APOSOLO GONO DI MINANIꞌ MONOVO
Aposolo Gono Di Minaniꞌ Monovomuꞌ Gomuꞌ Gataaꞌ Gamazi
Aposolo Gono Di Minaniꞌ Monovo gizive nene guliveꞌve gizamineꞌ ve. Neꞌmine oganiꞌ neineꞌza eveneꞌ malite lisa gomuꞌ akaꞌmilatiꞌ Lukaꞌ gizineꞌ ve laniꞌ ve. Tiꞌ li laniꞌza monoꞌ godolouꞌ nene Lukaꞌnimuꞌ eiꞌ monovo danavaꞌve vaiꞌ lamaniꞌ ve. Neꞌmine aniꞌza Pauloꞌ neꞌmo Zuda ve minamineꞌ tota ve minineꞌ ve lineꞌ. Idoꞌ Pauloꞌ aza Timoteoꞌni luhuvo niteꞌ naba 2 gize-dinguꞌ nene Lukakisi makaꞌ nosive lo gizineꞌ ve. Idoꞌ aꞌmine luhuvo niteꞌ nene Pauloꞌ nalaꞌ numunguꞌ mino gizineꞌ ma gele noneꞌ ma neive. Aꞌmidotiꞌ gamene haꞌna minamivo Loma vete bili hilaniꞌ ve. Olihe bili hilamavo ebeꞌ ebekuꞌ ha nomonivo initeꞌ mataꞌ sotoꞌ inekumukisi idoꞌ aposololite gono di minaniꞌ monovomukisi asiꞌve Lukaꞌ gizinguꞌ nene Paulokisi makaꞌ monusive lo gizineꞌ ve.
Lukaꞌ neꞌmo luhuvo niteꞌ ve naba Teohiloꞌni buku sitaꞌ gize-dineꞌ. Ma bukuuꞌ nene Izesuꞌ ogo molo ineꞌ initekumuꞌ nene gizo gize do lemo lumola nene Oꞌmosoꞌmo Izesuꞌni Okulumokuꞌ do dizo vineꞌ nemuꞌ gizineꞌ ve.
Idoꞌ luhuvo niteꞌ gohi ma gizineꞌ nene aposololite gono di minaniꞌ monovo nene gizineꞌ. Aposolo gono daniꞌ monovo apiꞌ ogo gizida nene Oꞌmosoꞌmo Izesuꞌni Okulumokuꞌ do dizo vineꞌ nemuꞌ gohi gizineꞌ ve. Idoꞌ aꞌmidotiꞌ nene Oꞌmosoꞌmo lo huko lineꞌ gamazi nene ha salani moloko Sikalahuꞌ nene eletavo lemo Izesuꞌni gili imi gelekeleꞌ i-di minaaꞌ aniꞌ aleve minanguꞌ nene vovoꞌninguꞌ mino initeꞌ ogo molo minelive lo neꞌmine ineꞌ nemuꞌ gizineꞌ ve. Idoꞌ Sikalahuꞌ neꞌmo hize eleꞌ o-ngidivo aposolo linge ma nete igi mili aniꞌ initeꞌ linge ma nemukisi gizineꞌ ve. Aposolo gono mukiꞌ daniꞌ nemukisi ma lo sotoꞌ amineꞌ ve. Aposolo nete Izesuꞌ lineꞌ gamazimuꞌ gelekeleꞌ aniꞌ nene mone mone igi Zelusalemi numuno ebekuꞌ eiꞌ gamaziꞌve nene li-ngimi ngimiꞌ aniꞌ nemuꞌ gizineꞌ ve. Idoꞌ Zudaia misubouꞌ Zelusalemi numuno ebeꞌ neꞌmo misubo hela hela mininguꞌ ne li-ngimi idoꞌ misubo ma gulive Samalia neuꞌ nesi nene moni Izesuꞌnimuꞌ gamazi lamineꞌ nene li-ngimaniꞌ ve. Izesuꞌ olihe amivo nene Zuda ve nete Oꞌmosoꞌmi gamazi lamineꞌ nene engikumukovoꞌ nehe