5
1 Ioxe, voteꞌisou itema uxali kisiꞌa ta ailiꞌi ne aloxo ꞌo. Lataua ulosou xaixai sou usosovosou itema vile no taineꞌi ta menexu la utulusou xe ulosou xaixai sou usosovosiꞌa ta mitema no anu mii maꞌia iꞌoxonu ulai noxou Lataua. Xe ta mitema inoꞌu mimii moseꞌi sou ineꞌe ilosou ailiꞌi la uꞌelaxu mo uvau ukalu la uꞌelaxu sou uxexeenu susu noxiꞌa.
2 Xe ta mitema ane lavulavuiꞌa uasi mo ane milai vaꞌaxu ineꞌe noxou sou uxaxaisiꞌa la umalalixaꞌasi xo anu kalumo ne pekiaꞌu sou uxaxaisiꞌa uasi.
3 La sou no mine aneꞌi inoꞌa ta mimii ineꞌe sou lexe anu uꞌelaxu sou uxexeenu susu noxiꞌa la anu uꞌoxonu sou uxexeenu susu noxou kalumo.
4 Itema uxali kisiꞌa ta ailiꞌi ne anu unoꞌu uala tatila manina, la sou itema vile umomomo sou ukelelixu uꞌuna no anu xaixai ꞌo no anu masaxa noxousi uasi. Xo Lataua anusisi uꞌavalou itema ne la sou ulosou xaixai sou uxaxaisou loxo anu muꞌoxonu noxou Aloni taatei.
5 Mo Iesu kalumo ne Anu aloxo ne, Anu molu muneꞌesi ka molu mulosou uala tila sou muꞌoxonu muxali kisiꞌa ta ailiꞌi uasi. Ia Lataua molu musosovosou sou uꞌoxonu xaixai ane. Xo loxo Anu mulemolu, la muvikalanu lexe,
“Nini ne, eni ꞌalixeni, mo vaimomo ꞌo eni exali Mamine.”
6 Mo no anu kaukavu vile muai no anu vaikala noxou Lataua la Lataua muvikala la aloxo ꞌo,
“Nini naxolu loxo ailiꞌi vaimomo ꞌo mo kaluxu uasi,
mo nenoꞌu tanixu Melikisateki.”
7 No anu voxo e Iesu muxolu mo mumauli loxo itema no lia ꞌo, la Anu mukilaka mutotomu mulai noxou Lataua, xe muvikalanu sou usuꞌulinu. Anu mukilaka toxotoxoxaꞌa xe mutama iou lexaxu munixi mulai noxou Lataua, xo mulavusou lexe Lataua anusisi umomomo sou usuꞌulinu no anu soli. Lataua mulomuxu la mukolinu lakilaka noxou xo Anu mutaloxolixu.
8 Manina anu Lataua ꞌOlu, ia Anu mutavulenu tuꞌutuꞌumaxu. Aloxo ne, la sou no anu tuꞌutuꞌumaxu ne mulosou lavulavu lexe no anu ꞌilixo sou umulinu masaxa noxou Latauasi, xe ulolomuxusi, la utavulenu tuꞌutuꞌumaxu.
9 Xo Anu mumulinu masaxa noxou Momu laixe, la sou Anu muxali kisiꞌa ta ailiꞌi laixe manina mo tavaꞌu pamauli noxiꞌa ta mitema mukalusi ane imulinu masaxa noxou, xe ulosiꞌa mauli ane kaluxu uasi.
10 Xo Anu muꞌoxonu aloxo ne la sou Lataua musosovosou sou muxali kisiꞌa ta ailiꞌi tatila manina la munoꞌu tanixu Melikisateki.
Mamu sou Taxolu Tatovava loxo ta Molomolo ta Kitukituꞌa
11 No anu ngiou ane Iesu muxali kisiꞌa ta ailiꞌi loxo Melikisateki ne, nexi tamomomo sou taaꞌalomengixu tavuꞌalo. Ia nexi tamomomo sou talamanalixu ukalusi uasi, xo ngalomusou laixe ia xavutalamengi ne utovava sio.
12 Ngingi ngexolu no nano no anu lalotu mo ngexali ta mitema noxou Kalisito maxuveni. Mo vaimomo ꞌo ne ngingi ngamomomo sou ngaxali ta tisa sou ngalosiꞌa moseꞌi lavulavu. Ia uasi ngingi ngatovavasi la sou ngamasaxa lexe ngaxolusi ia ta mitema seꞌi ineꞌe sou iaꞌalomengi no anu lavulavu se ngenoꞌu tei noxou Lataua no anu vaikala la. Xo ngingi ngamomomo sou menge nganoꞌu laꞌilali pekiaꞌu mo ngaꞌou uasi. Ngingi uao ngaiexu susu loxo ta keakea sio.
13 Nenge telavusou lexe ta mitema e iiexu susu sio ne aneꞌi uao ta keakea sio, mo ilavusou ꞌilixo mii maꞌia laixe xe masua uasi.
14 Ia laꞌilali pekiaꞌu ne ta mitema ta tatila naꞌa. Aneꞌi ta mitema ane loxo ne aneꞌi milavusou voteꞌi sou itilovosou mii maꞌia ane masua xe mii maꞌia ane laixe. Xo aneꞌi mitotovonu sou miꞌoxoꞌoxonu mutotomu no anu maulixaꞌa.