5
Ananiaki Elenaho Sahilaki Gamazi Gosohoꞌ Lasingumuꞌ Oꞌmosoꞌmo Lihime nGimineꞌ Gamazi
1-2 Banabasiꞌ neꞌmine ineꞌza ve ma gulive Ananiakisi elenaho Sahilakisi angiseꞌine gamazi li gili ebeꞌ za zuhoꞌine eveneꞌ ma ngimi aꞌmidotiꞌ moni dasineꞌ nene lingela di halekisa lingela Ananiaꞌ do vo aposolo ngimineꞌ.
3 nGemavo Petoloꞌ tiꞌ lo lo-imineꞌ: Ananiazo. Gaza Sataniꞌmo lemo lukauꞌ gono davo nanimuꞌ Oꞌmosoꞌmi Sikalahuꞌ soza gani lo-emo misuboꞌmi meni lingela do halekekane.
4 Misuboka geita minelinako gasika gelo ngemaineꞌ ma ve. Idoꞌ ngemo meni daineꞌ nene geiꞌ monika neineꞌza laꞌlise vokuꞌ lo-gedamune. Nedunuꞌ do initeꞌ mataka dalo ma dalinako geiꞌ lukaꞌmo goka izavo nanitekumuꞌ neꞌmine ane. Eveneꞌ soza lo-limuhe lo Oꞌmoso soza lo-emo golo izane.
5 Tiꞌ lo nolo-imivo Ananiaꞌ nogelo nogelo lemo pouꞌ lo ongo hilineꞌ. Helavo ningi gilave nene ngehelele naba izineꞌ.
6 Izipe gosoꞌve minaniꞌ nete gonoso nene lavolavotunuꞌ asabuꞌ izi di vi galese izi-daniꞌ ve.
7 Galese izi-dikevo gamene tili aua neꞌmine ngomo mine haꞌna noogo elenaho aꞌmine gamazi gelamo vanaho ha neihe lo ogo hetelineꞌ.
8 Hetelavo Petoloꞌ tiꞌ lo longoꞌ o-do lineꞌ: Olo. Misubolotiꞌ meniꞌve mo aꞌnevoꞌ dasineꞌ nehe. Neꞌmine lavo aza tiꞌ lo lineꞌ: Oo. Mo aꞌnevoꞌ ve.
9 Lavo Petoloꞌ tiꞌ lo lo-imineꞌ: Lingine nanitekumuꞌ gamazi li halekiki Guvelesi veꞌmi Sikalahuꞌ golo izasive. Vangahine di galese izi-dave ma nesu gateda lidi lidi li niigi lanako gezesi aꞌmine aꞌmine igi di vi galese izi-gidilisave lo nolo-imivo
10 nogelo galinali lo gizeneuꞌ lemo pouꞌ lo ongo hilineꞌ. Helavo gosoꞌve nete dizi gonoso ne ningi di vi vanahine galese izi-dadoꞌ galese izi-daniꞌ ve.
11 Galese izi-dikevo noso hilave mukikisi eveneꞌ linge ma aꞌmine gamazi gilave mukikisi nene ngehelele naba izivo minaniꞌ ve.
Aposololite Eleꞌvoleꞌ Initeꞌ Ato Atoliꞌmine Di Sotoꞌ Aniꞌ
12 Aposolo ingine ato atoꞌ suno di eveneta initeꞌ ato atoꞌ mukiꞌ di sotoꞌ igaꞌ aniꞌ. Idoꞌ Izesuꞌnimuꞌ gili eleꞌvoleꞌ igaꞌ ave mukiꞌ luꞌine di hamoꞌ igi mini monoꞌ numuno nabaꞌmi heꞌ numuno ma gizikaniꞌ ma gulive Solomoniꞌ ve lo minineꞌ neuꞌ nene di geseꞌ igi minaaꞌ aniꞌ.
13 Nizavo eveneꞌ heta minavete engikumuꞌ sizaga li di naba i-ngidaniꞌza ngehelele izavo vi engita giꞌmizamaniꞌ.
14 Vi giꞌmizamaniꞌza veneꞌ vemohoꞌ mukiꞌ vanu hizi igi gili eleꞌvoleꞌ igi Guvelesi vela igi imineꞌ mili giꞌmizaaꞌ aniꞌ.
15 Neꞌmine ikevo gebili nabili initeꞌ gizi davesi ngeleꞌmizi vi Petoloꞌ ogo novivo mumunoꞌmo nesi linge ma avutoꞌ ngebelavo lamineꞌ ilizahe li holomosi ingaaꞌ aniꞌ initekisi di vi akaloꞌ huli ngimikaꞌ aniꞌ.
16 Zelusalemi ebeꞌ gahevela inganiꞌ aleve mukikisi igi engita initeꞌ gizi daniꞌ alevesi idoꞌ luꞌninguꞌ sikalahuꞌ golosoliꞌmo mino do goloso o-ngedo minivesi ngeleꞌmizi ikevo di lamineꞌ igi osuꞌ li-ngidaniꞌ ve.
