2
Nigbawian ni Hisus ka Lukos no Kono Ogpokoorol
(Matiu 9:2-8; Lukas 5:18-26)
1 Pogligad to pila no allow, nig-uli si Hisus dio to Kapirnaum no nigdinog ka mgo otow to duon sikandin to baloy rin.
2-3 No, niglimudlimud ka mohon-ing no mgo otow dio to baloy rin no waro ogkaliotan dan duon to gumawan no ogwali si Hisus kandan. Ko ogwali pad, nokouma ka hop-at no mgo lukos no ogloungan dan duon to hibatanan din ka sagboka no lukos no nigkolog so lawa rin. Si Hisus ka tuud dan.
4 Tongod to kono ogpakarani ki Hisus su ka mohon-ing no nalibulung no mgo otow, dini ogpamanoik sikandan to kalatkat no oghondio to atop. Nò, niglungagan dan ka atop duon to ampow to longod ni Hisus. Ko litos on ogpakabayo, pigtuntun dan ka hibatanan no duon ka sika otow no nigkolog so lawa rin dio to soog.
5 Pogsabut ni Hisus to dakol ka pogtuu ran kandin, nigkagian din ka sika lukos no nigkolog so lawa rin, “Usi, napasayluan on ka mgo salo nu.”
6 Nò, duon pila no naminpinnuu dio no mgo talag-anad to Balaod dan no nigtawad so goinawa ran.
7 Kagi to goinawa ran, “Manio naan ka soin no lukos no ogboboot? Ogsumpaliton din ka Magboboot! Waro agad sagboka no otow no ogpakapasaylu to salo ko kono ka Magboboot do.”
8 Di magaan mataga si Hisus dio to kandin no goinawa to nokoy ka duon to goinawa to mgo talag-anad no pig-inso din sikandan to, “Manio naan to ogsumansuman kow to unawa to soini?
9 Hondoi ka malomu no kagi ku to soin no nigkolog so lawa rin, ko ignangon ku to, ‘Napasaylu on ka mgo salo nu,’ woy ko ogsugu a to, ‘Onow kad on; honata nu ka hibatanan nu no hipanow kad on?’
10-11 Nò, sikoddi ka Kakoy to Koot-otawan kai to kalibutan no igpakita ku kaniu to duon katondanan ku to ogpasaylu to salo to mgo otow. Nò, nigkagian din ka sika nigkolog to lawa, ‘Usi, ka kagi ku koykow, onow kad, paragas ka ogsasindog honata nu ka ikam nu woy og-uli kad on.’ ”
12 Nigpipitow to tibo no mgo otow ka lukos no nig-onow no nigparagas nigsasindog woy to nig-agpas puruta ka hibatanan din no nig-uli on. Noinuinu ka tibo no mgo otow no nigsayo dan ka Magboboot no kagi ran, “Waro koy pad nigkita to unawa to soini no nohimu kuntoon.”
Nig-alam ni Hisus si Libi
(Matiu 9:9-13; Lukas 5:27-32)
13 No, niglibong on si Hisus dio to ilis to Lanow to Galilia. Ko dio, nalibulung ka mgo otow dio no nig-anad din sikandan.
14 Pogkaponga rin, nigparagas nighipanow. No ko dio pad sikandan to dalan nigkita rin ka sagboka no talagkubla to buhis no si Libi ian no anak ni Alpiu duon ogpinpinnuu duon to opisina rin dut bayaranan to mgo otow to buhis dan. Kagi ni Hisus kandin to, “Duma ka koddi; ogsakupon ku sikoykow.” Nò, nigsasindog si Libi no nigduma on kandin.
15 Waro malugoy no nighondio si Hisus mgo hibatoon din to baloy ni Libi to ogkoon. Nig-amut kandan ka mohon-ing no mgo talagsukut to buhis tagkos to mgo otow no tahan no pigsawoy sikandan no songo nigkoon dio.
16 Agad nigbayo dio ka mgo talag-anad to Balaod no mgo Parisiu sikandan no nigkita ran si Hisus to songo ogkokoon to soi mgo sinawoy, mgo talagkubla to buhis. Nig-inso dan ka mgo hibatoon ni Hisus to, “Manio naan to og-amut no ogkoon si Hisus to mgo sinawoy mgo talagkubla to buhis?”
