13
Makkaká-iddù ittam!
Nu makáwayyángà nga magubobuk
sù ira ngámin nga makkakerumá nga ággubobuk na tolay
ánna yù ággubobuk nayù ira daroban ni Namarò gapay,
á nu awán ta ángngiddù ku sù ira kábuluk ku,
á kunnayà laguk ta kekkeng nga matannuk onu gássá nga jikkù yù ággallu na.
Á mássiki nu makáwayyángà nga mangibukalán sù bilin ni Namarò nga ipalappâ na nikán,
ánna mássiki nu kánnámmuák ku yù ngámin nga monak nga nelímak nga talákkurugan na,
á mássiki nu masikan yù ángngikatalà ku, tapè máwayyâ nga pagalitan yù ira puddul,
á awán galâ ta serbi nayù akkuák ku nu awán ta ángngiddù ku sù ira kábuluk ku.
Á mássiki nu isinek ku ngámin yù kukuâ sù ira pobare ánna ipatuggì yù baggì, megapu sù pangikatalà ku kâ Apu,
awán ta pakkapiánák ku nu arák ku iddukan yù ira kábuluk ku,
Nu mangiddù ittam sù ira kábulut tam,
attamát tam gapay yù akkuád da,
ánna ikállà tam ira.
Á ari ittam bulubugá mangabubu nira,
Á ari ittam mappeddaráyaw,
ánna ari motun yù nonò tam.
Á nu mangiddù ittam sù ira kábulut tam,
arát tam ira uyoyungán.
Á ari ittam mangukkuk,
ánna arát tam ipapílì yù ure tam lápay.
Á ari ittam malogon nga mapporay.
Á arát tam ipatattam ta nonò tam yù liwiliwâ nayù ira kábulut tam,
ánna arát tam ibálà yù liwâ da nittam.
Á nu mangiddù ittam sù ira kábulut tam,
arát tam ipagayáyâ yù akkuán nayù ira nga mangnguá ta narákè,
nu ari galâ ta magayáyâ ittam
megapu sù napiá nga akkuád da.
Á nu mangiddù ittam sù ira kábulut tam,
ari ittam malurâ nga mangabbák nira.
Maguray lâ yù mesimmu,
arát tam ira táttájjián.
Á ipasigaggà tam lâ yù pangikatalà tam kâ Apu
ánna yù pagiddanáma tam kâ Apu nga mangabbák nittam.
Á mássiki nu marigirigâ ittam,
onu narákè yù akkuán na tatolay nittam,
attamát tam lâ yù ngámin nga mesimmu nittam.
Á awán ta áddè nayù pakkaká-iddù tam
ánna yù pangiddù tam kâ Namarò.
Ngam mappasá sangaw yù pangilayalayâ nayù ira ábbilinán ni Namarò,
ánna yù pagubobuk nayù ira tatolay ta tanakuán nga ággubobuk nga ari paga nánnámmuán.
Á mappasá gapay sangaw yù ngámin nga ammu tam.
Ta baddì yù ammu tam kunangan, á arát tam kánnámmuán yù ngámin.
Á nakúráng paga yù inipalappâ ni Namarò nittam.
10 Ngam sangaw nu mapalurokin yù ngámin nga ure ni Namarò
ánna mesipà ittamin kâ Apu Kesu Kiristu,
á mappasá laguk yù ammu tam nga baddì,
ta mepalappâ nittam yù ngámin nga nabalinin.
11 Á ta ángngarigán, sù ngaw kabajjì ku,
á kunnay ta abbing lâ yù ággubobuk ku, ánna yù ánnonò ku, ánna yù pangibiláng ku ta nonò ku gapay.
Á pattaggâ ku, nilikurák kin yù ággangnguá na abbing.
12 Á kunangane ta keggá tam ta dabbuno,
arát tam kánnámmuán ta napiá yù ituddu ni Namarò nittam nga meyannung kuna,
gapu ta kunnay ta alinu nga masingan ta ispeku nga ari malitáw.
Ngam sangaw nu meyarubáng ittam kâ Namarò ta lángì,
á kánnámmuát tam laguk ta napiá, nga kunnay sù pakánnámmu na nittam.
13 Á danniawe nga tallu yù pakkapiánát tam, nga maggián ta áddè ta áddè:
yù pangikatalà tam kâ Namarò,
yù pagiddanáma tam kâ Namarò,
ánna yù pangiddù tam kári Namarò ánna yù ira kábulut tam.
Ngam yù kapiánán nayù ira tallu
yù pangiddù tam kári Namarò ánna yù ira kábulut tam.