6
Holisekuꞌ Izesuꞌ Izipahala Zuholite Viti Gihile Ili Nangumuꞌ Nene Gono Dikeve Li nGelemikevo Aꞌmidoꞌ Izesuꞌ Aza Holisekuꞌ Osoꞌ Amosoꞌ Initekumuꞌ Laaꞌ Uve Ne Nouve Lineꞌ Gamazi Gizineꞌ
(Mataioꞌ 12:1-8; Malekoꞌ 2:23-28)
1 Holiseꞌ gameneuꞌ Izesuꞌ aza izipahala zuhosi viti minguꞌ nivavo izipahala zuho nete viti godololatiꞌ gihile nene ili aꞌninguꞌ hupuꞌ izi niꞌmi vaniꞌ.
2 Neꞌmine aniꞌza Halisaioꞌ monoꞌ gilaaꞌ ave malite tiꞌ li laniꞌ: Lingine louꞌ gamaziuꞌ nene holiseꞌ gameneuꞌ gono damilo li nizaniꞌ mako neꞌmine nanimuꞌ nave.
3 Likevo Izesuꞌ aza tiꞌ lo lo-ngimineꞌ: Idoꞌ Zuda ve leliꞌ avotemoti guveꞌinesi ve naba Davidiꞌ aza ezesi monave gaꞌna hili minangumuꞌ nene louꞌ gamaziꞌmo initeꞌ mamuꞌ namaaꞌ ve lo hize tilavo tile minineꞌ aka nene goloso amivo ha do ngoloꞌ loo Davidiꞌ ineꞌ initeꞌ nene monoꞌ godolouꞌ gati gilahe gilamahe.
4 Aza neꞌmine ineꞌ ve. Oꞌmosoꞌmi monoꞌ numunguꞌ dizavo evenetoꞌ medelo mino Oꞌmoso initeꞌ lehize-daaꞌ ive neꞌmo Oꞌmosoꞌmi veleloꞌ milaniꞌ beleti nene eveneꞌ gohi malitesi namilizave lo asi evenetoꞌ medeli mini Oꞌmoso initeꞌ lehizi-daaꞌ avetevoꞌ ha nalisave lo louꞌ gamaziꞌmo lavo minineꞌ beleti nene Davidiꞌni do emavo idoꞌ ezesi makaꞌ monave ngemavo mukitoꞌ ezesi naniꞌ. Nemuꞌ nene goloso amivo neniꞌ izipahaꞌne zuho nene aꞌmineꞌmine igi viti gihile mene ha nalisave.
5 Neꞌmine lo tiꞌ lo lo-ngimineꞌ: Oꞌmosolatiꞌ ve gihile naza nene holiseliꞌmi meleho mino aꞌmine holisekuꞌ iliza initekumuꞌ idoꞌ amiliza initekumuꞌ laaꞌ uve nene nenikovoꞌ nouve.
Louꞌ Gamazite Avutoꞌ Ogo Holisekuꞌ Izesuꞌ Aza Gono Do Eveneꞌ Ma Do Lamineꞌ O-delineꞌ Nene Laza Goniꞌ O-delone Li Zuda Veti Monoꞌ Veꞌine Naba Nete Ningi Nizavo Izesuꞌ Aza Holiseꞌ Gameneuꞌ Eveneꞌ Ma Ana Goloso Ogo Gilizevo O Vive Ma Do Lamineꞌ O-dineꞌ Gamazi Gizineꞌ
(Mataioꞌ 12:9-14; Malekoꞌ 3:1-6)
6 Idoꞌ holiseꞌ gamene mauꞌ Izesuꞌ aza monoꞌ numunguꞌ dizo monoꞌ apize ngemo neivo aꞌminguꞌ nene ve ma ana zamela goloso ogo gilizevo o vive ma minineꞌ.
7 Neivo louꞌ gamazi apizi ngimaaꞌ avesi Halisaioꞌ monoꞌ gilaaꞌ avesi ingine Izesuꞌ aza aꞌmine ve nene idise do lamineꞌ o-delineꞌ nene holisekumuꞌ laniꞌ louꞌ gamazi ma nene avutoꞌ oloseinako nemuꞌ goniꞌ o-deloneꞌ aka ma sotoꞌ ilihe li vonuꞌ bili ningi minaniꞌ.