Aposolo Goboni Mili-ngidaniꞌ Gamazi
17 Neꞌmine igi nizavo evenetoꞌ medelo mino Oꞌmoso initeꞌ lehize-daaꞌ ive nabasi ezela igi giꞌmizave mukiꞌ adoꞌ Sadukaioꞌ aleve aꞌmidoꞌ mulise milaaꞌ ave engikutiꞌ minikevo ngizeboloꞌ goloso molavo
18 aposolo aꞌnidoꞌ di giliꞌ li ngeleꞌmizi di vi eveneꞌ mukiliti nalaꞌ numuno gizikanguꞌ huli-ngidaniꞌ.
19 Huli-ngidikevo nizavo holukaꞌ litiꞌmusouꞌ Guvelesi veꞌmi angeloꞌ maliꞌmo ogo nalaꞌ numungutiꞌ akahe siꞌze-ngedo ngeleꞌmize hetoꞌ ogo tiꞌ lo lineꞌ:
20 Vi monoꞌ numuno nabauꞌ oti mini Oꞌmosoꞌmo do luꞌ izavo minevoꞌ minevoꞌ ogo minaaꞌ gosoholiꞌmi monovomuꞌ gamazi mukiꞌ nene li sotoꞌ igi eveneꞌ li-ngimi minilo.
21 Neꞌmine lavo gili goꞌ lolosa neivo monoꞌ numuno nabauꞌ dizi aꞌmine gamazi li sotoꞌ i-ngimi minaniꞌ. Nizavo evenetoꞌ medelo mino Oꞌmoso initeꞌ lehize-daaꞌ ive nabasi ezela giꞌmizi minavesi di nubo igi engiꞌ Isilaeleꞌ aleveti gizebo veti kanisole nabaꞌine vise li di mulise mili-ngidi aꞌmine ve ngeleꞌmizi alizave li pilisi ve ma nalaꞌ numuda ngimiselaniꞌ.
22 nGimiselikevo vi ninganiꞌza nalaꞌ numunguꞌ nene nizamavo viseꞌ igi di tibizi vi tiꞌ li li-ngimaniꞌ:
23 Vuneꞌza nalaꞌ numunoꞌmi akahe nene gizi giliꞌ likevo gatedoꞌ gizebo igaꞌ ave nene ha oti nizavo ninguneꞌza akahe siꞌzuneꞌ nene eveneꞌ hamokisi ma nizamavo ninguneꞌ ve.
24 Likevo monoꞌ numuno nabauꞌ gizebo igaꞌ ave adoꞌ pilisi veti guveꞌinesi ve nabasi evenetoꞌ medeli mini Oꞌmoso initeꞌ lehizi-daaꞌ ave nabasi gili aposolo nadiꞌ ahe li gopo gaꞌine gili alingeꞌ nene initeꞌ ma nadiꞌ ogo sotoꞌ ilihe li laniꞌ.
25 Neꞌmine li nizavo ve maliꞌmo ogo hetelo tiꞌ lo lo-ngimineꞌ: Mene gililo. Lingine nalaꞌ numunguꞌ huli-ngidave nene monoꞌ numuno nabauꞌ mini eveneꞌ monoꞌ li-ngimi nizave.
26 Lavo pilisi veti gizebo veꞌine aza pilisi ve ma ngeleꞌmizo vo aposolo ngeleꞌmizo aniꞌ. Aꞌmine pilisi ve nete ngeleꞌmizi aniꞌza evenelite gehenidunuꞌ libilikelizave li golise gili ngibilami zou li ngeleꞌmizi aniꞌ ve.
27 nGeleꞌmizi kanisoleti vovoꞌninguꞌ huli-ngidikevo nizavo evenetoꞌ medelo mino Oꞌmoso initeꞌ lehize-daaꞌ ive naba neꞌmo tiꞌ lo longoꞌ o-ngidineꞌ:
28 Laza aꞌmine veꞌmi gulive igi li-ngimiꞌ ngimiꞌ amilo lo amuzo molo lo-lengemamuneꞌ nehe. Olo. Lingine peleseveꞌ izi aꞌmine gamazi nene Zelusalemi numunguꞌ li hutileꞌ ikevo buu lineꞌ ma ve. Neꞌmine igi aꞌmine ve bilaveliti lihimeꞌine nene leliꞌ okodela dizelive lisa nahe.
29 Lavo Petolole aposolo linge masi di velepeꞌ izi gamazi tiꞌ li li-imaniꞌ: Eveneliti gamazi gele do Oꞌmosoꞌmi gamazi gele hulaaꞌ ne ma nomive.