li gilii idoꞌ eveneꞌ Zuda ve minamaniꞌ mukiꞌ nene Oꞌmosoꞌmi zuho nizamave li gilaniꞌza Lukaꞌ gizinguꞌ nene Oꞌmosoꞌmo eiꞌ gamaziꞌve di vi Zuda ve minamaniꞌ heta atoꞌ ve minaniꞌ nesi li-ngimilisive lo Paulongi Petolongi lo-ngidineꞌ nemuꞌ gizineꞌ ve. Idoꞌ Pauloꞌ ebeꞌ mukikuꞌ Izesuꞌ gamaziꞌve nene do monineꞌ nemukisi gizineꞌ ve. Gize do vo lumola nene Pauloꞌ numuno ebeꞌ naba ma gulive Loma nela vineꞌ nemuꞌ gizineꞌ ve. Aꞌmine Loma nene Loma veti guveꞌinesi ve naba neꞌmo gizebo ineꞌ misubouꞌ numuno ebeꞌ minaniꞌ nene ngivileꞌ ogosa minineꞌ ve. Idoꞌ aꞌmida Pauloꞌ nene gamazi lamineꞌ nesi lo-ngimineꞌ ve.
Aposolo Gono Di Minaniꞌ Monovo gatelineꞌ nene numuno ebeꞌ idoꞌ misubo mukikumuꞌ ne gatelesane. Idoꞌ misuboꞌmi mapi me bukuꞌmi mehenela neinguꞌ mene ningelineꞌ nene aꞌmine misubo ma ne neize idoꞌ ne numuno ebeꞌ ma ne neize lo ninge lamineꞌ olosane.
1
Izesuꞌ Oꞌmosoꞌmi Sikalahuꞌ Imiselelesa Lo Hukineꞌ Gamazi
1-2 O Teohiloꞌ, Naza luhuvo niteꞌ lingela ma gomuꞌ gize-giduhe. Aꞌmine luhuvo nitekuꞌ nene Izesuꞌ apiꞌ ogo gono do minineꞌ neꞌmi gamazisi idoꞌ eveneꞌ apize ngimineꞌ gamazi nesi nene gize osuꞌ luvoniꞌ ma neive. Idoꞌ aꞌmine gamazi nogizo Izesuꞌ aza gono do eveneꞌ apize ngemeꞌmo dizosa do kegese-ngidive aposolo gono dalizaniꞌ gamazi nene Oꞌmosoꞌmi Sikalahuliꞌmo lidoꞌ lo-ngemavo Oꞌmosoꞌmo Izesuꞌni Okulumokuꞌ eleꞌmizo dizineꞌ nene gizosa gamazi gohi ma gizamo luhuvo niteꞌ nene hulo-giduvoniꞌ ma ve.
Ee, lohotoꞌ zaloꞌ bili badikevo mulumo gelo helo oto velesi mino aposolo sotoꞌ o ngimineꞌ ve. Neze ha neive li gilikevo gihile izeleseive lo eleꞌvoleꞌ niteꞌ mukiꞌ nene ogo ngelebizo neivo gamene foti novivo eze ningikaꞌ ningikaꞌ navo ezesi gamazi li voleloꞌ meloꞌ igi laniꞌ ve. Idoꞌ aza nene Oꞌmosoꞌmo gizebo o-ledelineꞌ gamazi lo-ngimineꞌ ve. Neꞌmine ogo engikisi mino tiꞌ lo lo-ngimineꞌ: Lingine Zelusalemi numuno ebeꞌ mene hulamilo. Meꞌneho Sikalahuꞌve imiselelove lingumuꞌ lo-lingimuvoniꞌ mamuꞌ nene gizebo igi minilo. Zohaneꞌ aza eveneꞌ noso holo-ngedavo ingine haza nosovoꞌ daniꞌza lingine gamene haꞌna ogo vamivo Oꞌmosoꞌmi Sikalahuꞌ neve nene dalisave lo lo-ngimineꞌ ve.
