14
Lengiꞌ Zuho Malite Monokumuꞌ Gaꞌine Atoꞌ Gilangumuꞌ Nene Engiꞌ Monovoꞌnidoꞌ Izeꞌ Mili Lisa Gili Goloso Amilo Lo Pauloꞌ Lineꞌ Gamazi
1 Idoꞌ monokuꞌ gilizevo igi minave ma lengita ikevo ma nene ha ngeleꞌmizi milalo. Idoꞌ ngeleꞌmizi milalizaniꞌ nene ingine lingine gatine giladoꞌ vo lisiheꞌ amilineꞌ gaꞌine gili nilizangumuꞌ nene lesisi igi gamazidunuꞌ ge hulo ne hulo lilisamuꞌ nene ngeleꞌmizi milamilo.
2 Nene adoꞌ neꞌminemuꞌ noluve. Eveneꞌ malite gilavo initeꞌ ato atoꞌ mukiꞌ naaꞌ nene ha neive. Ne neiha eveneꞌ linge ma monokuꞌ gilizevo igi mini ize malise igi minguꞌ initekovoꞌ naaꞌ nave.
3 Nosoꞌ niteꞌ ato atoꞌ mukiꞌ naaꞌ nave nete nosoꞌ niteꞌ ma malise igaꞌ navemuꞌ nene gilavo haza niteꞌ ve li gilikelizave. Idoꞌ Oꞌmoso neꞌmo nene nosoꞌ niteꞌ mukiꞌ gopo naaꞌ avesi nene mo eiꞌ ve lo ngeleꞌmize molaniꞌ nenako nemuꞌ nene nosoꞌ niteꞌ malise igaꞌ ave nete nosoꞌ niteꞌ mukiꞌ gopo naaꞌ aveti monovomuꞌ nene izeꞌ mili lamilizadoꞌ o neive.
4 Lingine gilavo eveneꞌ atoꞌ neꞌmi gelekeleꞌ izipeꞌveti monovomuꞌ izeꞌ molo laaꞌ nene lisiheꞌ o neivosa nahe. Oꞌove. Neꞌmino nomive. Engiꞌ monovoꞌinemuꞌ lilive nene engiꞌ meꞌniboꞌmovoꞌ nene izeꞌ molo loloseive. Idoꞌ meꞌnibo Oꞌmosoꞌmo gelavo monovoꞌine lamineꞌ neinako ha oti minilisave lilihe idoꞌ monovoꞌine goloso neinako diꞌmozilisave lilihe nene mo eitokovoꞌ neive. Idoꞌ eiꞌ Oꞌmosoꞌmo do ote-ngedelidoꞌ lisiheꞌ o neinako ingine mo oti minilisave.
5 Idoꞌ gamene hamo hamokumuꞌ giluneꞌ nene eveneꞌ linge ma nete gilavo gamene nene dizi limi minaaꞌ naha eveneꞌ linge ma nete gilavo gamene mukiꞌ nene dizi limi minami mo hamoliꞌminevoꞌ minaaꞌ nave. Lingine eveneꞌ malite gilangumuꞌ izeꞌ mili lami hamo hamoꞌ aꞌmine gamenemuꞌ gilavo lisiheꞌ ilineꞌ akamuꞌ nene gili eleꞌvoleꞌ igi aꞌmidoꞌ eꞌmeti minilo.
6 Eveneꞌ ma ingine gamene mamuꞌ nene gamene naba ve li gilaaꞌ naniꞌ nene Guvelesi vemuꞌ gili neꞌmine igaꞌ nave. Idoꞌ eveneꞌ ma nosoꞌ niteꞌ ato atoꞌ mukiꞌ naaꞌ naniꞌ nene aꞌmine nosoꞌ nitekumuꞌ nene Oꞌmoso tangezoꞌ ve li opoꞌni li-daaꞌ naniꞌ nenako neve nene mo Guvelesi vemuꞌ gili minisa naaꞌ nave. Idoꞌ eveneꞌ ma ingine nosoꞌ niteꞌ ma malise igaꞌ nave ingine Guvelesi vemuꞌ gili malise igi inginesi Oꞌmoso tangezoꞌ ve li opoꞌni li-daaꞌ nave.
