4
Gomuꞌ Abalahamuꞌni Oꞌmosoꞌmo Ve Lisiheꞌ Ve Lo-dineꞌ Monovoꞌve Maloꞌ Nene Ningo Geleloningumuꞌ Pauloꞌ Lineꞌ Gamazi
1 Nemuꞌ nene laza leliꞌ Zuda veti zuho do sotoꞌ ive avoteho Abalahamuꞌnida sotoꞌ ineꞌ initeꞌ mamuꞌ nene laza aꞌmidoꞌ do molosa lo gele ha gele ogo gelelone.
2 Abalahamuꞌ nene aza monovo laminekovoꞌ ogo molo minidotiꞌ Oꞌmosoꞌmo ve lisiheꞌ ve lo-didiniko aza nene eiꞌ okoꞌno do dizelidoꞌ lisiheꞌ o minidineꞌza Oꞌmosoꞌmi veleloꞌ nene aza neꞌmino ma minamidine.
3 Aꞌminemuꞌ nene monoꞌ godolouꞌ nene nadive li gizi nizaniꞌ neve. Mene gililo:
Abalahamuꞌ aza Oꞌmosomuꞌ gele eleꞌvoleꞌ o minavo
aza nene ve lisiheꞌ ve lo-dineꞌ ve.
4 Ve maliꞌmo ve maloꞌ gono davo aꞌmine ve meni emelineꞌ nene haza gidini noimuve lo gelosa emelivoba asi nenitoꞌ gono nodavo dinaꞌ neineꞌ nene golo nohizuve lo gele minosa meni nene emeleseive.
5 Idoꞌ aꞌmineꞌmine ogo laza ogo molo oloneꞌ neꞌmo Oꞌmosoloꞌ gono noduneꞌ gilivo mino monovo lamineꞌ gehepevelokovoꞌ eꞌmetunidiniko Oꞌmosoꞌmo aꞌmidoꞌ golo hizo meni neꞌmine lemo ve lisiheꞌ ve lo-lididineꞌza mo neꞌmino nomive. Nemuꞌ nene ve ma laza aꞌmine ogo molo oloneꞌ initetotiꞌ nene menite neꞌmine ve lisiheꞌ ve lo-ledelidoꞌ nomive lo gelosa idoꞌ Oꞌmoso aza nene lihimeꞌinesi vemukisi ve lisiheꞌ ve lo-ngedaaꞌ ive ve lo laza ogo molo oloneꞌ initetoꞌ nene gele medelamo ezemuꞌ haza gele eleꞌvoleꞌ oloneꞌ nene aza ezemuꞌ gele eleꞌvoleꞌ oloningumukovoꞌ nene ve lisiheꞌ ve lo-ledeleseive.
6 Idoꞌ neniꞌ luvoniꞌ neꞌmino Davidiꞌ aza Oꞌmosoꞌmo eveneꞌ igi mili minaniꞌ monovomuꞌ nene gele hulo ve lisiheꞌ ve lo-ngedelive nene ngolize izilizadoꞌ lisiheꞌ i nizave lo tiꞌ lo lineꞌ ve:
7 Ve ma louꞌ gamaziꞌve avutoꞌ angumuꞌ nene
Oꞌmosoꞌmo gele hulo lihimeꞌine hulo-ngedelive nene
ngolize izilizadoꞌ lisiheꞌ i nizave.
8 Ee, ve ma lihimeꞌine Oꞌmosoꞌmo do-ngede minamilive nene
ngolize izilizadoꞌ lisiheꞌ i nizave.
9 Lingine gilavo aꞌmine neꞌmino lolize izelonidoꞌ lisiheꞌ ogaꞌ monovo mene Oꞌmosoꞌmi noso okodela mulunive Zuda velavoꞌ sotoꞌ ogaꞌ neineꞌ nehe idoꞌ Oꞌmosoꞌmi noso okoꞌnida milisaꞌmave Zuda ve minamavelasi sotoꞌ ogaꞌ neineꞌ neve. Nemuꞌ nene lo gele ha gele olonge. Gililo. Laza tiꞌ lo laaꞌ none: Abalahamuꞌ Oꞌmosomuꞌ gele eleꞌvoleꞌ ineꞌ neꞌmo Oꞌmoso ezemuꞌ ve lisiheꞌ ve lo-dineꞌ ve. Nemuꞌ nene aꞌmine luvoniꞌ monovo nene Oꞌmosoꞌmi noso okoꞌnida milisaꞌmavelasi sotoꞌ ogaꞌ neive lo ningo gele none. Nanitekumuꞌ ve.
