5
Litiꞌmusouꞌ Minaniꞌ Gameneloꞌ Monovo Goloso Igi Mili Minaaꞌ Aniꞌ Monovo Nene Huli Oꞌmosoꞌmi Emeni Dameniloꞌ Eꞌmeti Labanaliꞌmi Emeni Dameni Di Otuhilizaniꞌ Monovomuꞌ Pauloꞌ Lo-ngimineꞌ Gamazi
1 Idoꞌ neꞌmine ogo Oꞌmosoꞌmo lihimetine hulo-lingidineꞌ nemuꞌ nene lingine Oꞌmosoꞌmo lulo lingimineꞌ izipahala minaniꞌ nete nene eiꞌ emeni dameni neꞌmidoꞌ gehepeve eꞌmetilizadoꞌ o neineꞌ nenako nemuꞌ nene eꞌmeti minilo.
2 Idoꞌ Oꞌmosoꞌmo unuvo lamineꞌ gelo mulunouꞌ lamineꞌ gelelive li sipisipi ize nevoꞌmine bili olokuꞌ gizi Oꞌmoso imaaꞌ naniꞌ neꞌmine ogo Kilisitoꞌ aza nene leliꞌ lulo limidiꞌmo lelikumuꞌ okoꞌno nene hulo hilineꞌ ve. Nemuꞌ lingine nene aꞌmineꞌmine igi lutine ngemaaꞌ monovo nene lengita minivosa aꞌmidoꞌ eꞌmeti vi minilo.
3 Idoꞌ veneꞌ vemohoꞌ gipe alu gopo ingaaꞌ monovo idoꞌ neꞌmine monovo lute do goloso ilineꞌ monovo ato atoꞌ nesi idoꞌ initeꞌ gohi gohi dalisa gilaaꞌ monovo nene Oꞌmosoꞌmi evenele laza ogo molo amolonidoꞌ o neineꞌ nenako lengiꞌ vovotinguꞌ aꞌmine monovo nene ngomosi mo sotoꞌ ogalize. Aꞌmine initeꞌ goloso nemuꞌ nene li voleloꞌ meloꞌ igi gohi di gatidoꞌ milamilo.
4 Idoꞌ lingine nene ekeseꞌ gamazi nesi lami idoꞌ dingani gamazi nevoꞌmine nesi lami idoꞌ ha gizeꞌ zohiꞌ gamazi nolube li monovo laminekumuꞌ di gopo igi lami idoꞌ monovo golosomuꞌ nene veteteꞌ igi lami Oꞌmoso opoꞌni li minilo.
5 Ee, veneꞌ vemohoꞌ gipe alu gopoꞌnapa ingiꞌmi monaaꞌ nave nehe ido do goloso o-ngedelineꞌ monovo goloso igi mili igaꞌ nave nehe idoꞌ initeꞌ gohi gohi dalone li gilaaꞌ nave nene aꞌmine initeꞌ neꞌmo engiꞌ Oꞌmosoꞌine gelavo soza oꞌmoso opoꞌni li minaaꞌ ave neꞌmine ve nene Oꞌmososi Kilisitokisi gizebo i minasinguꞌ nene vi hilami salani mili-lidasineꞌ initeꞌ nesi nene ma damilisave lo laminetokovoꞌ nolo-lingimuze. Gili minilo. Idoꞌ aꞌmine neꞌmine monovo daaꞌ nave nene Oꞌmososi Kilisitokisi gizebo i minasinguꞌ nene vi hilamilisanako nemuꞌ nene lingine aꞌmine neꞌmine monovo nene damilo lo nolo-lingimuve.
6 Oꞌmosoꞌmi gamazi gili disaꞌmave nete nene aꞌmine neꞌmine monovo goloso daaꞌ naniꞌ nenako nemuꞌ Oꞌmoso izeboloꞌ molavo lihime ngemelineꞌ nenaze. Aꞌmine neꞌmine monovo goloso nemuꞌ nene gotine izi soza saza gamazi nili-lingimavo ma nene aꞌmidoꞌ gili ngimamilo.
