12
Izesungumuꞌ Gele Eleꞌvoleꞌ Ogo Monoliꞌmi Lesisiꞌveuꞌ Lotiꞌ Izo Mino Geni Lebelelingukisi Amuzo Molo Mineloninguꞌ Nene Laza Nadiꞌ Olobe Nemuꞌ Lo-ngimineꞌ
1 Aꞌmine Oꞌmosomuꞌ gele eleꞌvoleꞌ ogaliꞌmi monovo di sotoꞌ mili lelebizave mukiꞌ ingine nene limuso neꞌmini vaiꞌ goloso mini hizi vodo vodo i-lidi vonuꞌ libili nizaniꞌ gilineꞌ nemuꞌ nene laza okodela lihiteheꞌ initeꞌ vaiꞌ nene do hulo idoꞌ lihime initeliꞌmo gizedeloꞌ izo do mineꞌ mineꞌ ilineꞌ initeꞌ nesi nene do hulo hazala ogo Oꞌmosoꞌmo aka lelebizidokovoꞌ nene initeꞌ maliꞌmo aꞌmine aka hize tile-ledamivo idoꞌ ahukisi mo lamo lotikovoꞌ izo vo minelone.
2 Idoꞌ neꞌmino lotiꞌ izo novo Oꞌmosomuꞌ gele eleꞌvoleꞌ ogaꞌ monovoloꞌ nene gomuꞌ molo lemo aꞌmine monovoloꞌ eꞌmete osuꞌ losa aka lelebizive Izesuꞌnivoꞌ nene eꞌmeto volone lo eitokovoꞌ nene vete hulo-do volone. Aza nene alingeꞌ nolize izo minelongumuꞌ ve lo gelo evenelite ve goloso ve li gili lohotoꞌ zaloꞌ bililizangumuꞌ ovozo helo minelingumuꞌ nene haza initeꞌ ve lo gele hulo golise vamo aꞌmine lohotoꞌ zaloꞌ bilangukisi nene amuzo molo minineꞌ ve. Neꞌmine ogo Oꞌmosolatiꞌ lemo minelineꞌ moꞌmosiꞌveloꞌ Oꞌmosoꞌmo ana hulaaꞌ ida vo neive.
3 Idoꞌ Izesuꞌ monovomuꞌ gililizaniꞌ nene aza mo hize eleꞌ o-ledelineꞌ nenako nemuꞌ nene lingine monokuꞌ amuzo molaakumuꞌ goseleꞌ lengebelavo lutine nene vo gilizevo ogalive li lihime daaꞌ ave nete Izesuꞌni biluvaꞌ i-daaꞌ anguꞌ amuzo molo minineꞌ mamuꞌ nene gili minilo.
Vete Zopovo Siꞌzo Monovo Lisihetokovoꞌ Moneloningumuꞌ Ve Lo Oꞌmosoꞌmo Geni Initeliꞌmi Lulouꞌ Hulo-ledaaꞌ Neingumuꞌ Lo-ngimineꞌ
4 Lingine goloso initeꞌ neꞌmo do ongo-lengedelesa neivo amuzo mili lovo i imi aꞌmineꞌmi luloutiꞌ nene lingine olihe vanise lepi hilamave.
5-6 Idoꞌ lingine Oꞌmosoꞌmo muludinguꞌ do lamineꞌ ogo gipeꞌne ve lo gamazi ma monoꞌ godolouꞌ tiꞌ lo lo-lingidineꞌ mamuꞌ nene gatine molahe. Olo:
Gipeꞌnee, Guvelesi veꞌmo eveneꞌ ma lulo ngemo minelive nene
veꞌine zopovo siꞌzi monovo lisihetokovoꞌ monilizangumuꞌ ve lo
geni initeliꞌmi lulouꞌ ngeleꞌmize molaloseive.
Ee, gipeꞌne ve lo ningaaꞌ ive mukiꞌ nene
veꞌine zopovo siꞌzilizave lo ngebeleleseive.
