5
1 Hkyangjong mó yuq hkangmó gi, byu pê chyáng mai hkyin htoq yû huî é nghut mù, mara pê é matú, chyunghuq pé eq hkungga pé nhông byi hkyô nghut é, Garai Gasang eq sêng é muzó pé má, yhangmoq é gunglik dông, hkyin masat to huî é bang nghut akô.
2 Yhânggùng yhang gi, wum nyhóm hkyo é a-ô má nghut nyi é yanmai, yhang gi, bun a bóng é eq hkyô nghoq ló é bang lé nú-nhâm é dông wó shuî-û é nghut lhê.
3 Wum nyhôm é yanmai, yhang gi, byu pê é marâ é matú le, yhânggùng yhâng é marâ é matú le, hkungga nhông byi râ dut é nghut lhê.
4 Ó yuq le, yhumsing gùng yhumsîng aróng haû lé wó yu é a nghut; Arun lé su, Garai Gasâng èq wut yu é hui jáng sheq wó é nghut lhê.
5 Haû eq rajung za, Hkrisduq le, hkyangjong mó dut lo é hpungwup shingkang lé, Yhânggùng yhang kut yu é a nghut. Garai Gasang sheq, Yhang lé,
"Nàng gi, Ngá Zo nghut ri; Ngò, hkû-nyí Náng Wa dut bê nghut lhê."
ga taî é nghut lhê.
6 Hau htoq agó,
"Nàng gi, Melahkizedek wó é hkyangjong ayá hkyô dông mai ahtum abyuq hkyangjong rayuq nghut nyi ri."
ga, gó wô má le, Yhang taî to ashî nghut ri.
7 Yesuq gi, myidàm htoq má asak dui nyi é buinyì pé má, Yhang lé, shi é mai wó hkyi yù Su chyáng, ngaubyi ngau-nhap eq wut garû é èq, kyûdung é eq dung tôngbán bê nghut mù, Yhâng é hkungga gíng é ap nóng hkyo é yanmai, gyo byî é hui bê nghut ri.
8 Yhang gi, Zo rayuq nghut to kôle, Yhang hui zô é wuîhke jamjau hkyô mai jìno gyo hkyô wó mhoq yû bê nghut ri.
9 Yhang gi, lhoq gumjup huî é hkûn, Yhang é jìno gyo bang banshoq é matú, ahtum abyuq é hkyi yù hkyo é awang dut byuq bê nghut é eq,
10 Melahkizedek wó é hkyangjong ayá hkyô dông mai hkyangjong mó dut râ matú, Garai Gasâng èq hkyin masat é hui bê sû nghut ri.
Woi-nyí Má Wáng Ra Bê Hkyô
11 Ngamoq gi, shí hkyô eq séng luî taí râ gyai joq lhê; nghut kôlhang, nungmoq gi, ra luì za a sê gyô é bang nghut kô é yanmai, taî sân kyo wuî ri.
12 Gè gè ga jáng, ahkui lhê ahkyíng má, nungmoq gi, sará dut gíng bê bang nghut lhê; nghut kôlhang, Garai Gasâng é mungdang mâ é tengmán hkyo é awang lé, rayuq yuq èq nungmoq lé dum taû mhoq byi râ ru dut nyi akô nghut ri. Nungmoq gi, htan é zoshuq râ é bang a nghut, naú wing râ é bang ru nghut nyi ashî kó myhi-nhung!
13 Naú wing shuq râ é sû ó yuq le, zonú nghut nyi ashî mù, dingmán é hkyô lé mhoqshit é má a mán shi nghut ri.
14 Nghut kôlhang, htan é zoshuq gi, ge é hkyô eq agè ashop é hkyô lé wó sê gam hkoq yû shoq, hkâ-nhám le yhumsing gùng yhumsîng lhoq mhân yu nyi é, kô dìng bê bâng é matú ru nghut lhê.