PETOLOꞌ IZESUꞌ ZUHO MINIꞌMI MONAVE GIZE-NGIDINEꞌ LUHUVO NITEꞌ NABA 1
Petoloꞌ Izesuꞌ Evenele Zuho Naba Vanu Luhuvo Niteꞌ Gize-ngidingumuꞌ Gomuꞌ Gataaꞌ Gamazi
Mene luhuvo niteꞌ nene aposoloꞌ Petoloꞌ gizineꞌ ve. Petoloꞌ aza Betesaida ebekutiꞌ ve minineꞌ. Aꞌmine ebeꞌ Betesaida nene Zuda veliti misubo lingela nGalilaia polovinisi ve languꞌ minineꞌ. Idoꞌ Izesuꞌ aza olihe gulive gosohoꞌ Kehaꞌ ve lo molo-damivo Petoloꞌ gulive nene Simoniꞌ ve lo minineꞌ. Aꞌmine Izesuꞌ molo-dineꞌ gulive Kehaꞌ nene do velepeꞌ izo nGiliki aleveti gamaziꞌningutiꞌ loloneꞌ nene Petoloꞌ ve lo mineleseive. Aꞌmine Petoloꞌ gulive neꞌmi monovo nene neꞌmino neive: Eleꞌvoleꞌ ogo minaaꞌ neineꞌ initeꞌ geheni neꞌmine ve. Melehi gulive nene Zohaneꞌ ve. Petolokisi akunolo Adeleakisi ingine alahaꞌ daaꞌ asive minasineꞌ ve. Aꞌmine alahaꞌ dii maketi milaaꞌ gonouꞌ makaꞌ daaꞌ ave ma minasineꞌ nene uvolohoi akunoloi adoꞌ Zakoboki Zohaneki ve. Idoꞌ alahaꞌ daaꞌ aniꞌ nene nGalilaia noso ohuno nabautiꞌ disa maketi milaaꞌ aniꞌ ve. Aꞌmine ve setaꞌve setaꞌve ingine noso holo-ngedaaꞌ ive Zohaneꞌ izipahala liliꞌ igi mini nelotiꞌ alingeꞌ nene Izesuꞌ izipahala zuho liliꞌ aniꞌ ve. Alingeꞌ nene Petoloꞌ aza Izesuꞌ izipahala zuho mukiꞌ minangutiꞌ aposoloꞌ gono di hize eleꞌ i-dilizave lo ve tuveluꞌa do kegese-ngidiveutiꞌ minineꞌ ve. Idoꞌ aꞌmine Izesuꞌ aposoloꞌve tuveluꞌa minanguꞌ nene Petoloꞌ aza ve naba neꞌmine minineꞌ ve. Idoꞌ aza gamazi lo ogo molo ineꞌ initeꞌ vaikumuꞌ nene Mataioꞌ ve Malekoꞌ ve Lukaꞌ ve Zohaneꞌ ve gizaniꞌ buku setaꞌve setaꞌveukisi idoꞌ aposoloꞌ bukuukisi nene gatelesane. Pedekosi gameneuꞌ Oꞌmosoꞌmi Sikalahuꞌ neꞌmo Izesuꞌ izipahala zuhola lemo minineꞌ gameneuꞌ eveneꞌ vaiꞌ igi di geseꞌ ave monoꞌ lo-ngimive nene Petoloꞌ ve. Aꞌmine di geseꞌ aveuꞌ nene kanitili ato atoꞌ mukikutiꞌ aniꞌ Zuda ve masi vaiꞌ minaniꞌ. Aꞌmine gameneuꞌ Izesuꞌnimuꞌ gili eleꞌvoleꞌ igi eze evenele zuho liliꞌ ave tili tauseni minanguꞌ nene aꞌmine kanitili ato atokutiꞌ aniꞌ Zuda ve lingesi neꞌmine aniꞌ noloseive. Idoꞌ Zuda ve minamave nene ganaꞌ apiꞌ ogo Izesuꞌ gamaziꞌve lamineꞌ lo-ngemelive lo Oꞌmosoꞌmo Petoloꞌni eleꞌmize molaniꞌ ve. Neꞌmine gamazimuꞌ nene Aposoloꞌ tenisi idoꞌ leveniukisi ne neive. Idoꞌ gozopoꞌ akaꞌmilatiꞌ liꞌmi aniꞌ gamazi ma tiꞌ lo lo neineꞌ ma neive. Petoloꞌ aza Kolidi ebeta vo aꞌmida alevesi monoꞌ gamazi lo-ngimineꞌ. Ne neiha Zuda ve minamave nene Izesuꞌ gamaziꞌve lamineꞌ lo-ngemeꞌmo monelive lo Oꞌmosoꞌmo eleꞌmize molave nene Pauloꞌ minineꞌ ve. Petoloꞌ aza monoꞌ gono vauve elo daniꞌ nene Zuda vetinguꞌ ve. Petoloꞌ aza vani molo mino Loma ebekuko vo neivo aꞌmida Loma vete Pauloꞌni bili hilaniꞌ gamenela nene Petoloꞌnisi lohotoꞌ zaloꞌ bili hilaniꞌ ve li liꞌmi aniꞌ. Idoꞌ bili hililisa navo Petoloꞌ aza Guvelesi ve Izesuꞌni bili hiladiꞌmine gehepeve igi nenikisi nibili hililizadoꞌ lisiheꞌ amuve lo gelo amilite godoꞌne huli galaꞌmuda igi gizeꞌne di veleta igi lohotoꞌ zaloꞌ nilidunuꞌ nibililizave lo lo-ngedavo gili di neꞌmine i-daniꞌ ve laaꞌ aniꞌ. Idoꞌ luhuvo niteꞌ mene gizavo gamene haꞌna ogo vamivo bili hilaniꞌ noloseive. Luhuvo niteꞌ lumola nene Babelonia meuꞌ minineꞌ alu neꞌmo meseꞌ aseka nolo-lingidive lo gizineꞌ. Idoꞌ monoꞌ monovo gili lamineꞌ igaꞌ ave linge mukiꞌ nete tiꞌ li laaꞌ nave: Petoloꞌ aza aꞌmine alumuꞌ gizineꞌ nene eiꞌ minineꞌ ebekuꞌ Izesuꞌ evenele zuho muliseloꞌ lo molo gizineꞌ ve. Idoꞌ Babelonia ebekumuꞌ lineꞌ nene gepeꞌ gamazi Loma ebekumuꞌ lo molo lineꞌ noloseive li laaꞌ nave.
Idoꞌ aꞌmine luhuvo niteꞌ gizineꞌ nene Izesuꞌ evenele zuho Podo polovinisiukisi Galatia polovinisiukisi Kapadokia polovinisiukisi Asia polovinisiukisi idoꞌ Bitinia polovinisiukisi miniꞌmi monangumuꞌ gizineꞌ. Aꞌmine polovinisi mukiꞌ nene kanitili ma idise Teki (Turkey) ve laaꞌ nouninguꞌ minaniꞌ ve. Idoꞌ luhuvo niteꞌ gizingumuꞌ nene nemuꞌ gizuve lo gizamineꞌza aꞌminguꞌ gizineꞌ gamazilotiꞌ nene tiꞌ lo gele none: Aꞌmine luhuvo niteꞌ gize-ngidive nene eveneꞌ malite goboni nimili-ngidave nete gohi amuzo mili goboni mili-ngidilisa nave lo gele mino monokuꞌ mini giliꞌ li minilizangumuꞌ do amuzo molo-ngedelesa gizineꞌ noloseive lo gele none. Neꞌmine lo gelo laza Loma veti gizebo veꞌine naba gulive Neloꞌ aza ngamani gonoꞌ daaꞌ avesi idoꞌ ami pilisi veꞌvesi lo-ngedavo ingine apiꞌ igi Izesuꞌ evenele zuho numudoꞌ namadoꞌ miniꞌmi monaniꞌ nene goboni mili-ngidi minaniꞌ gamene nene olihe alosa neivo nehe idoꞌ mo ogavo nehe neꞌmine gameneuꞌ nene luhuvo niteꞌ mene gizineꞌ noloseive lo gele none. Idoꞌ aꞌmine luhuvo niteꞌ gizinguꞌ nene Petoloꞌ aza Izesuꞌ evenele mene tiꞌ lo lo-ngimineꞌ: Ingine mulumo geni gihi nizaniꞌza nesi nene ngolize izi minilizadoꞌ o neive. Idoꞌ neꞌmino ngolize izilizadoꞌ o neineꞌ nene Oꞌmosoꞌmo noꞌnohoꞌ ize-ledo Okulumokuko initeꞌ lamineꞌ goloso salani molo-lede neingumuꞌ nene ngolize izilizadoꞌ o neineꞌ ve. Izesuꞌ Kilisitoꞌnimuꞌ gili eleꞌvoleꞌ aniꞌ nene do ningelesamuꞌ aꞌmine mulumo geni nene gihilizave lo Oꞌmosoꞌmo gele ngimineꞌ ve. Idoꞌ gili eleꞌvoleꞌ aniꞌ nenako neꞌmo lukuvo nikevo Izesuꞌ gohi tineꞌ molo alineꞌ gameneuꞌ nene Oꞌmosoꞌmo guliveꞌine do hozi loloseive. Monovo golosoꞌmi akaloꞌ minadotiꞌ huli monovo lamineliꞌmi akaloꞌ minilizave lo Kilisitoꞌ aza helo vaniseꞌve dizo minineꞌ lekineꞌ nemuꞌ gili minilizave lo lo-ngimineꞌ. Mo Oꞌmosoꞌmi izipahala gehepeve liliꞌ ikeniꞌ nenako nemuꞌ ingine gonoꞌine nene eiꞌ gulive di oti eveneꞌ li-ngimilizave. Izesuꞌ evenele minamave nete Izesuꞌ evenele zuho nene eveneꞌ goloso nizave laaꞌ naha Izesuꞌ evenele zuho ingine igi mili minilizaniꞌ monovo nene aꞌmine Izesuꞌ evenele minamaniꞌ aleve nete engikumuꞌ nene monovo laminekovoꞌ daaꞌ nave lilizadoꞌ di mili igi mili minilizave. Nemuꞌ ingine gizebo veꞌinelite gamaziꞌine nene gili dalizave. Gizebo veꞌinelite gonouꞌ ve monovo lamineꞌ i ngimamaaꞌ nave nemukisi noluve. Monovo lamineꞌ ilizanguꞌ mulumo geniuꞌ vilizaniꞌ nene Oꞌmosoꞌmo noꞌnohoꞌ ize-ngedeleseive. Nemuꞌ nene Kilisitoꞌ gomuꞌ molo ngemo okineꞌ monovoloꞌ nene eꞌmeti ilizave lineꞌ. Di goloso gehepeve i-danguꞌ nesi Izesuꞌ aza aꞌmida do velepeꞌ izo gamazi lo idoꞌ do goloso o-ngedamaaꞌ ineꞌ. Neꞌmine lo Izesuꞌ evenele zuho nene eleꞌninge vaꞌninge minaniꞌ nete engiꞌ minevoꞌ alevoꞌninguꞌ monovo igi mili minilizangumuꞌ lo-ngimineꞌ. Gohi tiꞌ lo lo gaꞌine ineꞌ: Lingine luꞌine mili hamoꞌ igi ge luka neme ne luꞌne geme idoꞌ ge hongu monovo o neme ne hongu monovo o geme li minilizave. Monovo goloso i-ngidaaꞌ nave nene luꞌine ngimilizave. Monovo