7-8 Idoꞌ neꞌmine noluvoniꞌ nene nemuꞌ noluve: Laza minevoꞌ alevoꞌ oloneꞌ nene Guvelesi vemuꞌ minevoꞌ alevoꞌ olosune. Idoꞌ heleloneꞌ nesi nene Guvelesi vemuꞌ helelesune. Nemuꞌ nene laza minevoꞌ alevoꞌ oloneꞌ nene eveneꞌ hamolitesi lelikumukovoꞌ nene ma minevoꞌ alevoꞌ osaꞌmune. Idoꞌ heleloneꞌ nene hamolitesi lelikumukovoꞌ nene ma helesaꞌmune. Nemuꞌ nene minevoꞌ alevoꞌ ogo minelobe idoꞌ helelobe nene Guvelesi veꞌmi evenelevoꞌ nene minelesune.
9 Nemuꞌ nene Kilisitoꞌ aza eveneꞌ veꞌinesi ha nizaveti Guveꞌinesi ve mino hili nizaveti Guveꞌinesi ve nesi nene minelongumuꞌ ve losa hilineꞌ ve. Idoꞌ nemukisi nene oto minevoꞌ minevoꞌ ogo neive.
10 Idoꞌ laza mukitoꞌ Oꞌmosoꞌmo goniꞌ o-ledelidoꞌ eze veleloꞌ vo otekunivo mukitoꞌ nene eiꞌ izeꞌ molo-ledelineꞌ o neinako lingine linge ma lengiꞌ zuholiti monovoꞌinemuꞌ izeꞌ mili laaꞌ naniꞌ nene nanimuꞌ nave. Idoꞌ linge ma nete lengiꞌ zuho mamuꞌ gilavo lemo haza niteꞌ loloꞌ ogaꞌ neineꞌ nene nanimuꞌ nave.
11 Idoꞌ Oꞌmosoꞌmo goniꞌ o-ledelidoꞌ nene ha volosune noluvoniꞌ nene monoꞌ godolouꞌ gamazi ma tiꞌ li gizi nizaniꞌ neineꞌ nenako nemuꞌ nene noluve:
Guvelesi veꞌmo tiꞌ lo nolive:
Naza nouvoniꞌ nene soza nomive. Mo gamazi gihile laminetoꞌ neive.
Idoꞌ aꞌmineꞌmine ogo
naza eveneꞌ hamo hamoꞌ mukiꞌ lingine obuvotine hizi neniꞌ gubiꞌ izi nimi
Gaza Oꞌmoso gihile nane li li sotoꞌ ilisave lo noluvoniꞌ nene
gamazi gihile laminekovoꞌ noluve.
12 Nemuꞌ nene laza eveneꞌ hamo hamoꞌ mukiꞌ leliꞌ ogo molo minuneꞌ monovote nene lo sotoꞌ ogo lo-emelesune.
Leliꞌ Ogo Molo Noneꞌ Initetoꞌ Eꞌmeti Leze Zuho Malite Goloso Ve Li Gilaniꞌ Initeꞌ Disa Lihime Dikelizave. Leliꞌ Monovoteloꞌ Gizebo Lamineꞌ Olosune Lo Pauloꞌ Lineꞌ Gamazi
13 Nemuꞌ nene laza ge izeꞌ molo-nede ne izeꞌ molo-gede lo minaaꞌ monovo nene hulo gohi amolone. Asi lingine tiꞌ li gili minilo. Leze zuho ma nene limi ingikelizaze. Laza ngeleꞌmize goloso ogaꞌ monovo nene amolone.
14 Naza Guvetesi ve Izesuda giꞌmize nouvonako neꞌmo nene tiꞌ lo gele eleꞌvoleꞌ gehepeve o nouve: Nosoꞌ niteꞌ leliꞌ lute do goloso o-ledaaꞌ emeni damenisi minineꞌ nosoꞌ niteꞌ ma nomive. Ne neiha eveneꞌ malite initeꞌ mamuꞌ nene lute do goloso ogaꞌ initeꞌ ve li gililizaniꞌ nene aꞌmine initeꞌ neve nene engiꞌ luꞌine do goloso ogaꞌ initeꞌ loloꞌ oloseive.
