3
Monoꞌ Noso Holo-ngedaaꞌ Ive Zohaneꞌ Monoꞌ Gono Daniꞌ Gamazi Gizineꞌ
(Mataioꞌ 3:1-12; Malekoꞌ 1:1-8; Zohaneꞌ 1:19-28)
1 Idoꞌ Tibelioꞌ Kaesaleꞌ aza kilisimasi fiftini (15) neꞌmine Loma veti guveꞌinesi ve loloꞌ ogo neivo Podioꞌ Pilatoꞌ nene Zudaia misubouꞌ ngamani naba loloꞌ o-davo evenetoꞌ gizebo ogo neivo idoꞌ Helodeꞌ aza meleho gomuꞌ gizebo ineꞌ misubo linge ma nGalilaia misubouꞌ nene guvelesi ve loloꞌ ogo neivo idoꞌ akunolo Hilipoꞌ nene misubo linge ma Itulia misuboukisi Talakonito misuboukisi nene guvelesi ve neivo idoꞌ Lisaniaꞌ nene misubo linge ma Abilene misubouꞌ nene guvelesi ve neivo
2 idoꞌ Anasiꞌ ve Kaiahaꞌ ve ingine nene evenetoꞌ medeli mini Oꞌmoso initeꞌ lehizi-daaꞌ asive naba nizasivo neꞌmine igi minaniꞌ gameneloꞌ nene Zakaliaꞌ gipele Zohaneꞌ aza ebeꞌ hadivela mininguꞌ nene Oꞌmoso neꞌmo eze gamaziꞌve eveneꞌ lo-ngeme ngemeꞌ ilive lo aꞌmine Zohaneꞌ veleuꞌ molavo lo-ngeme ngemeꞌ ineꞌ.
3 Neꞌmine oꞌmo novo Zodani noso gahevela misubo mukiꞌ mineꞌmo moninguꞌ nene tiꞌ lo lo-ngeme ngemeꞌ oꞌmo vineꞌ: Oꞌmosoꞌmo lengiꞌ lihimetine nene hulo-lengedelingumuꞌ ve li lingine lutine di velepeꞌ izi monoꞌ noso hilalo.
4 Neꞌmino lo-ngeme ngemeꞌ oꞌmo vo minineꞌ nene monoꞌ godolouꞌ polohete Isaiaꞌ tiꞌ lo lineꞌ gamazi gizaniꞌ minineꞌ maloꞌ nene vo gihile izineꞌ ve:
Ebeꞌ hadivelatiꞌ eveneꞌ maliꞌmo asi naba ma tiꞌ lo nolive:
Guvelesi ve alingumuꞌ ve li akaꞌve di vaꞌvaꞌ igi lutine di lisiheꞌ i-dilo.
5 Giꞌmize gaꞌmize nene misubo mili di lisiheꞌ igi
golo ngomoꞌ nabaꞌ dizaaꞌ lemaaꞌ o neineꞌ nene bili diꞌmi limi di lisiheꞌ igi
aka zovoꞌ zavaꞌ izo minineꞌ nene di pehe li
idoꞌ aka goloso o nolineꞌ nene hasaꞌ igi di lisiheꞌ ilisave.
6 Neꞌmine ikevo eveneꞌ mukiꞌ ingine
Oꞌmosoꞌmo eze evenele do nguꞌ izelineꞌ aka nene ningilisave.
7 Idoꞌ polohete Isaiaꞌ nene Zohaneꞌ neꞌmine gamazi lilingumuꞌ lineꞌ nenako nemuꞌ nene eveneꞌ vaiꞌ goloso neꞌminete Zohaneꞌ noso holo-ledelive li eiꞌ neida ikevo aza tiꞌ lo lo-ngeme ngemeꞌ ogo minineꞌ: Lingine sataliꞌmi izipahala goloso mene Oꞌmosoꞌmo lihime lengemelingutiꞌ ha olovoꞌ ilisave lo ve maliꞌmo lo-lengemavosa olovoꞌ ilisa nahe.
