9
Ukpa̱ u ɗa ukocishi u yaba dem
1 Ɗa m peɗelyukpei kakuna ka nampa ka a̱ ka̱ɗu ka̱ va̱, ɗa n yevei aza a usuɓi n aza ugboji n ili i na i a kuyaꞋan ra̱ka̱ yi ta̱ ekiye a̱ Ka̱shile, ali n ucigi u le n uꞋiwin u le ko vuza u yeve ili i na yi a̱ kugita̱ kelime ba.
2 Dem vu le ukpisa̱ u te u ɗa i a kubana, aza a usuɓi n aza a kawuya, aza a̱ ma̱riki n aza a na i m ma̱riki ba, vuza vu unata n vuza vu ciɗa aza a na e ci neke alyuka n aza a na e ci neke ba.
Uteku tsu na ka ki u vuma vu singai,
ta feu ka ki nannai u vuza vu unushi,
uteku tsu na ka ki u vuza va akucina,
ta feu ka ki nannai u vuza na u tsu pana wovon wa akucina ba.
3 Na ɗa ka gbani-gbani ka na i a kuyaꞋan aduniyan. Ili i te i ɗa ra̱ka̱ i pura̱ngu yaba dem. Ama a̱ɗu a uma i ta̱ tukpa n ka gbani-gbani, n ujari a̱ a̱ɗu e le, a ayin a wuma u le, ka nanlo ka laza baci sai ukpisa̱.
4 Yaba dem vu na wi a̱ ka̱tsuma̱ aza a wuma wi ta̱ n a̱pa̱, mesheꞋe ma wuma ma laꞋa ta̱ ka̱kpisa̱ ka kawu.
5 Adama a na aza a wuma e yeve ta̱ a na i ku kuwa̱,
ama a̱kpisa̱ e yeve ili ba,
i n katsupu ba,
a buwa feu a kuciɓa n ele ba.
6 Ili i na a cigai n i na a iwain,
n cisheꞋe ci le a̱ puwa̱nka̱ ta̱ m megeshe,
i o kuyongo a̱ ka̱tsuma̱ ki ili i na yi a̱ kugita̱ aduniyan ba.
7 Wala, vu lyaꞋa ilikulyaꞋa i nu m ma̱za̱nga̱, ka̱ta̱ vu soꞋo ma̱kya̱n ma̱ nu n ka̱ɗu ka̱ ma̱za̱nga̱, adama a ili i na vu yaꞋin ra̱ka̱ derere ɗa u Ka̱shile.
8 YaꞋan akashi a̱ nu o yongo wa̱ri makyan dem, ka̱ta̱ ayin tutu vu putala kaci ka̱ nu n maniꞋin.
9 Pana uyoꞋo n vuka vu ucigi vu nu, a ayin gbani a na Ka̱shile ke nekei nu ra̱ka̱ aduniyan, adama a na ɗaɗa katsupu ka̱ nu n kataci ka̱ nu aduniyan.
10 Ili i na baci vi a kuyaꞋan n ekiye a̱ nu, yaꞋan i ɗa n utsura u nu, adama a na a kasaun a̱ ubuta̱ u na vi a kubana, babu ulinga, kufoɓuso ki ili, ko kuyeve ko tana ugboji.
11 Ɗa n doku me enei ili i yoku aduniyan.
Vuza na u fuɗai ilaɗi ɗa u ci ciya̱ ulyaꞋi makyan dem ba,
makyan dem ɗa vuza vu utsura u tsu ciya̱ ulyaꞋi o kuvon ba,
makyan dem ɗa vuza vu ugboji u tsu ciya̱ ilikulyaꞋa ba,
makyan dem ɗa feu ɗa vuza vu cicoꞋo u tsu ciya̱ udukuyan ba,
makyan dem ɗa keyevi ka̱ tsu ciya̱ mpasa ma singai ba.
Ama makyan n kofon ka cina yaba dem vu le.
12 Adama a na babu vuza na u yevei kanna ka̱ ni.
Tsu na e ci reme adan a̱ bilili,
tsu na e ci reme nnunu a maza,
ta ayin a atakaci a̱ tsu ta̱wa̱ u uma nannai.
Ugboji u laꞋa ta̱ tsulau
13 Ɗa kpamu me enei agisana a ukuna wu ugboji aduniyan a na ugaꞋin mu.
14 A yaꞋan ta̱ likuci i kenu i yoku n uma kenu punu. Ɗa mogono mu utsura mo yoku ma̱ tuka̱i i ɗa n vishili, u kambuki i ɗa, ɗa u maꞋi adasukpatsu a kupasa nshilya.
15 Vuza vu unambi vu yoku tana wi ta̱ punu a̱ likuci ya ama wi ta̱ n ugboji, ɗa u wawai likuci ya n ugboji u ni. Ama vuza u ciɓa n a̱yi ba.
16 Ɗa n danai, <<Ugboji u laꞋa ta̱ utsura.>> Ama ɗa o goyoi ugboji u vuza vu unambi va, a tsu pana odoki a̱ ni ba.
17 U laꞋa ta̱ n kugaꞋan a pana kadanshi ka sawu ka vuza vu ugboji
a na a kupana kacaꞋa ka vuza vu tsugono tsa alau.
18 Ugboji u laꞋa ta̱ ucanuku u kuvon,
ama vuza vu unushi vu te u tsu la̱nga̱sa̱ ta̱ ili i singai n a̱bunda̱i.