10 Oꞌmosoꞌmo lihimeꞌvemuꞌ gele hulo Abalahamuꞌni ve lisiheꞌ ve lo-dineꞌ monovomuꞌ nene gohi gelosa gelelone. Abalahamuꞌ okoꞌnola Oꞌmosoꞌmi noso molosa neivo Oꞌmosoꞌmo ve lisiheꞌ ve lo-dineꞌ nehe olihe Oꞌmosoꞌmi noso okoꞌnola molamivosa lo-dineꞌ neve. Oꞌmosoꞌmo ve lisiheꞌ ve lo-dineꞌ nene okoꞌnola Oꞌmosoꞌmi noso neivosa nevoba asi olihe nomivosa ve lisiheꞌ ve lo-dineꞌ ve.
11 Neꞌmine ogo Abalahamuꞌ okoꞌnola Oꞌmosoꞌmi noso nomineꞌ mino Oꞌmosomuꞌ gele eleꞌvoleꞌ ogo minineꞌ nemuꞌ nene Oꞌmosoꞌmo ve lisiheꞌ ve lo-dineꞌ nene do sotoꞌ olosa aꞌmine noso nene eiꞌ okoꞌnoloꞌ nene molaniꞌ ve. Neꞌmine ineꞌ nenako Abalahamuꞌ aza Oꞌmosoꞌmi noso okoꞌnida nomineꞌ minisa Oꞌmosomuꞌ gili eleꞌvoleꞌ ilizadotiꞌ nene Oꞌmosoꞌmo ve lisiheꞌ ve lo-ngedeliveti meꞌnibo loloꞌ ineꞌ ve.
12 Neꞌmino engiꞌ meꞌnibo loloꞌ ogo minineꞌ nene laza Oꞌmosoꞌmi noso okodela mulunive linge maliti meteho nesi neive. Adoꞌ laza nene avoteho Abalahamuꞌ Oꞌmosoꞌmi noso okoꞌnola nomivo mino gele eleꞌvoleꞌ ogo minineꞌ monovoꞌveloꞌ eꞌmeto mino Oꞌmosoꞌmi nosovoꞌ nene okodela mulunivoba asi gele eleꞌvolekisi o noniveti meteho nesi nene neive.
Oꞌmosoꞌmo Lemelove Lo Lo Huko Salani Molo-lidineꞌ Initeꞌ Daloneꞌ Nene Loutoꞌ Eꞌmetelonidotiꞌ Dalonivoba Asi Oꞌmosomuꞌ Gele Eleꞌvoleꞌ Olonidotikovoꞌ Nene Dalosune Lo Pauloꞌ Lineꞌ Gamazi
13 Idoꞌ naza neꞌmine noluvoniꞌ nene memuꞌ luve: Oꞌmosoꞌmo Abalahamuꞌni misubo mukiꞌ nene eiꞌ aꞌvopilemokisi salani molo-lengedekuve lo lo huko-dineꞌ nene louꞌ gamazi gomukutiꞌ ma minidoꞌ eꞌmeto miningumuꞌ nevoba asi Oꞌmosomuꞌ gele eleꞌvoleꞌ ogo miningumuꞌ nene Oꞌmosoꞌmo ve lisiheꞌ ve lo-dineꞌ nenako nemuꞌ nene aꞌmine salani gamazi lo huko-dineꞌ ve.
14 Ee, louꞌ gamaziloꞌ eꞌmetelonidotiꞌ nene aꞌmine salani initeꞌ nene ma dunidiniko Oꞌmosomuꞌ gele eleꞌvoleꞌ ogaꞌ monovo nesi idoꞌ aꞌmine Oꞌmosoꞌmo Abalahamuꞌni lo huko-dineꞌ gamazi nesi nene vi haza niteꞌ loloꞌ asidine.
15 Naniteliꞌmo ve. Louꞌ gamaziloꞌ eꞌmetaaꞌ neꞌmo nene Oꞌmosoꞌmo izeboloꞌ molavo lihime lemeli akaloꞌ leleꞌmize molaaꞌ neive. Ne neiha louꞌ gamazi ma minamilidokovoꞌ nene louꞌ gamazi avutoꞌ oloneꞌ aka ma minamoloseive.