Izesuꞌ Okulumokuko Dizo Vineꞌ Gamazi
Gamene ma izipahala zuhosi di geseꞌ igi mini Izesuꞌni tiꞌ li longoꞌ i-daniꞌ: Guvekasi ve make, guveꞌinesi ve nabalite avotemotine gizebo i-ngidi minaaꞌ aniꞌ maꞌmine ogo gaza Guvetesi ve naba loloꞌ ogo leze Isilaeleꞌ ve gizebo o-ledelineꞌ gamene nene idise nehe. Olo. Neꞌmine li likevo Izesuꞌ aza tiꞌ lo lo-ngimineꞌ: Naza olihe neꞌmine amuvo gamene ma ogo vilineꞌ nene nehe idoꞌ gomuꞌ sotoꞌ ilineꞌ initeꞌ nene nehe neve nene lengiꞌ initetine ne nominako lingine ma gilamilisave. Nanitekumuꞌ ve. Meꞌneho asiꞌve amuzoꞌveloꞌ molo gelo mino lo hukineꞌ nemuꞌ ve. Ne neineꞌza Oꞌmosoꞌmi Sikalahuꞌ lengita lemo amuzo molo lengemavo neniꞌ gamaziꞌne nene Zelusalemi numudotiꞌ apiꞌ igi li Zudaia misuboukosi Samalia misuboukosi vi li sotoꞌ ikevo misubo lumolasi vo osuꞌ lilive. Tiꞌ lo lo-ngemavo ingine vonuꞌ bili nizavo Okulumokuko dizo volosa nodizivo limusoꞌmo molo hite-davo vo halekavo ma ningamaniꞌ ve. 10 Okulumokuꞌ vo halekavo ingine okeneꞌ igi ningi nizavo ve setaꞌ geneganaꞌine mokonokisi liteꞌ mateꞌ li vovoꞌninguꞌ sotoꞌ asineꞌ ve. 11 Sotoꞌ igi tiꞌ li li-ngimasineꞌ: nGalilaia ve lingine nanimuꞌ okeneꞌ igi ningi nizave. Izesutine lengikisi minidotiꞌ Oꞌmosoꞌmo Okulumokuko eleꞌmizo dizive nene ningi nizavo dizineꞌ neꞌmine ogo lemo aloseive li li-ngimasineꞌ. 12 Neꞌmine ikesivo aposolo nene Oliva gololotiꞌ tibizi aka alite minida vi Zelusalemi numuda hetelaniꞌ. 13 Heteli numuno muloloꞌ ma minineꞌ numunguꞌ ingi minaaꞌ aniꞌ numunguꞌ nene dizi minaniꞌ. Engiꞌ guliveꞌine nene Petoloꞌ ve Zohaneꞌ ve Zakoboꞌ ve Adeleaꞌ ve Hilipoꞌ ve Tomasiꞌ ve Batolomaioꞌ ve Mataioꞌ ve idoꞌ Alahaioꞌ gipele Zakoboꞌ ve idoꞌ Simoni aza Loma ve ngimiselelone lo amuzonga laaꞌ ive neve idoꞌ Zakoboꞌ gipele Zudakisi ve. 14 Vekise nesi idoꞌ veneꞌ linge masi Izesuꞌ izeleho Maliakisi idoꞌ Izesuꞌ akunolomotesi di geseꞌ igi mini luꞌine mili hamoꞌ igi Oꞌmosola li minaniꞌ ve.