lamineꞌ ilizangumuꞌ eveneꞌ nete ma di goloso i-lingidamilizaniꞌza ma neꞌmine ilizaniꞌ nene Oꞌmosoꞌmi noꞌnohoꞌ dalizaze. Nemuꞌ lingine lengehelele izamivo minilo. Lingine gili eleꞌvoleꞌ igi minaaꞌ naniꞌ niteꞌ nene nanitekumuꞌ gili eleꞌvoleꞌ igaꞌ nave li longoꞌ i-lingidilizave nene lutine laminetotiꞌ lingimilizangumuꞌ di vaꞌvaꞌ igivoꞌ minilo lineꞌ. Idoꞌ gohi amuzo molo tiꞌ lo lo-ngimineꞌ: Evenelite mulumo geni lingimilizaniꞌ nene monovo goloso angumuꞌ minamilive. Kilisitoꞌ mulumo geni nogeho gala gelaaꞌ ineꞌ neꞌmini gililizave. Neꞌmine ikevo mulumo geni gihilizaniꞌ neꞌmo lihime monovolotiꞌ do olovoꞌ o-ngede minelive lineꞌ. Idoꞌ gohi tiꞌ lo gaꞌine daniꞌ: Initeꞌ mukiꞌ osuꞌ lilineꞌ gamene nene mo avitoꞌ ogaze. Nemuꞌ Oꞌmosola lii ge hize eleꞌ o-nede ne hize eleꞌ o gede lii idoꞌ Oꞌmosoꞌmo dalizave lo amuzo lengeme neineꞌ gono nene dalo lineꞌ. Asiꞌve nene monoꞌ muliseloꞌ gizebo ve minineꞌ nenako nemuꞌ monoꞌ muliseloꞌ gizebo ve ingine gonoꞌine nene di guni dalizave lo lo-ngidineꞌ. Ingine mukitoꞌ okoꞌine diꞌmi limi minilizave lo lo-ngimineꞌ. Miniꞌmi limi ve maliꞌmi gonouꞌ ve neꞌmini minaatoꞌ mini mili minilizave. Miniꞌmi limi minikevo Oꞌmosoꞌmo geniꞌine hize eleꞌ o-ngedelidoꞌ mini mili minilizave. Oꞌmoso aza engikumuꞌ gelaaꞌ neineꞌ nenako nemuꞌ hize eleꞌ o-ngedeleseive.
Nelotiꞌ gohi ma tiꞌ lo lo-ngimineꞌ: Satani aza doꞌmo leme-lengedelesa nomonize. Nemuꞌ gizebo igi minilo lo gaꞌine daniꞌ. Idoꞌ Izesuꞌ evenele zuho numudoꞌ namadoꞌ minaniꞌ nesi ingine aꞌmine hamoꞌ geni nidaniꞌza gamene haꞌna minamunivo Oꞌmoso aza initeꞌ do lisiheꞌ o-lengedelesa aloseive lineꞌ.
Siluvanoꞌ adoꞌ Aposoloꞌ bukuuꞌ Silasiꞌ ve laaꞌ ave aza aꞌmine luhuvo niteꞌ gizuvonguꞌ nene hize eleꞌ o-nidive lo lo-ngemo idoꞌ Oꞌmosoꞌmo do kegese-mikineꞌ alu Babelonia ebekuꞌ minineꞌ neꞌmo meseꞌ aseka lo-ngidineꞌ nene lo-ngemo idoꞌ Malekoꞌ meseꞌ aseka lo-ngidineꞌ nesi lo-ngimineꞌ. (Monoꞌ monovo gilaaꞌ ave nete gilaniꞌ nene aꞌmine Babelonia ebekuꞌ minineꞌ alu ve lineꞌ nene Izesuꞌ evenele zuho mulise Loma ebekuꞌ minaniꞌ nemuꞌ lo noloseive li gilaniꞌ ve.) Neꞌmine lo luhuvo niteꞌve nene noꞌnohoꞌ gamazitunuꞌ gize osuꞌ lineꞌ.