16 Nemuꞌ nene aꞌmine salani initeꞌ daloneꞌ nene mo Oꞌmosomuꞌ gele eleꞌvoleꞌ olonidotikovoꞌ nene haza gidini dosoꞌ o neive. Ee, aꞌmine lo huko-lidineꞌ initeꞌ nene Oꞌmosoꞌmo haza nasahiliꞌ o-lididiꞌmovoꞌ nene Abalahamuꞌ aꞌvopilemoꞌ zuho mukiꞌ adoꞌ Moseꞌ louꞌ gamaziꞌmi gesi minguꞌ nonivesi idoꞌ aꞌminguꞌ minami Abalahamuꞌ aza Oꞌmosomuꞌ gele eleꞌvoleꞌ idiꞌmine igi gili eleꞌvoleꞌ ilizavesi nene laza mukitoꞌ dalonidoꞌ lisiheꞌ o minelive losa lehize-lidineꞌ nenako gele eleꞌvoleꞌ olonidotikovoꞌ nene haza gidini dosoꞌ o neive. Abalahamuꞌ nene aꞌmine neꞌmino dalonive mukiliti meteho nene neive.
17 Neꞌmino meteho minineꞌ nene aꞌminemuꞌ Oꞌmosoꞌmo lineꞌ gamazi monoꞌ godolouꞌ tiꞌ li gizi nizaniꞌ ma neive:
Naza nene eveneꞌ zuho ato atoꞌ mukiliti avoꞌnibo mineline lo
geleꞌmize molokuve.
Ee, Oꞌmosoꞌmi veleloꞌ nene aꞌmine lo huko lineꞌ gamazi nene mo eleꞌvoleꞌ o neive. Idoꞌ Oꞌmoso aza nene hilavemuꞌ gohi veꞌine gizilizave lo hilangutiꞌ nene gohi do ote-ngedaaꞌ ive mino idoꞌ olihe sotoꞌ amaniꞌ initeꞌ nene mo sotoꞌ aniꞌ gilivosa aꞌminemuꞌ nene ha lo sotoꞌ ogaꞌ ive nesi neive.
18 Idoꞌ Abalahamuꞌ nene Oꞌmosoꞌmo lo huko-dineꞌ initeꞌ sotoꞌ o-delineꞌ aka nene nomineꞌza aza nene aꞌmine initeꞌ sotoꞌ ilineꞌ aka nene mo ninge minineꞌ gelavo mino aza nene Oꞌmosoꞌmo gaꞌvopilemoꞌ nene neꞌmini mukiꞌ sotoꞌ ilisave lo lo-nimidoꞌ nene gihile izavo eveneꞌ zuho ato atoꞌ mukiliti avoꞌnibo ha loloꞌ olosuve lo gele eleꞌvoleꞌ ogo minineꞌ ve.
19 Idoꞌ neꞌmino gele eleꞌvoleꞌ ogo minineꞌ nene aza kilisimasiꞌve vanu hadeti (100) neꞌminesi mino okoꞌnoꞌve nene gilisupo molangumuꞌ nesi nene ha gele mino idoꞌ Salaꞌ aza nesi nene eleni molavo izipe gedelineꞌ gamene nene osuꞌ lavo minineꞌ neemukisi nene mo ha gele minineꞌza gele eleꞌvoleꞌ ogo minineꞌ nene matamineꞌ.
20 Aꞌmine neꞌmino Oꞌmosoꞌmo lo-dineꞌ nemuꞌ nene gele hepeꞌ lizo gala setaꞌ gelamineꞌza gele eleꞌvoleꞌ ineꞌ neꞌmo amuzo molo minavosa Oꞌmoso nene opoꞌni laaꞌ ineꞌ ve.
21 Idoꞌ aꞌmine gamazi lo huko-nidive Oꞌmoso neꞌmo aꞌmine gamazi nene do gihile izelidoꞌ mo lisiheꞌ o neineꞌ nenako ha do gihile izeleseive lo gele muꞌmusiꞌ gehepeve ogo minineꞌ ve.
22 Neꞌmine ogo minineꞌ nenako aꞌneemuꞌ nene Oꞌmosoꞌmo ve lisiheꞌ ve lo-dineꞌ ve.
23 Idoꞌ Oꞌmosoꞌmo neꞌmino ve lisiheꞌ ve lo-dineꞌ monoꞌ godolouꞌ gizi nizaniꞌ nene eikumukovoꞌ neive li gililizave lisa gizi nizaniꞌ nevoba
24 asi Guvetesi ve Izesuꞌ Kilisitoꞌ hilingutiꞌ do ote-dive Oꞌmosomuꞌ gele eleꞌvoleꞌ ogo minunivo Oꞌmosoꞌmo ve lisiheꞌ ve lo-ledelive lelikumukisi nene gizi nizaniꞌ ma neive.
25 Aꞌmine Guvetesi ve Izesuꞌni nene leliꞌ lihimetemuꞌ medelo helelive lo Oꞌmosoꞌmo eveneliti aꞌninguꞌ molavo helavosa leliꞌ nene ve lisiheꞌ ve lo-ledelineꞌ aka velo hilingutiꞌ nene gohi do ote-dineꞌ ve.