Idoꞌ neꞌmine oloseinako nemuꞌ nene gaza Guvelesi veꞌmo
veka zopovo siꞌzo monovo lisihetokovoꞌ moneline lo
do lisiheꞌ o-gedo geni initeliꞌmi lulouꞌ geleꞌmize nomolavo ma
gaza nemuꞌ gelanivo haza initeꞌ loloꞌ amivo.
Idoꞌ lihimeka nogimivo ma nemuꞌ goseleꞌ gebelamilive.
7 Geni initeliꞌmi lulouꞌ mini ma nene Guvelesi veꞌmo leleꞌmize akaloꞌ neive li aꞌmine initeꞌ nene goseleꞌ lengebelamivo ha gihi minilo. Meꞌninge nete gipeꞌine ma veꞌine zopovo siꞌzilizave li ngibili di hehe li-ngidami huli-ngimikavo minaniꞌ nene ma minamavo mukitoꞌ nene ngibili di hehe li-ngidaaꞌ naniꞌ nemuꞌ nene Oꞌmosoꞌmo linginesi gipeꞌne nizave lo neꞌmine o-lengedo noloseive.
8 Ee, meꞌninge mukiꞌ nete gipeꞌine veꞌine zopovo siꞌziliza initeꞌ di-ngidi di hehe li-ngidaaꞌ naanako lengikisi Oꞌmosoꞌmo neꞌmine o-lengedo minamineꞌ neidiniko eiꞌ izipahala zuho minami akaloꞌ izipe neꞌmine minadine.
9 Idoꞌ aꞌmine gamaziloꞌ imineꞌ molo ma lolove. Ha okode losuvosi noneꞌ mene gidave metemote nete leliꞌ vete zopovo siꞌzilizave li di hehe li-lidavo gelekeleꞌ o-ngedo mino lamineꞌ giluneꞌ nenako nemuꞌ nene neꞌmine o-ngedaaꞌ nouneꞌ nene ivileꞌ ogo vode lute lemeni dameni do sotoꞌ o-ledaaꞌ ive metehine nene nabosa gelekeleꞌ o-dukeꞌvo. Olo. Ee, laza neꞌmine ogo ezelatiꞌ minevoꞌ minevoꞌ lemeni do minevoꞌ minevoꞌ olosunako nemuꞌ nene gelekeleꞌ nabo o-do minelone.
10 Ee, me misubouꞌ metemote di hehe li-lidavo gelekeleꞌ o-ngiduneꞌ nene ingine engiꞌ luꞌnidoꞌ lamineꞌ oloseive li giladoꞌ gamene liꞌnibevoꞌ di hehe li-lidaaꞌ aniꞌza Oꞌmoso eiꞌ neꞌmino lihimete goloso daaꞌ monovote nene nomivo monovote lisihekisivoꞌ minelone lo leleꞌmize lamineꞌ ilineꞌ initeꞌ do sotoꞌ o-ledo do hehe lo-ledaaꞌ neineꞌ nenako nemuꞌ nene gelekeleꞌ nabo o-do minelone.
11 Vete zopovo siꞌzeloningumuꞌ ve li di hehe li-lidi geni initeliꞌmi lulouꞌ leleꞌmizi milikevo aꞌminguꞌ mineloneꞌ gameneuꞌ nene lolize izo laniteꞌ gelo minelonivoba ha mulumo alumo gelo minelesuneꞌza neꞌmine oloneꞌ neꞌmo leleꞌmize akaloꞌ ogavo ma alingeꞌ neꞌmi gihileꞌve nene monovo lisiheꞌ laminekovoꞌ ogo molo nonivo lute nene zou lo minaaꞌ neive.
12 Oꞌmosoꞌmo vetine zopovo siꞌzilizave lo geni initeliꞌmi lulouꞌ lengeleꞌmize molaaꞌ neineꞌ neꞌmo nene lengeleꞌmize lamineꞌ oloseinako nemuꞌ nene lingine lutine gopo o vivo lutineꞌmi gizene anaꞌve nene guluꞌ gelo izo bele vivo lutine gilizevo ogo minaaꞌ neineꞌ nene gohi di oti-di gonouꞌ eleꞌmizi milalo.
13 Neꞌmine igi lutine neꞌmo monoꞌ akaloꞌ volosa neivo ma lengikuꞌ ve ma lingine lutineꞌmi gizeneꞌve goloso o vivo minave lingine nene gopo aka mili vami aꞌmidoꞌ lamini nivi lamineꞌ ilizangumuꞌ nene aka lamineꞌ di hehe li vi minilo.
Ingine Monovo Lisiheꞌ Igi Mili Ami Oꞌmoso Meheꞌine Imikevo Lihime nGemalive Lo Gaꞌine Daniꞌ Gamazi
14 Idoꞌ lengikuꞌ lovo lolize nene sotoꞌ ogalive li eveneꞌ mukita hongu monovo nene igi mili ngelebizi minilizangumuꞌ nene amuzo milalo. Idoꞌ ve ma ingine Oꞌmosoꞌmi evenelelite di minilizaniꞌ monovo lisiheꞌ lamineꞌ nene engita nomivo minaaꞌ nave nene Guvelesi ve mo ningamilizaniꞌ nenako lingine hongu monovo igi mili ilizadotiꞌ nene Oꞌmosoꞌmi evenele nounako li monovo lisiheꞌ laminetokovoꞌ eꞌmeto volone li amuzo mili minilo.
15 Oꞌmosolatiꞌ nasahiliꞌ lamineꞌ nene lengiꞌ zuho malite ningi huli aka maloꞌ vikelizave li ge gizebo o-nede ne gizebo o-gede li minilo. Idoꞌ lengiꞌ zuho maliꞌmo lengiꞌ vovotinguꞌ mino za maliꞌmo gihile ekeseꞌ ineꞌ izaaꞌ neineꞌ neꞌmino mino monovo goloso ato atoꞌ do sotoꞌ ogo lengita geni do sotoꞌ o-lengedo neivo lengikutiꞌ eveneꞌ lingela mukiꞌ nene aꞌmineꞌmine igi monovo goloso dikevo lutine do gopo ogalive li gizebo lekeseve igi minilo.
16 Idoꞌ lengikutiꞌ veneꞌ vemohoꞌ gopoꞌnapa ingi monikelizave. Idoꞌ lengikutiꞌ eveneꞌ ma Esauꞌ neꞌmine mini Oꞌmosomuꞌ gaꞌine molavo me misubouꞌ initekumukovoꞌ gili minikelizave li ge gizebo o-nede ne gizebo o-gede li minilo. Esauꞌ aza nene Isakaꞌ ganaꞌ gipele mino melehidoꞌ medelo mino melehi initeꞌvelokisi nene medelo minelidoꞌ minineꞌza gamene ma aꞌmine uvoloho Esauꞌ aza gaꞌna helo nakunolo Zakoboꞌ nosoꞌ niteꞌ gize vataꞌ ogo minineꞌ nenako aꞌmingutiꞌ nene linge ma nemavo nalongisi ve lo haza misubouꞌ initeꞌ nosoꞌ nitetoꞌ nene melehidoꞌ medelo minelineꞌ moꞌmosiꞌve nene nakunolo Zakoboꞌni eme molaniꞌ ve. Ee, Esauꞌ aza Oꞌmosomuꞌ gala molavo me misubouꞌ initekumukovoꞌ gele minive mino haza nosoꞌ niteꞌ nene gamene hamokovoꞌ nalosa idoꞌ nene initeꞌ naba melehidoꞌ medelo minelineꞌ moꞌmosiꞌve nene Zakoboꞌni imineꞌ ve.
17 Emavo Zakoboꞌ ezeloꞌ medelo minavo alingeꞌ meleho aza ganaꞌve noꞌnohoꞌ ize-delineꞌ noꞌnohoꞌ nene Zakoboꞌni ize-davo Esauꞌ aza meꞌneho noꞌnohoꞌ nene do tineꞌ molo neniꞌ noꞌnohoꞌ ize-nedelive lo ive ogo lulo do velepeꞌ izelineꞌ aka viseꞌ ogo minineꞌza ma ningamivo meleho aza Esauꞌ gamaziꞌve gele hulineꞌ nene lingine mo gili nizaniꞌ ma neize. Nemuꞌ nene lingine eze ineꞌ neꞌmine amilo.