8 Nemuꞌ nene lingine aꞌmingutiꞌ olovoꞌ olone lii ma lingine luꞌine di velepeꞌ lamineꞌ izaveti monovo nene di mini initeꞌ lamineꞌ gihilevoꞌ nene igi mili minilo. Idoꞌ gililo. Lingine laza Abalahamuꞌ aꞌvopilemoꞌ Oꞌmosoꞌmo noꞌnohoꞌ ize-ledelesuve live nounako Oꞌmosoꞌmo lihime lemo do goloso o-ledamivo laminekovoꞌ ha minelesune li mo lamilo. Naza ma lo-lengemeloze. Lengiꞌ nene do hulosa Oꞌmosoꞌmo Abalahamuꞌni lo huko-dineꞌ gamazi do gihile izelesa Abalahamuꞌ aꞌvopilemoꞌ gohi ma do sotoꞌ o-delove lo gilidiniko geheni nevote Abalahamuꞌ aꞌvopilemoꞌ liliꞌ adine. Nemuꞌ nene lingine laza Abalahamuꞌ aꞌvopilemoꞌ nounako lihime lemamoloseive li gilamilo.
9 Oꞌmosoꞌmo idise lihime lemo mo lebelelesa do nene ogo mino eveneꞌ za belelesa za monovola luno bai gamunoꞌ ogaꞌ neineꞌ neꞌmine o neive. Za mukiꞌ gihile lamineꞌ izamaniꞌ nene monoꞌ gilamaniꞌ aleve neꞌminosa nenako huko olokuꞌ gizeleseive.
10 Neꞌmine lavo eveneꞌ nete tiꞌ li longoꞌ i-daniꞌ: Idoꞌ gaza neꞌmine laineꞌ nemuꞌ nene Oꞌmosoꞌmo neꞌmine o-ledamilingumuꞌ nene laza nadiꞌ olone.
11 Neꞌmine likevo Zohaneꞌ tiꞌ lo lo-ngimineꞌ: Lingine nene okodidoꞌ izaaꞌ naniꞌ initeꞌ saketitine nene sitaꞌ neivo ma nene saketiꞌve ma nomivo nolive nesi nene izeꞌ mili dalisive. Idoꞌ aꞌmineꞌmine igi ve ma ingine nosoꞌ niteꞌine ma neivo minaaꞌ nave nete nene ma nomivo minaaꞌ nave nene izeꞌ mili ngimi ni minilizave.
12 Idoꞌ takisi moni daaꞌ ave nesi nene monoꞌ noso holo-ledelive li Zohaneꞌ neida igi tiꞌ li longoꞌ i-daniꞌ: Idoꞌ Tisazo, leliꞌ nene nadiꞌ oloneꞌ o neive.
13 Neꞌmine likevo aza tiꞌ lo lo-ngimineꞌ: Lingine nene eveneꞌ takisi moni di-ngidilizanguꞌ nene ngamaniꞌmo moni neꞌmine makiloꞌ dalizave lo-lengede nolineꞌ maki nene ivileꞌ igi di gopo igi vaiꞌ damilo.
14 Neꞌmine lo-ngedavo ami pilisi ve netesi nene igi tiꞌ li longoꞌ i-daniꞌ: Idoꞌ leze nene nadiꞌ oloneꞌ o neive. Neꞌmine likevo Zohaneꞌ aza tiꞌ lo lo-ngimineꞌ: Lingine eveneꞌ mamuꞌ nene lengebelalone idoꞌ gonikuꞌ lengeleꞌmize molalonge moni limilo li soza sakupo gamazi li-ngidi ngehelele izelineꞌ initeꞌ i-ngidi moni gumine damilo. Moni gohi gohi dalisa amuzo milami menitine lingimilizanikovoꞌ lisiheꞌ igi dalo.
