3
Pauloꞌ Eiꞌ Monovo Lo Sotoꞌ Ogo Oꞌmosoꞌmo Lo Huko-lidineꞌ Gamazi Gosohoꞌ Neꞌmi Gonouꞌ Ve Nouve Losa Aꞌmine Lo Huko-lidineꞌ Gamazi Gosohoꞌ Neꞌmo Litehe Nene Ivileꞌ Ivo Lamineꞌ Goloso Neive Lineꞌ Gamazi
1 Neꞌmine noluvoniꞌ nene leliꞌ monovote nene lamineꞌ ve losa aꞌmine gamazi ma nene gohi apiꞌ ogo nolo-limive lisa nigilahe. Idoꞌ monoꞌ laaꞌ ave linge ma nete eveneꞌ malite engiꞌ monovoꞌinemuꞌ li sotoꞌ igi gizaniꞌ gamazi nene ma disa aꞌmine vilizada minaaꞌ naniꞌ aleve nene ngimaaꞌ nave. Lingine gilavo leliꞌ nene aꞌmineꞌmine ogo eveneꞌ malite leliꞌ monovotemuꞌ li sotoꞌ igi gizaniꞌ gamazi ma dosa lengemelonidoꞌ o neihe. Idoꞌ aꞌneꞌmine luhuvo nene eveneꞌ ma ngemeloningumuꞌ nene lingine ma gizi limilizadoꞌ o neihe.
2 Oꞌove. Leliꞌ monovote lo sotoꞌ ilineꞌ luhuvo niteꞌ neꞌmine nene mo lengiꞌ nene nizave. Idoꞌ aꞌmine leliꞌ monovote lo sotoꞌ ilineꞌ luhuvo niteꞌ gizaheꞌ nene leliꞌ luteuꞌ do nonivo eveneꞌ mukiꞌ nete nene aꞌminemuꞌ ningisa gilaaꞌ nave.
3 Leliꞌ monoꞌ gono noduneꞌ neꞌmi gihileꞌve lengiꞌ nene Kilisitodatiꞌ luhuvo niteꞌ neꞌminisa nizaniꞌ nene mo sotoꞌ gehepeve o neive. Aꞌmine luhuvo niteꞌ nene ingi noso neꞌminedunuꞌ gizaniꞌ nomive. Idoꞌ geheniloꞌ luhuvo mili gizaniꞌ neꞌminesi nene nomive. Asi minevoꞌ minevoꞌ Oꞌmoso neꞌmi Sikalahuꞌ nedunuꞌ nene eveneꞌ lengiꞌ lutinguꞌ nene luhuvo neꞌminosa gize neive.
4 Neꞌmine noluneꞌ nene Kilisitoꞌ gono daniꞌ neꞌmo nene Oꞌmosoloꞌ gele muꞌmusiꞌ o noneꞌ nenako neꞌmine gamazi lamineꞌ nene laaꞌ noune.
5 Idoꞌ neꞌmine laaꞌ nouneꞌ nene gihile neꞌmine do sotoꞌ olonidoꞌ nene laza mo lisiheꞌ o none losa nevoba neꞌmine amuzo nene lelita ma nomive. Asi Oꞌmoso eiꞌ nene amuzo lemo aꞌmine gono dalonidoꞌ nene do lisiheꞌ o-ledaaꞌ neive.
6 Aza nene lo huko-lidineꞌ gamazi gosohoꞌ neꞌmi gonouꞌ ve minelonidoꞌ nene do lisiheꞌ o-lede neive. Aꞌmine gono nene gizikaniꞌ neineꞌ louꞌ gamazi maloꞌ nevoba asi Oꞌmosoꞌmi Sikalahutoꞌ nene neive. Nene nanitekumuꞌ ve. Aꞌmine gizikaniꞌ neineꞌ louꞌ gamaziloꞌ nene ngelo eꞌmetamuneꞌ neꞌmo nene lute helavo aꞌmine louliꞌmo lebele helaaꞌ neineꞌ gilineꞌza Oꞌmosoꞌmi Sikalahuꞌ neꞌmo nene minevoꞌ minevoꞌ lemeni dameni lemo do upuhoꞌ o-ledaaꞌ neive.
7 Ee, idoꞌ aꞌmine gehedoꞌ gizikaniꞌ neineꞌ louꞌ gamaziꞌmi gonolotiꞌ nene helaaꞌ nouneꞌza aꞌmine louꞌ ganaꞌ sotoꞌ ineꞌ nene mo vode gade vilineꞌ initeꞌ amuzoꞌvesi labanaꞌvesi nene sotoꞌ ineꞌ ma neive. Idoꞌ aꞌmine amuzo labanaꞌve nene vo Moseꞌ golo velelotiꞌ nene silingengeꞌni hulo minineꞌ nene gopo okaꞌ okaꞌ oꞌmo vo minineꞌza aꞌminesi nene Isilaeleꞌ aleve ningavo veꞌine lenge lenge lavo vonuꞌ bililizadoꞌ lisiheꞌ amaniꞌ ve.
8 Aꞌneꞌmine initeꞌ nene neꞌmino minineꞌ nenako Oꞌmosoꞌmi Sikalahuliꞌmo do sotoꞌ o neineꞌ monoꞌ gono neꞌmo nene aꞌmine litehe monoꞌ nene ivileꞌ nabaloꞌ goloso ivosa leliꞌ vode gade goloso vilineꞌ monovoꞌvesi sotoꞌ oloseive.