7 Nemuꞌ nene lingine neꞌmine alevesi giꞌmizo makaꞌ monalone li eheeꞌ igi minilo.
8 Lingine gomuꞌ nene litiꞌmusouꞌ neꞌmine minaniꞌ ma neineꞌza idise nene mo Guvelesi vela igi giꞌmizi mini labanaꞌ neꞌmi lulouꞌ nizaniꞌ nenaze. Aꞌneꞌmine aleveloꞌ nene giꞌmizami labanaliꞌmi emeni damenisi minaniꞌ nete igi mili minilizaniꞌ lisiheꞌ ilineꞌ monovolokovoꞌ nene eꞌmeti vi minilo.
9 Ee, labanaliꞌmi gihile neꞌmi emeni damenisi minave ingine nene monovo laminekovoꞌ igi mili eveneꞌ lisiheꞌ mini eveneꞌ goꞌine izami gamazi nene laminetokovoꞌ laaꞌ naniꞌ nenako nemuꞌ nene laza labanaliꞌmi emeni damenisi minunive leliꞌ monovotelokovoꞌ nene eꞌmeti vi minilizangumuꞌ luvoniꞌ ve.
10 Idoꞌ neꞌmine igi minilizanguꞌ nene Guvelesi veꞌmo ningivo lamineꞌ ilineꞌ monovomukovoꞌ nene viseꞌ igi ningi igi mili minilo.
11 Lingine eveneꞌ litiꞌmuso neꞌmi lulouꞌ mini monovo goloso igi mili minaaꞌ naniꞌ neꞌmo nene gihile izesaꞌmineꞌ nenaze. Engikisi zogo mili bizi minami asi aꞌmine monovoꞌine goloso nene hulilizangisi di sotoꞌ i-ngidilo.
12 Ee, ingine haleki igi mili igaꞌ naniꞌ monovomuꞌ nene laza ma ogo molo amo noloba ha vetetekovoꞌ oloneꞌ nesi nene lovozo helelonidoꞌ o neineꞌ nenako nemuꞌ nene aꞌmine monovoꞌine nene di sotokovoꞌ i-ngidilo.
13 Di sotoꞌ ikevo miniliza initeꞌ mukiꞌ nene labanatoꞌ sotoꞌ igi minikevo labanaꞌ neꞌmo engiꞌ monovoꞌine nene do sotoꞌ ogavo sotokovoꞌ minaaꞌ neive.
14 Idoꞌ neꞌmine noluvoniꞌ nene aꞌmine di sotoꞌ ikevo miniliza initeꞌ mukiꞌ nene labanaliꞌmi emeni dameni di otuhilizadoꞌ o neineꞌ nenako nemuꞌ nene luvoniꞌ ve. Aꞌminemuꞌ nene nama ma tiꞌ li laaꞌ nave:
Upuhoꞌ igi otilevo. Lutine okise ongavo minave
lingine hili minaniꞌ gili minangutiꞌ nene otilevo.
Otikevo Kilisitoꞌ aza hize labanaꞌ ele-lengedeleseive.
15 Nemuꞌ nene lingine eveneꞌ gaꞌine gili nge li mini igi mili isaꞌmave nete igaꞌ aniꞌ neꞌmine ami asi eveneꞌ gaꞌine gili nge li mini monovo laminekovoꞌ igi mili igaꞌ naniꞌ neꞌmine igi monovotine igi mili mini di vilizadoꞌ nene gizebo lekeseve igi minilo.
16 Idoꞌ idise gameneuꞌ eveneꞌ ingine nene monovo goloso di sotoꞌ iꞌmi vivoꞌ nizanaze. Lingine haza gopo moni minami monovotidoꞌ gizebo lekeseve igi mini eveneꞌ hize eleꞌ i-ngidiliza gonotine lamineꞌ sotoꞌ ilineꞌ nene mo diivoꞌ minilo.