18 Lingine Oꞌmosola igi giꞌmizaniꞌ nene Isilaeleꞌ aleve leliꞌ avotemote Sinae golola louꞌ gamazi lo huko-ngidineꞌ dalisa vanguꞌ sotoꞌ ogo minineꞌ initeꞌ neꞌmidoꞌ nene lingine ma amave. Ingine ha veꞌinedunukovoꞌ ningi idoꞌ gaꞌinedunukovoꞌ gililizaniꞌ initeꞌ nevoꞌminevoꞌ neidoꞌ aniꞌ ma neive. Ee, ingine Sinae golola vadoꞌ nene oloꞌ gulumo ogo minivo idoꞌ litiꞌmuso goloso izo minivo idoꞌ hepeꞌ naba mumu gehe gehe ogo elo minivo
19 idoꞌ pikuli neꞌmo nolo naba molo minivo idoꞌ Oꞌmosoꞌmo gamazi livo gilave nete nolo nene gilangumuꞌ golise gili gamazi gohi ma lelitoꞌ lisiheꞌ ogo lo lemamilive li amuzo mili Moseꞌni li-imaniꞌ.
20 Idoꞌ Oꞌmosoꞌmo tiꞌ lo lo huko-ngidineꞌ nemuꞌ ngemengingi goloso izineꞌ: Aꞌmine Sinae golola vi lisi gililiza initepe evenepe nene mo geheni huli huliꞌ igi ngibili hililizave. Idoꞌ evenekovoꞌ nevoba ize gulo nesi aꞌmida vi lisi gililizaniꞌ nene mo ngibili hililizave lo lineꞌ.
21 Ee, ingine ninganiꞌ initeꞌ nene ngemengingi izaaꞌ initeꞌ atoliꞌmine goloso minavo Moseꞌ aza nehelele goloso izavo luvoluvo zaloꞌ do nouve lo lo-ngimineꞌ.
22 Ee, lingine nene avotemotida Sinae golola ngemengingi initeꞌ sotoꞌ o ngimineꞌ neꞌmidoꞌ nene ma vamave. Asi aꞌmine ngemengingi initeꞌ ivileꞌ ogo lamineꞌ goloso minineꞌ initetoꞌ ikeniꞌ neive. Idoꞌ Zelusalemi numuno ebekuꞌ minineꞌ golo Zaioni neꞌmine minevoꞌ minevoꞌ Oꞌmosoꞌmi numuno ebeꞌ Zelusalemi neꞌmino Okulumokuko minineꞌ numuno ebekuꞌ Zaioni golo mala nene lingine mo imi hilikeve. Idoꞌ angeloꞌ tauseni tauseni neꞌminete zegeꞌ zegeꞌ igi ngolize izi minadasi
23 idoꞌ Oꞌmosoꞌmo noꞌnohoꞌ ize-ngedelineꞌ izipahala Okulumoꞌ ebeꞌ ngemelingumuꞌ guliveꞌine Okulumokuꞌ gize molave engiꞌ muliseukisi nene mo imi hilikeve. Idoꞌ eveneꞌ mukiliti Oꞌmoso leliꞌ zaasi naba minidasi idoꞌ ve lisiheꞌ neꞌmine mo hilikevo sikalahuꞌine Oꞌmosoꞌmo mudise ngeleꞌmize lamineꞌ ogavo nizada nesi nene mo imi hilikeve.