9 Ee, gonitoꞌ ngeleꞌmize molaaꞌ ineꞌ monoꞌ litehe neꞌmo nene initeꞌ naba mino vode gade vilineꞌ monovoꞌvesi minineꞌ nenako Oꞌmosoꞌmo eveneꞌ lisiheꞌ ve lo-ledelidoꞌ leleꞌmize molaaꞌ neineꞌ monoꞌ gono gosohoꞌ neꞌmo nene ivileꞌ goloso ivosa initeꞌ naba goloso mino vode gade atoliꞌmine goloso ogosa vilineꞌ monovoꞌvesi noloseive.
10 Ee, monoꞌ gosohoꞌ neꞌmi monovoꞌve vode gade vaaꞌ neineꞌ neꞌmo nene ivileꞌ ogo dizo minidiꞌmo nene monoꞌ litehe labanaꞌvesi mino voꞌine gaꞌine vaaꞌ neineꞌ monovoꞌve ma nene mo vo halekave.
11 Ee, aꞌmine monoꞌ liteheliꞌmi labanaꞌve nene vo gopo okaꞌ okaꞌ oꞌmo vo osuꞌ lineꞌza aꞌmine nesi nene voꞌine gaꞌine vaaꞌ neineꞌ initeꞌ minineꞌ nenako osuꞌ lamo minevoꞌ minevoꞌ monovoꞌve laminekisi minineꞌ monoꞌ gosohoꞌ neꞌmo nene ivileꞌ ogo vode gade goloso vilineꞌ initeꞌ mineleseive.
12 Idoꞌ aꞌmine noluvoniꞌ monovomuꞌ mene mo gele muꞌmusiꞌ o noneꞌ nenako nemuꞌ nene laza gamazi laaꞌ nouneꞌ nene do hito gepeꞌ gamazi neꞌmingutikisi lamo asi mo gamazi lamineꞌ sotokovoꞌ lovoꞌ kiselevoꞌ ogo laaꞌ noune.
13 Laza nene Moseꞌ neꞌmine nene minamune. Aza nene eiꞌ velelotiꞌ silingengeꞌni hulo minineꞌ vo gopo okaꞌ okaꞌ oꞌmo vo osuꞌ nolivo Isilaeleꞌ aleve nene aꞌmidoꞌ gisili hizi ningi minikelizave losa veleloꞌ nene lavolavo do hitineꞌ ma neive.
14 Ne neiha Moseꞌ golo veleloꞌ lavolavo do hitineꞌ neꞌmino Isilaeleꞌ aleve nene Oꞌmosoꞌmo lo huko-ngidineꞌ monoꞌ litehe gatanguꞌ gatanguꞌ monovoꞌve gilisaꞌmaniꞌ nenako nemuꞌ nene idisesi engiꞌ luꞌine gaꞌnidoꞌ nene ha hite neineꞌ gele neivo luꞌine gaꞌnine nene ha ngi lo neive. Aꞌmine lute gateloꞌ hite minelineꞌ initeꞌ nene mo Kilisitoda vo giꞌmizekunivosavoꞌ nene do hulo-ledeleseive.
15 Ee, idise mene gamenelokisi nene Moseꞌ gizineꞌ monoꞌ gamazi eveneꞌ gati ngimaaꞌ naaniꞌ gameneloꞌ gameneloꞌ nene Isilaeleꞌ aleveti luꞌine gaꞌine nene initeliꞌmo ma hite neineꞌ gele neivo minaaꞌ naniꞌza
16 monoꞌ godolouꞌ Moseꞌnimuꞌ tiꞌ li gizi nizaniꞌ ma nene engitokisi ha gihile izelidoꞌ o neive: Idoꞌ Guvelesi vela mine velepeꞌ izineꞌ gameneloꞌ gameneloꞌ nene veleloꞌ hitineꞌ initeꞌ nene do hulaaꞌ ineꞌ ve. Adoꞌ Guvelesi vela mini velepeꞌ izilizaniꞌ gamenela nene aꞌmine luꞌineꞌmi veleloꞌ hitineꞌ nene do hulo-ngedeleseive.
17 Idoꞌ Guvelesi ve ve noluvoniꞌ nene Sikalahuꞌvemuꞌ noluve. Idoꞌ Guvelesi veꞌmi Sikalahuꞌ lelita minive nene initeꞌ maliꞌmosi nalava ize-ledamivo apase-ledavo haza minaaꞌ noune.
18 Ee, laza mukitoꞌ Moseꞌ initeꞌ veleloꞌ hitosa minaaꞌ ineꞌ neꞌmino minamo asi mukitoꞌ nene vete haza sotoꞌ o neivo mino gapogapoliꞌmo silingengeꞌni gohi do tineꞌ molo hulo mala ogaꞌ neineꞌ neꞌmino Guvelesi veꞌmi monovoꞌve vode vaaꞌ neineꞌ monovoꞌve nene lelitatiꞌ hulo eveneꞌ mala ogaꞌ noune. Aꞌmine monovoꞌve lamineꞌ goloso lelita minineꞌ nene vo naba oꞌmo voovoꞌ neivo laza nene eiꞌ Guvelesi veꞌmi emeni dameniloꞌ gehepeve lisiheꞌ ogosa medelo minaaꞌ noune. Idoꞌ neꞌmine nouneꞌ nene Oꞌmosoꞌmi Sikalahuliꞌmo nene ogaꞌ noune.