17 Ee, eveneꞌ ingine nene monovo goloso di sotoꞌ iꞌmi vivoꞌ nizaniꞌ nenako nemuꞌ negi hizi gopoꞌ napa minami Guvelesi veꞌmo eiꞌ lulouꞌ nene lengikumuꞌ nadiꞌ igi minilizave lo gele nolihe nemukovoꞌ nene ningi gili hehe li minilo.
18 Idoꞌ lutine nene do gopo o-lengedavo vi tolovo ikelizaze. Negi noso nene ni sipaki igi minamilo. Asi Oꞌmosoꞌmi Sikalahuꞌ neꞌmo nene lutine vaitoꞌ gizebo o neivo mini eiꞌ lilidokovoꞌ nene eꞌmeti minilo.
19 Idoꞌ gamazi li voleloꞌ meloꞌ igi minilizanguꞌ nene monoꞌ nama ato atoꞌ Oꞌmoso opoꞌni li laaꞌ naniꞌ idoꞌ Oꞌmosoꞌmi Sikalahuꞌ neꞌmo lo sotoꞌ ogo lo lengemelineꞌ neꞌmine nama nene li mini Guvelesi ve nene lutinedunuꞌ opoꞌni li longolize izi minilo.
20 Neꞌmine igi mini lengita sotoꞌ ilineꞌ initeꞌ mukikumuꞌ nene Guvetesi ve Izesuꞌ Kilisitoꞌ velemuꞌ igi gamene gamene Oꞌmoso metehine nene tangezoꞌ li-di opoꞌni li minilo.
21 Idoꞌ Kilisitoꞌnimuꞌ nene eveneꞌ naba lamineꞌ ve li ezemuꞌ lengehelele izivo mini eiꞌ gala gilidoꞌ eꞌmeti lingine nene ge gelekeleꞌ o-nede ne gelekeleꞌ o-gede li minilo.
Veneꞌ Vemohoꞌ Engiꞌ Igi Mili Miniliza Monovomuꞌ Pauloꞌ Lo-ngimineꞌ Gamazi
22 Idoꞌ aꞌmineꞌmine igi veneꞌ nete Guvetesi vela gelekeleꞌ i-daaꞌ naniꞌ neꞌmine igi vadinge lilizadoꞌ gelekeleꞌ igi minilizadoꞌ o neineꞌ nenako gelekeleꞌ i-ngidi minilo.
23 Ee, Kilisitoꞌ aza evenele muliseti godoteloꞌ minive minineꞌ neꞌmino vadinge nene godotidoꞌ minave nizaniꞌ nenako nemuꞌ nene gelekeleꞌ i-ngidi minilo. Idoꞌ Kilisitoꞌ aza nene godoteloꞌ minivevoꞌ minineꞌ nevoba eiꞌ evenele eiꞌ okoꞌno neꞌmino minunive nene do luꞌ izaaꞌ ive neꞌmine nesi minineꞌ ve.
24 Nemuꞌ nene eze evenele mulise Kilisitoꞌnimuꞌ gelekeleꞌ o-do minaaꞌ nouneꞌ neꞌmine igi veneꞌ nete vaꞌninge lilizaniꞌ initeꞌ mukikumuꞌ nene gelekeleꞌ i-ngidilizadoꞌ o neive.
25 Kilisitoꞌ aza nene evenele zuho mulise nene lulo limidiꞌmo lelikumuꞌ okoꞌno hulo hilineꞌ nenaze. Vemohoꞌ lingine aꞌmineꞌmine igi eledingine nene lutine ngimilo.