15 Idoꞌ Zohaneꞌ neꞌmine ogo miningumuꞌ gili eveneꞌ nete leze do luꞌ izelive lo Oꞌmosoꞌmo imiselelesa live nene mo sotoꞌ olosa neihe li laniteꞌ gilii aꞌminemuꞌ gizebo igi mini eveneꞌ mukilite aꞌmine ve nene aꞌmine Zohaneꞌ nolihe li luꞌninguꞌ nigilavo
16 Zohaneꞌ aza aꞌmine eveneꞌ mukiꞌ nene tiꞌ lo lo-ngimineꞌ: Naza nene monoꞌ noso holo-lengedeꞌmo vo nouvoniꞌ nene haza nosodunuꞌ holo-lengedeꞌmo vo nouvoniꞌza eveneꞌ ma neniꞌ amuzo nesi ivileꞌ o neineꞌ amuzoꞌvesi minive nene mo nave. Naza aꞌneꞌmine goboni gono do-do eiꞌ suuꞌvelotiꞌ nalaꞌve nesi nene apase hulo-delodoꞌ nene lisiheꞌ amuve. Aꞌmine ve neꞌmo noso neꞌmine holo-lengedelineꞌ nene Oꞌmosoꞌmi Sikalahukisi olokisi ne neive.
17 Ee, aꞌmine ve nene eveneꞌ laminekisi golososi do gizekaꞌ olosa do nene ogo mino ve ma viti gihilesi losuvosi gopo igi minaniꞌ nene do kegeselesa gono daaꞌ initeꞌve do anauꞌ ogo do nene ogo minaaꞌ neineꞌ neꞌmine o neive. Aza viti gihile losuvosi minangutiꞌ aꞌmine vaiꞌ nene do lamino izeꞌ moloo naaꞌ initeꞌ nene do nubo ogo numuꞌveuko molo losuvo nene lovoꞌ lovoꞌ ogo minaaꞌ neineꞌ olokuꞌ nene gizeleseive.
18 Idoꞌ neꞌmine gamazi nene ato atoꞌ vaiꞌ lo-ngemo luꞌine do ngi lo-ngedo monoꞌ gamazi lamineꞌ nene eveneꞌ lo sotoꞌ o-ngemo minineꞌ ve.
19 Neꞌmine ogo minineꞌza guvelesi ve Helodeꞌ aza akunoloꞌmi elenahine ipeꞌ ogo dangumukisi idoꞌ goloso niteꞌ vaiꞌ dangumukisi Zohaneꞌ aza elemavo
20 Helodeꞌ aza aꞌmine goloso niteꞌ vaiꞌ dadoꞌ nene imineꞌ molo monovo goloso gohi ogo Zohaneꞌni nene galapuso numunguꞌ hulo-dineꞌ ve.
Izesuꞌ Monoꞌ Noso Holaniꞌ Gamazi Gizineꞌ
(Mataioꞌ 3:13-17; Malekoꞌ 1:9-11)
21 Idoꞌ Helodeꞌ aza Zohaneꞌni galapuso numunguꞌ olihe hulo-damivo Zohaneꞌ aza eveneꞌ mukiꞌ nene monoꞌ noso holo-ngedo osuꞌ losa nelotiꞌ Izesuꞌni nesi nene noso holo-davo Oꞌmosola lo neivo Okulumoꞌ nene ngoloꞌ lavo
22 Oꞌmosoꞌmi Sikalahuꞌ nene nama viluso neꞌmine okoꞌno do otuho Izesuda lemo aniꞌ ve. Lemo navo Okulumokutiꞌ gamazi ma tiꞌ lo limineꞌ ve: Gaza nene voꞌneloꞌ gipeꞌne hamoꞌ nene nane. Gezemuꞌ nene mo muluꞌneuꞌ lamineꞌ nogiluve.