24 Idoꞌ lelikisi Oꞌmososi kuku holo-ledo gamazi hulo voleloꞌ meloꞌ o-ledo Oꞌmosoꞌmo gamazi lamineꞌ gosohoꞌ lo huko-lidineꞌ lo-do ogo limive Izesuda nesi imi hilikevo vaniseꞌve lutidoꞌ hibiꞌ izo hulineꞌ gelavo minikeve. Kainiꞌ aza Abeliꞌni bele hilineꞌ vaniseꞌve nene misubouꞌ doꞌmozavo Oꞌmosoꞌmo ningo Kainiꞌni nene lihime imineꞌza Izesuꞌni bili hilaniꞌ vaniseꞌve nene ningo lihime lemamo isete izineꞌ nenako aꞌmine vaniseꞌve neꞌmo gono daniꞌ nene Abeliꞌ vaniseꞌmo gono daniꞌ nene ivileꞌ ogosa gono lamineꞌ daniꞌ ve. Neꞌmo lingine nene mo aꞌminguꞌ imi hilikeve. Idoꞌ lingine aꞌminguꞌ nene mo imi hilikenako nemuꞌ nene Oꞌmosoꞌmo nasahiliꞌ o-ledo hize eleꞌ o-ledaaꞌ neineꞌ nene lengikutiꞌ ve malite ningi huli monovo goloso lengiꞌ vovotinguꞌ di sotoꞌ ikelizave li gizebo lamineꞌ igi minilo.
25 Ee, Oꞌmosoꞌmi gamazi Izesuꞌ lo-lingimineꞌ nene hulikelizaze. Gizebo lamineꞌ igi minilo. Ingine Oꞌmosoꞌmi gamazi misubouꞌ mene Moseꞌ lo-ngimineꞌ gili hulave nene Oꞌmosoꞌmo ngebelelingutiꞌ olovoꞌ igi golise viliza akaꞌine ma minamivo aza lihime ngemaaꞌ neineꞌ nenako nemuꞌ Oꞌmosoꞌmi gamazi nene Okulumokutiꞌ lo-limineꞌ nenako gele huloloneꞌ nene laza Oꞌmosoꞌmo lihime lemelingutiꞌ nene mo kekeꞌ ngelo olovoꞌ amolosunako nemuꞌ nene aꞌmine gamazi nene gili hulikelizaze. Gizebo lamineꞌ igi minilo.
26 Moseꞌ Sinai gololoꞌ dizo minineꞌ gameneuꞌ nene Oꞌmosoꞌmo gamazi nolo-imivo nolo neꞌmo misubo nene do moꞌmongoꞌ ineꞌ ve. Idoꞌ Oꞌmosoꞌmo idise tiꞌ lo lo huko neineꞌ ma neive: Iheꞌ initeꞌ mukiꞌ nene gamene hamokovoꞌ ma do moꞌmongoꞌ olosuve. Idoꞌ misubovoꞌ nevoba okulumoꞌ nesi do moꞌmongoꞌ olosuve lo lineꞌ ve.
27 Idoꞌ initeꞌ mataꞌ nene gohi do moꞌmongoꞌ olosuve lo lineꞌ nene aza initeꞌ mataꞌ mukiꞌ do sotoꞌ muluvoniꞌ nene do moꞌmongoꞌ ogo do hulokuvo moꞌmongoꞌ ami minilizaniꞌ initekovoꞌ nene ha miniviꞌ miniviꞌ ilisave lo gele mino do moꞌmongoꞌ ilingumuꞌ lineꞌ ve.
28-29 Idoꞌ laza Oꞌmosoꞌmo gizebo inguꞌ moꞌmongoꞌ amilineꞌ ebeꞌ minevoꞌ minevoꞌ ilinguꞌ nene vo holokuneꞌ nenako nemuꞌ nene Oꞌmoso isaaꞌ neve lo-do opoꞌni lo-deloneꞌ nene mulunouꞌ lamineꞌ gelelidokovoꞌ o-delone. Idoꞌ ololiꞌmo initeꞌ loꞌvoto osuꞌ lilineꞌ neꞌmino Oꞌmosote neꞌmo eveneꞌ goloso ngebele osuꞌ loloseinako eze opoꞌni loloneꞌ nene ezemuꞌ lehelele izivo goliseꞌve gele mino neꞌmine ogo minelone.