8 Neꞌmine igi nizavo Izesuꞌ aza ingine gilaniꞌ initeꞌ nene mo ningo gelo ana goloso o vive nene tiꞌ lo lo-imineꞌ: Gaza olusoꞌ mene ogo otezo. Neꞌmine lavo aza oto ogo aꞌmidoꞌ ote minineꞌ.
9 Ote neivo Izesuꞌ aza tiꞌ lo lo-ngimineꞌ: Naza tiꞌ lo longoꞌ noo-lingiduve. Leze louꞌ gamazite neꞌmo nadive lo neive. Holiseꞌ gameneuꞌ nene monovo lamineꞌ ilo lo neihe goloso ilo lo neive. Adoꞌ eveneꞌ di lamineꞌ i-ngidilo lo neihe di goloso i-ngidilo lo neive.
10 Lo lo-ngemo eveneꞌ mukiꞌ vonuꞌ ngebele osuꞌ lo ana goloso o vive ma nene tiꞌ lo lo-imineꞌ: Anga do pehe lozo. Lavo do pehe lavo ana nene gohi lamineꞌ ineꞌ ve.
11 Neꞌmine ineꞌza louꞌ gamazi apizi ngimaaꞌ avesi Halisaioꞌ monoꞌ gilaaꞌ avesi ingine Izesuꞌnimuꞌ ngizeboloꞌ goloso molavo nemuꞌ li voleloꞌ meloꞌ igi nadiꞌ o-delone li laniꞌ ve.
Izesuꞌ Aza Izipahala Zuho Vaiꞌ Minangutiꞌ Eveneꞌ Tuvelu (12) Nene Neniꞌ Aposolo Minilizave Lo nGeleꞌmize Molaniꞌ Gamazi Gizineꞌ
(Mataioꞌ 10:1-4; Malekoꞌ 3:13-19)
12 Aꞌmine gameneuꞌ nene Izesuꞌ aza Oꞌmosola lolosa golola dizo vineꞌ. Dizo vo Oꞌmosola lovoꞌ lovoꞌ ogo neivo litiꞌmuso izo goꞌ lineꞌ.
13 Idoꞌ goꞌ lavo nedengaꞌ nene eze eꞌmeti monaaꞌ ave izipahala zuho mukiꞌ nene asi lo-ngedavo ikevo engikutiꞌ eveneꞌ tuvelu (12) ngeleꞌmize kegeso ezeloꞌ medeli mini gamazi lilizave aposolo ve lo ngeleꞌmize molaniꞌ.
14 Ingine guliveꞌine nene neꞌmino minineꞌ: Simoniꞌ nene guliveꞌve gohi Petoloꞌ ve lo molaniꞌ idoꞌ Petoloꞌ nakunolo Adeleaꞌ ve idoꞌ Zakoboꞌ ve Zohaneꞌ ve idoꞌ Hilipoꞌ ve Batolomaioꞌ ve
15 Mataioꞌ ve Tomasiꞌ ve idoꞌ Alahaioꞌ gipele Zakoboꞌ abalaho ve idoꞌ Loma ve leliꞌ misuboutiꞌ ngimisele hulolone li amuzo milaaꞌ aveutiꞌ minive lave Simoniꞌ gohi ma neeve
16 idoꞌ Zakoboꞌ gohi maliꞌmi gipele Zudaꞌ ve idoꞌ alingeꞌ Izesuꞌni do sotoꞌ o-dive adoꞌ Keliotoꞌ numuno ebetotiꞌ ve Zudaꞌ engiꞌ neve nene minaniꞌ ve.
Ebeꞌ Ato Atokutiꞌ Eveneꞌ Mukiꞌ Goloso Izesuꞌ Gamazi Gililisa Igi Di Geseꞌ Ikevo Engikutiꞌ Initeꞌ Gizi Dave Mukiꞌ Do Lamineꞌ O-ngidineꞌ Gamazi Gizineꞌ
(Mataioꞌ 4:23-25)
17-18 Idoꞌ Izesuꞌ aza aꞌmine eveneꞌ tuvelu (12) inginesi gololatiꞌ limi ikevo izipahala zuho linge vaikisi idoꞌ eveneꞌ mukiꞌ goloso eze gamaziꞌve gililisa avesi idoꞌ initeꞌ gizi dave do lamineꞌ o-ledelive li avesi Zelusalemi numuno ebetatikisi idoꞌ Zudaia misubo linge mukitatikisi idoꞌ Tilo idoꞌ Sidoni numuno ebeꞌ minasineꞌ misubo guvo noso gahevelatikisi igi di geseꞌ ikevo Izesuꞌ aza aꞌmida nene misubo geledoꞌ lemo ogo ote minineꞌ ve. Neivo eveneꞌ luꞌninguꞌ sikalahuꞌ golososi minave ezela ikevo do lamineꞌ o-ngidineꞌ.
