إِنْجِيلُ لُوقَا
كاتَب واحَد واسمو لوقا كْتَب زوج كْتوب، إِنجيل لوقا وعْمال الرُسُل. كْتَب الإِنجيل لمَسيحِيّين آصَلهُم ماشي يْهود ويَهَّدرو اللُغة اليونانِيّة. فَسَّرلهُم الكَلمات الواعرين وعْوايَد اليْهود اللي هومَ ما يَعَّرفوهُمش. هَكدا، اللي ماشي يْهود فالدَنيا كامَل وفي كُل زْمان يَقَّدرو يَفَّهمو باللي يَسوع هُوَ سَلاّكهُم.
لوقا يَحكي بالتَدقيق على سْفَر يَسوع من الجْليل حَتّى لأورشَليم وين كان رايَح يْموت (9. 51- 19. 28). في هاد الحْكاية، يَجبَد حاجات ماشي مَدكورين فالأَناجيل الأُخرين. فالمْتَل، حْكاية السامري المْليح (10. 29-37)، زْيارة يَسوع لمَرتا ومَريَم (10. 38-42)، حْكاية الوْلَد الضايَع (15. 11-32). وبَيَّن الشي اللي شافو كْتَر في خَدمة وحْياة يَسوع: • الله بْعَت يَسوع المَسيح باش يْسَلَّك كامَل اللي حابّين يَقَّبلوه. • يَسوع يْلَتها بَزّاف بالناس المَحڤورين: الخاطي، الصْغير، الڤَلّيل، المْريض، الغْريب. • حْكا حْكايات بَزّاف على التَرفيه، فالمْتَل في 12. 16-21، وفالفَصل 16. التَرفيه لازَم يْكون لله. • تابعين يَسوع كانو معاه في طْريقو، حابّين حْياتهُم تَتبَدَّل وفاهمين باللي الله مْليح ويْحَب كامَل بْني آدَم.
من جيهة أخرى، لوقا يَدكُر يَسوع بَزّاف بصِفة الرَب. الإِنجيل مْتاعو يَخلاص في أورشَليم وين بْدا يَسوع وهُوَ مْعَمَّر بالروح القُدّوس. هاد الروح اللي وْعَد بيه يَسوع التابعين مْتاعو قْبَل ما يْنَفرَق عليهُم ويَطلَع للسْما.
1
يا تاوفيلَس
1 على حْساب اللي كايَن بَزّاف اللي دارو حْكاية على الحاجات اللي صْراو عَندنا،
2 على حْساب واش قالولنا اللي كانو من البَدية شاهدين ووَلاّو خَدّامين للكَلمة،
3 بانلي مْليح أنا تاني، بَعدما تَبَّعت كُل شي بالتَدقيق من الأوَّل لو كان نَكتَبلَك حْكاية مْرَتبة، يا العْزيز تاوفيلَس،
4 باش تَعرَف الصَح فالشي اللي سْمَعت بيه.
البْشارة بزْيادة يوحَنّا المَعمَدان
5 كان في زْمان هيرودَس سَلطان اليَهودِيّة، مُقَدَّم واسمو زَكَريّا، من جْماعة أبِيّا، مَرتو من بْنات هارون وواسمها أليصابات.
6 كانو في زوج صالحين قُدّام الله، ويْتَبّعو كيما لازَم كامَل الفْرايَض والأحكام مْتاع الرَب،
7 وما كانش عَندهُم الدْراري خاطَر أليصابات كانَت عاڤرة وكانو في زوج كْبار فالعْمَر.
8 كي لَحقَت دالَة جْماعتو فالمَعبَد، كان زَكَريّا يَخدَم خَدَّمتو قُدّام الله،
9 وطاحَت فيه القُرعة على حْساب عادة الكَهَنوت باش يَدخُل لمَعبَد الله ويْبَخَّر.
10 كان كامَل الشَعب يْصَلّي بَرّا في وَقت البْخور.
11 ضْهَرلو مْلاك الرَب واقَف على يْمين مَدبَح البْخور،
12 وكي شافو زَكَريّا نَخلَع وخاف.
13 قاللو المْلاك: "ما تْخافش يا زَكَريّا خاطَر الله سْتَجاب لصْلاتَك، ومَرتَك أليصابات رايحة تَولَدلَك وْلَد وتْسَمّيه يوحَنّا،
14 يْجيبلَك الفَرح والسَعد، وبَزّاف اللي يَفَّرحو بزْيادتو،
15 خاطَر يْكون كْبير قُدّام الرَب، ما يَشرَب لا شْراب لا حاجة تْسَكَّر، ويَتعَمَّر بالروح القُدّوس وهُوَ مازالو في كَرش يَمّاه،
16 ويْرَجَّع بَزّاف من وْلاد إسرائيل للرَب إلَههُم،
17 يَمشي قُدّام الرَب بروح وقُدرة النَبي إلِيّا، باش يَرَجَّع قْلوب الوالدين لوْلادهُم والعاصيين لعْقَل الصالحين، باش يْهَيّي للرَب شَعب واجَد".