15 Ne neiha lingine lengiꞌ zuho malite nosoꞌ niteꞌ mamuꞌ nene lute do goloso ogaꞌ initeꞌ ve li gili nizaniꞌ nosoꞌ niteꞌ ma gopo naaꞌ ilizadiꞌmo nene aꞌmine lingine zuho di goloso i-ngidilizaniꞌ nene mo lutine ngemaaꞌ monovoloꞌ eꞌmetami minilisanako nemuꞌ nene lingine neꞌmine ogo leze zuho ngeleꞌmize goloso ogaꞌ monovo ma amolone li gili minisa nosoꞌ niteꞌ nalizadotiꞌ nene Kilisitoꞌ engitoꞌ hilive nene vi tolovo ilizaniꞌ akaloꞌ ngeleꞌmizi milamilo.
16-17 Nosoꞌ niteꞌ ma nalobe idoꞌ malise ogo minelobe neꞌmo nene Oꞌmosoꞌmo gizebo o neineꞌ akauꞌ nene initeꞌ naba nomive. Asi Oꞌmosoꞌmi Sikalahuꞌ neꞌmo nene do sotoꞌ o-ledaaꞌ monovo adoꞌ monovo lisiheꞌ laminekovoꞌ ogo molo minaaꞌ nesi idoꞌ muludeuꞌ hongu lo lamino minaaꞌ nesi idoꞌ luteuꞌ gulumo avile lisivo minaaꞌ monovo nesi nene initeꞌ naba neineꞌ nenako nemuꞌ nene lingine monovo lamineꞌ nehe li nosoꞌ niteꞌ ha gopo nikevo lengemenga likelizaze. Alamilo.
18 Neꞌmine igi Kilisitoda gelekeleꞌ i-di minilizave ingine nene Oꞌmosoꞌmo mulunouꞌ lamineꞌ gelelineꞌ initeꞌ igi mili mini eveneꞌ nesi ningavo lisiheꞌ ilineꞌ monovoloꞌ nene eꞌmeti minilisave.
19 Nemuꞌ nene lingine lengikuꞌ hongu li bizi lamini miniliza monovolokisi idoꞌ monokuꞌ ne hize eleꞌ o-gede ge hize eleꞌ o-nede li minilizadoꞌ lisiheꞌ o neineꞌ monovo ato atokisi nene amuzo mili eꞌmeti minilo.
20 Nosoꞌ niteꞌ ha gopo nalizaniꞌ neꞌmo nene lingine Oꞌmosoꞌmi gono di goloso amilo. Nosoꞌ niteꞌ ato atoꞌ mukiꞌ nene lute do goloso amaaꞌ neiha ha gopo nokunivo neꞌmo nene eveneꞌ linge ma monokutiꞌ limi ingalizaniꞌ nene monovo goloso olosune.
21 Nemuꞌ nene ize meꞌmele nehe vaini noso nehe initeꞌ ma nehe nene lingine nalizadiꞌmo lengiꞌ zuho linge ma monoꞌ akalotiꞌ nene vi zovoꞌ izilizaniꞌ nene lingine aꞌneꞌmine initeꞌ malise ilizaniꞌ nene lamineꞌ o neive.
22 Idoꞌ aꞌneꞌmine initekumuꞌ nene lingine hamo hamoꞌ gilaniꞌ nene lengikisi Oꞌmosolokisivoꞌ neivo lengiꞌ hamo hamokovoꞌ gili minilo. Eveneꞌ ma nete monovo mamuꞌ nene neꞌmine ogaꞌ ha neive li gilangumuꞌ nene engiꞌ luꞌineꞌmo goloso ve lo goniꞌ o-ngedamilineꞌ nene engiꞌ minevoꞌ alevoꞌine lamineꞌ neivo ngolize izilizadoꞌ lisiheꞌ o neive.
23 Eveneꞌ ma initeꞌ mamuꞌ nene naloneꞌ lute do goloso ilihe li gaꞌine setaꞌ gili minisasi aꞌmine initeꞌ gopo nalizaniꞌ nene mo Oꞌmosoꞌmo lihime molo-ngedeleseive. Nene nanitekumuꞌ ve. Laza initeꞌ mamuꞌ nene monovo lisiheꞌ ve lo gele eleꞌvoleꞌ amosasi ha gopo oloneꞌ nene monovo goloso uneꞌ gelavo lihime daloneꞌ nenako idoꞌ ingine aꞌmine initeꞌ naaꞌ nene lisiheꞌ o neive li gili eleꞌvoleꞌ amisa nalizaniꞌ o neinako nemuꞌ nene Oꞌmosoꞌmo lihime molo-ngedeleseive.