19 Idoꞌ Izesudatiꞌ amuzo neꞌmo eveneꞌ do lamineꞌ o-ngidineꞌ nemuꞌ nene eveneꞌ mukiꞌ ingine eiꞌ okoꞌnoloꞌ do gelosa lamineꞌ olosune li okoꞌnoloꞌ di gililisa aniꞌ ve.
Izesuꞌ Aza nGolize Izilizadoꞌ I Minave Nemukisi Idoꞌ Mulumo Gililizadoꞌ I Minave Nemukisi Lineꞌ Gamazi Gizineꞌ
(Mataioꞌ 5:1-12)
20-26 Neꞌmine ikevo Izesuꞌ aza izipahala zuhola vonuꞌ nongebelo tiꞌ lo lineꞌ:
Initetine nomivo gohoꞌ gahaliꞌ aleve lingine nene Oꞌmosoꞌmo gizebo o-ledelinguꞌ vi hilalizaniꞌ o neineꞌ nenako lamineꞌ iliza akaloꞌ mini mili nizaze.
Nemuꞌ longolize izilizaniꞌ o neive.
Neꞌmine igi nizaniꞌza initetine vaiꞌ lo neivo heneni ve nizave lingine longolize izi initeꞌ mukiꞌ mo dikeve. Alingeꞌ gohi ma damilisaze.
Nemuꞌ nene agae, ehetine ve.
Idoꞌ idise gaꞌna hili minaaꞌ nave lingine nene
alingeꞌ Oꞌmosoꞌmo nosoꞌ nitetine vaiꞌ lengemelineꞌ nenako lamineꞌ iliza akaloꞌ mini mili nizaze. Nemuꞌ longolize izilizaniꞌ o neive.
Neꞌmine igi nizaniꞌza idise gatudinevoꞌ o minivo minaaꞌ nave
lingine alingeꞌ gaꞌna hilivoꞌ minilizaniꞌ o neineꞌ nenaze.
Nemuꞌ nene agae, ehetine ve.
Idoꞌ minevoꞌ alevotine goloso o vivo idise agae agae li ive namavoꞌ igi minaaꞌ nave lingine alingeꞌ Oꞌmosoꞌmo minevoꞌ alevotine do lamineꞌ ogavo
lamineꞌ gili gize zohiꞌ igi minilizaniꞌ o neineꞌ nenako
lamineꞌ iliza akaloꞌ mini mili nizaze.
Nemuꞌ longolize izilizaniꞌ o neive.
Neꞌmine igi nizaniꞌza idise gize zohiꞌ igi minaaꞌ nave lingine alingeꞌ mulumo alumo gili
ive nama igi minilizaniꞌ o neineꞌ nenaze.
Nemuꞌ agae, ehetine ve.
Idoꞌ Oꞌmosolatiꞌ ve gihile neniꞌ neꞌmeti minangumuꞌ ve li eveneꞌ lengikumuꞌ goseleꞌ goloso ngebelavo vasa izi-lingidi gamazi goloso li lengelemi gulivetine nesi goloso neineꞌ nenako mo gohi gelamolone li gulivetine di hulilizaniꞌ nene engiꞌ avoꞌninge nete gozopoꞌ polohete minave i-ngidaniꞌ initeꞌ goloso neꞌmine i-lingidilizaniꞌ nenako lingine poloheteliti gonoloꞌ nene medeli minikevo Oꞌmosoꞌmo menitine naba Okulumokuko molo-lengedeleseize. Nemuꞌ nene aꞌmine neꞌmine manaꞌmine i-lingidilizaniꞌ gameneuꞌ nene longolize goloso izi ganine hizi gizedine adine izisa minilo. Ee, neꞌmine i-lingidikevo ma lamineꞌ iliza akaloꞌ mini mili nizaze. Nemuꞌ longolize izilizaniꞌ o neive.
Neꞌmine ilizaniꞌ o neineꞌza eveneꞌ mukiꞌ nete longopoꞌni li di naba nii-lingidavo ma avoꞌninge nete soza polohete goloso gomuꞌ minave di naba i-ngidaaꞌ aniꞌ neꞌmine i-lingidilizaniꞌ nenako lingine aꞌmine soza polohete minaveloꞌ medeli minilizaniꞌ o neineꞌ nenako agae, ehetine ve.
