11
Isilaeleꞌ Aleve Engikutiꞌ Mukiꞌ Gidini Nene Kilisitoꞌnimuꞌ Gili Eleꞌvoleꞌ Amaniꞌza Oꞌmosoꞌmo Aꞌmine Isilaeleꞌ Aleve Mukiꞌ Mudise Vasa Ize-ngedamo Engikutiꞌ Linge nGomo Nene Do Kegese-ngidineꞌ Ve Lo Pauloꞌ Lineꞌ Gamazi
Isilaeleꞌ aleve ingine neꞌmine igi minaniꞌ nenako naza tiꞌ lo gelo longoꞌ nouve: Oꞌmosoꞌmo aꞌmine evenele zuho mo mudise vasa ize-ngede neineꞌ nolihe. Oꞌove. Mo kekeꞌ neꞌmine amilihe losa gele nouve. Naza mudise vasa ize-ngedamive noluvoniꞌ nene nenikisi aꞌmine Isilaeleꞌ aleveutiꞌ nouvoniꞌ nenako nemuꞌ noluve. Ee, naza Abalahamuꞌ aꞌvo mino Zakoboꞌ gipele Benizaminiꞌ aꞌvopilemoꞌ zuhoutiꞌ gehepeve ne nouve. Oꞌmosoꞌmo gomukutiꞌ ninge lamineꞌ do eze zuho loloꞌ o-ngede neineꞌ aleveꞌve nene mo kekeꞌ mudise vasa ize-ngedamive. Oꞌove. Idoꞌ nemuꞌ nene lingine Eliaꞌ gamaziꞌve monoꞌ godolouꞌ neineꞌ ma nene gilamaniꞌ nehe. Isilaeleꞌ alevemuꞌ nene tiꞌ lo Oꞌmosola lipoti molaniꞌ ve: Guvekasi ve, geiꞌ vekautiꞌ gamazi laaꞌ ave polohete vaiꞌ nene ngibili geseꞌ igi gopoꞌni lo initeꞌ molo-gedaaꞌ uneꞌ holomo mukiꞌ nesi neve nene izi nguꞌvosi hulikevo geita mili geꞌmetaaꞌ ave nene gohi masi nizamavo nenikovoꞌ nene lumo nouvo nenikisi nibililisamuꞌ nene viseꞌ iꞌmi nimonave. Neꞌmine lineꞌza aꞌmidoꞌ Oꞌmosoꞌmo lo-imineꞌ gamazi mene gililo:
Oꞌove. Gaza nene geikovoꞌ gehepeve nene lumo minamane. Vemohoꞌ seveni tauseni (7,000) neꞌmine nene soza oꞌmoso initeꞌ Baaliꞌni nene gubiꞌ izi imi opoꞌni lisaꞌmave neniꞌ eveneꞌne gehepeve nene nenikumuꞌ ve lo lumo ha hulo-ngede nouve.
Neꞌmine lineꞌ nenako aꞌmineꞌmine ogo idisesi nene eveneꞌ ngomosiꞌ nene haza gidini inele ogosa eiꞌ ve lo do kegese-ngedavo nizave. Eiꞌ ve lo do kegese-ngidineꞌ nene inele ogaꞌ neꞌmine ogo haza gidini do kegese-ngidineꞌ nenako neꞌmine o-ngidineꞌ nene gono ma dikevosa neꞌmine o-ngidineꞌ nene nomive. Asi gono ma dikevosa neꞌmine o-ngidineꞌ neidiniko inele haza gidini ogo do eita o-ngidineꞌ ma nene inele neꞌmine ineꞌ gelamidine. Nemuꞌ nene laza nadive lolone. Tiꞌ lo lolosune: Isilaeleꞌ aleve Oꞌmosolatiꞌ viseꞌ aniꞌ initeꞌ nene adoꞌ ve lisiheꞌ ve lo-ngedelineꞌ mukilite ma damavo Oꞌmosoꞌmo do kegese-ngidive netevoꞌ nene dikevosa linge ma nene aꞌmanapa igisa damaniꞌ ve. Neꞌmino sotoꞌ ineꞌ initeꞌ nene monoꞌ godolouꞌ tiꞌ li gizadoꞌ nene sotoꞌ neive:
Oꞌmosoꞌmo luꞌine nene do negi hize-ngedavo
veꞌinedunuꞌ nene initeꞌ ma ningami
gaꞌinedunuꞌ nene gamazi ma gilami mini
idisesi neꞌminivoꞌ igi nizave.