1
Petoloꞌ Luhuvo Niteꞌ Gizelesa Apiꞌ Ogo Gizaaꞌ Gamazi Gizinguꞌ Noꞌnohoꞌ Gamazi Gize-ngidineꞌ Gamazi
1-2 Izesuꞌ Kilisitoꞌ aposolo minuve Petoloꞌ naza lingine Izesuꞌ Kilisitoꞌ gamaziꞌve gili diivoꞌ minilizangumuꞌ ve losa idoꞌ vaniseꞌve neꞌmo noso ize-lengedo Kilisitoꞌ gelekeleꞌ ve lengeleꞌmize molalingumuꞌ ve losa eiꞌ Oꞌmosoꞌmi Sikalahuꞌve neꞌmo nene do kekeize lo-lengedelive lo Oꞌmosoꞌmo gomukutiꞌ vomine gele minidoꞌ eꞌmeto do kegese-lengede neineꞌ aleve lingine venenga ve neꞌmine gili mini gamene liꞌnibemukovoꞌ Podo misuboukisi Galatia misuboukisi Kapadokia misuboukisi Asia misuboukisi idoꞌ Bitinia misuboukisi miniꞌmi monave lengiꞌ nene luhuvo niteꞌ mene nogize-lingiduve. Oꞌmosolatiꞌ nasahiliꞌ nesi idoꞌ hongu lo lamino minaaꞌ monovo nesi nene lengita mine vaiꞌ loꞌmo vo miniliho.
Oꞌmosoꞌmo Leliꞌ Mulumote Gelo Do Luꞌ Izo Minevoꞌ Alevoꞌ Lamineꞌ Nene Okulumokuko Salani Molo-lede Neineꞌ Nenako Nemuꞌ Nene Lingine Idise Mulumo Geni Ato Atoliꞌmine Gihi Nizangukisi Longolize Naba Izi Minilizave Lo Petoloꞌ Lo-ngimineꞌ Gamazi
3 Idoꞌ Guvetesi ve Izesu Kilisitoꞌ eiꞌ Oꞌmosoꞌve mino eiꞌ meleho minive nene opoꞌni lolone. Opoꞌni loloneꞌ nene adoꞌ Oꞌmosoꞌmo mulumote naba gelosa lemeni dameni nene do gosohoꞌ o-ledo gohi do sotoꞌ o-ledave. Idoꞌ neꞌmine o-lidineꞌ nene laza minevoꞌ alevoꞌ lamineꞌ daloningumuꞌ upuhoꞌ ogo gilingili ogo mino aꞌminemuꞌ gele muꞌmusiꞌ ogo noneꞌ akaloꞌ nene leleꞌmize nomolosa lemeni dameni nene do gosohoꞌ o-ledo gohi do sotoꞌ o-lidineꞌ ve. Idoꞌ neꞌmine o-lidineꞌ nene Izesu Kilisitoꞌ hilingutiꞌ do ote-didiꞌmo nene neꞌmine o-lidineꞌ ve.
4 Ee, idoꞌ neꞌmine ineꞌ nene aza Okulumokuko salani molo-lengede neineꞌ initeꞌ adoꞌ geleso osuꞌ lamaaꞌ idoꞌ golosoꞌvesi minamaaꞌ idoꞌ emeni dameniꞌve gopo amo gosohoꞌ laminekovoꞌ minaaꞌ initeꞌ nene dalizangumuꞌ ve losa lengemeni dameni do gosohoꞌ o-lengedo gohi do sotoꞌ o-lengedave.
5 Idoꞌ lingine aꞌmine salani molo neineꞌ initeꞌ dalizave noluvoniꞌ nene lingine ezemuꞌ gili eleꞌvoleꞌ igi minaaꞌ naniꞌ nemuꞌ nene Oꞌmosoꞌmo do lunguꞌ izelingumuꞌ ve losa eiꞌ amuzoꞌve neꞌmo alete molo-lengede minaaꞌ neingumuꞌ nene noluve. Aza do lunguꞌ izelesa do nene ogo neineꞌ nene gamene nabala do sotoꞌ ogo mudise do lunguꞌ izeleseive.
6 Nemuꞌ nene lingine longolize izilizadoꞌ o neive. Ee, Oꞌmosoꞌmo gelavo idise nene gamene liꞌnibemuꞌ mulumo geni ato atoꞌ ma gihi nilizangukisi nene longolizevoꞌ izi minilizadoꞌ o neive.