Izesuꞌ Aza Lute Eveneꞌ Nongemo Biluvatesi Nongemo Initeꞌ Laminekovoꞌ O-ngedeloneꞌ Monovomuꞌ Lineꞌ Gamazi Gizineꞌ
(Mataioꞌ 5:38-48; 7:12a)
27 Neꞌmino neineꞌza neze gamaziꞌne nigilave nene naza tiꞌ lo nolo-lingimuve: Biluvatine nene lutine ngimi lengikumuꞌ goseleꞌ ngebelaaꞌ neive nene nasahiliꞌ i-ngidi di lamineꞌ i-ngidilo.
28 Idoꞌ initeliꞌmo ma lingibilivoo li usiꞌ izi-lingidaaꞌ naniꞌ aleve nene Oꞌmosoꞌmo noꞌnohoꞌ ize-lingidivoo li-lingimilo. Idoꞌ goboni mili-lingidilizavemuꞌ nene do lamineꞌ o-ngedelive li Oꞌmosola li minilo.
29 Idoꞌ ve maliꞌmo gatidoꞌ noizivo ma nene helalasi izelize mine velepeꞌ izilo. Idoꞌ ve maliꞌmo saketika nene dalove nolivo ma nene siotika ngomo lulouꞌ nesi nene do aꞌmanapa amozo.
30 Idoꞌ lengitatiꞌ initeꞌ ma dalone li longoꞌ navo ma nene ha ngimilo. Idoꞌ lengitatiꞌ initeꞌ ma ipeꞌ igi di vikevo ma nene gohi di tiꞌni limilo li lamilo.
31 Idoꞌ lingine evenelite lelita neꞌmine manaꞌmine i-lidilizave li gili ma nene engitasi aꞌmineꞌmine i-ngidilo.
32 Idoꞌ eveneꞌ ma luꞌine lengiꞌ lingimaaꞌ avevoꞌ lutine ngimilizaniꞌ nene monoꞌ gilamave lihime daaꞌ ave netesi nene eveneꞌ luꞌine engita ngimave nene luꞌine ngimaaꞌ naniꞌ nenako lingine nene eveneꞌ ma ngivileꞌ igi monovo lamineꞌ ma damave. Oꞌmosoꞌmo eveneꞌ linge ngopoꞌni lilineꞌ votigile ivileꞌ ivosa lengiꞌ longopoꞌni goloso lilidoꞌ minamaniꞌ ve.
33 Idoꞌ eveneꞌ ma lengiꞌ lengeleꞌmize lamineꞌ avevoꞌ ngeleꞌmize lamineꞌ ilizaniꞌ nene monoꞌ gilamave lihime daaꞌ ave netesi nene aꞌmineꞌmine igi ingine ngeleꞌmize lamineꞌ ave nene ngeleꞌmize lamineꞌ igaꞌ naniꞌ nenako lingine eveneꞌ ma ngivileꞌ igi monovo lamineꞌ ma damaze. Oꞌmosoꞌmo ve mamuꞌ ngopoꞌni laaꞌ neineꞌ votigile ivileꞌ ivosa lengiꞌ longopoꞌni goloso lilidoꞌ minaniꞌ nehe. Oꞌove.
34 Idoꞌ lingine nene eveneꞌ ma initeꞌ ngemekunivo ingine alingeꞌ aꞌmine initeꞌ gohi limilizadoꞌ ve li gili mini ngimilizaniꞌ nene monoꞌ gilamave lihime daaꞌ ave netesi nene aꞌmineꞌmine igi aꞌmine initeꞌ gohi dalosune li aꞌmine initeꞌ ngimaaꞌ naniꞌ nenako lingine nene eveneꞌ ma ngivileꞌ igi monovo lamineꞌ ma damaze. Oꞌmosoꞌmo eveneꞌ linge ngopoꞌni lilineꞌ votigile ivileꞌ ivosa lengiꞌ longopoꞌni goloso lilidoꞌ minaniꞌ nehe. Oꞌove.
