘wan hantɨlet fouti-foua tausen’ (144,000) sofe hungkunofoho.
Ose uhwononji nomꞌne wojo hopa uhwonɨmentoheso, aꞌamu ahwomomjo osofosofahuꞌnohino sohwa hwaho tokwajo ae sopo lohofontɨfi ifofo osoꞌmo soꞌmtaꞌango osofosofahuꞌnohino somo aho kesyohumentanɨngkofi uhwonɨmentohefoho. Oso ifofo hiso mijo ayomo hwahomo iyo osoꞌnjo sopo mulohoꞌmentisofoho. Oꞌo, ifofo homo somo pɨjwahumentohofofoho. 2-3 Ose uhwononji uhwonɨmentoheso, aꞌamu ahwomomjo nomꞌne sohwo mofehiꞌnyo sɨꞌmofapiso soꞌmtaꞌni nosaponto Anɨtu songo neꞌno humayo sohwoe ifalifaliyo mtɨꞌmokiyoꞌneso ahomo nomokosyohumanto mango engo ulɨmento, Sekwo aꞌamu ahwomomjo osofosofahuꞌnohino sohwasi sekwo hwahoꞌnji mijo ayoꞌnji wonyo imokiyoꞌne yokumpohnꞌnyo mokosyohumalofo sohwasi weꞌe nehwo fohontohumamno. Sɨmoꞌmo nakwo Anɨtuye syoho ulohofiyo sohwafe yomohuꞌnyopo Anɨtu kakwoꞌyohwo sohwoe ifalifaliyo mtɨꞌmokosyɨhwasi i osohonta sekwo hwahoꞌnji mijoꞌnji iyoꞌnji wonyo hmmokumno. 4-8 Ose upaꞌnonji aꞌamufe yomohuꞌnyopo ifalifali mtɨꞌmokinyo neso atofo linyoso ole upaꞌnɨmentoho. Aꞌamu Isɨlael temtitofo aho hopiꞌnono sɨfe mtaꞌni hufaꞌuyo somtaꞌango aꞌamu wan hantɨlet fouti-foua tausen (144,000) somo Anɨtu kakwo sohwoe ifalifaliyo mtɨꞌmokinyo hwafoho. Temtitofo homo homtaꞌango aꞌamu tɨwelɨf tausenɨso (12,000) maꞌmentohofofoho.
Jutafe temtitofoso tɨwelɨf tausenfoho (12,000).
Lupenɨye temtitofoso tɨwelɨf tausenfoho (12,000).
Ngkatɨye temtitofoso tɨwelɨf tausenfoho (12,000).
Asyafe temtitofoso tɨwelɨf tausenfoho (12,000).
Napɨtalaiye temtitofoso tɨwelɨf tausenfoho (12,000).
Monaseye temtitofoso tɨwelɨf tausenfoho (12,000).
Simeyounɨye temtitofoso tɨwelɨf tausenfoho (12,000).
Lifaiye temtitofoso tɨwelɨf tausenfoho (12,000).
Isokafe temtitofoso tɨwelɨf tausenfoho (12,000).
Sepɨyulanɨye temtitofoso tɨwelɨf tausenfoho (12,000).
Jousepɨye temtitofoso tɨwelɨf tausenfoho (12,000).
Mpenyaminɨye temtitofoso tɨwelɨf tausenfoho (12,000).
Oso aꞌamu hofosofe yomohuꞌnyopo Anɨtuye ifalifaliyo hiꞌnjofoho.
Anɨtuye aꞌamu ne piꞌnɨngo engoso hofɨko Anɨtuye yofe hoꞌnomayoꞌne uhuꞌmokumentohofofoho.
Ose uhwononji nomꞌne wojo hopa uhwonɨmentoheso hwe moyaꞌmi piꞌnɨngo engoso oso aꞌamu hiso aꞌamu hofɨko atofo joso hopoꞌmaho. Oso aꞌamu hiso temtitofo homo homtaꞌangoso hwaho kengo kengo aꞌapaho kengo kengo hungkuno kengo kengoso hofɨko hwapɨfe sawemo halojo inyoso Hwe Engo sohwoe epohumayo sɨmano sopo lohoꞌmentohofofoho. Osopo lohofontɨfi Anɨtuye mango hwamo uyakoloꞌmentohofo soꞌno tohe hweho nomantɨfi sɨmonyo yontɨfi 10 mampaho engoꞌnji ole lɨmentohofi, Nakwoe Anɨtu epohumayopo humaso sohwoꞌnji Jisas nakwoe Wonyoꞌne Tohino Engo Maꞌmentiso sohwoꞌnji siko nakumo asomo netɨmahonɨngki nakwo wopɨngo humalohwono.
