9
Pueyasojuanaari pueya saquiriojojua na pueyara
1-3 Naa Pueyaso pueyano cua quishacaritij, janiyari jiyanohua cuarta Israel pueyacua taraajequiaani, nojori tiuyaquiniuucua pa Jiyaniijia Jesucristoocua. Janiyari pueyaracaanu nojoriicua taraajequiaa jiyanohuani, maja cua naata quishacari cuarta Israel pueya tiuutiniu Jesucristoocua. Seetanujuanaa nia sequeyanijia, Pueyaso jaara na naata quiri mani quiquiojinia na jatanura janiya nojori niti, janiya maara sequereni, maniniacuajaari naa cua miishaanura. Nojori jaara na naata quiri Jesucristoocua rupuetesaanu cua niti, janiya maara Pueyaso sequereni: “Cua rupatare cutara Jesucristojiniji, saniya cuarta Israel pueya jiyatesaanura Pueyaso muerasura cutara”. Naa cua sequesacari niajaniyatej, janiyari coojiajinia niishiyani, seetanujuanaari cua sequesano. Pueyaso Sohuanuuri cua niishitiyajuhuaj majaari cua sapojonu.
4 Cuarta Judiocuacaari pa supuetana Israel niquiohuacuajinio supueno pueyacuaja. Pueyasoori nojori jiyatequiaari na muerasu nojori quiniuria, nocua nojori tiuushacari. Pueyasoori nojori niquitiquiaari shacantuuca na cumaaca, tariucuacaanu nojoritia na quishacari. Pueyasoori nojori sequequiaari: “Janiyacuajaari Pueyasoni. Niaari cua pueya quiniutianiya niaa jaara cucua tiuuri”. Naajuhuaj, Pueyasoori Moisés niquitioquiaari caapiqui saajianeecua na naajiosano, saniniuujia Moisés niishitiojonura tiji nojori. Pueyasoori nojori niishitiquiaarijiuhuaj taa nojori miiniutianiyani, tariucua jiyanooshano nojori rerejonura na niquiara. Pueyasoori nojori sequequiaarijiuhuaj, nojuajaari puetunujuanaa na sequesano Abraham tohuateenutaniya nojoriria.
5 Israel pueya supuetanaari quiquiaari Abraham, Isaac, Jacobonio. Pa Jiyaniijia Cristoori cuno pojori niquiohuacuajinio supuequiaari. Nojuajaari tari jiyatesaaquiaari Jiyaniijiajanaa na quiniuria, puetunu casamijianaa jiitiana na quiniuriajuhuaj. Nojuajaari Pueyasojuhuanajaj, juhua na Quejuhuaj. ¡Nojuaja cuaara pueyaracaanu maniniuhuaqueetasano quiiria! ¡Cuaara naa quiiria pueyaracaanutej!
6 Quiarijiani, queraatia parta Israel pueyajinijinio pueyari maja Pueyaso muerasu. Naa cua sequesacari niajaniyatej, majaari nia jiyaniniu tariucuacaanu Pueyaso sequesano pa supuetanaari tohuateyaquiniutianiya. Maja pueyanaa. Tohuateenutaniyanocuaja. Jaara naa quiritij, ¿casaara puetunu Israel pueyajanaa maseyaquiniutianiya Pueyaso sequesano nojoririaarini? Cua tojitiare pueyanaa. Puetunu pa supuetana Israel niquiohuacuajinio supueno pueyajanaari maja seetanujuanaa Israel pueya Pueyasora.
7 Naajaariuhua Abraham niquiohua. Puetunu Abraham niquiohuajanaari maja seetanujuanaa Abraham niquiohua na quiniu quiquiaari Pueyasora. Pueyasocuajaari naa sequequiaari Abraham:
“Cua sequesano quiajaniyari saaja quia niyanu Isaaccuajinio supueno pueyarano quiniutianiya cutara”.
8 Naa Pueyaso sequesacari Abrahamtej, naacuajiti paari niishiyani, majaari puetunu Pueyaso saquiriojosano pueyacuajinio supueno pueyajanaa seetanujuanaa Pueyaso muerasu. Saniniuujia, seetanujuanaa Pueyaso muerasu cutaraari noo pojori, Pueyaso sequesanoocua tiuujiacatej, taa pa supuetana Abraham tiuuquiaari Pueyaso sequesanoocuacuaani. Pueyasora, nojori cutaraari Abrahamcuajinio supueno pueya.