35 Ne neiha lingine lengiꞌ biluvatine nene lutine ngimilo. Idoꞌ ngeleꞌmize lamineꞌ i-ngidilo. Idoꞌ eveneꞌ initeꞌ ngimilizaniꞌ nene alingeꞌ gohi dalone lami haza gidini ngimilo. Neꞌmine igi haza ngimilizaniꞌ nene Oꞌmosoꞌmo menitine naba molo-lengedeleseive. Atoliꞌmine ogo dize minive Oꞌmoso aza eveneꞌ goloso nene nasahiliꞌ o-ngedaaꞌ neineꞌ nemuꞌ gilavo haza niteꞌ loloꞌ ogavo ezemuꞌ opoꞌni lisaꞌmave nesi haza gopo nasahiliꞌ o-ngedaaꞌ neineꞌ nenako lingine nene eveneꞌ initeꞌ ma haza gidini ngimilizaniꞌ nene aꞌmine atoliꞌmine ogo dizo minive neꞌmine gili vaniꞌ mini eiꞌ izipahala gehepeve minilisave.
36 Nemuꞌ nene lingine metibo neꞌmo eveneꞌ mukiꞌ mulumotine ningo hize eleꞌ o-lengedaaꞌ neineꞌ neꞌmine igi linginesi eveneꞌ mulumoꞌine ningi hize eleꞌ i-ngidi minilo.
Izesuꞌ Aza Eveneliti Lihimeꞌinemuꞌ Gamazi Izeꞌ Molo Lo-ngedamolone Lo Lineꞌ Gamazi Gizineꞌ
(Mataioꞌ 7:1-5)
37 Idoꞌ neꞌmine igi Oꞌmosoꞌmo lengiꞌ monovotinemuꞌ dovoꞌ ledevoꞌ ogo izeꞌ molo lamilingisi lingine eveneꞌ maliti monovomuꞌ diviꞌ lediviꞌ igi izeꞌ mili lamilo. Idoꞌ Oꞌmosoꞌmo lingine monovo goloso dikeve lo lengemenga lamilingisi lingine eveneꞌ mamuꞌ monovo goloso dikeve li ngemenga liꞌmi monamilo. Idoꞌ Oꞌmosoꞌmo lengiꞌ lihimetine nene hulo-lengedelingisi lingine eveneꞌ lihime di-lingidaveti lihimeꞌine nene huli-ngidilo.
38 Idoꞌ Oꞌmoso neꞌmo initeꞌ mataꞌ lengemelingisi lingine nene eveneꞌ initeꞌ mataꞌ ngimilo. Aꞌmine Oꞌmosoꞌmo lengemelineꞌ initeꞌ nene vauve goloso elosa lengiꞌ di miniliza votigile nesi ivileꞌ ogosa lengemeleseive. Aꞌmine initeꞌ lengemelineꞌ nene lingine eveneꞌ ngimiliza votigilelokovoꞌ lengemeleseinako nemuꞌ lingine aꞌmineꞌmine igi initeꞌ vauve ili ngimi minilo.
39 Neꞌmine lo Izesuꞌ aza aneza gamazi tiꞌ losasi ma imineꞌ molo lo-ngimineꞌ ve: Vele likive maliꞌmo vele likive atoꞌ ma aka elebizo analoꞌ do do ha vilihe. Ne nomive. Mo sitatoꞌ vi galeseuꞌ limilisasive.
40 Idoꞌ sukulu izipe malite tisaꞌine nene ivileꞌ igi ma minamilisaniꞌza mukitoꞌ nene initeꞌ mukikumuꞌ apizi ngimi osuꞌ likevo initeꞌ mukikumuꞌ gili osuꞌ lavetevoꞌ nene tisaꞌine neꞌmine liliꞌ ilisave. (Nemuꞌ nene lingine eveneꞌ nene aka lamineꞌ ngelebizelone li ma veꞌine likive neꞌmine minami lo-lengemaaꞌ nouvoniꞌ gamazi mukiꞌ nene gili lamineꞌ igisavoꞌ apizi ngimilizadoꞌ minilisave.)
41 Idoꞌ gaza veka gihileuꞌ za lana naba vo neineꞌ nemuꞌ nene ningo gelamo ve maliꞌmi vele gihileuꞌ initeꞌ ngomo lasolo vo neineꞌ nemuꞌ nene nanimuꞌ ningaaꞌ nane.
42 Idoꞌ geꞌmo vekauꞌ nene za lana naba vo neivosa gaza ve mamuꞌ ve melo, vekauꞌ initeꞌ ngomo vo neineꞌ nene do hulo-gedelove lo-delinidoꞌ o neihe. Ne nomive. Soza sunolavoꞌ monanive gaza za lana vekauꞌ vo neineꞌ nene gomuꞌ do hulokosavoꞌ nene ve maliꞌmi veleuꞌ initeꞌ ngomo lasolo vo neineꞌ nene ninge guno o minosa do hulo-delineꞌ o neive. Ee, monovo goloso naba daaꞌ naineꞌ nene gomuꞌ hulosavoꞌ maliꞌmo monovo goloso ngomo ma do nolineꞌ nene do lisiheꞌ o-delesane.