18 قال زَكَريّا للمْلاك: "كيفاش نَعرَف باللي يَصرا هاد الشي؟ خاطَر أنا شيخ ومَرتي كْبيرة فالعْمَر"،
19 جاوَب المْلاك وقاللو: "أنا جَبرائيل الواقَف قُدّام الله، جيت مَبعوت باش نْكَلّمَك ونْجيبلَك هاد البْشايَر،
20 رايَح تْتْبَكَّم، وما تَقدَرش تَهدَر حَتّى لليوم اللي يَصراو فيه هاد الحاجات خاطَر ما آمَنتش كْلامي اللي رايَح يَتحَقَّق في وَقتو."
21 والشَعب كان يَستَنّا في زَكَريّا، وحارو كي بْطا فالمَعبَد.
22 كي خْرَج، ما كانش قادَر يَهدَر مْعاهُم، وفَهمو باللي شاف رُؤيا فالمَقدَس، وهُوَ كان يْديرلهُم فالإشارات وبْقا مْبَكَّم.
23 وكي خْلاصو يامات خَدَّمتو وَلاّ لدارو.
24 بَعد هَدوك اليامات، رَفدَت أليصابات مَرتو الجوف وتْخَبّات خَمس شْهور وقالَت:
25 "هَكدا دارلي الرَب نْهار شاف لِيَّ باش يْنَحّي عاري ما بين الناس"
البْشارة بزْيادة يَسوع
26 وكي كانَت في شْهَرها السادَس، بْعَت الرَب المْلاك جَبرائيل لواحَد المْدينة من الجْليل واسَمها الناصرة،
27 عَند واحَد العاتَق مَخطوبة لراجَل من دار داوَد واسمو يوسَف. وآسَم العاتَق مَريَم.
28 دْخَل ليها المْلاك وقال: "السْلام ليك يا اللي الرَب نْعَم عليك، الرَب مْعاك."
29 تْفَرفشَت من كْلامو وبْقات تْخَمَّم واش يْكون المَعنى مْتاع هاد السْلام.
30 قالَلها المْلاك: "ما تْخافيش يا مَريَم خاطَر راكي لْقيتي نَعمة عَند الرَب،
31 رايْحة تَرَّفدي الجوف وتَوَّلدي وْلَد وتْسَمّيه يَسوع،
32 هاد الوْلَد يْكون كْبير ويْسَمّيوَه بْن العالي، ويَعطيلو الرَب الإلَه عَرش داوَد باباه،
33 ويَملَك على دار يَعقوب للدْوام وما يْكونش للمَلك مْتاعو حَد".
34 قالَت مَريَم للمْلاك: "كيفاش يْصير هاد الشي وأنا ما تْدَنّا لِيَّ حَتّى راجَل؟"
35 جاوَب المْلاك وقالَلها: "يْجي عليك الروح القُدّوس وقُدرة العالي تْضَلَّل عليك، وعلى هَدا القُدّوس اللي يْزيد عَندَك يَتسَمّا بْن الله،
36 وهاي أليصابات اللي تْكونلَك هِيَ تاني راهي رَفدَت الجوف بوْلَد في كْبُرها، واللي تْسَمّات عاڤرة راهي في شْهَرها السادَس،
37 خاطَر حاجة ماهي مُحال عَند الله".
38 قالَت مَريَم: "هاني أنا خْديمة الرَب، واللي قُلتو هَداك هُوَ اللي يْصيرلي". وراح المْلاك من عَندها.
مَريَم تْزور أليصابات
39 في هَدوك اليامات، ناضَت مَريَم وراحَت بالخَف للجْبال، لواحَد المْدينة في يَهودا،
40 ودَخلَت لدار زَكَريّا، وسَلّمَت على أليصابات.
41 كي سَمعَت أليصابات سْلام مَريَم، نَڤَّز الصْغير في كَرشها وتْعَمّرَت بالروح القُدّوس،
42 وعَيّطَت بالزور: "مْباركة أنتِ ما بين النْسا ومْبارَك الصْغير اللي يْزيد من كَرشَك،
43 كيفاش حَتّى نَلت باش تْجيني يَمّاة رَبّي؟
44 كي جا صوت سْلامَك في وَدنيَّ، نَڤَّز الصْغير من الفَرحة في كَرشي.