26 Idoꞌ Kilisitoꞌ eiꞌ evenele mulisemuꞌ eiꞌ okoꞌno hulo hilineꞌ nene aza aꞌmine eveneꞌ mulise nene gamaziꞌne lo-ngemo noso holo-ngedeloniꞌ neꞌmo neniꞌ ve lo ngeleꞌmize molo luꞌninguꞌ goloso neineꞌ nene gilite osuꞌ lo-ngedelove lo
27 idoꞌ aꞌmine eveneꞌne mulise neti okoꞌnidoꞌ nene huꞌine neꞌmine initeꞌ golososi nomivo mini idoꞌ gonoliseꞌine laminekisi minaniꞌ gelavo naꞌniseꞌne nenita do giꞌmize-ngedekuvo lihimeꞌinesi idoꞌ gamaziꞌinesi nomineꞌ minilizave lo nemuꞌ nene eiꞌ okoꞌno hulo hilineꞌ ve.
28 Idoꞌ aꞌmineꞌmine igi vemohoꞌ nete lengiꞌ okodinemuꞌ gilaaꞌ naniꞌ neꞌmine igi lengiꞌ eledinginemuꞌ gili lutine ngimilizadoꞌ o neive. Ve ma ingine eleꞌningine luꞌine ngimi minaaꞌ nave nene mo engiꞌ okoꞌinesi nene neꞌmine nii-dave.
29-30 Ee, eveneꞌ hamolitesi engiꞌ okoꞌinemuꞌ nene goloso ma gili imaaꞌ navoba asi nosoꞌ niteꞌ lamineꞌ nene di vele vele igi aꞌmine okoꞌine nene ganala daliko li gizebo lamineꞌ i-daaꞌ naniꞌ nenako idoꞌ eledinge nene lengiꞌ okodine neꞌmine nizaniꞌ nenaze. Nemuꞌ nene lingine aꞌmineꞌmine igi lutine ngimilizadoꞌ o neive. Idoꞌ Kilisitoꞌ evenele mulise laza nene eiꞌ okoꞌnoloꞌ gizene ana nevoꞌmine noneꞌ nenako aza nene aꞌmineꞌmine ogo leze luteꞌmi nosoꞌ niteꞌve nene do vele vele o-ledo ganala dikelizave lo gizebo lamineꞌ o-ledaaꞌ neive. Nemuꞌ nene ingine engiꞌ okoꞌine i-daaꞌ naniꞌ neꞌmine igi eleꞌninginesi aꞌmineꞌmine i-ngidilizave nene mo Kilisitoꞌ eiꞌ evenele leliꞌ o-ledaaꞌ neineꞌ neꞌmine igi minilisave.
31 Monoꞌ godolouꞌ tiꞌ li gizi nizaniꞌ maꞌminosa nene neive:
Nemuꞌ nene vehomoꞌ aza izelehingi melehingi nene hulo elenahida vo bizo minavo
ingine nene eveneꞌ hamoꞌ neꞌmine loloꞌ igi minilisasive.
32 Idoꞌ aꞌmine monoꞌ godolouꞌ gizaniꞌ gamaziuꞌ nene aneza gamazi dizo minineꞌ ma haleko neive. Naza aꞌminemuꞌ nene giluvo eveneꞌ hamoꞌ neꞌmine liliꞌ igi minilisasive li gizaniꞌ nene Kilisitoꞌnimukisi idoꞌ eze evenele mulise leliꞌ nesi nene hamoꞌ liliꞌ igi minilisasive li li mili gizikeniꞌ neive.
33 Idoꞌ neꞌmine li monoꞌ godolouꞌ gizaniꞌ nene Kilisitoꞌnimukisi eze evenele zuho mulisemukisi nene li gizaniꞌza aꞌmine nene mo lengiꞌ veneꞌ vemohotasi nene vo do neize. Mukitoꞌ lingine lengiꞌ okodinemuꞌ gilaaꞌ naniꞌ neꞌmine igi venetinemuꞌ gili lutine ngimikevo veneꞌ lingine nete vadinginemuꞌ nene eveneꞌ nabate mo gelekeleꞌ o-ngedelonidoꞌ o neive li vadingine gili ngimi mini di vi minilizave.