Zudadoꞌ Medelo Minelive Ma Di Kegesi-daniꞌ Gamazi
15 Aꞌmine gamene neuꞌ nene Izesuꞌ evenele zuho eveneꞌ vani hadeti tuvedi (120) neꞌmine nene igi mulise mili nizavo Petoloꞌ aza voꞌninguꞌ ote mino tiꞌ lo lo-ngimineꞌ: 16 Zogone zuhokizo, gililo. Oꞌmosoꞌmi Sikalahuliꞌmo Davidiꞌni do ote-davo Davidiꞌ aza Zudaꞌ adoꞌ Izesuꞌni dalizave gomuꞌ molo ngemo ngelebizive mamuꞌ lineꞌ gamazi gizikaniꞌ nene gihile izelineꞌ ogavosa gihile izineꞌ ve. 17 Lezesi makaꞌ gono dalive lo Izesuꞌ aza Zudaꞌni do kegeso eleꞌmize molaniꞌ nenako aza Zudaꞌ leliꞌ aleve minineꞌ ve. 18 Aꞌmine ve nene monovo goloso ogo Izesuꞌni nene adeuꞌ molalive li biluvalite moni imaniꞌ nedunuꞌ nene misubo ma meni hizo aꞌmidoꞌ vo mino godololatiꞌ velepeꞌ izeko lemo gatuno izo hoꞌlavo iseve nene dulungizo doꞌmozineꞌ ve. 19 Nemuꞌ Zelusalemi aleve mukiꞌ gili aꞌmine ebeliꞌmi gulive nene engiꞌ gamaziꞌningutiꞌ Akeledama ve li milaniꞌ ve. Idoꞌ aꞌmine gulive nene leliꞌ gamaziutiꞌ vanise ebeꞌ ve lo neive. 20 Idoꞌ Oꞌmoso opoꞌni li nama laaꞌ aniꞌ nama monoꞌ godolouꞌ ma tiꞌ li gizi nizaniꞌ ma neive.
Numuꞌve nene hulavo zupoꞌ molo neivo eveneꞌ maliꞌmo aꞌminguꞌ minamoloseive li gizi nizave.
Idoꞌ ma nene tiꞌ li gizi nizave:
Eiꞌ gono veleloꞌ nene ve maliꞌmo do tiꞌ ogo dalive li gizi nizaniꞌ ma neive.
21-22 Nemuꞌ nene Izesuꞌ hilingutiꞌ ote neineꞌ gamazi lo sotoꞌ ilive lo ve ma do kegeso leliꞌ aposolokuꞌ do giꞌmize-do eleꞌmize molaloneꞌ ogave. Adoꞌ Izesuꞌ ha neivo Zohaneꞌ noso holo-dineꞌ gamenelotiꞌ apiꞌ ogo mine do dizo Oꞌmosoꞌmo vovoteutiꞌ Izesuꞌni Okulumokuꞌ do dizo vineꞌ gameneuꞌ ezesi makaꞌ minuniveutiꞌ ma do kegeso eleꞌmize molaloneꞌ ogave. 23 Petoloꞌ tiꞌ lo lo-ngemavo Izesuꞌ evenele zuho ingine ve sitaꞌ ma Zoseheꞌ adoꞌ gulive ngomo Balasabaꞌ ve lo mininekisi idoꞌ gulive ma Zusitoꞌ ve lo mininekisi idoꞌ ve ma gulive Matatiaꞌ nesi nene di sotoꞌ i-ngidi 24-25 Oꞌmosola tiꞌ li opoꞌni laniꞌ ve. Agae, Guvetesi ve make, eveneꞌ mukiꞌ luteuꞌ ningaaꞌ anive neke, Zudaꞌ aza aposolo gono hulo Oꞌmoso geiꞌ do vaꞌvaꞌ ogo molo-daineꞌ ebeta vo mo gopo ogaze. Eze gono veleloꞌ dalive lo mene ve sitakutiꞌ ma do kegeso lelebizezo. 26 Tiꞌ li opoꞌni li Oꞌmoso gelavo di kegesaaꞌ zohikuꞌ ngeleꞌmizi milikevo Matatiaꞌ ivileꞌ ogavo aposolo leveni minanguꞌ nene di giꞌmizi-daniꞌ ve.