45 يا سَعدها اللي آمنَت خاطَر رايَح يَصرا كامَل واش تْقالَلها من عَند الرَب".
تَسبيح مَريَم
46 وقالَت مَريَم:
47 "نَفسي تْعَضَّم الرَب، وروحي تَفرَح بالله اللي يْسَلَّكني،
48 خاطَر شاف لضَعف خْديمتو. ومن دُرك كامَل الجْيال يْقولو يا سَعدها.
49 خاطَر القَادر دارلي حاجات كْبار، قُدّوس آسمو،
50 ورَحَّمتو للي يْخافوه من جيل لجيل.
51 بَيَّن قُوّة دْراعو، زَربَع اللي عندهُم في قْلوبهُم تَخمام المَتكَبّرين،
52 نَزَّل الحُكّام من عْروشهُم ورْفَع المَتواضعين،
53 فَيَّض الخير على الجيعانين، ورَد المْرَفّهين بيَدّيهُم فارغين،
54 سَلَّك إسرائيل خْديمو وتْفَكَّر رَحَّمتو،
55 لإبراهيم ودَريّتو للدْوام، كيما قال لجْدودنا".
56 قَعدَت مَريَم واحَد التَلت شْهور عَند أَليصابات أومبَعد وَلاّت لدارها.
زِيادة يوحَنّا المَعمَدان
57 وْصَل وَقت أَليصابات باش تْزَيَّد وجابَت وْلَد.
58 سَمعو جيرانها ومْواليها باللي رَبّي فَيَّض عليها رَحَّمتو وفَرحو معاها.
59 فاليوم التامَن جاو باش يْخَتّنو الصْغير وحَبّو يْسَمّيوَه "زَكَريّا" على آسَم باباه،
60 بَصَّح جاوبَت يَمّاه وقالَت: "لالا، يَتسَمّا يوحَنّا."
61 قالولها: "واحَد من مْواليك ما تْسَمٌّا بهاد الآسَم"،
62 سَقساو باباه بالإشارات كيفاش حَب الوْلَد يَتسَمّا،
63 طْلَب لوحة وكْتَب يْقول: "يَتسَمّا يوحَنّا"، وكامَل نْدَهشو.
64 تَم تَم، نْحَل فَمّو وتْسَرَّح لْسانو وتْكَلَّم وبارَك الله.
65 طاح الخوف على كامَل جيرانهُم، ووْصَل هاد الشي لكامَل جْبال اليَهودِيّة.
66 وكامَل اللي سَمعو بهاد الشي خَلاّوَه في قْلوبهُم وقالو: "يا دْرا واش رايَح يْوَلّي هاد الوْلَد"، وكانَت قُدرة الرَب معاه.
تَسبيح زَكَريّا
67 تْعَمَّر زَكَريّا باباه بالروح القُدّوس وتْنَبَّأ وقال:
68 "مْبارَك الرَب إلَه إسرائيل خاطَر فاقَد شَعبو وفْداه،
69 دارَلنا سَلاّك كْبير في دار داوَد خْديمو،
70 على حْساب كْلامو اللي قالوهُلنا الأنبيا القَدّيسين مْتاع زْمان:
71 سْلاك من عَدياننا ومن يَد كامَل اللي يَكَّرهونا.
72 هَكدا بَيَّن رَبّي رَحَّمتو لجْدودنا وتْفَكَّر عَهدو المْقَدَّس،
73 على حْساب اليْمين اللي حْلَف بيه لجَدنا إبراهيم،
74 بَعدما يْسَلَّكنا من يَد عَدياننا، نَقَّدرو نَعَّبدوه بلا خوف،
75 ماشيين قُدّامو فالقَداسة والصْلاح طول حْياتنا.
76 وأنتَ يا وْلَد، رايَح تَتسَمَّا نَبي العالي، خاطَر تْسير قُدّام الرَب باش تْوَجَّد طُرقانو،
77 باش تْعَلَّم شَعبو باللي السْلاك يْكون بغُفران دْنوبهُم،
78 على جال حْنان الرَحمة مْتاع إلَهنا اللي فاقَدنا بيها النور اللي شْرَق علينا من الفوق،
79 باش يْضَوّي على اللي راهُم قاعدين فالضَلمة وضَل الموت، باش يَهدي خَطوَتنا لطْريق السْلام".
80 والصْغبر كان يَكبَر ويَتقَوّا بالروح وبْقا فالخْلا حَتّى لليوم اللي بان فيه لبْني إسرائيل.