Lukaꞌ Izesuꞌ Avolomoti Guliveꞌine Gizineꞌ
(Mataioꞌ 1:1-17)
23 Neꞌmine ogo nelotiꞌ Izesuꞌ aza gonoꞌve gihile nene apiꞌ ogo do do vineꞌ nene kilisimasiꞌve teoti (30) neꞌmine minosa gonoꞌve gihile nene apiꞌ ineꞌ ve. Idoꞌ evenelite gilavo Izesuꞌ aza Zoseheꞌ gipele minineꞌ ve.
Idoꞌ aꞌmine Zoseheꞌ nene Heliꞌ gipele minineꞌ ve.
24 Idoꞌ Heliꞌ nene Matatiꞌ gipele minineꞌ.
Idoꞌ Matatiꞌ nene Leviꞌ gipele minineꞌ.
Idoꞌ Leviꞌ nene Melekiꞌ gipele minineꞌ.
Idoꞌ Melekiꞌ nene Zanaiꞌ gipele minineꞌ.
Idoꞌ Zanaiꞌ nene Zoseheꞌ gipele minineꞌ.
25 Idoꞌ Zoseheꞌ nene Matatiaꞌ gipele minineꞌ.
Idoꞌ Matatiaꞌ nene Amosiꞌ gipele minineꞌ.
Idoꞌ Amosiꞌ nene Nahumiꞌ gipele minineꞌ.
Idoꞌ Nahumiꞌ nene Hesiliꞌ gipele minineꞌ.
Idoꞌ Hesiliꞌ nene Nagaiꞌ gipele minineꞌ.
26 Idoꞌ Nagaiꞌ nene Maatiꞌ gipele minineꞌ.
Idoꞌ Maatiꞌ nene Matatiaꞌ gipele minineꞌ.
Idoꞌ Matatiaꞌ nene Semeiniꞌ gipele minineꞌ.
Idoꞌ Semeiniꞌ nene Zosekeꞌ gipele minineꞌ.
Idoꞌ Zosekeꞌ nene Zodaꞌ gipele minineꞌ.
27 Idoꞌ Zodaꞌ nene Zoanaꞌ gipele minineꞌ.
Idoꞌ Zoanaꞌ nene Lesaꞌ gipele minineꞌ.
Idoꞌ Lesaꞌ nene Zelubabeliꞌ gipele minineꞌ.
Idoꞌ Zelubabeliꞌ nene Sealetieliꞌ gipele minineꞌ.
Idoꞌ Sealetieliꞌ nene Neliꞌ gipele minineꞌ.
28 Idoꞌ Neliꞌ nene Melekiꞌ gipele minineꞌ.
Idoꞌ Melekiꞌ nene Adiꞌ gipele minineꞌ.
Idoꞌ Adiꞌ nene Kosamuꞌ gipele minineꞌ.
Idoꞌ Kosamuꞌ nene Elimadamuꞌ gipele minineꞌ.
Idoꞌ Elimadamuꞌ nene Eliꞌ gipele minineꞌ.
29 Idoꞌ Eliꞌ nene Zosuaꞌ gipele minineꞌ.
Idoꞌ Zosuaꞌ nene Eliezeleꞌ gipele minineꞌ.
Idoꞌ Eliezeleꞌ nene Zolimiꞌ gipele minineꞌ.
Idoꞌ Zolimiꞌ nene Matatiꞌ gipele minineꞌ.
Idoꞌ Matatiꞌ nene Leviꞌ gipele minineꞌ.
30 Idoꞌ Leviꞌ nene Simeoniꞌ gipele minineꞌ.
Idoꞌ Simeoniꞌ nene Zudaꞌ gipele minineꞌ.
Idoꞌ Zudaꞌ nene Zoseheꞌ gipele minineꞌ.
Idoꞌ Zoseheꞌ nene Zonamuꞌ gipele minineꞌ.
Idoꞌ Zonamuꞌ nene Eliakimiꞌ gipele minineꞌ.