9 Abrahamri Pueyaso sequesanoocua tiuuquiaari, Pueyaso jaara naa na sequequiaari:
“Abrahamnaa, janiyari quiocua tacatenutaniuhua tamacarini. Janiyari jiyacari quia niquio Saara riuriatanutaniuhua tariucua mueyaracani”.
Naacuajitij, Isaac jaara rasaaquiaari, Pueyaso sequesanoori tohuateequiaari. Naacuajitij, puetunu Abraham niquiohuajinijiniojuanaani, saaja Isaacri Pueyaso saquiriojosano pueyano quiquiaari.
10 Naa quiquiaarijiaariuhua Isaac niquiohua. Isaac jaara neco Rebeca manajoquiaari, Rebecaari caapueya manajequiaari.
11-13 Cuno caapueya royaquishacarijia, juhuanojuaja nojori niishiyaquishacari maninia miiniu, sesa soj, jiyacariti Pueyasoori na nucua sequequiaari:
“Janiyari quia jiyapueranu jiyatenutaniya na nuhuajishana tojijiarani”.
Naa Pueyaso sequesacaritij, cunoori juhua Pueyaso sequesano tariucuacaanu. Naa sequequiaari cuno royaquishoojua caapueyajinijiiri:
“Jacoboori cua panishano quiniutianiya. Esauuri saniniuujia cua soosano quiniutianiyacujua”.
Naa Pueyaso sequesacaritij, paari niishiyani, Pueyasoori saquiriojoquiaa cana na saquiriojonu paniyacuajani, tama na miiniu panishanojuaaja na tohuateenura. Naacuajitij, Pueyaso jaara saquiriojore pueya, nojuajaari maja na niishiriojonu nojori miishanojiniji; maninia, sesa soj.
14 Naa Pueyaso miishacari tama na panishanojuaajatej, ¿taa pa sequeyani? ¿Pueyasote sesa miya, naa rimiajata na saquiriojosacari pueyatej? Maja.
15 Pueyasocuajaari naa Moisés sequequiaari:
“Janiyari pueya jiyanooniutianiyani teyano pueyano cua jiyanooniu paniyacuajani. Naajuhuaj, janiyari pueyanoocua taraajenutaniyani, teyano pueyanoocua cua taraajenu paniyacuajani”.
16 Naacuajitij paari niishiyani, pueyano maja na naata tama na cuaqueyajaaja jiyatenu Pueyaso pueyano na quiniuria. Pueyasocuajaari tama saquiriojoquiaajaaja cana na jiyanooniu paniyani.
17 Naajuhuaj, tariucuacaanu Pueyaso sequesano Egipto jiyaniijiaraari naa naajiotasano quiyajuhuaj:
“Faraónnaa, janiyari quia jiyatequiaari Egipto pueya jiyaniijia quia quiniuriani, cua cumaacata cua miijiosano cua niquitiniuria quiajaniya. Naacuajitij, puetunu jiyacajinia quiniaa pueyapuejanaari niishiniutianiya, janiyari Pueyasojuanaa cutarani”.
18 Naacuajitij, paari niishiyani, Pueyasoori taraajeja teyanoocua na taraajenu paniyani. Naajaariuhuaj, nojuajaari na tojiyashijia pueyano jiuujia jiyateja cumajiuujiaacara, teyano pueyano jiuujia na jiyatenu paniya naaracuajani.
19 Naa cua sequesacari niajaniyatej, tamonu naasucuaari sequenutaniya: “Pueyaso jaara naa miiquiaa taa na miiniu paniquiaacuajani, ¿maatucua casaara sesa pa miiniuucua pa saniitioreni? ¿Canteeri na naata Pueyaso tarinitiniu na miiniu panishanojinijini?”
20 Majaari naa sequenu pueyanonaa. ¿Canteeri quiajaniyani, naa quia juaaniuria Pueyasotej? Paacuajaari na shipinishano pueyani. ¿Taa nia sequeyani? Marau jaara pocuanu niishiriquia, ¿nojuajate na naata na paninia juaaniu: “Juaashiquiaracanaa, ¿casaara quia panirii conatura janiyani?”?
21 Paniyojojuacuajaari na naata paniniu maraujiniji na panishano casaa, shanohua pataconiyojua, mashaca quiquiora manijinia cajitiariquiano conatunio.
