15
Izesuꞌ Nene Vaini Nalaꞌ Neꞌmine Nouvo Lingine Nene Aꞌnava Neꞌmine Nizave Lo Lineꞌ Gamazi
1 Izesuꞌ imineꞌ molo tiꞌ lo lo-ngimineꞌ: Neniꞌ nene vaini nalaꞌ neꞌmi zava gehepeve ne nouve. Idoꞌ meꞌneho neve nene aꞌmine vaini nalatoꞌ gizebo ve ne neive.
2 Aꞌmine nenikuꞌ aꞌnava neꞌmine mini gihile izamaniꞌ nene huko do hulaaꞌ neive. Idoꞌ gihile izi minaniꞌ aꞌnava mukikuꞌ nene gihile mo vaiꞌ goloso izelingumuꞌ ve lo sisive do do lisiheꞌ gehepeve ogaꞌ neive.
3 Naza gamazi lo-lengemaaꞌ nouvoniꞌ neꞌmo lengikuꞌ nene mo sisive do do lisiheꞌ ogave.
4 Nemuꞌ lingine nenitoꞌ nene giꞌmizi giliꞌ li minilo. Aꞌmineꞌmine ogo naza linginela giꞌmizo minelove. Aꞌnava neꞌmo zavaꞌveloꞌ giꞌmize minamilineꞌ nene asiꞌve ngelo gihile izamoloseiha zavaꞌveloꞌ giꞌmize minelineꞌ nene gihile izeleseive. Aꞌmineꞌmine ogo lingine nenita giꞌmizami minilizaniꞌ nene gihile ma izami asi nenita giꞌmizi minilizanikovoꞌ nene gihile izilisave.
5 Ee, neniꞌ nene vaini nalaꞌ neꞌmi zavaꞌve nene nouvo lingine nene aꞌnava neꞌmine nene nizave. Idoꞌ neniꞌ nene hize eleꞌ o-ngedamuvo initeꞌ hamokisi ma amilisanako ve ma ingine nenita giꞌmizi nizavo naza inginela giꞌmizo minelove nete nene gihile vaiꞌ goloso izilisave.
6 Ve ma ingine nenitoꞌ giꞌmizi minamave nene za aꞌnava huki hulikevo gokoꞌ lavo di nubuho igi olokuꞌ gizikevo laaꞌ neineꞌ neꞌmine nene nizave.
7 Lingine nenitoꞌ giꞌmizi minilizaniꞌ nene naniteꞌ naniteꞌ dalisa gililizahe aꞌminemuꞌ lilizaniꞌ nene meꞌneho ha gele lengemavo dalisave.
8 Idoꞌ lingine gihile vaiꞌ izi neniꞌ izipahaꞌne zuho gihile liliꞌ igi minilizadotiꞌ nene meꞌnehine di hozi li-dilisave.
9 Meꞌneho lulo nene neniꞌ neme neineꞌ neꞌmino naza luꞌne nene lengeme nouve. Nemuꞌ nene luꞌne lengemeꞌmo vo minelodoꞌ vo lisiheꞌ ivosavoꞌ minilo.
10 Naza meꞌneho lo huko lo-nidineꞌ gamaziloꞌ eꞌmeto mino meꞌneho lulo nimidoꞌ lisiheꞌ ivosa minaaꞌ nouvoniꞌ neꞌmine igi linginesi nene aꞌmineꞌmine igi neniꞌ lo huko lo-lingiduvoniꞌ gamaziloꞌ eꞌmeti minilizaniꞌ nene luꞌne lengemeꞌmo vo minelodoꞌ vo lisiheꞌ ivosavoꞌ nene minilisave.
11 Gamazi mene nolo-lingimuvoniꞌ nene luꞌne gulumo avile lisivo minaaꞌ nouvoniꞌ monovo nene lengitasi minivo aꞌmine neꞌmo vaiꞌ lo lingibilivo minilizave losa noluve.
12 Neniꞌ gamazi ma lo huko lo-lingiduvoniꞌ ma nene neꞌmino neive: Naza luꞌne lengiꞌ lengeme nouvoniꞌ neꞌmine igi linginesi nene ge luka neme ne luꞌne geme livoꞌ minilo.
13 Ve maliꞌmo eze zogo alevemuꞌ okoꞌno hulo labuluvo ogosa helelineꞌ nene lulo atoliꞌmine gehepeve ogo ngeme minosa nene neꞌmine ilineꞌ nenako lulo mo ngemo minineꞌ votigile nene ivileꞌ ivosa lulo gohi ngemelidoꞌ ngelo minamoloseive.
14 Lingine lo huko lo-lingimuvodoꞌ eꞌmeti minilizaniꞌ nene neniꞌ zogone nene nizave.
15 Idoꞌ gelekeleꞌ izipe nete nene guveꞌinesi ve gizebo o-ngede miniveꞌmo ogo molo ogaꞌ neineꞌ initekumuꞌ nene ma ningi gilisaꞌmaniꞌ nenako nemuꞌ nene naza lengikumuꞌ nene gelekeleꞌ izipe ve lo gohi ma lo-lengedamolodoꞌ o neive. Asi meꞌnehidatiꞌ ningo giluvoniꞌ initeꞌ mukiꞌ nene lengiꞌ gililizave lo do sotoꞌ ogo lo-lengeme nouvoniꞌ nenako nemuꞌ nene idise lengiꞌ nene zogone ve nolo-lingiduve.