Idoꞌ Davidiꞌ nene tiꞌ lo lineꞌ ve:
Idoꞌ laniteꞌ gilaniꞌ initeꞌ neꞌmo nene
gelevuso neꞌmine gehepeve loloꞌ ogo ngebelavosa
lihime dalizaho.
10 Ee, veꞌine nene do gopo o-ngedavo initekisi ma ningamilizaho.
Idoꞌ geni initeliꞌmo gamene gamene meheꞌine nene
do hilingize-ngede miniliho.
Isilaeleꞌ Aleve Ingine Aka Laminetotiꞌ Zovoꞌ Izi Vaniꞌ Neꞌmo Nene Oꞌmosoꞌmo Heta Atoꞌ Ve Do nGuꞌ Izelineꞌ Aka Nene Velave Lo Pauloꞌ Lineꞌ Gamazi
11 Nemuꞌ nene naza tiꞌ lo gohi longoꞌ nouve: Isilaeleꞌ aleve ingine ladani igisa mo mudise limi pouꞌ li inganiꞌ nehe. Oꞌove. Mo kekeꞌ neꞌmine amaniꞌza asi ingine aka laminetotiꞌ nene zovoꞌ izi vaniꞌ neꞌmo nene Oꞌmosoꞌmo heta atoꞌ ve do nguꞌ izelineꞌ aka nene velave. Idoꞌ neꞌmine aka vele-ngidineꞌ nene aꞌmine Zuda ve ningi lezesi neꞌmine o-ledeliho lilizave losa vele-ngidineꞌ ve. 12 Idoꞌ ingine aka laminetotiꞌ nene zovoꞌ izi vi gopo aniꞌ neꞌmo nene Oꞌmosoꞌmo heta atoꞌ ve vaiꞌ nene do lamineꞌ o-ngedelidoꞌ ngeleꞌmize molo initeꞌ lamineꞌ gehepeve do sotoꞌ ineꞌ nenako Zuda ve ingine nene alingeꞌ mudise aka laminetoꞌ tineꞌ mili alizaniꞌ neꞌmo nene mo ivileꞌ ivosa initeꞌ lamineꞌ goloso do sotoꞌ oloseive.
13 Idoꞌ heta atoꞌ ve lengikumuꞌ nene tiꞌ lo noluve: Naza nene heta atoꞌ ve lengiꞌ aposolo nouvoniꞌ nenako nemuꞌ nene naza heta atoꞌ ve lengita gono daaꞌ nouvongumuꞌ nene do naba ogaꞌ nouve. 14 Idoꞌ lengita neꞌmino aposolo gono daaꞌ nouvongumuꞌ do naba nouvoniꞌ nene neze zuho Isilaeleꞌ aleve nene ningi ingine heta atoꞌ ve neꞌmine gono do-ngidineꞌ nene leliꞌ do-ledelinako li minikevo engikutiꞌ linge ma nene Oꞌmosoꞌmo do nguꞌ izelineꞌ akaloꞌ ngeleꞌmize molaloho lo aꞌmine gonoꞌnemuꞌ nene do naba ogaꞌ nouve. 15 Idoꞌ engiꞌ nene Oꞌmosoꞌmo do nguꞌ izelineꞌ akaloꞌ ngeleꞌmize molaloho lo noluvoniꞌ nene tiꞌ lo gelosa noluve: Oꞌmosoꞌmo vasa ize-ngidineꞌ neꞌmo nene misubouꞌ aleve linge lovo i imi minangutiꞌ nene gohi eiꞌ Oꞌmososi do hamoꞌ o-ngidineꞌ nenako nemuꞌ nene aꞌmine Isilaeleꞌ aleve nene gohi do gatulo o-ngedelineꞌ neꞌmo nene atoliꞌmine ogo initeꞌ lamineꞌ goloso do sotoꞌ o-ledavo mo helaaꞌ neꞌmine ogo noningutiꞌ nene gohi oto minevoꞌ dovoꞌ ogo noneꞌ geleleseive. 