31 Idoꞌ Eliakimiꞌ nene Meleaꞌ gipele minineꞌ.
Idoꞌ Meleaꞌ nene Menaꞌ gipele minineꞌ.
Idoꞌ Menaꞌ nene Matataꞌ gipele minineꞌ.
Idoꞌ Matataꞌ nene Nataniꞌ gipele minineꞌ.
Idoꞌ Nataniꞌ nene Zuda veti guveꞌinesi ve naba
Davidiꞌ gipele minineꞌ.
32 Idoꞌ Davidiꞌ nene Zesaiꞌ gipele minineꞌ.
Idoꞌ Zesaiꞌ nene Obediꞌ gipele minineꞌ.
Idoꞌ Obediꞌ nene Boaziꞌ gipele minineꞌ.
Idoꞌ Boaziꞌ nene Salaꞌ gipele minineꞌ.
Idoꞌ Salaꞌ nene Nasoniꞌ gipele minineꞌ.
33 Idoꞌ Nasoniꞌ nene Aminadabuꞌ gipele minineꞌ.
Idoꞌ Aminadabuꞌ nene Adiminiꞌ gipele minineꞌ.
Idoꞌ Adiminiꞌ nene Alaniꞌ gipele minineꞌ.
Idoꞌ Alaniꞌ nene Hezeloniꞌ gipele minineꞌ.
Idoꞌ Hezeloniꞌ nene Pelezaꞌ gipele minineꞌ.
Idoꞌ Pelezaꞌ nene Zudaꞌ gipele minineꞌ.
34 Idoꞌ Zudaꞌ nene Zakoboꞌ gipele minineꞌ.
Idoꞌ Zakoboꞌ nene Isakaꞌ gipele minineꞌ.
Idoꞌ Isakaꞌ nene Abalahamuꞌ gipele minineꞌ.
Idoꞌ Abalahamuꞌ nene Telaꞌ gipele minineꞌ.
Idoꞌ Telaꞌ nene Naholiꞌ gipele minineꞌ.
35 Idoꞌ Naholiꞌ nene Selugaꞌ gipele minineꞌ.
Idoꞌ Selugaꞌ nene Leguꞌ gipele minineꞌ.
Idoꞌ Leguꞌ nene Pelekoꞌ gipele minineꞌ.
Idoꞌ Pelekoꞌ nene Ebeliꞌ gipele minineꞌ.
Idoꞌ Ebeliꞌ nene Selaꞌ gipele minineꞌ.
36 Idoꞌ Selaꞌ nene Kenaniꞌ gipele minineꞌ.
Idoꞌ Kenaniꞌ nene Alahasadaꞌ gipele minineꞌ.
Idoꞌ Alahasadaꞌ nene Semiꞌ gipele minineꞌ.
Idoꞌ Semiꞌ nene Noaꞌ gipele minineꞌ.
Idoꞌ Noaꞌ nene Lamekiꞌ gipele minineꞌ.
37 Idoꞌ Lamekiꞌ nene Metuselaꞌ gipele minineꞌ.
Idoꞌ Metuselaꞌ nene Enokuꞌ gipele minineꞌ.
Idoꞌ Enokuꞌ nene Zalediꞌ gipele minineꞌ.
Idoꞌ Zalediꞌ nene Mahalaleliꞌ gipele minineꞌ.
Idoꞌ Mahalaleliꞌ nene Kenaniꞌ gipele minineꞌ.
38 Idoꞌ Kenaniꞌ nene Enosiꞌ gipele minineꞌ.
Idoꞌ Enosiꞌ nene Setiꞌ gipele minineꞌ.
Idoꞌ Setiꞌ nene Adamuꞌ gipele minineꞌ.
Idoꞌ Adamuꞌ nene Oꞌmosoꞌmo loloꞌ o-davo gipele neꞌmine minineꞌ ve.