3
1 Nexi texavutala lexe sou taneꞌe noxinge ne maxuveeni mukalu, la sou nexi texavutala lexe nexi noxou Sailasi a taxolu ne Atenai,
2 ia nexi tepalusou Timoti sou mulai noxinge. Timoti ne, anu vivixe no anu ualasou Iesu mo itema sou xaixai noxou Lataua sou uaꞌaloxu aꞌalo laixe noxou Kalisito. Nexi noxou tepalusou mulai noxinge sou ngatulu pekiaꞌinge mo tapeletotosinge no anu muxamuxaxu tangengi noxou Iesu,
3 mo sou seꞌi noxinge ne ixolu ukalipala no anu tuꞌutuꞌumaxu ane ngingi ngenoꞌu uasi. Tuꞌutuꞌumaxu ane ne, ngingi ngelavu manina lexe Lataua musosovosinge lexe nenge tatavulenu.
4 Xo no voxo ane nenge nengeꞌa texoxolu ꞌo, la tevivikalangengi lexe nenge tanoꞌu tuꞌutuꞌumaxu iouiou. La ngingi ngelavu lexe mii ane ne, anu muxali manina loxo nexi tevikalangengixu tei.
5 Tavaꞌu aloxo ne, la sou eni axomaiou voteꞌi sou lexe aneꞌe noxinge ne maxuveeni mukalu, la sou eni epalusou sou alavu lexe ngingi ngamuxamuxaxu tangengi noxou Iesu a loxovaa? Xo eni exavutala lexe itema sou tovotovo utovongengi muxamuxaxu tangengi noxou Iesu, la xaixai noxixe ne, anu uxali mii vitanisi.
Timoti Muaꞌalo Aꞌalo Laixe Siꞌa ta Tesalonika Mulai Noxou Paulo La Anu Muꞌosa
6 Ia Timoti muꞌumesinge, la vaimomo ꞌosi anu mulivu muneꞌe noxixe. Muxali noxixe, la muaꞌalomexixu aꞌalo laixe singe lexe ngingi ngemuxamuxaxu tangengi manina noxou Iesu mo ngemasaxainge ngatongatoꞌo. Mo muvikalanexi lexe utotomu ne ngingi ngaxavutalanexi laixe mo ngingi ngemasaxa manina sou lexe ngamaisixe loxo nexi temasaxa manina sou tamaisinge.
7 Ta vivixe, nexi telavusinge aloxo ne, xo ngingi ngemulaxu tangengi noxou Lataua la sou ngingi ngepeletotosixe sou tatulu pekiaꞌixe no anu tuꞌutuꞌumaxu ilou navunavu.
8 Nexi telavu lexe ngingi ngetulu pekiaꞌinge noxou Tila, la sou vaimomo ꞌo nexi texamuli lexe vasimexe papaxe mo teꞌosa.
9 Nexi texavutalangengi, la nexi taꞌosa misevile no iou Lataua. La talemo vaikala laixe musuku anevaa ulai noxou Lataua sou lakolisou ꞌosa ane ngingi ngelosixe ne?
10 No voxo utotomu no aso xe no ꞌolovoxo ne, nexi talavusou telinga pekiaꞌu ulai noxou Lataua lexe nexi taneꞌe tamaisinge la, sou lexe muxamuxaxu tangengi noxou Iesu ne mamalaxu, la nexi tasuꞌulingengi sou ngatulu pekiaꞌinge.
11 Nexi talinga lexe Lataua Maminge molu ilou Tila Iesu noxinge iꞌoxonu voteꞌisixe sou nexi talai noxinge.
12 Mo nexi talinga lexe Tila usuꞌulingengi sou ngamasaxainge ngatongatoꞌo manina mo ngamasaxaiꞌa ta mitema vaꞌavaꞌaxaꞌa ukalusi loxo nexi temasaxainge manina.
13 Xe nexi talinga lexe Lataua uꞌoxonu opongengi pekiaꞌu, mo sou ta mitema imaisou ꞌiliꞌilixomengi, la itoꞌomenge no anu vaivaikala uasi mo ngaxolu malemalenga no iou Lataua Maminge no mine Tila noxinge Iesu Kalisito ulivu uneꞌe iloꞌa Lataua ta naꞌu ane malemalenga ukalusi.