16 Idoꞌ Isilaeleꞌ alevemuꞌ nene aneza gamazi tiꞌ lo lo-lengemelesuve: Beleti loloꞌ ogosa gomuꞌ nene aꞌmidotiꞌ linge ngomo ma do Oꞌmoso emekunivo Oꞌmosoꞌmi initeꞌ loloꞌ ilineꞌ nene aꞌmine beleti linge naba nesi nene Oꞌmosoꞌmi initeꞌ loloꞌ oloseive. Idoꞌ zaliꞌmi luhive neꞌmo Oꞌmosoꞌmi initeꞌ ma minelineꞌ nene aꞌmine zaliꞌmi aꞌnava nesi nene Oꞌmosoꞌmi initeꞌ mineleseive.
17 Idoꞌ Isilaeleꞌ aleve ingine Oꞌmosoꞌmi oliva za neꞌmine minaniꞌ nene Oꞌmosoꞌmo aꞌmine zaꞌmi aꞌnava linge nene huko hulosa oliva za hadenelotiꞌ aꞌnava ma nene do eiꞌ oliva zaꞌveloꞌ nene do giꞌmizineꞌ nenako Isilaeleꞌ aleveti avoꞌningidatiꞌ sotoꞌ ineꞌ monoꞌ lamineꞌ nene lingine heta atoꞌ vesi nene makatoꞌ di nizaze. 18 Lingine nene Oꞌmosoꞌmo oliva zaꞌvelotiꞌ aꞌnavaꞌve linge ma huko hulineꞌ mamuꞌ nene ningedoꞌ hangedoka li-ngidi lengiꞌ okodine di dizamilo. Lingine nete nene aꞌmine zaliꞌmi luhiveꞌve nene di ngi li-ngidisaꞌmave. Asi eiꞌ aꞌmine za neꞌmi luhive nete lengiꞌ nene di ngi li-lingidaaꞌ naaniꞌ nenaze. Okodine nene di dizamilo. 19 Idoꞌ aꞌminemuꞌ nene lingine tiꞌ li lilisave: Idoꞌ nadiive. Leliꞌ nene Oꞌmosoꞌmi oliva zaꞌveloꞌ nene do giꞌmize-ledelesa eiꞌ aꞌnavaꞌve nene huko hulo do giꞌmize-ledave. 20-21 Ehe, mo laminetoꞌ nilaniꞌza engiꞌ huko hulo-ngidineꞌ nene ingine ezemuꞌ gili eleꞌvoleꞌ amavosa huko hulo-ngidineꞌ ve. Idoꞌ lingine eiꞌ zaꞌveloꞌ do giꞌmize-lengedavo nizaniꞌ nene lengiꞌ gili eleꞌvoleꞌ i minangumuꞌ nene eiꞌ zaꞌveloꞌ nene do giꞌmize-lengedavosa nizave. Nemuꞌ nene lengikumuꞌ gilavo dizalize. Oꞌmosoꞌmo aꞌmine zaꞌveꞌmi aꞌnavaꞌve gehepeve nene iseꞌine izamineꞌ nenako lengikisi nene isetine izamoloseize. Golisesi nene ha gili minilizaniꞌ o neive. 