7 Idoꞌ aꞌmine mulumo geni gihaaꞌ ilizaniꞌ nene nanitekumuꞌ ve. Lingine Oꞌmosomuꞌ gili eleꞌvoleꞌ igi minaaꞌ naniꞌ nene aza mo gihile lamineꞌ nehe lo neꞌmi monovo do sotoꞌ o-lengedelesa nene lengemenguꞌ nomolave. Idoꞌ evenelite gilavo ngoli neꞌmo initeꞌ mataꞌ mukiꞌ ngivileꞌ ogo initeꞌ lamineꞌ neiha ngoli nene ngoli lamineꞌ nolihe li ningilisa olokuꞌ gizikevo loꞌvotamo ha minaaꞌ neiha alingeꞌ ngoli nesi nene vo osuꞌ loloseive. Lingine Oꞌmosomuꞌ gili eleꞌvoleꞌ igi minaaꞌ nanitine nene gihile lamineꞌ nolineꞌ nene mo ngoli nene ivileꞌ goloso ivosa initeꞌ naba neive. Nemuꞌ nene neꞌmino Oꞌmosoꞌmo lengemenguꞌ molaaꞌ ilidotiꞌ gele eleꞌvoleꞌ ogatine gihile lamineꞌ neineꞌ nene sotoꞌ ogavo Izesu Kilisitoꞌ gohi sotoꞌ o lemelineꞌ gamenela nene aza longopoꞌni lo gulivetine do hozi lo do naba o-lengedelingumuꞌ nene aꞌmine mulumo geni ato atoꞌ nene gihaaꞌ ilisave.
8 Izesu Kilisitoꞌni nene lingine mo ma ningamaniꞌza lutine imi minikeve. Idoꞌ idisesi mene okoꞌnoloꞌ ma ningami nizangukisi nene ezemuꞌ gili eleꞌvoleꞌ i mini lutinguꞌ gulumo avile lisivo longolize izi minaniꞌ nene laza evenelitesi ngelo monovo ma lamolonidoꞌ o minineꞌ longolize adoꞌ Okulumokutiꞌ atoliꞌmine ogo minineꞌ ma ne neive.
9 Idoꞌ neꞌmine igi longolize izi nizaniꞌ nene Kilisitoꞌnimuꞌ gili eleꞌvoleꞌ igi minaniꞌ neꞌmi gihileꞌve nene Oꞌmosoꞌmo lutine lukuvo emelidoꞌ mini mili nizaniꞌ nemuꞌ nene lutinguꞌ gulumo avile lisivosa longolize izi nizave.
10 Oꞌmosoꞌmo leliꞌ lehize-ledelesa gele minineꞌ nasahilikumuꞌ li sotoꞌ ikaꞌ ikaꞌ igaꞌ ave gozopoꞌ minaniꞌ polohete nete nene aꞌmine aꞌme luvoniꞌ gamazi adoꞌ Oꞌmosoꞌmo lukuvo lemelineꞌ nene nado lemelive li neꞌmi monovomuꞌ nene gelelone li viseꞌ ikaꞌ ikaꞌ iꞌmi vi minaniꞌ ve.
11 Ee, Kilisitoꞌ Sikalahuꞌve neꞌmo aꞌmine polohete engikuꞌ omo mino Kilisitoꞌ mulumo geni ato atoꞌ gehelingumukisi lo sotoꞌ ogo idoꞌ neꞌmine ilidotiꞌ Guvelesi ve naba gehepeve loloꞌ ogo minelineꞌ makiloꞌ mine do dizelingumukisi lo sotoꞌ ineꞌ nene aꞌmine polohete nete aꞌmine mulumo geni gehelive zaho nolive li idoꞌ aꞌmine Sikalahuliꞌmo lo sotoꞌ ogo lo-limineꞌ initeꞌ nene nani gameneloꞌ sotoꞌ ilizave li neꞌmi monovo nene viseꞌ ikaꞌ ikaꞌ igaꞌ aniꞌ ve.