30 Lingine Izesuꞌni lohotoꞌ zaloꞌ bili hilikevo avotemoteliti Oꞌmosoꞌine neꞌmo do ote-dineꞌ ve.
31 Otavo Isilaeleꞌ aleve lingine lutine di velepeꞌ izikevo lihimetine hulo-lengedelive lo Guvetesi ve ve lo idoꞌ do luꞌ izaaꞌ ive ve lo Oꞌmosoꞌmo eiꞌ amuzodunuꞌ do dize-davo neive.
32 Idoꞌ aꞌme luvoniꞌ initeꞌ nene ningo gelosa aꞌminemuꞌ lo sotoꞌ o lengemelonive nene leliꞌ ne none. Idoꞌ lelikovoꞌ nomive. Oꞌmosoꞌmi Sikalahuꞌve nesi nene lo sotoꞌ ogaꞌ neive. Aꞌmine Sikalahuꞌve nene Oꞌmosoꞌmo eze gamaziloꞌ gele daaꞌ unive nene leme neineꞌ ma neive lo lo-ngimineꞌ.
33 Tiꞌ lo lo-ngemavo ngizeboloꞌ goloso molavo mo ngebelelone li gilaniꞌ.
34 nGebelelone li gilaniꞌza Zuda veliti kanisole mulise nabautiꞌ ve ma Halisaioꞌ ve aza Moseꞌ louꞌ gamazi gize ngimineꞌ nene apize ngemaaꞌ ivo eveneꞌ mukiꞌ ezemuꞌ gilavo dize minive neꞌmi gulive Gamalieleꞌ neꞌmo oto aposolo vi heta igi gamene ngomo minilizave lavo vi minikevo
35 kanisole alevemuꞌ tiꞌ lo lo-ngimineꞌ: Isilaeleꞌ aleve neze zuhokizo, lingine aꞌmine ve nadiꞌ i-ngidilizahe. Gatine gili nge li minisa i-ngidilo.
36 Gamene gozopoꞌ akaꞌmila ve ma gulive Teudaꞌ aza oto ve guveꞌnesi ve naba nouve lavo eveneꞌ fo hadeti (400) neꞌmine ezela giꞌmizaniꞌza alingeꞌ ngamani nete meꞌnibine bili hilikevo ezela giꞌmizave nene hutileꞌ igi vi haha ikevo aꞌmine initeꞌ osuꞌ lineꞌ.
37 Idoꞌ alingeꞌ gulivete gizaniꞌ gamenela nGalilaia ve ma gulive Zudaꞌ ve lo minive neꞌmo oto eveneꞌ linge gaꞌine do lovo do sotoꞌ ogo ngamani ngebelelone lavo gili imikevo lovo hizanguꞌ nene Zudaꞌni bili hilikevo eze aleve mukiꞌ vi hutileꞌ igi vi halekaniꞌ.
38 Nemuꞌ ne mene vemuꞌ lo-lengemeloze. Gililo. Lingine huli-ngimikavo haza minilizave. Ingine di sotoꞌ aniꞌ initeꞌ nene haza evenelite gaꞌine gili gono di di sotoꞌ aniꞌ nolineꞌ nene mo gopo ogo haha oloseive.
39 Idoꞌ Oꞌmosoꞌmo hize eleꞌ o-ngedo minivo di sotoꞌ aniꞌ nolineꞌ nene lingine Oꞌmoso ivileꞌ igi ingine gono nidangumuꞌ nene ngeli oꞌve li li-ngidilizahe. Oꞌmososi lovo i imi minikelizave lo nemuꞌ nolo-lingimuve lo lo-ngimineꞌ. Lo-ngemavo ingine gili di
40 aposolo gohi ngeleꞌmizi numunguko dizi lobuno gavosodunuꞌ ngibiliviꞌ ngibiliviꞌ igi Izesuꞌ gulive igi eveneꞌ li-ngimamilizave li li huki-ngidi ngimiseli hulaniꞌ.
41 Idoꞌ ngimiselikevo aꞌmine kanisole alevesi minadotiꞌ huli-ngidi ngolize iziꞌmi limi vaniꞌ. Idoꞌ ngolize iziꞌmi limi vaniꞌ nene ingine Oꞌmosoꞌmo lelikumuꞌ gelavo lamineꞌ ogavo ingine Izesuꞌ gulive di minangumuꞌ ve li biluvalite diꞌmi limi-ngidi ngibililizaniꞌ nene monokuꞌ amuzoꞌine nene aꞌmine geni ha gihilizadoꞌ lisiheꞌ o neive lo gilineꞌ noloseive li ngolize iziꞌmi vaniꞌ ve.
42 Neꞌmine ogavo gamene gamene monoꞌ numuno nabaukisi numudasi Oꞌmosoꞌmo do luꞌ izelive lo imiselelesa live nene Izesuꞌ minineꞌ nenako nemuꞌ gamazi lamineꞌ nene di halekami li sotoꞌ igi apizi ngimiꞌ ngimikovoꞌ igi minaniꞌ ve.