22 Idoꞌ Oꞌmosoꞌmo neꞌmine ogaꞌ neidotiꞌ nene helala nasahiliꞌ lamineꞌ ogaꞌ neineꞌ nene ningo idoꞌ helala amuzo molo lihime ngemaaꞌ neineꞌ nene ningo gelelesune. Ee, monokutiꞌ limi ingave nene amuzo molo lihime ngemosa lengiꞌ nene nasahiliꞌ o-lengedo neive. Idoꞌ aza nasahiliꞌ o-lengedelidoꞌ lisiheꞌ i minilizangumuꞌ nene mo nasahiliꞌ o-lengedeleseiha neꞌmine ma ami minilizaniꞌ nene linginesi zaꞌvelotiꞌ nene huko hulalize. Ningiisa minilo. 23 Idoꞌ aꞌmine zaꞌvelotiꞌ aꞌnava huko hulineꞌ neꞌminisa minaniꞌ Isilaeleꞌ aleve ingine gili eleꞌvoleꞌ ami minadotiꞌ nene huli gili eleꞌvoleꞌ ma ilizaniꞌ nene Oꞌmosoꞌmo gohi zaꞌvela do giꞌmize-ngedaaꞌ amuzo nene ha do neinako gohi ha do giꞌmize-ngedeleseive. 24 Idoꞌ neꞌmino gohi do giꞌmize-ngedelineꞌ amuzo do neineꞌ nene nadosa ningo gelelone. Aza nene amosoꞌ initeꞌ gehepeve ogo heta atoꞌ ve lingine nene oliva za hadenelotiꞌ aꞌnava neꞌmine minave nene eiꞌ oliva zaꞌve laminekuꞌ nene do giꞌmize-lingidineꞌ nenako nemuꞌ nene eiꞌ zaꞌvelotiꞌ gehepeve minaniꞌ aleve Zuda ve nene ha lapa nomineꞌ initeꞌ ogo gohi aꞌmine zaꞌveloꞌ nene ha do giꞌmize-ngedeleseive lo ningo gelelesune.
Oꞌmosoꞌmo Isilaeleꞌ Aleve Aꞌmanapa Igi Minangutiꞌ Gohi Do Eita Ogo Do nGuꞌ Izelineꞌ Nenako Neꞌminosa Eveneꞌ Ato Atoꞌ Mukiꞌ Nene Isete Ize-ledeleseive Lo Pauloꞌ Lineꞌ Gamazi
25 Neze zuhokizo, mene loloniꞌ gamazi nene gilami minilizaniꞌ neꞌmo lingine laza otohato ve nene none lisa okodine di dizi minikelizave losa sunoꞌ gamazi mene lo-lengemelouze. Gililo: Isilaeleꞌ aleve linge nene aꞌmanapa igi Kilisitoꞌnimuꞌ gili eleꞌvoleꞌ amaniꞌza neve nene mudise nomive. Asi heta atoꞌ ve ingine Oꞌmosoꞌmo gele neineꞌ votigileloꞌ Oꞌmosola imi hilalizaniꞌ 26 nelotiꞌ nene monoꞌ godolouꞌ tiꞌ li gizi nizadoꞌ nene eꞌmeto Isilaeleꞌ aleve mukiꞌ nene do nguꞌ izeleseive:
Isilaeleꞌ aleveti gotoꞌ numuꞌine Zaioni gololotiꞌ nene
do nguꞌ izelive ma sotoꞌ oloseive.
Sotoꞌ ogosa aza monoꞌ gelamaaꞌ monovo
Zakoboꞌ aꞌvopilemoꞌ zuho Isilaeleꞌ alevetinguꞌ minineꞌ nene
do huloloseive.
27 Naza gamazi meve nene ma nolo huko-ngiduve.
Engiꞌ lihime do hulo-ngedeloniꞌ gamene nene ma gihile izo sotoꞌ oloseive.