12 Viseꞌ ikevo Oꞌmosoꞌmo tiꞌ lo ngelebizineꞌ ve: Ingine Kilisitoꞌ gehelineꞌ initekumuꞌ li sotoꞌ igi gono daniꞌ nene angiseꞌinemuꞌ dami asi lengikumuꞌ daniꞌ nene Oꞌmosoꞌmo ngelebizavo gilaniꞌ ve. Idoꞌ aꞌmine Kilisitoꞌnimuꞌ laniꞌ gamazi nene idise lingine mo gilikeve. Oꞌmosoꞌmo Sikalahuꞌ Okulumokutiꞌ lelita imiselineꞌ neꞌmo do ote-ngedavo Kilisitoꞌnimuꞌ gamazi lamineꞌ li sotoꞌ igi li-lingimave nete nene mo li sotoꞌ igi li-lingimikevo gilikeve. Idoꞌ aꞌmine li-lingimaniꞌ gamazi laminekumuꞌ nene angeloꞌ netesi nene ma ningo geleloinakoo li gili minaaꞌ nave.
Monovo Golosoloꞌ Minevoꞌ Alevoꞌ Igi Minangutiꞌ Nene Kilisitoꞌ Vaniseliꞌmo Do Kuluhize-lingidingumuꞌ Gili Mini Oꞌmoso Monovo Laminekovoꞌ Ogo Minaaꞌ Neineꞌ Neꞌmine Igi Lingine Monovo Laminekovoꞌ Igi Minilo Lo Petoloꞌ Gaꞌine Daniꞌ Gamazi
13 Neꞌmine o neineꞌ nenako nemuꞌ nene lutine gatine nene gono dalidoꞌ di nene i-di mini lingine negi hizami monovotidoꞌ ha gizebo lamineꞌ igi mini Izesu Kilisitoꞌ sotoꞌ o lemelidoꞌ nasahiliꞌ gohi o-ledelingumuꞌ nene mudise gili muꞌmusiꞌ i minisa minilo.
14 Lingine Oꞌmosoꞌmi izipahala mini eiꞌ gamaziꞌve gili dalizadoꞌ o neineꞌ nenaze. Nemuꞌ nene lingine gomuꞌ ezemuꞌ gilami haza minaniꞌ gamenela vomine laniteꞌ gilaaꞌ aniꞌ initeꞌ maloꞌ nene gohi mini milamilo.
15-16 Asi monoꞌ godolouꞌ nene Oꞌmosoꞌmo lineꞌ gamazi tiꞌ li gizi nizaniꞌ ve:
Naza nene monovoꞌne golososi nomineꞌ nouvoniꞌ nenako nemuꞌ nene linginesi monovotine golososi nomineꞌ minilo.
Idoꞌ neꞌmine lineꞌ gizi nizaniꞌ nenako nemuꞌ nene elese molo-lengedo do eita ive Oꞌmoso aza monovo golosoꞌvesi nomivo neineꞌ neꞌmine igi linginesi nene initeꞌ mataꞌ mukiꞌ igi mili ilizanguꞌ nene monovotine golososi nomineꞌ minilo.
17 Idoꞌ lingine meteho ve li Oꞌmosola laaꞌ naniꞌza eveneꞌ mukiꞌ izeꞌ molo-ledaaꞌ ilineꞌ nene gopo eveneꞌ mala ninge lamineꞌ o-ledoo mala ninge goloso o-lede minosa nene izeꞌ molo-ledelineꞌ nevoba asi leliꞌ hamo hamoꞌ nene ogo molo olonidoꞌ olonidoꞌ do molo meni lamineꞌ lemelihe goloso lemelihe ilineꞌ nene mo aꞌmine o noloneꞌ initeꞌ lisiheꞌ o nolidokovoꞌ nene lisiheꞌ ogo golo hizo lemeleseive. Neꞌmine ilineꞌ nenako lingine olihe gotoꞌ numudine Okulumokuko vi minami venenga ve gili me misubouko minilizaniꞌ gameneuꞌ nene ezemuꞌ lengehelele izivosa mini monovo lisiheꞌ laminekovoꞌ igi mili minilo.