16 Lengiꞌ nene gomuꞌ apizi neniꞌ nene lengiꞌ ve li ma di tiꞌ amave. Asi neniꞌ neve lengiꞌ do tiꞌ uvoniꞌ nene vi gono dikevo minevoꞌ minevoꞌ ilineꞌ gihile nene izelive losasi idoꞌ lingine neniꞌ veꞌnemuꞌ igi meꞌnehida vokuꞌ nanitekumuꞌ lilizahe aꞌmine initeꞌ nene lengemelive losasi do tiꞌ o-lingiduvoniꞌ ve.
17 Naza nene mo neꞌmine lo nolo huko-lingiduve: Lingine nene ge luka neme ne luꞌne geme li minilo.
Me Misubouꞌ Aleve Neniꞌ Biluvaꞌ I-nidaaꞌ Naniꞌ Neꞌmine Igi Biluvaꞌ I-lingidilisave Lo Izesuꞌ Lo-ngimineꞌ Gamazi
18 Me misubouꞌ initetoꞌ luꞌine milaaꞌ nave nete lengiꞌ biluvaꞌ i-lingidilizaniꞌ nene gomuꞌ neniꞌ biluvaꞌ i-nidi minaniꞌ ma nene idise leliꞌ nene biluvaꞌ nii-lidave lisa gili minilo.
19 Lingine nene aꞌmine me misubouꞌ aleveti muliseꞌningutiꞌ minadiniko ingine lengikumuꞌ nene leliꞌ aleve ve li zogo mili-lingidadine. Neꞌmine adineꞌza engiꞌ muliseutiꞌ lengiꞌ nene neniꞌ ve lo do kegese-lengedo do nenita o-lingiduvoniꞌ neꞌmo nene biluvaꞌ nii-lingidave.
20 Naza tiꞌ lo lo-lingimuvoniꞌ gamazi mamuꞌ nene gili minilo: Gelekeleꞌ izipe neꞌmo nene gizebo o-do minive guvelesi veꞌve nene ivileꞌ o-do minesaꞌmive. Neniꞌ goboni mili-nidaaꞌ ave nilizaniꞌ nene lengikisi goboni mili-lingidilisave. Idoꞌ neniꞌ gamaziꞌneloꞌ gili di minaaꞌ ave nilizaniꞌ nene lengiꞌ gamazitinesi nene gili di minilisave.
21 Mene noluvoniꞌ initeꞌ i-lingidilizaniꞌ nene ingine neniꞌ nimiselive nene ningi gilami minilisanako neꞌmo nene lingine neniꞌ guliveꞌne di tiꞌ igi nenitoꞌ giꞌmizi minangumuꞌ ve li aꞌmine noluvoniꞌ initeꞌ nene ha i-lingidilisave.
22 Idoꞌ naza ma amo gamaziꞌne nene ma lo-ngemamuvodiniko nenikumuꞌ gili hulamavo lihime nene engita mo minamivo minadineꞌza idise nene ingine laza lihime nodune lo gelamo gopo minune li eꞌmenga lilizaniꞌ aka nene ogo hize tile-ngedekuvoniꞌ nenako olovoꞌ ma amilisave.
23 Ve ma ingine neniꞌ biluvaꞌ i-nidaaꞌ nave nene aꞌminguꞌ meꞌnehinesi nene biluvaꞌ nii-dave.
24 Idoꞌ neniꞌ nene eveneꞌ malitesi amaniꞌ initeꞌ atoliꞌmine suno gehepeve nene engiꞌ vovoꞌninguꞌ do sotoꞌ uvoniꞌ ma nene ma do sotoꞌ amuvodiniko lihime engita ma minamivo minadineꞌza engiꞌ vovoꞌninguꞌ nene aꞌmine atoꞌ suno nene do sotoꞌ nouvo ningisasi nene nenikisi meꞌnehinesi nene biluvaꞌ i-lidi minaniꞌ ma neive.
25 Neꞌmine igi minaniꞌ nene engiꞌ monoꞌ gamaziꞌninguꞌ gizikaniꞌ minineꞌ gamazi ma nene gihile izelingumuꞌ ve losa nene neꞌmine aniꞌ ve. Aꞌmine gamazi nene neꞌmino neive: Biluvaꞌ i-nidaniꞌ nene mo hazamuꞌ gehepeve neꞌmine aniꞌ ve.
26 Idoꞌ meꞌnehosi minasidotiꞌ imiselekuvo alive hize eleꞌ o-lengedelive adoꞌ gamazi gihile do sotoꞌ ive Oꞌmosoꞌmi Sikalahuꞌ alineꞌ nene neniꞌ monovoꞌnemuꞌ lo sotoꞌ sotoꞌ oloseive.
27 Idoꞌ lengiꞌ nene gono apiꞌ ogo do minuvodotiꞌ nene nenikisi makaꞌ mine do ogo noneꞌ nenako nemuꞌ nene linginesi nene neniꞌ monovoꞌnemuꞌ li sotoꞌ sotoꞌ ilisave.