28 Izesuꞌnimuꞌ gamazi lamineꞌ nene gili hulisa Isilaeleꞌ aleve nene Oꞌmosoꞌmi biluvaꞌve liliꞌ aniꞌ ve. Neꞌmo nene heta atoꞌ ve lingine Oꞌmosoꞌmo do lunguꞌ izelineꞌ akaloꞌ lengeleꞌmize molave. Ne neiha ganakutiꞌ nene Oꞌmosoꞌmo eiꞌ ve lo do kegese-ngidineꞌ nenako nemuꞌ nene engiꞌ avoꞌninginemuꞌ gele minosasi nene lulo ha ngeme neive. 29 Idoꞌ lulo ha ngeme neive noluvoniꞌ nene adoꞌ Oꞌmosoꞌmo eveneꞌ ma elese molo-ngedo do eita ogo initeꞌ ma ngeme nolineꞌ nene aꞌminemuꞌ gamazi gohi senisi ogo oꞌve aꞌva losaꞌmineꞌ nenako nemuꞌ nene luve. 30 Ee, gomuꞌ nene heta atoꞌ ve lingine Oꞌmosoloꞌ gelekeleꞌ ami minaniꞌza Isilaeleꞌ aleve ingine nene idise Oꞌmosoloꞌ gelekeleꞌ amavo neꞌmo nene Oꞌmosoꞌmo lengiꞌ heta atoꞌ ve nene isetine izo do eita ogave. 31 Aꞌmineꞌmine ogo Oꞌmosoꞌmo lengiꞌ isetine izo do eita ineꞌ neꞌmo nene Isilaeleꞌ aleve idise Oꞌmosoloꞌ gelekeleꞌ amave. Idoꞌ neꞌmine monovo sotoꞌ ineꞌ nene Oꞌmosoꞌmo engiꞌ Isilaeleꞌ aleve nene iseꞌine izelingumukisi ve losa neꞌmino sotoꞌ ineꞌ ve. 32 Ee, Oꞌmosoꞌmo eveneꞌ ato atoꞌ mukiꞌ nene iseꞌine izelidoꞌ lisiheꞌ i minilizangumuꞌ ve lo eveneꞌ mukiꞌ nene ezeloꞌ gelekeleꞌ amaaꞌ monovoꞌmi gesi minguꞌ nene hulo-ngidineꞌ ve.
Oꞌmoso Nene Atoliꞌmine Ogo Miningumuꞌ Pauloꞌ Do Naba O-do Opoꞌni Lineꞌ Gamazi
33 Aizoo, Oꞌmosote nene atoliꞌmine ogo minive neive. Adoꞌ gamazi gele neineꞌ nene atoliꞌmine ogo gele mino otohato ogaꞌ neineꞌ nesi nene vosoꞌ vamosoꞌ vaaꞌ neive. Idoꞌ lo hukaaꞌ neineꞌ gamaziꞌmi monovo nene eveneꞌ malitesi ngelo lo ngoloꞌ lo osuꞌ lamolosune. Idoꞌ eze gono dalosa gala gelaaꞌ neineꞌ nemuꞌ nene ve malitesi ngelo gelamolosune. 34 Monoꞌ godolouꞌ tiꞌ li gizi nizaniꞌ nenako mo laminetoꞌ noluve:
Oꞌmosoꞌmo gelaaꞌ neineꞌ maduno nene
eveneꞌ hamolitesi ngelo ma gelamolosune.
Idoꞌ eveneꞌ hamolitesi nene
ogo molo ilineꞌ monovomuꞌ ngelo ma apize emamolosune.
35 Idoꞌ eveneꞌ hamolitesi nene
Oꞌmosoꞌmo alingeꞌ do tibizo lemelive lo
dinaꞌ ogo initeꞌ nene ngelo ma emamolosune.
36 Nanitekumuꞌ ve. Initeꞌ mukiꞌ nene eitokovoꞌ gelekeleꞌ i-dilizave losa asiꞌvevoꞌ initeꞌ mukiꞌ do sotoꞌ ogavo mo eitokovoꞌ lehete i minaaꞌ nave. Nemuꞌ nene Oꞌmoso opoꞌni lo mineloneꞌ nene huko vamivo ha miniliho.