22 Naajuhuaj, ¿taa pa sequenutaniyani, Pueyaso jaara niishitiniu paniya na juaaniu, na cumaacanio, na saniitiosacari sesa miijiaca? Naajaa, Pueyasoori jiyanohua rejeretaquiaa sesa miijiaca, cante tari saniitiosocoriquiano quiyacuajani.
23 Pueyasoori naa tarishiyajaara na saniitionura na tojitiaashijiaca pueya. Naa na tarishishacaritij, nojuajaari pueya niishitiquiaa na shacantuuca cumaaca, maninia na miishacari na jiyanooshano pueya, cante tari saquiriojosano quiya na shuriucua quiriquianocuajani.
24 Paacuajaari cuno jiyanooshano pueyani, canapue tari Pueyaso saquiriojoquiaaricuajani Judiocuacajinijinio, taucuacajinijinionio.
25 Naa naajiotasano quiyacuajaari Pueyaso sequesano supuetana Oseas naajioneejinia:
“Cante cua pueya quiyaquiquiaarini, janiyari nojori sequenutaniyani: ‘Niaari cua quiquiohuaniyojua’. Naajuhuaj, cante cua shuquiritiasoo pueya quiquiaarini, nojoriiri cua timitiasano pueyara quiniutianiya”.
26 Naa naajiotasanoori quiyajuhuaj:
“Tee cuniqui naa pueya sequesaaquiaaricuajani: ‘Niaari maja cua pueya’, nojoriiri cuniquijia jiyaniquishaanutaniya: ‘Niaari Pueyaso niquiohuajanaa cutara’ ”.
27 Saniniuujia, supuetana Isaíasri naa sequequiaari Jacobo niquiohuacuajinio supueno pueyajiniji:
“Israel pueyari jiyanohua canenutaniya, juhua shoniniacu caminia shuriuquioco paajia jaaquia, serojosoo. Saniniuujia, saaja secaja nojorijinijinioori Pueyaso pueyara jatanishaanutaniya.
28 Pueyasoori mijiriara na sequesano tohuateenutaniya. Majaari na tarishiniu quiniutianiya”.
29 Supuetana Isaíascuajaari naa sequequiaari tarijiajuhuaj:
“Pa Jiyaniijia Pueyaso jaara Israel pueya niquiohua jiyanoyaquiquiaari, Israel pueya maara quiarijia quiyaquiri. Maara tari shaajasaacanu tojetaarucuajanaa, naatej, taa Sodoma tiacajinia quiniaa pueya puecoosaaquiaaricuaani, Gomorra tiacajinia quiniaa pueyanio”.
Judiocuacaari Pueyaso rupaacua tiuyashijiaca saaja
30 Naa cua pohuatasacari niajaniya tariucuacaanu Pueyaso Rupaajinijitij, paari quiarijia nio niishiyani: taucuacaari maja quenaaja na tacaaniu quijia taate nojori naata Pueyaso jiyanooshano quiniuni. Nojoriiri juhuajaniya quijia saaja. Naajaa, quiarijia, Pueyasoori nojori jiyatequiaa juhua sesa miyashijiacara, saaja Jesucristoocua nojori tiuushacari.
31 Israel pueyari saniniuujia jiyanohua Moisés Rootasano tojijiaca juucua, nojori jiyanishacari Pueyaso naasucuaari naa nojori miishacari nojori jiyanooniutianiya. Majaari Pueyaso jiyanooniu quijia nojori.
32 ¿Niaate niishiya casaara Pueyaso jiyanoyaquiquiaari nojorini? Pueyasoori nojori jiyanoyaquiquiaari nojori tiuyaquiniuucua nocua. Nojoriiri jiyaniquiaari tama nojorijiaarijia na naata tama nojori cuaqueyajaaja jiyatenu juhua sesa miyashijiacara, Moisés Rootasano nojori tojishacari. Naaratej, majaari nojori tiuuniu quiquiaa Jesucristoocua. Nojoriiri saaja na sooquiaa. Naacuajitij, Jesucristoori juhua saajia nojoriria, nocua nojori tiuriiniuria.
33 Jesucristojiniji miriqui Pueyaso sequesanocuajaari naa naajiotasaaquiaari tariucuacaanu, Jesucristo niyacarijia:
“Cua tojitiare. Janiyari Sión tuhuananuucua nianutaniya saajiani, pueya tiuriiniuria nocua. Saniniuujia, cante nocua tiuyani, nojoriiri puetunu Pueyaso sequesanojuanaa na muerasurano masenutaniya”.