18 Idoꞌ neꞌmine igi minilizaniꞌ nene lingine tiꞌ li gili nizaniꞌ nemuꞌ nene neꞌmine igi minilisave. Lingine lengiꞌ avotingidatiꞌ di minaniꞌ dingani monovo igi mili minangutiꞌ nene do eita ogo meni hize-lingidineꞌ nene me misubouꞌ initeꞌ hulupo elelineꞌ siluvaꞌ nehe ngolimoni nehe nevoꞌmine initeꞌ nedunuꞌ nene meni hizineꞌ nevoba
19 asi mo Kilisitoꞌ vaniseꞌve lamineꞌ nedunuꞌ meni hizineꞌ ve. Ee, Kilisitoꞌ aza lihimetemuꞌ belaaꞌ nouneꞌ sipisipi angale okoꞌnoloꞌ initeꞌ goloso hamokisi nomineꞌ neꞌmine loloꞌ ogo neivo biladotiꞌ vaniseꞌve lamineꞌ nedunuꞌ nene meni hizineꞌ ma neive.
20 Ee, Oꞌmosoꞌmo me misubo nene olihe do sotoꞌ amosa gozopoꞌ vomilotiꞌ nene neꞌmine ilingumuꞌ ha mo ningo gele minineꞌza ha minosa alingeꞌ gameneuꞌ mene lengikumuꞌ ve losa do sotoꞌ o-dineꞌ ve.
21 Neꞌmine o-davo aꞌmine Kilisitoꞌ gono dadotiꞌ nene lingine Kilisitoꞌ hilingutiꞌ do ote-do do naba o-dive Oꞌmosomuꞌ nene gili eleꞌvoleꞌ aniꞌ nene Oꞌmosomuꞌ neve nene gili eleꞌvoleꞌ igi ezemuꞌ gili muꞌmusiꞌ igi minaaꞌ nave.
22 Lingine gamazi gihile di minadiꞌmo lutinguꞌ monovo goloso minineꞌ nene di huli lutine di guluviꞌ lisa lingine lengiꞌ zuho Kilisitoꞌ evenele lutine ngimilizaniꞌ nene abeleni ami asi lutine ngimi giliꞌ lilizadoꞌ nene lisiheꞌ i nizaze. Mo lutine laminetotiꞌ nene amuzo mili lutine ge neme ne geme li minilo.
23 Lingine nene lengemeni dameni gosohoꞌ ogavo gohi sotoꞌ aniꞌ ve. Idoꞌ gohi sotoꞌ aniꞌ nene helosa osuꞌ liliveꞌmo zuho molavosa nevoba asi helosa osuꞌ lamaaꞌ neiveꞌmo zuho molavosa gohi sotoꞌ aniꞌ ma neive. Ee, minevoꞌ minevoꞌ ogo mino minevoꞌ minevoꞌ ogaliꞌmi monovo do sotoꞌ o-ledaaꞌ neineꞌ initeꞌ Oꞌmosoꞌmi gamazi neꞌmo lengiꞌ lutinguꞌ gono dadotiꞌ nene lengemeni dameni do gosohoꞌ ogavo gohi sotoꞌ aniꞌ ma neive.
24 Idoꞌ mene noluvoniꞌ gamazi nene monoꞌ godolouꞌ tiꞌ li gizi nizaniꞌ gamaziloꞌ vo miliseꞌ o neivosa nene noluve:
Eveneꞌ mukiꞌ leliꞌ nene guvise navise neꞌmine nene none.
Idoꞌ leliꞌ do sotoꞌ ogaꞌ nouneꞌ initeꞌ lamineꞌ tamineꞌ ato atoꞌ mukiꞌ nene
ha aꞌmine guvise naviseliꞌmi guvovo neꞌmine nene neive.
Guvise nene gaꞌnuvo elo osuꞌ lavosa
guvovoꞌve nene suludoꞌmozaaꞌ neive.
25 Neꞌmine ogaꞌ neiha Guvelesi veꞌmi gamazi nene mo eleꞌvoleꞌ ogo
minevoꞌ minevoꞌ ogovoꞌ mineleseive.
Idoꞌ aꞌmine Guvelesi veꞌmi gamazi nene adoꞌ aꞌmine li soto sotoꞌ igi li-lingimaniꞌ gamazi lamineꞌ nene neive.