11 Ose ulahonɨngkofi aꞌamu ahwomomjo sohwa Anɨtuye epohumayo somo ehofoꞌmokosyohumalofo sohwa hwe engo sɨfe aho hopiꞌnono nomꞌne mtaꞌni osofosofahuꞌnohino sohwanji yoꞌmayo songo humalofo osofosofahuꞌnohino oso hwanji hofɨko Anɨtumneꞌno hwomtame ehumantɨfi Anɨtuye yofe hoꞌnomaꞌmentohofofoho. 12 Ole lɨmentohofi, Nehopeho. Nakwo nakwoe Anɨtumneꞌno sɨmonyo engo uyano. Kakoe yofe engo, kakoe yokumpohnꞌnyo soꞌntnneꞌno wohoꞌnomano. Kakoe huno wopɨngo yakoloꞌnnyoso, kakoe yokumpohnꞌnyoso neꞌno nowentɨhwonefoho. Osoꞌno nakwo kakimo isamoyoka engolopohamo ulɨhwano. Oso hungkunoso nehopeho. Ose ulɨmentohofofoho.
Oso aꞌamu piꞌnɨngo engo sofe tohino soꞌno Jounɨmo lutɨhwamentisofoho.
13 Ose uhwonɨngkahonɨngko hwe engo sɨfe aho hopiꞌnono nomꞌne mtaꞌni osofosofahuꞌno somtaꞌango fihwo ntɨmento, Olo aꞌamu hwapɨfe halojo sawemoꞌnjo lohwa tɨhwalo. Ntɨꞌmtaꞌango hwalo.
14 Ose ntahonɨngki ulɨmentoho, Hwe engofo, ngko huno maniyohoyohoho. Kɨko huno kiyohoho. Ose ulahonɨngko oso hwe engo huhwo sohwo kako tango mɨkunɨmposo iꞌmofapone soꞌno ole ntɨmento, Anɨtu kako oso tango mɨkunɨmpososo hwahopo uyɨmentiso sohonta aꞌamu hiso nohumantɨfi Anɨtumneꞌno yokumpohnꞌnyo lohofontɨfi poyo peꞌnɨngkahonɨngkofi Anɨtu kako hofɨkimo olo poneꞌno motosahopohoho. Sɨmoꞌmo hofɨkoe honɨngkano wonyo somneꞌno hwapɨfe mijo yajɨjwohofo hopaso hofɨkoe honɨngkano wonyo somo Jisasɨye honɨyoꞌnji wae yaoꞌmentisoso hwapɨfe kiho ane paꞌnyo halojo imoꞌnɨmentisofoho. 15 Oso hisoꞌno hofɨko Anɨtuye epohumayo sopo lohokwofo. Sɨkuno huhwo huhwi imɨngoꞌnji sɨkunoꞌnji hinjopo hofɨko Anɨtuye ango ahwomomjo somo kakoe syoho ulohofɨwoꞌnɨngkohofofoho. Anɨtu kako kakoe epohumayo sopo humanto hofiyo umokosyohumawoꞌnɨngkisofoho. 16 Oseso hofɨko mijoho apaꞌno mapeꞌnyofoho. Hofɨko mijoꞌno mumoꞌnyofoho. Mofehiꞌnyo hofɨkimo toho mufojiyofoho. Tohino muhmnyofoho. 17 Hwapɨngoso hwe hofɨkoe wonyoꞌne tohino maꞌmentiso sohwo kako Anɨtuye epohumayo sopo nohumanto hofiyo mokosyohumaho. Kako aꞌamu homo somo mijo tɨmo soꞌmo ipemotasyɨhwosi mijo songo neꞌno humayoꞌne nɨfitnnefoho. Osopo Anɨtu kako hofɨkoe tɨmijo wae imofɨhwosi hofɨko humotaho apaꞌno malɨfitnnefoho.