17 Pogdinog ni Hisus to inso dan, nigtabak din to pananglitan. Kagi rin, “Ka mgo otow no waro dalu ran, kono dan og-awoson ka talagtambal; ka mgo otow no duon dalu ran sikandan ian ka og-awos to talagtambal. Wara a nighondini to kalibutan to ogbulig to mgo otow no matuwarong so batasan dan ko kono ian ku ogbuligan ka mgo makasasalo oyow ogbalbalawan dan ka batasan dan.”
Ka Tahan woy ka Iam no Impang-anad
(Matiu 9:14-17; Lukas 5:33-39)
18 Duon allow, ka tibo no mgo hibatoon ni Huan no Talagbautismu woy ka mgo hibatoon to mgo Parisiu, oglangkad to ogkoon. No, nighondio ki Hisus ka duma no mgo otow no nig-inso dan sikandin, “Manio kun to duon mgo allow no oglangkad to ogkoon ka mgo hibatoon ni Huan woy ka hibatoon to mgo Parisiu di ogkoon do atag ka koykow no hibatoon?”
19 Nigtabak si Hisus to pananglitan. Inso din, “Litos to goinawa now ko kono pad ogkoon ka mgo otow no pigtugunan to kasal? Ka ku kow! Ko duon dod ka lukos no ogpangasawa, kono ogkaayun no oglangkad ki ogkoon.
20 Di duon allow no ogdakopon on ka lukos no ogpangasawa no warad sikandin dio to kandan no sikan ka allow no oglangkad to ogkoon sikandan.”
21 Duon dangob no pananglitan ni Hisus. Kagi, “Hontow buwa ka otow no igtupak din ka iam no manggad no wa pad malaboi to tahan no kinabo din? Ko oghimuon din soini, ogkonsong ka iam no tupak no ogmaluag ka nagisi to tahan no kinabo.”
22 Duon dod dangob no pananglitan din. Kagi, “Ko iam ka inumanon, kono ta igtagu dio to tahan no taguanan no nohimu to laplap to ayam su ko ogtulin ka inumanon ogbotu ka sikan no tahan no taguanan no ogkaraat no warad pulus to sikan no taguanan woy naraat ka inumanon. Ian do litos ko igtagu ta ka iam no inumanon dio to songo iam no taguanan su ogkalanat pad ka sikan no nohimu to iam no laplap to ayam.”
Ka Inso Bahin to Allow to Oghimoloy
(Matiu 12:1-14; Lukas 6:1-11)
23 Songo allow, ka Allow to mgo Hudiu to Oghimoloy, nakabayo si Hisus mgo hibatoon din dio to sagboka no kamot no nigpamuaan to tirigu. Ko oghihipanow kandan dio to dalan, namupu ka mgo hibatoon din to pila buwa no tagdoy to tirigu.
24 Songo nighipanow dio ka duma no mgo Parisiu. Ko nigkita ran, pigkagian dan si Hisus no kagi ran, “Pitawa nu! Ogpakalapas ka mgo hibatoon nu to Balaod ta to oghimu to soin to Allow ta to Oghimoloy.”
25 Nigtabak si Hisus no nig-inso din kandan, “Waro kow makabasa to nighimu ni Dabid no Igbuyag ta dongan duma to mgo sakup din no oggutasan sikandan no waro koonon dan?
26 Ko si Abiatal pad ka Labow to mgo talagpanubad, nigsolod to baloy to Magboboot woy si Dabid no nigkoon to paan no intubad to talagpanubad to Magboboot. Kagi to Balaod ta, ka mgo talagpanubad ro porom ka ogkoon to soin no paan di nigkoon ni Dabid woy nigtaaran din ka mgo duma din.”
27 Kagi pa ni Hisus kandan, “Nighimu to Magboboot ka Allow to Oghimoloy oyow ogkapulusan ka mgo otow. Wa din himua ka otow to duon Allow to Oghimoloy.
28 Nò, ian man ian ka Kakoy to Koot-otawan kai to kalibutan ka ogboboot ko nokoy ka oghimu to Allow to Oghimoloy.”