Izesuꞌ Aza Gihile Izaaꞌ Ineꞌ Zaloꞌ Aneza Gamazi Lo Molo Evenelite Igi Mili Minaaꞌ Naniꞌ Initeꞌ Neꞌmo Luꞌineꞌmi Monovo Do Sotoꞌ Ogaꞌ Neingumuꞌ Lineꞌ Gamazi
(Mataioꞌ 7:17-20; 12:34-35)
43-44 Gohuno gihile nene uhoni zalotiꞌ ngelo ma elamolosane. Idoꞌ vaini gihile nene gasavasi nalaꞌ golosolotiꞌ nene ngelo ma elamolosune. Nemuꞌ za mukiliti monovo nene gihileꞌine izelineꞌ neꞌmo do sotoꞌ ogavo ningelonidoꞌ o neineꞌ nenako nemuꞌ nene za ma lamineꞌ nolineꞌ neꞌmo nene gihileꞌve goloso ma izamoloseive. Idoꞌ za ma goloso nolineꞌ neꞌmo nene gihileꞌve lamineꞌ ma izamoloseive.
45 Idoꞌ eveneꞌ aꞌmineꞌmine igi nizave. Eveneꞌ luꞌninguꞌ goꞌzikaniꞌ initeꞌ nene veꞌningutiꞌ li hulaaꞌ nanako eveneꞌ lamineꞌ neꞌmi lulouꞌ nene gamazi lamineliꞌmo vaiꞌ lo neinako neꞌmo nene monovo lamineꞌ do sotoꞌ ogaꞌ neive. Idoꞌ eveneꞌ goloso neꞌmi lulouꞌ nene gamazi goloso neꞌmo nene vaiꞌ lo neinako neꞌmo nene monovo goloso do sotoꞌ ogaꞌ neive.
Numuno Gizaaꞌ Monovo Sitakumuꞌ Izesuꞌ Lineꞌ Gamazi
(Mataioꞌ 7:24-27)
46 Idoꞌ eveneꞌ nene guveꞌinesi veti gamazi gili dalizadokovoꞌ minaaꞌ naniꞌ nenako lingine nenikumuꞌ Guvetesi ve, Guvetesi ve, li-nidi minaaꞌ niigisa neze gamaziꞌne gili hulaaꞌ naniꞌ nene nanimuꞌ nave.
47 Idoꞌ eveneꞌ ma ingine nenita igi gamaziꞌne gili di luvodoꞌ luvodoꞌ igi mili eꞌmetilizaniꞌ nene ingine naniꞌmine ve nizahe nemuꞌ lo-lengemelove:
48 Ve maliꞌmo numuno gizelesa posi galese haꞌna elo homi gehedoꞌ ogo posi nene gehedoꞌ hize giliꞌ loo numuno gizavo goline izo noso naba velo numudoꞌ nene bilineꞌza numuno nene do lamineꞌ ogo gehedoꞌ gizineꞌ nenako neꞌmo numuno nene lemo ongamo amuzo molo haza minineꞌ ve. Idoꞌ ingine neniꞌ gamazi luvodoꞌ luvodoꞌ igi mili eꞌmetilizave nene aꞌmine numuno gizive neꞌmine minikevo initeꞌ igi mili minilizaniꞌ nene lemo ongamoloseive.
49 Ne neiha eveneꞌ ma ingine neze gamaziꞌne gili gili huli luvodoꞌ luvodoꞌ eꞌmetamilizaniꞌ nene numuno gizive gohi ma neꞌmine minilisave. Aꞌmine ve aza numuno gizelesa posi galese elo hulo homiuꞌ ogo posi nene gehedoꞌ hize giliꞌ lamo galese avileloꞌ eleko gizavo goline izo noso naba velo numudoꞌ ogo belavo numuno nene eii, do goloso ogosa izevo etevoꞌ ogo lemo onganiꞌ ve. Idoꞌ aꞌmineꞌmine ogo neniꞌ gamaziꞌne gili huli luvodoꞌ luvodoꞌ igi mili eꞌmetamilizavete igi mili minilizaniꞌ initeꞌ nene lemo ongaloseive.